རྟ་མགྲིན་གྱི་སྒྲུབ་པའི་ཐབས།
རྒྱ་གར་སྐད་དུ། ཧ་ཡ་གྲཱི་བ་སཱ་དྷ་ནཾ། བོད་སྐད་དུ། རྟ་མགྲིན་གྱི་སྒྲུབ་པའི་ཐབས། དཔལ་རྟ་མགྲིན་ལ་ཕྱག་འཚལ་ལོ། །སྔོན་དུ་བསྟན་པའི་ཆོ་གས་སྣ་ཚོགས་པདྨ་དང་ཉི་མ་ལ་ཧཱུཾ་དམར་པོའི་ཡེ་ཤེས་ལས་ཡོངས་སུ་རྫོགས་པའི་འཕགས་པ་རྟ་མགྲིན་མདོག་དམར་བ། ཞལ་གསུམ་པ། ཕྱག་བརྒྱད་པ། ཞལ་སོ་སོ་ནས་སྤྱན་གསུམ་གསུམ་མོ། །སྔོན་པོ་དང་དཀར་པོ་ནི་གཡས་དང་ཅིག་གོས་ཀྱི་ཞལ་ལོ། །སྦྲུལ་གྱི་རྒྱན་ཅན་འགྱིང་བག་གིས་གནོན་ཅིང་གནས་པ། ཁྲོ་བོའི་ལྟ་སྟངས་ཀྱིས་གཟིགས་པ།
ཞལ་དང་པོ་བཞད་པ། གཡས་པའི་ཞལ་ལྗགས་འདྲིལ་བ། མཆེ་བ་གཉིས་ཀྱིས་མ་མཆུ་བཙིར་བ། གཡོན་པའི་ཞལ་ལོ། །སྟག་གི་པགས་པའི་ཤམ་ཐབས་ཅན་ནོ། །རྡོ་རྗེ་དང་དབྱུག་པ་དང༌། བྱེད་པའི་ཕྱག་རྒྱ་དང༌། མདའ་འཕྱར་བ་ནི་གཡས་པའི་ཕྱག་བཞི་ནའོ། །སྡིགས་མཛུབ་དང་རང་གི་ནུ་མ་བཟུང་བ་དང༌། པདྨ་དང་གཞུ་འཕྱར་བ་ནི་གཡོན་གྱི་ཕྱག་བཞི་ནའོ། །མི་བསྐྱོད་པས་མནན་པའི་དབུ་རྒྱན་ཅན་བསམ་པར་བྱའོ་ཞེས་བྱ་བ་ནི་རྟ་མཆོག་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །སྔགས་ཀྱི་བཟླས་པ་ནི། ཨོཾ་ཧ་ཡ་གྲཱི་བ་སྭཱ་ཧཱ། རྟ་མགྲིན་གྱི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང༌། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ། །