དཔལ་ལྡན་མཁའ་སྤྱོད་ཀྱི་སྒྲུབ་ཐབས།
རྒྱ་གར་སྐད་དུ། ཤྲཱི་ཁརས་པཱ་ཎ་སཱ་དྷ་ནཾ། བོད་སྐད་དུ། དཔལ་ལྡན་མཁའ་སྤྱོད་ཀྱི་སྒྲུབ་ཐབས། དཔལ་ལྡན་མཁའ་སྤྱོད་ལ་ཕྱག་འཚལ་ལོ། །
དང་པོར་རེ་ཞིག་སྔགས་པས་སྟན་བདེ་བ་ལ་ཉེ་བར་འདུག་སྟེ། རང་གི་སྙིང་གར་པཾ་ཡིག་ཡོངས་སུ་གྱུར་པ་ལས་པདྨ་འདབ་མ་བརྒྱད་པ། དེའི་སྟེང་དུ་ཨ་ཡིག་ཡོངས་སུ་གྱུར་པ་ལས་ཟླ་བའི་དཀྱིལ་འཁོར། དེའི་སྟེང་དུ་ཧྲཱིཿཡིག་ལས་འོད་ཟེར་བལྟས་ཏེ། འོད་ཟེར་དེས་འོག་མིན་གྱི་ས་ལ་ཞུགས་ཏེ། འཇིག་རྟེན་དབང་ཕྱུག་གདན་དྲངས་ནས་མདུན་གྱི་ནམ་མཁའི་མཐིལ་དུ་བལྟས་ཏེ་སྡིག་པ་བཤགས་པ་ལ་སོགས་པ་བྱའོ། །འདི་ལྟ་སྟེ་སྡིག་པ་བཤགས་པ་དང༌། བསོད་ནམས་ལ་རྗེས་སུ་ཡི་རང་བ་དང༌། བསོད་ནམས་ཡོངས་སུ་བསྔོ་བ་དང༌། གསུམ་ལ་སྐྱབས་སུ་འགྲོ་བ་དང༌། བདག་ཉིད་དབུལ་བ་དང། གསོལ་བ་འདེབས་པ་དང༌། བྱང་ཆུབ་ཏུ་སེམས་བསྐྱེད་པར་བྱས་ནས། ཚངས་པའི་གནས་བཞི་བསྒོམ་པར་བྱ་སྟེ། བྱམས་པ་དང༌། སྙིང་རྗེ་དང༌། དགའ་བ་དང༌། བཏང་སྙོམས་སོ། །དེ་ནས་སྟོང་པ་ཉིད་བསྒོམ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་པས་རང་གི་ལུས་གཟུགས་བརྙན་དང་འདྲ་བར་བལྟས་ལ། སྙིང་གའི་དབུས་སུ་པཾ་ཡིག་ལས་སྐྱེས་པའི་པདྨ་འདབ་མ་བརྒྱད་པ། དེའི་སྟེང་དུ་ཨ་ཡིག་ལས་ཟླ་བའི་དཀྱིལ་འཁོར་དེའི་སྟེང་དུ་ཧྲཱིཿཡིག་དམར་པོའི་འོད་ཟེར་གྱིས་དེ་བཞིན་གཤེགས་པ་རྣམས་བཀུག་ཅིང་བཅུག་ནས་བདག་ཉིད་འཇིག་རྟེན་དབང་ཕྱུག་གི་གཟུགས་སུ་བསྒོམ་པར་བྱ་སྟེ། སྐུ་མདོག་དཀར་པོ་རལ་པའི་ཅོད་པན་ཅན། ཕྱག་གཡས་པ་མཆོག་སྦྱིན། ཅིག་ཤོས་ན་པདྨ་དཀར་པོ་བསྣམས་པ། སྐྱིལ་ཀྲུང་ཕྱེད་པས་བཞུགས་ཤིང་རྒྱན་ཐམས་ཅད་ཀྱིས་རྣམ་པར་བརྒྱན་པ། འོད་དཔག་ཏུ་མེད་པའི་ཅོད་པན་ཅན། མཚན་སུམ་ཅུ་རྩ་གཉིས་དང་ལྡན་པ། དཔེ་བྱད་བཟང་པོ་བརྒྱད་ཅུས་སྤྲས་པ། ཟླ་བའི་གདན་ལ་ཟླ་བའི་འོད་ལྟ་བུའི་བདག་ཉིད་རྣམ་པར་བསྒོམ་པར་བྱའོ། །དེའི་གཡས་སུ་འཕགས་མ་སྒྲོལ་མ་དང་ནོར་བཟངས། གཡོན་དུ་ཁྲོ་གཉེར་ཅན་དང་རྟ་མགྲིན། ཤར་དུ་རྣམ་པར་སྣང་མཛད། ལྷོར་རིན་ཆེན་འབྱུང་ལྡན། ནུབ་ཏུ་འོད་དཔག་མེད། བྱང་དུ་དོན་ཡོད་གྲུབ་པ་རྣམས་སོ། །མེར་སྤྱན་མ། བདེན་བྲལ་དུ་མཱ་མ་ཀཱི། རླུང་དུ་གོས་དཀར་མོ། །དབང་ལྡན་དུ་རྡོ་རྗེ་དབྱིངས་ཀྱི་དབང་ཕྱུག་མ་རྣམས་སོ། །དེ་ནས་སྙིང་གའི་ས་བོན་གྱི་འོད་ཟེར་གྱིས་ཡེ་ཤེས་སེམས་དཔའ་དགུག་ཅིང་རབ་ཏུ་གཞུག་པར་བྱའོ། །མིག་ལ་སོགས་པ་བྱིན་གྱིས་
བརླབས་ཤིང༌། ལུས་དང་ངག་དང་ཡིད་བྱིན་གྱིས་བརླབས་ནས་དབང་བསྐུར་བ་ཞུ་བར་བྱའོ། །ཇི་ལྟར་འཁྲུངས་ཙམ་ཉིད་ནས་ནི། །དེ་བཞིན་གཤེགས་རྣམས་ཁྲུས་གསོལ་བ། །ལྷ་ཡི་ཆུ་བོ་དག་པ་ཡིས། །དེ་བཞིན་བདག་ཀྱང་ཁྲུས་མཛད་གསོལ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ་ཕཊ་སྭཱ་ཧཱ། སྤྱན་མ་ལ་སོགས་པའི་ལྷ་མོ་བཅུ་ཡང་དག་པར་སྤྲོས་ནས་མཆོད་པ་དང་བསྟོད་པ་བྱས་ཏེ། སྔགས་བཟླས་པར་བྱའོ། །དེ་ལ་སྔགས་ནི་འདིའོ། །ཨོཾ་ཧྲཱིཿསྭཱ་ཧཱ་ཞེས་སོ། །དཔལ་ལྡན་མཁའ་སྤྱོད་ཀྱི་སྒྲུབ་ཐབས་རྫོགས་སོ།། །།