རྡོ་རྗེ་ཆོས་ཀྱི་སྒྲུབ་ཐབས།
རྒྱ་གར་སྐད་དུ། བཛྲ་དྷརྨ་སཱ་དྷ་ནཾ། བོད་སྐད་དུ། རྡོ་རྗེ་ཆོས་ཀྱི་སྒྲུབ་ཐབས། རྡོ་རྗེ་ཆོས་ལ་ཕྱག་འཚལ་ལོ། །ཧྲཱིཿཡིག་ཡེ་ཤེས་རྫོགས་པ་ལས། །ཧཱ་ལ་ཧཱ་ལའི་སྐུ་ཆེན་པོ། །ཞལ་གསུམ་སྤྱན་ཡང་གསུམ་པ་སྟེ། །རལ་པའི་ཅོད་པན་གྱིས་བརྒྱན་ཅིང༌། །ཟླ་བ་ཕྱེད་པ་འཛིན་པའི་ལྷ། །དབུ་ལ་ཐོད་པའི་ཕྲེང་བས་བརྒྱན། །རལ་པའི་ནང་ནས་རྒྱལ་བའི་སྐུ། །རྒྱན་རྣམས་ཀུན་གྱིས་བརྒྱན་གྱུར་པ། །ཆུ་སྐྱེས་དཀར་པོ་དང་མཚུངས་ཤིང༌། །སྒེག་པ་ལ་སོགས་ཉམས་དང་ལྡན། །ཕྱག་དྲུག་ཞལ་ནི་འཛུམ་པ་དང༌། །སྟག་གི་པགས་པའི་ན་བཟར་བཅས། །ཕྱག་གཡས་ན་ནི་མཆོག་སྦྱིན་དང༌། །གཉིས་པ་ན་ནི་བགྲང་ཕྲེང་དང༌། །གསུམ་པ་མངའ་དང་གར་མཛད་དོ། །གཡོན་པ་ན་ནི་པདྨས་བརྒྱན། །གཉིས་པ་དེ་བཞིན་ནུ་མ་འཛིན། །གསུམ་པ་ལ་ནི་དེ་བཞིན་གཞུ། །སྤྲུལ་གྱིས་ཡོངས་སུ་དཀྲིས་པ་ཡི། །རྩེ་གསུམ་གཡས་ཀྱི་ཕྱོགས་སུའོ། །མེ་ཏོག་དྲི་བཟངས་སྣ་ཚོགས་ཀྱིས། །གང་བའི་ཐོད་པ་གཡོན་ཕྱོགས་སུ། །པདྨ་དམར་པོའི་སྟེང་དུ་ནི། །རོལ་པའི་སྟབས་ཀྱིས་ཡང་དག་བཞུགས། །རིན་ཆེན་རི་བོའི་ཕུག་མཐར་གནས། །རྣལ་འབྱོར་ཅན་གྱིས་བསྒོམ་པར་བྱ། །ཆོ་འཕྲུལ་རྣམ་པ་སྣ་ཚོགས་ཀྱིས། །སངས་རྒྱས་རང་བཞིན་སྐུ་སྤྲོས་ཏེ། །རྣམ་པར་མི་རྟོག་ཏིང་འཛིན་གྱིས། །ཟས་རྣམས་ཀུན་ལ་ལོངས་སྤྱོད་ཅིང༌། །བསྒོམ་པའི་རིམ་པའི་སྦྱོར་བ་ཡིས། །རང་གིས་གསང་སྔགས་བཟླས་པར་བྱ། །བླ་ན་མེད་པའི་བྱང་ཆུབ་ནི། །མྱུར་དུ་ཐོབ་ཅིང་བདེ་བར་འཇུག །ཧཱ་ལ་ཧཱ་ལ་ཡོངས་མཉེས་པས། །འདོད་པ་ཐམས་ཅད་རབ་ཏུ་འགྲུབ། །རྡོ་རྗེ་ཞེས་བྱའི་ཏིང་ངེ་འཛིན། །སྙིང་གར་ཧྲཱིཿཡིག་ཟླ་སྟེང་དགོད། །ཆོས་རྣམས་བདག་མེད་བསྒོམ་བྱས་ལ། །དེ་
ལས་འོད་ཟེར་དམར་པོ་ནི། །ཡང་དག་འཕྲོ་བ་མཁའ་མཉམ་དེ། །འཇིག་རྟེན་དབང་ཕྱུག་རྣམ་པར་བལྟ། །བརྟན་དང་གཡོ་བའི་འགྲོ་བ་རྣམས། །ཡང་དག་བྱང་ཆུབ་སེམས་དཔའི་དོན། །བསྐྱེད་ཅིང་སྙིང་གར་རབ་ཏུ་ཞུགས། །དེ་ལ་ཧྲཱིཿཡིག་གཞན་འཇུག་པས། །སྐད་ཅིག་གིས་ནི་ཡེ་ཤེས་སྦྱོར། །དེ་ལ་ཁ་དོག་དཀར་དང་དམར། །པདྨ་རཱ་གའི་རང་བཞིན་འོད། །སངས་རྒྱས་ལྔ་ཡི་ཅོད་པན་ཅན། །རབ་ཏུ་དགྱེས་པའི་སྤྱན་རྒྱས་པ། །ཕྱག་གཡོན་པདྨ་སྡོང་བུར་བཅས། །འདབ་མ་བཅུ་དྲུག་པ་དག་བསྣམས། །དེ་ལ་ཕྱག་གཡས་ཀྱིས་ཀྱང་ནི། །པདྨ་རྒྱས་པ་ཐུགས་ཀར་འཛིན། །རྨ་བྱའི་སྟེང་དུ་ཟླ་བ་ཡི། །དཀྱིལ་འཁོར་དབུས་སུ་ཉེ་བར་བཞུགས། །སེམས་དཔའི་སྐྱིལ་ཀྲུང་ཀུན་ནས་འཁྱིལ། །སྒེག་པའི་ཉམས་དང་བཅས་ཤིང་བསྟེན། །ལས་ཆེན་མཆོད་རྟེན་ནང་གནས་པའི། །གཞལ་ཡས་ཁང་གི་སྤྱོད་ལམ་ཅན། །རྟག་ཏུ་རྡོ་རྗེའི་ཆོས་མཆོག་ནི། །བསྒོམ་བྱས་བྱང་ཆུང་ཐོབ་པར་འགྱུར། །བསྒོམས་པས་ངལ་ན་སྙིང་གར་ཟླ་བ་ལ་སྔགས་བཀོད་ལ་ཕྲེང་བའི་རྣམ་པ་བཞིན་དུ་མི་གཡོ་བའི་སེམས་ཀྱིས་བཟླས་པར་བྱའོ། །དེ་ལ་བཟླས་པའི་སྔགས་ནི་འདིའོ། །ཨོཾ་བཛྲ་དྷརྨ་ཧྲཱིཿཞེས་སོ། །རྡོ་རྗེ་ཆོས་ཀྱི་སྒྲུབ་ཐབས་ཆོ་ག་བསྡུས་པ་རྫོགས་སོ།། །།