འཇིག་རྟེན་མགོན་པོའི་སྒྲུབ་ཐབས།
རྒྱ་གར་སྐད་དུ། ལོ་ཀ་ནཱ་ཐ་སཱ་དྷ་ནཾ། བོད་སྐད་དུ། འཇིག་རྟེན་མགོན་པོའི་སྒྲུབ་ཐབས། འཇིག་རྟེན་མགོན་པོ་ལ་ཕྱག་འཚལ་ལོ། །འདིར་སྔོན་གྱི་ཆོ་གས་ཟླ་བའི་དཀྱིལ་འཁོར་ལ་བདུན་པའི་གསུམ་པའི་ས་བོན་བཅུ་གསུམ་པས་གནོན་པ། ཟླ་བའི་ཐིག་ལེས་རྣམ་པར་བརྒྱན་པ། དེ་རྣམས་ཡོངས་སུ་གྱུར་པ་ལས་དཔལ་ལྡན་འཇིག་རྟེན་མགོན་པོ་ཞི་བ་རལ་པའི་ཅོད་པན་འཆང་བ། སྐུ་ཟླ་བ་བཞིན་དུ་དྲི་མ་མེད་པ། རྒྱན་ཐམས་ཅད་ཀྱིས་བརྒྱན་པ། ཕྱག་གཡོན་ན་པདྨ་བསྣམས་པ། གཡས་པ་མཆོག་སྦྱིན་པ། ཕྱག་གཉིས་ཁུ་ཚུར་བཅིངས་ནས་གུང་མོ་པདྨ་ཁ་མ་བྱེ་བ་ལྟ་བུ། པདྨ་དང་ཟླ་བའི་གདན་ལ་བཞུགས་པར་བསྒོམ་པར་བྱའོ། །འདིའི་ཕྱག་རྒྱས་རྒྱས་གདབ་པར་བྱའོ། །ཨོཾ་མ་ཎི་པདྨེ་ཧཱུཾ་ཞེས་པ་ཡི་གེ་འབུམ་དུ་བཟླས་པས་སྡིག་པ་ཐམས་ཅད་དག་པར་འགྱུར་རོ། །གཉིས་དང་གསུམ་གྱིས་རྨི་ལམ་དུ་མཐོང་བར་འགྱུར་རོ། །བྱེ་བ་བཟླས་ན་མཚམས་མེད་པ་ལྔ་བྱས་པས་ཀྱང་འགྲུབ་པར་འགྱུར་རོ། །དཔལ་ལྡན་འཇིག་རྟེན་མགོན་པོའི་སྒྲུབ་ཐབས་རྫོགས་སོ།།