ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས།
སངས་རྒྱས།
རྒྱ་གར་སྐད་དུ། པྲཛྙཱ་པཱ་ར་མི་ཏཱ་སཱ་དྷ་ནཾ། བོད་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་
ཐབས། ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་ལོ། །གང་གིས་བསྒོམས་པ་ཙམ་གྱིས་ནི། །ཤེས་རབ་ཕ་རོལ་ཕྱིན་བསྐྱེད་ཅིང༌། །གཞན་རྩོད་ཀུན་ལས་རྒྱལ་འགྱུར་བ། །དེ་ནི་ཡང་དག་བཤད་པར་བྱ། །ཞལ་གཅིག་ཕྱག་ནི་གཉིས་པ་སྟེ། །མདོག་ནི་དཀར་པོ་ཡིད་དུ་འོང༌། །ཕྱེད་ཕྱེད་འཁྱིལ་པའི་དབུ་སྐྲ་དང༌། །པདྨ་དཀར་པོར་ཡང་དག་གནས། །གཡས་ཀྱི་ཕྱག་ན་པདྨ་སྟེ། །གཡོན་ན་ཤེས་རབ་ཕ་རོལ་ཕྱིན། །མདོག་དམར་རྣམ་པར་བསྒོམ་པར་བྱ། །རྡོ་རྗེ་སྐྱིལ་ཀྲུང་ཡང་དག་གནས། །རྒྱན་རྣམས་ཀུན་གྱིས་ཡན་ལག་བརྒྱན། །ལྟེ་བའི་དཀྱིལ་འཁོར་བསྒོམ་པར་བྱ།། ཨཾ་ཡིག་ཡེ་ཤེས་ལས་བྱུང་བ། །མཆོག་དང་དགའ་བར་བྱེད་པ་མོ། །དམ་ཚིག་སེམས་དཔའ་རྫོགས་བྱས་ལ། །ཡེ་ཤེས་སེམས་དཔའ་བསྒོམ་པར་བྱ། །ཟླ་དྲུག་བསྒོམས་པའི་སྦྱོར་བ་ཡིས། །ཤེས་རབ་ཕ་རོལ་ཕྱིན་མར་འགྱུར། །ནུབ་བདུན་བར་དུ་སྦྱོར་བ་ཡིས། །བསྟན་བཅོས་ཀུན་ལ་འཇིགས་པ་མེད། །འབུམ་ཕྲག་བཟླས་པ་སྦྱོར་བ་ཡིས། །ཉིན་རེ་ཚིགས་བཅད་བརྒྱ་བརྒྱ་ནི། །འབད་པ་མེད་པར་རབ་ཏུ་བྱེད། །གཞུང་ནི་བརྒྱ་ནི་འཛིན་པར་འགྱུར། །དེ་ལ་སྔགས་ཀྱི་ཚིག་ནི་འདི་ཡིན་ཏེ། ཨོཾ་པི་ཙུ་པི་ཙུ་པྲ་ཛྙཱ་བརྡྷ་ནི་ཛྭ་ལ་ཛྭ་ལ་མེ་དྷཱ་བར་དྷཱ་ནི། དྷི་རི་དྷི་རི་བུདྷི་བར་དྷ་ནི་སྭཱ་ཧཱ། བྱ་རོག་གི་སྒྲ་མི་གྲག་བར་སྔགས་འདིས་མ་བསླངས་པར་རང་སྐྱུར་ལ། ལན་བདུན་དུ་བསྔགས་ལ། ཇི་སྲིད་ཟླ་བ་དྲུག་གི་བར་དུ་འཐུངས་ན་དེའི་ཤེས་རབ་སྐྱེ་བར་འགྱུར་རོ། །ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་བའི་ཐབས་སངས་རྒྱས་ཀྱིས་གསུངས་པ་རྫོགས་སོ། །པཎྜི་ཏ་དོན་ཡོད་རྡོ་རྗེ་དང༌། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་ཅིང་ཞུས་པའོ།།