ཧ་རི་ཧ་རི་ཧ་རི་ལ་ཞོན་པར་གྱུར་པའི་སྒྲུབ་ཐབས།
རྫོགས་པའི་སངས་རྒྱས།
རྒྱ་གར་སྐད་དུ། ཧ་རི་ཧ་རི་ཧ་རི་བཱ་ཧ་ནོདྦྷ་བཱ་སཱ་དྷ་ནཾ། བོད་སྐད་དུ། ཧ་རི་ཧ་རི་ཧ་རི་ལ་ཞོན་པར་གྱུར་པའི་སྒྲུབ་ཐབས། འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །དང་པོར་རེ་ཞིག་སྔགས་པས་སྟན་བདེ་བ་ལ་འདུག་སྟེ། འགྲོ་བ་རྣམས་མངོན་པར་གདོན་པར་འདོད་པའི་བསམ་པས་སྡིག་པ་བཤགས་པ་ལ་སོགས་པ་བླ་ན་མེད་པའི་མཆོད་པ་རྣམ་པ་བདུན་བྱས་ནས། ཡཾ་ཡིག་རྫོགས་པ་ལས་རླུང་གི་དཀྱིལ་འཁོར་གཞུའི་རྣམ་པ་ལྟ་བུ་ཁ་དོག་སྔོན་པོ་བ་དན་གྱིས་མཚན་པའོ། །དེའི་སྟེང་དུ་རཾ་ཡིག་ལས་གྱུར་པའི་མེའི་དཀྱིལ་འཁོར་ཟུར་གསུམ་པ་ཁ་དོག་དམར་པོ་རཾ་ཡིག་གིས་མཚན་པའོ། །དེའི་སྟེང་དུ་བཾ་ཡིག་རྫོགས་པ་ལས་ཆུའི་དཀྱིལ་འཁོར་ཟླུམ་པོ་ཁ་དོག་དཀར་པོ་དབུས་སུ་བུམ་པ་དཀར་པོས་མཚན་པའོ། །དེའི་སྟེང་དུ་ལཾ་ཡིག་ལས་བྱུང་བའི་དབང་ཆེན་གྱི་དཀྱིལ་འཁོར་གྲུབ་བཞི་པ་ཁ་དོག་སེར་པོ་ཟུར་བཞི་པོར་རྡོ་རྗེ་རྩེ་གསུམ་གྱིས་མཛེས་པར་བྱས་པའོ། །དེའི་སྟེང་དུ་སུཾ་ཡིག་ཡོངས་སུ་གྱུར་པ་ལས་རིན་པོ་ཆེ་སྣ་བདུན་གྱི་རང་བཞིན་
ལྕོག་བརྒྱད་དང་ལྡན་པའི་རི་རབ་དང་སྣ་ཚོགས་ཆུ་སྐྱེས་སོ། །དེའི་སྟེང་དུ་བདག་ཉིད་བསམས་ཏེ། ཨོཾ་ཧྲཱིཿཧཱུཾ་རིམ་པ་བཞིན་དུ་སྤྱི་བོ་དང༌། མགྲིན་པ་དང༌། སྙིང་ག་རྣམས་སུ་རིམ་པར་བཀོད་ནས་བདག་གིས་ཐོག་མ་མེད་པའི་དུས་ནས་བསགས་པའི་ལས་ཀྱི་སྒྲིབ་པ་དང་བྲལ་ནས་ཧ་རི་ཧ་རི་ཧ་རི་ལ་ཞོན་པར་གྱུར་པའི་འཇིག་རྟེན་དབང་ཕྱུག་གི་སྐུ་གསེར་གྱི་ཁ་དོག་ལྟ་བུ་འོད་ཟེར་འབར་བ་འཁྲིགས་པ་གཞོན་ནུའི་གཟུགས་སུ་སྔགས་པས་བསྒོམ་པར་བྱའོ། །ཕྱི་ནས་རང་གི་སྙིང་གར་བསོད་ནམས་དང་ཡེ་ཤེས་རྣམ་པར་དག་པའི་ཕྱིར་ཟླ་བའི་དཀྱིལ་འཁོར་དང༌། ཉི་མའི་དཀྱིལ་འཁོར་རོ། །དེ་ལ་ཧྲཱིཿཡིག་ལས་བྱུང་བའི་འོད་ཟེར་གྱི་དྲ་བས་ཡེ་ཤེས་སེམས་དཔའ་བཀུག་སྟེ་འཆད་པར་འགྱུར་བའི་སྐུ་ལ་སྔོན་དུ་གསུངས་པའི་མཆོད་པས་མཆོད་པར་བྱའོ། །ཡེ་ཤེས་སེམས་དཔའ་དང་དམ་ཚིག་སེམས་དཔའ་དག་གཅིག་ཏུ་གྱུར་ནས་བཅོམ་ལྡན་འདས་ཧ་རི་ཧ་རི་ཧ་རི་ལ་ཞོན་པར་གྱུར་པའི་འཇིག་རྟེན་དབང་ཕྱུག་ཏུ་སེམས་བརྟན་པོས་བདག་ཉིད་བསྒོམ་པར་བྱས་ཏེ། ཕྱག་དྲུག་པ་སྐུ་མདོག་དཀར་པོ་རལ་པའི་ཅོད་པན་དང་ཞི་བའི་ཆ་ལུགས་ཅན། ཕྱག་གཡས་པས་རྫོགས་པའི་སངས་རྒྱས་དཔང་པོར་མཛད་པ། གཉིས་པ་ན་ཕྲེང་བ་བསྣམས་པ། གསུམ་པས་ངན་སོང་ན་གནས་པའི་སེམས་ཅན་ལ་དགེ་བ་སྟོན་པར་མཛད་པ། གཡོན་པས་དབྱུག་པ་བསྣམས་པ། གཉིས་པས་རི་དགས་ནག་པོའི་པགས་པ་བསྣམས་པ། གསུམ་པ་ན་རིལ་བ་སྤྱི་བླུགས་བསྣམས་པའི་བཅོམ་ལྡན་འདས་བསྒོམ་པར་བྱའོ། །དེ་ལ་རྣམ་པར་དག་པ་ནི་རླུང་དང་མེའི་དཀྱིལ་འཁོར་དག་ནི་སེང་གེའོ། །ཆུའི་དཀྱིལ་འཁོར་ནི་ནམ་མཁའ་ལྡིང་ངོ༌། །དབང་ཆེན་གྱི་དཀྱིལ་འཁོར་དང་རི་རབ་ནི་འཕྲོག་བྱེད་རྣམ་པར་དག་པའོ། །རྟག་ཏུ་སྒོམ་པར་བྱེད་པའི་རྣལ་འབྱོར་པས་སེམས་ཅན་ཐམས་ཅད་གྱི་དོན་བྱེད་ནུས་པར་འགྱུར་རོ། །སྐྱེ་འགྲོ་ཐམས་ཅད་དགའ་བར་འགྱུར་རོ། །ཤེས་རབ་ཆེན་པོར་འགྱུར་རོ། །ནད་མེད་པར་འགྱུར་རོ། །ཉེ་བར་འཚེ་བ་མེད་པར་འགྱུར་རོ། །ནོར་ལ་སོགས་པ་དང་ལྡན་པར་འགྱུར་རོ། །དབང་དུ་བྱེད་པ་དང་དུག་གི་ལས་ལ་ནུས་པ་ཆེན་པོ་དང་ལྡན་པར་འགྱུར་རོ། །སྔགས་བཟླས་པ་ནི་བླ་མའི་གདམས་ངག་ལས་ཤེས་པར་བྱའོ། །
ཧ་རི་ཧ་རི་ཧ་རི་ལ་ཞོན་པར་གྱུར་པའི་འཇིག་རྟེན་དབང་ཕྱུག་གི་སྒྲུབ་ཐབས་རྫོགས་པའི་སངས་རྒྱས་ཀྱིས་གསུངས་པ་རྫོགས་སོ།།