འཇིག་རྟེན་དབང་ཕྱུག་ཧཱ་ལ་ཧཱ་ལའི་སྒྲུབ་ཐབས།
རྒྱ་གར་སྐད་དུ། ཧཱ་ལ་ཧཱ་ལ་ལོ་ཀེ་ཤྭ་ར་སཱ་དྷ་ནཾ། བོད་སྐད་དུ། འཇིག་རྟེན་དབང་ཕྱུག་ཧཱ་ལ་ཧཱ་ལའི་སྒྲུབ་ཐབས། ཧཱ་ལ་ཧཱ་ལ་ལ་ཕྱག་འཚལ་ལོ། །སྔོན་མ་བཞིན་དུ་སྟོང་པ་ཉིད་ཀྱི་མཐར་ཐུག་པ་བསྒོམས་ནས། ཧྲཱིཿཡིག་ས་བོན་ལས་སྐྱེས་པའི། །ཧཱ་ལ་ཧཱ་ལ་བརྩེ་ཆེན་པོ། །ཞལ་གསུམ་དེ་བཞིན་སྤྱན་གསུམ་པ། །རལ་པའི་ཅོད་པན་གྱིས་བརྒྱན་ཅིང༌། །དང་པོའི་ཞལ་ནི་དཀར་པོ་སྟེ། །གཡས་པ་སྔོན་པོ་གཡོན་པ་དམར། །དབུ་ལ་ཟླ་བ་ཕྱེད་པས་བརྒྱན། ཐོད་པ་རྣམས་ཀྱིས་ཟུར་ཕུད་བྱས། །རལ་པའི་ནང་གནས་རྒྱལ་བ་དང༌། །རྒྱན་རྣམས་ཀུན་གྱིས་ཡང་དག་བརྒྱན། །ཆུ་སྐྱེས་དཀར་པོའི་མདོག་དང་མཚུངས། །སྒེག་པའི་ཉམས་ཀྱིས་ཤིན་ཏུ་མཛེས། །ཕྱག་དྲུག་ཞལ་ནི་སྨ་ར་ཅན། །སྟག་གི་པགས་པའི་ན་བཟའ་དགྱེས། །ཕྱག་གཡས་དང་པོ་མཆོག་སྦྱིན་དག །གཉིས་པ་ན་ནི་བགྲང་ཕྲེང་བསྣམས། །གསུམ་པ་མདའ་དང་གར་གྱི་སྟབས། །གཡོན་པ་ནི་དེ་བཞིན་གཞུ། །གཉིས་པར་པདྨ་དཀར་པོ་དང༌། །གསུམ་པ་དེ་བཞིན་རྒྱུ་མ་འཛིན། །བྲལ་གཡོན་པའི་སྟེང་དུ་ལྷ་མོ་སྒེག་མོ་སྟེ། གཡོན་པ་ཆུ་སྐྱེས་བསྣམས་པ་ཕྱག་གཡས་པས་བཅོམ་ལྡན་འདས་ལ་འཁྱུད་པ། གཞན་ན་མེ་ཏོག་གིས་མཛེས་པར་བྱས་པ། རལ་པའི་ཚོགས་དང་བཅས་པའོ། །གཡས་ལོགས་ན་སྤྲུལ་གྱིས་དཀྲིས་པའི་རྩེ་གསུམ། གཡོན་ལོགས་ན་པདྨ་ལ་གནས་པའི་མེ་ཏོག་དྲི་ཞིམ་པོ་སྣ་ཚོགས་པས་ཡོངས་སུ་གང་བའི་ཐོད་པའོ། །
པདྨ་དམར་པོ་དང་ཟླ་བ་ལ་རོལ་པའི་སྟབས་ཀྱིས་བཞུགས་པའི་བཅོམ་ལྡན་འདས་བསྒོམ་པར་བྱའོ། །དེ་ནས་སྔགས་བཟླས་པར་བྱ་སྟེ། ཨོཾ་བཛྲ་དྷརྨ་ཧྲཱིཿཞེས་སོ། །འཇིག་རྟེན་དབང་ཕྱུག་ཧཱ་ལ་ཧཱ་ལའི་སྒྲུབ་ཐབས་རྫོགས་སོ།།