ལྷ་མོ་འོད་ཟེར་ཅན་གྱི་སྒྲུབ་ཐབས།
ཀུན་དགའ་སྙིང་པོ།
ཡང་ན་སྒྲུབ་ཐབས་རས་རིས་ཀྱི་ཆོ་ག་ལས་བསྒོམ་པར་འདོད་ན། སྔར་ཤད་པའི་ཆོ་ག་དང༌། དེ་བཞིན་དུ་རང་གི་སྙིང་གར་ཟླ་བའི་དཀྱིལ་འཁོར། དེའི་སྟེང་དུ་ཡི་གེ་མཾ་ཞེས་བྱ་བ། ཡི་གེ་ཨ་དང་ཐིག་ལེ་དང་ལྡན་པའི་སྙིང་པོའི་མཆོག་བསམས་ལ། དེ་ནས་འོད་ཟེར་སྣ་ཚོགས་པ་སྤྲོས་པ་ལས་བྱུང་བ་དེས། བླ་མ་དང་ཡང་དག་པར་རྫོགས་པའི་སངས་རྒྱས་དང་བྱང་ཆུབ་སེམས་དཔར་བསམས་ལ། མཆོད་པ་ལྔ་ལ་སོགས་པ་བྱས་ནས། ཆོས་བདག་མེད་པར་བསྒོམ་པར་བྱ་སྟེ། ཨོཾ་སྭ་བྷ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། ཞེས་བྱ་བའི་སྔགས་ཀྱིས་དེ་ལྟར་
ལྷག་པར་མོས་པར་བྱས་པས། ཁམས་གསུམ་པ་འདི་དག་མིག་ཡོར་ཙམ་དུ་ཤེས་པར་བྱས་ལ། དེའི་ས་བོན་ལས་བྱུང་བའི་ཨ་ཤྭ་ཀའི་ཡལ་ག །དེའི་སྟེང་དུ་ཡི་གེ་མཾ་དེ་ཐམས་ཅད་ཡོངས་སུ་གྱུར་པ་ལས་རྗེ་བཙུན་ལྷ་མོ་དེའི་སྐུར་བདག་ཉིད་བསམ་པ་ནི། ཡུམ་ལྷ་མོ་འོད་ཟེར་ཅན་སྐུ་མདོག་འཛམ་བུ་ཆུ་བོའི་གསེར་ལྟར་ཤིན་ཏུ་སེར་བ། སྐུའི་འོད་ཟེར་ཉི་མ་ལྟར་འབར་བ། སྤྱི་བོར་མཆོད་རྟེན་གྱིས་བརྒྱན་པ། ན་བཟའ་དམར་པོ་དང༌། སྐུ་སྟོད་ཚིག་གུ་ཅན་གྱི་ཞིང་ཆུང་དུ་བསྣམས་པ། གདུ་བུ་སྣ་ཚོགས་དང༌། རྒྱན་ཐམས་ཅད་ཀྱིས་བརྒྱན་པ། སོར་གདུབ་དང༌། རྣ་རྒྱན་དང༌། འོག་པག་དང༌། གཡེར་ཁ་དང༌། ཞབས་གདུབ་ཀྱི་སྒྲ་འཁྲོལ་བ། ཞལ་གསུམ་པ། སྤྱན་གསུམ་པ། ཕྱག་བརྒྱད་པ། འོད་ཟེར་གྱི་ཕྲེང་བ་འབར་བ། མེ་ཏོག་བནྡྷུ་ཀ་དང༌། རྒྱ་སྐྱེགས་ཀྱི་མདོག་འདྲ་བ་འཕྲོ་བ། སྤྱི་བོར་རྣམ་པར་སྣང་མཛད་ཀྱིས་མནན་པ། ཨ་ཤྭ་ཀའི་ཕྲེང་བས་དབུལ་བརྒྱན་པ། ཕྱག་གཡས་ན་རྡོ་རྗེ་འོད་འཕྲོ་བ་དང། ཁབ་དང༌། ལྕགས་ཀྱུ་དང༌། མདའ་གསོར་བ་ལ་དགྱེས་པ། ཕྱག་གཡོན་ཞགས་པ་དང༌། གཞུ་དང་ཨ་ཤྭ་ཀའི་ཡལ་ག་དང༌། སྐུད་པ་བསྣམས་པ། ཞལ་དང་པོ་ཞི་བ། ཞལ་རས་རྒྱས་པ། གསེར་སྦྱངས་བ་ལྟར་ཤིན་ཏུ་སེར་བ། སྤྱན་ཤིན་ཏུ་རྒྱས་པ། ཞལ་གྱི་སྒྲོས་ལི་ཁྲིའི་རྡུལ་གྱིས་བཙོས་པ་འདྲ་བ། སྒེག་པའི་ཉམས་ཀྱིས་གནས་པར་གྱུར་པ། ཞལ་གཡས་པ་པདྨ་རཱ་ག་ལྟར་ཤིན་ཏུ་དམར་བ། འོད་ཟེར་བཟང་པོ་འབར་བ་འཕྲོ་བ། ཞལ་གཡོན་པ་ཕག་གི་གདོང་འཕྲོ་བ་དང་བཅས་ཤིང་མི་སྡུག་པ། མཆེ་བ་རྣམ་པར་གཙིགས་ཤིང་འཇིགས་སུ་རུང་བ། ཨིནྡྲ་ནཱི་ལའི་མདོག་འདྲ་བ། ཉི་མ་བཅུ་གཉིས་དང་འོད་མཉམ་པ། སྨིན་མ་བསྡུས་ཤིང་ཁོར་གཉེར་དང་ལྡན་པ། མཆེ་བ་གཙིགས་པ་འཇིགས་པ་རྣམས་ཀྱང་འཇིགས་པར་མཛད་པའོ། །དབུ་ལ་བཅོམ་ལྡན་འདས་རྣམ་པར་སྣང་མཛད་སྐུ་མདོག་གསེར་སྦྱངས་པ་ལྟར་ཤིན་ཏུ་དག་པ། བྱང་ཆུབ་མཆོག་གི་ཕྱག་རྒྱ་ཅན། རལ་པ་དང་ཐོར་ཚུགས་མངའ་བར་བཞུགས་པ། གཞལ་ཡས་ཁང་མཆོད་རྟེན་གྱི་དབྱིབས་ལ་ཤིང་ཨ་ཤྭ་ཀའི་མེ་ཏོག་གིས་ཁྱབ་པའི་ནང་ན། ཕག་གི་སྟེང་ན་གཡོན་བརྐྱང་བའི་གནས་པས་བཞུགས་པ། གཞོན་ནུ་མདང་ལ་བབ་པའི་ཚུལ་ཅན། ཤིང་རྟའི་འོག་ན་ཧ་ལས་བྱུང་བའི་རླུང་གི་དཀྱིལ་འཁོར་གྱི་སྟེང་ན། གཟའ་ཆེན་པོ་སྒྲ་
གཅན་འཛིན་ཉིན་མོ་ཉི་མ་འཛིན་པ་མཚན་མོ་ཟླ་བ་འཛིན་གནས་པ། ལྷ་མོ་བཞིས་ཡོངས་སུ་བསྐོར་བར་བག་ཉིད་བསྒོམ་པར་བྱའོ། །དེའི་མདུན་དུ། ཨོཾ་མཱ་རཱི་ཙྱཻ་བཏྟཱ་ལི། བ་དཱ་ལི། བ་རཱ་ལི། བཱ་རཱ་ཧཱ་མུ་ཁི། ཨཱ་ཀཪྵ་ཡཛཿསྭཱ་ཧཱ། ཞེས་བྱ་བས་ལྷ་མོ་སྐུ་མདོག་དམར་བ་ཞལ་གཅིག་པ། ཕག་གི་གདོང་པ་ཅན་སྤྱན་གསུམ་པ། ཕྱག་བཞི་པ་གཡས་ན་ཁབ་དང་རྡོ་རྗེ་བསྣམས་པ། གཡོན་ན་གཞུ་དང་ཨ་ཤྭ་ཀའི་ཡལ་ག་བསྣམས་པ། ཞིང་ཆུང་དུ་སྟོད་གཡོགས་དམར་པོ་བསྟན་པ། རྟོག་པ་ལས་གསུངས་པའི་ཆོ་ག་ཡིད་ལ་གང་ཞིག་སྒྲུབ་པར་འདོད་པའི་བུད་མེད་འགུགས་པར་མཛད་པའོ། །དེ་བཞིན་དུ་གཡས་སུ། ཨོཾ་མཱ་རཱི་ཙྱཻ་བཏྟཱ་ལི། བ་དཱ་ལི། བ་རཱ་ལི། བཱ་རཱ་ཧཱ་མུ་ཁི། སརྦ་དུཥྚཱ་ནཾ། པྲ་དུཥྚཱ་ནཾ། མུ་ཁཾ་བནྡྷ་བནྡྷ་ཧཱུཾ་སྭཱ་ཧཱ། ལྷ་མོ་སྔར་བཤད་པའི་ན་བཟའ་དང་རྒྱན་དང་གཟུགས་དང་ལྡན་མོད་ཀྱི། འོན་ཀྱང་འདི་ནི་སྐུ་མདོག་སེར་བ། གཡས་ན་ཨ་ཤྭ་ཀའི་ཡལ་ག་དང་ཁབ་བསྣམས་པ། གཡོན་ན་ཞགས་པ་དང་རྡོ་རྗེ་བསྣམས་པ། གདུག་པ་རྣམས་ཀྱི་ཁ་དང་མིག་འཆེམ་པར་མཛད་པའོ། །དེ་བཞིན་དུ་རྒྱབ་ཏུ། ཨོཾ་མཱ་རཱི་ཙྱཻ་བཏྟཱ་ལི། བ་དཱ་ལི། བ་རཱ་ལི། བཱ་རཱ་དྷཱ་མུ་ཁི། སརྦ་དུཥྚ་ནཾ། སྟཾ་བྷ་ཡ་བཾ་སྭཱ་ཧཱ། ཞེས་བྱ་བས་ལྷ་མོ་འདི་ཡང་ན་བཟའ་དང་རྒྱན་ལ་སོགས་པ་སྔར་དང་འདྲ་མོད་ཀྱི། འོན་ཀྱང་ཕྱག་གཡས་ན་རྡོ་རྗེ་དང་ཁབ་གཡོན་ན་གཞུ་དང་ཨ་ཤྭ་ཀའི་ཡལ་ག་བསྣམས་པ། སྐུ་མདོག་ཨིནྡྲ་ནཱི་ལ་ལྟ་བུ་གདུག་པ་ཅན་ཐམས་ཅད་རེངས་པར་མཛད་པ་བསྒོམ་པར་བྱའོ། །གཡོན་དུ། ཨོཾ་མཱ་རཱི་ཙྱཻ། བཏྟཱ་ལི། བ་དཱ་ལི། བ་རཱ་ལི། བཱ་རཱ་ཧཱ་མུ་ཁི། སརྦ་སཏྭ་ན་མེ་པ་ཤ་མ་ནཱ་ཡ་ཧོཿསྭཱ་ཧཱ། ཞེས་བྱ་བས་ལྷ་མོ་འདི་ཡང་ན་བཟའ་དང་རྒྱན་ལ་སོགས་པ་སྔ་མ་དང་མཐུན་མོད་ཀྱི་འོན་ཀྱང་སྐུ་མདོག་ཉི་མ་འཆར་ཀ་འདྲ་བ། ཕྱག་གཡས་ན་མདའ་དང་རྡོ་རྗེ་བསྣམས་པ། གཡོན་གཞུ་དང་ཨ་ཤྭ་ཀའི་ཡལ་ག་བསྣམས་པ། སེམས་ཅན་ཐམས་ཅད་ལ་རྗེས་སུ་ཆགས་པར་མཛད་པ་བསྒོམ་པར་བྱའོ། །དེ་ནས་རྡོ་རྗེ་ལྕགས་ཀྱུ་མ་ལ་སོགས་པའི་སྔགས་དང་ཕྱག་རྒྱས་དགུག་པ་ལ་སོགས་པ་བྱས་ལ། ཡེ་ཤེས་སེམས་དཔའ་དང་དམ་ཚིག་གི་ལྷ་གཅིག་ཏུ་བྱའོ། །དེ་ནས་བཟླས་བརྗོད་བྱ་བའི་སྔགས་ནི་འདིའོ། །ཨོཾ་མཱ་རཱི་ཙྱཻ་ཨོཾ་མཱཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་ཅི་ནུས་
བཟླས་ལ་སྔར་བཤད་པའི་ཆོ་གས་གནས་པར་བྱའོ། །འོད་ཟེར་ཅན་གྱི་སྒྲུབ་ཐབས་བྱས་པ་ལས། །བདག་གིས་དགེ་བའི་རྩ་བ་གང་བསགས་དེས། །སེམས་ཅན་ཐམས་ཅད་འོད་ཟེར་ཅན་གྱི་ནི། །ཡེ་ཤེས་དྲི་མེད་གནས་ཐོབ་ཤོག །ལྷ་མོ་འོད་ཟེར་ཅན་གྱི་སྒྲུབ་ཐབས་སློབ་དཔོན་ཀུན་དགའ་སྙིང་པོས་མཛད་པ་རྫོགས་སོ། །ལོ་ཙཱ་བ་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།