འཕགས་མ་སྒྲོལ་མ་ལ་བསྟོད་པ་ཚིགས་སུ་བཅད་པ་བཅུ་གཉིས་པ།
ཙནྡྲགོམིན།
རྒྱ་གར་སྐད་དུ། ཨཱཪྻ་ཏཱ་རཱ་སྟོ་ཏྲ་ད་ཤ་དྭཱི་གཱ་ཐཱ། བོད་སྐད་དུ། འཕགས་མ་སྒྲོམ་མ་ལ་བསྟོད་པ་ཚིགས་སུ་བཅད་པ་བཅུ་གཉིས་པ། རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །བཟློག་དཀའི་སྲིད་པའི་མུན་པ་ནི། །འཇོམས་བྱེད་ཉི་མའི་འོད་དང་མཚུངས། །ཐུགས་རྗེས་བརླན་པའི་ཐུགས་མངའ་བའི། །སྒྲོལ་མ་ལ་ནི་རྟག་ཏུ་འདུད། །ཤིན་ཏུ་རྨོངས་པའི་སེམས་ཅན་གྱིས། །གླང་པོ་ཆེ་རྣམས་གསོད་བྱེད་མ། །ལྷ་མོ་སེང་གེ་ཁྲོས་པ་ཡང༌། །ཁྱོད་འདུད་པ་ལས་འཇིགས་ཤིང་བྲོས། །མཆེ་བའི་མདུང་རྩེ་རྩེ་མོ་ཡིས། །བྲག་འཇོམས་ཤིང་དྲུང་རྩ་བ་འདོན། །ཁྱོད་ཀྱི་སྔགས་ཀྱིས་བཟླས་པ་ལས། །འཇིགས་ཤིང་གླང་པོ་འབྲོས་པར་འགྱུར། །ཕྱོགས་དང་ནམ་མཁའ་མ་ལུས་པའི། །དུ་བས་ཁྱབ་ཅིང་བཟོད་པར་དཀའ། །འབར་བ་ཡིས་ནི་ཁྲོ་ཚིག་པ། །ཁྱོད་བསྟོད་ཆར་པ་མེ་ཞིར་
འགྱུར། །མ་རུངས་གདེངས་ཀ་ལས་བྱུང་བའི། །ཕུཊ་སྒྲ་སྒྲོགས་ཤིང་དུག་མིག་ཅན། །སྦྲུལ་ནི་ལྷ་མོ་ཁྱོད་བསྟོད་པས། ནམ་མཁའ་ལྡིང་ནི་བཞིན་དུ་འཇོམས། །རལ་གྲིས་གཅོད་པའི་འགྲོ་བ་རྣམས། །ཁྲག་གིས་ཡན་ལག་བསྐུས་པ་སྟེ། །ཁྱོད་ཀྱི་མིང་ཙམ་དྲན་པ་ཡིས། །ཆོམ་རྐུན་ནུས་པ་མེད་པར་འགྱུར། །རྒྱལ་པོ་ཁྲོས་པའི་བྲན་རྣམས་ཀྱིས། །སྐྲ་ནས་བཟུང་ནས་ཞགས་པ་བཅིངས། །བཙོན་ར་སྤངས་ནས་ལྷ་མོ་ཀྱེ། །ཁྱོད་ལ་བསྟོད་བྱེད་འཇིགས་མེད་འགྱུར། །དབའ་རླབས་ཚོགས་ནི་ནམ་མཁའ་དང༌། །ཕྱོགས་བཅུར་ཡང་ནི་ཁྱབ་བྱེད་པ། །གྲུ་ལོག་ན་ཡང་རྒྱ་མཚོ་ལས། །ཁྱོད་ཀྱིས་འཕངས་ནས་ཕ་རོལ་ཕྱིན་།ཁྲག་དང་གླད་པའི་འདམ་གྱིས་བྱུགས། །དེ་དག་བཟའ་བ་ལ་ཆགས་པ། །ལྷ་མོ་ཁྱོད་ཀྱི་སྔགས་བཟླས་པ། །ཤ་ཟ་དེ་དག་འཇིགས་པར་འགྱུར། །ཡན་ལག་ཆད་ཅིང་དྲི་ངན་པའི། །ཁྲག་དང་ཞག་ནི་སྣ་ལ་འཛག། ཁྱོད་ནི་དྲན་པ་ཙམ་གྱིས་ནི། །མཛེ་ཅན་འདོད་པའི་ལྷ་འདྲར་འགྱུར། །བཀྲེས་སྐོམ་གྱིས་གདུངས་གཅེར་བུ་དང༌། །སློང་བའི་ཡི་དགས་འགྲོ་བ་ལ། །ཁྱོད་ལ་འདུད་པ་ཙམ་གྱིས་ནི། །འཁོར་ལོས་སྒྱུར་བའི་རྒྱལ་པོར་འགྱུར། །འཇིགས་པ་ཆེན་པོ་འཇིགས་མེད་པ། །དེ་ལྟར་དད་པས་ཁྱོད་བསྟོད་པས། །དགེ་བ་གང་བསགས་དེ་ཡིས་ནི། །འཇིག་རྟེན་བདེ་བ་ཅན་ཐོབ་ཤོག །རྗེ་བཙུན་མ་འཕགས་མ་སྒྲོལ་མ་ལ་བསྟོད་པ་སློབ་དཔོན་ཙནྟྲ་གོ་མིས་མཛད་པ། །ཚིགས་སུ་བཅད་བ་བཅུ་གཉིས་པ་རྫོགས་སོ།།