སེང་གེ་སྒྲའི་སྒྲུབ་ཐབས།
གཉིས་མེད་རྡོ་རྗེ།
རྒྱ་གར་སྐད་དུ། སིཾ་ཧ་ནཱ་ད་སཱ་དྷ་ནཾ། བོད་སྐད་དུ། སེང་གེ་སྒྲའི་སྒྲུབ་ཐབས། རྗེ་བཙུན་སེང་གེ་སྒྲ་ལ་ཕྱག་འཚལ་ལོ། །ཞལ་གཅིག་ཕྱག་གཉིས་སྐུ་མདོག་དཀར། །སྤྱན་གསུམ་སེང་གེ་ལ་གནས་ཤིང༌། །བླ་མ་ནད་ཀུན་འཇོམས་བྱེད་པའི། །སེང་གེ་སྒྲ་ལ་ཕྱག་འཚལ་ལོ། །དང་པོར་རེ་ཞིག་སྔགས་པས་ཁ་བསང་བ་ལ་སོགས་པ་བྱས་ཏེ། ཡིད་དང་མཐུན་པའི་གནས་སུ་གདན་བདེ་བ་ལ་ཉེ་བར་འདུག་སྟེ། ཨ་ཡིག་དཀར་པོ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར། དེའི་སྟེང་དུ་ཧྲཱིཿཡིག་དཀར་པོ་སྙིང་གར་བལྟས་ལ། དེའི་འོད་ཟེར་གྱིས་ཁམས་གསུམ་སྣང་བར་བྱས་ཏེ། འོག་མིན་གྱི་གནས་སུ་སོང་སྟེ། སེང་གེ་སྒྲ་དང༌། བླ་མ་དང༌། སངས་རྒྱས་དང༌། བྱང་ཆུབ་སེམས་དཔའ་ཐམས་ཅད་གདན་དྲངས་ཏེ། མདུན་གྱི་ནམ་མཁའ་ལ་བཞུགས་ནས། དེའི་རྗེས་སུ་མཆོད་པ་དང༌། སྡིག་པ་བཤགས་པ་ལ་སོགས་པ་བྱའོ། །དེ་ནས་ཚངས་པའི་གནས་བཞི་བསྒོམ་པར་བྱས་ནས། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ ཧཾ་ཞེས་པའི་སྔགས་འདིས་སྟོང་པ་ཉིད་དུ་བྱིན་གྱིས་བརླབ་པར་བྱའོ། །དེ་ནས་སྨོན་ལམ་རྗེས་སུ་དྲན་པར་བྱས་ནས་པཾ་ཡིག་དཀར་པོ་ཡོངས་སུ་གྱུར་པ་ལས་པདྨ། དེའི་སྟེང་དུ་ཨ་ཡིག་དཀར་པོ་ཡོངས་སུ་གྱུར་པ་ལས་ཟླ་པའི་དཀྱིལ་འཁོར། དེའི་སྟེང་དུ་ཨཱཿཡིག་དཀར་པོ་ཡོངས་སུ་གྱུར་པ་ལས་སེང་གེ་དཀར་པོ། དེའི་སྟེང་དུ་ཨཾ་ཡིག་དཀར་པོ་ཡོངས་སུ་གྱུར་པ་ལས་པདྨ་དཀར་པོ། དེའི་ལྟེ་བ་ལ་ཧྲཱིཿཡིག་དཀར་པོ་འོད་ཟེར་འཕྲོ་ཞིང་འགྱེད་པ། དེ་ཐམས་ཅད་ཡོངས་སུ་གྱུར་པ་ལས་སེང་གེ་སྒྲའི་གཟུགས་སུ་བདག་ཉིད་བལྟ་བར་བྱའོ། །ཡན་
ལག་ཐམས་ཅད་དཀར་ཞིང་ཞལ་གཅིག་ཕྱག་གཉིས་པ། སྤྱན་གསུམ་པ་རལ་པའི་ཅོད་པན་བཅིངས་པ། འོད་དཔག་ཏུ་མེད་པས་དབུ་བརྒྱན་པ། རྒྱལ་པོ་ཆེན་པོ་རོལ་པའི་སྟབས་ཀྱིས་སེང་གེའི་ཁྲི་ལ་བཞུགས་པ། སྟག་གི་པགས་པའི་ན་བཟའ་བསྣམས་པ། དེ་བཞིན་གཤེགས་པ་ལྔ་འཕྲོ་ཞིང་རོལ་པའི་དཔའ་བོ་ལྔ་དང་ཟླ་བ་ཕྱེད་པས་བརྒྱན་པ། ཕྱག་གཡོན་ན་པདྨ་དཀར་པོའི་སྟེང་དུ་རལ་གྲི་དཀར་པོ་དང༌། དེ་དང་ཉེ་བར་གནས་པའི་པདྨ་དཀར་པོའི་སྟེང་དུ་མེ་ཏོག་དྲི་བཟང་སྣ་ཚོགས་པས་ཡོངས་སུ་གང་བའི་ཐོད་པ་དཀར་པོ། གཡས་ན་པདྨ་དཀར་པོའི་སྟེང་ན་སྤྲུལ་དཀར་པོས་དཀྲིས་པའི་དབྱུ་གུ་རྩེ་གསུམ་པ་དཀར་པོའོ། །དེ་ལྟ་བུར་གྱུར་པའི་བཅོམ་ལྡན་འདས་བསྒོམ་པར་བྱའོ། །བསྒོམས་པས་ངལ་ན་སྔགས་བཟླས་པར་བྱའོ། །དེ་ལ་སྔགས་ནི་འདིའོ། །ཨོཾ་ཨཱཿཧྲཱིཿསིཾ་ཧ་ནཱ་ད་ཧཱུཾ་ཕཊ་སྭཱ་ཧཱ། ཆོ་ག་འདིས་སྐུ་གཟུགས་བྱས་ཏེ། ཡང་ན་རས་རིས་བྱས་ལ། བཅོམ་ལྡན་འདས་ཀྱི་མདུན་དུ་སོ་སོའི་མཎྜལ་བྱས་ལ་གཟུངས་ལན་གཅིག་བཀླག་པར་བྱའོ། །དེ་ལ་གཟུངས་ནི་འདིའོ། །ན་མོ་རཏྣ་ཏྲ་ཡཱ་ཡ། ན་མ་ཨཱ་ཪྻ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཨ་ཀ་ཊེ། བི་ཀ་ཊེ་ནི་ཀ་ཊེ། ཀ་ཊཾ་ཀ་ཊེ། ཀ་རོ་ཊེ་བཱི་ཪྻེ་སྭཱ་ཧཱ། ས་ལ་མ་ལྷུང་བའི་བའི་ལྕི་བ་ལ་མངོན་པར་བསྔགས་ནས་མཎྜལ་བརྒྱད་བྱས་ལ། མཎྜལ་སོ་སོ་ལ་ལན་བཅུ་གསུམ་གྱི་བར་དུ་གཟུངས་བཀླག་པར་བྱའོ། །མཎྜལ་སོ་སོའི་དྲི་མ་ལྷག་པའི་ལྕི་བ་དེ་ལ་གཟུངས་ལན་བདུན་དུ་མངོན་པར་བསྔགས་ནས་དེས་ནད་པ་ལ་བྱུག་པར་བྱའོ། །ཉི་མ་བདུན་ནམ། ཉི་མ་བཅུ་གསུམ་མམ། ཉི་ཤུ་རྩ་གཅིག་གིས་དེ་བཞིན་དུ་བྱས་པས་མཚམས་མེད་པ་ལྔ་བྱེད་པས་ཀྱང་འགྲུབ་པར་འགྱུར་རོ། །གལ་ཏེ་མ་འགྲུབ་ན་དེའི་ཚེ་ངས་མཚམས་མེད་པ་ལྔ་བྱས་པར་འགྱུར་རོ། །སེང་གེ་སྒྲའི་སྒྲུབ་ཐབས་རྫོགས་སོ། །བདག་གི་སྒྲུབ་ཐབས་ཆོ་ག་འདིས། །གང་ཞིག་ནོར་དང་དགེ་ཐོབ་ཅིང༌། །མགོན་པོ་སེང་གེ་སྒྲ་དང་ནི། །འགྲོ་བ་རྣམས་ནི་ནད་མེད་ཤོག །པཎྜི་ཏ་ཨ་བ་དྷཱུ་ཏཱི་པ་དཔལ་ལྡན་གཉིས་མེད་རྡོ་རྗེའི་ཞབས་ཀྱིས་མཛད་པའོ།།