བརྟན་པའི་འཁོར་ལོའི་སྒྲུབ་ཐབས།
བྷཱ་བ་སྐནྡྷ།
རྒྱ་གར་སྐད་དུ། སྠི་ར་ཙཀྲ་སཱ་དྷ་ནཾ། བོད་སྐད་དུ། བརྟན་པའི་འཁོར་ལོའི་སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །དཔལ་ལྡན་དབྱངས་ཅན་མ་ལུས་པ་ཡི་འཁྲུལ་པ་སྤངས་ཏེ་རབ་ཏུ་རྒྱས་ཤིང་འབར་བ་ཡི། །འོད་ཟེར་དཀར་པོ་གྱེན་དུ་འཕྲོ་ཞིང་དྲི་མེད་གཟུགས་ཅན་རྒན་ཡང་བྱིས་པའི་ཆ་ལུགས་ཅན། །འབར་བའི་རལ་གྲི་ཕྱག་ན་བསྣམས་ཤིང་འཕྱར་བའི་ཤེས་རབ་ལ་ནི་གུས་པར་རབ་ཏུ་འདུད། །བརྟན་པའི་འཁོར་ལོ་རིན་ཆེན་དེ་ནི་བདག་ཉིད་རྗེས་སུ་དྲན་ཕྱིར་རབ་ཏུ་བྲི་བར་བྱ། །ཀུན་མཁྱེན་ཡེ་ཤེས་རྒྱ་མཚོ་ནི། །ཕྱོགས་མཐའ་མེད་པར་རབ་ཏུ་བསམ། །རབ་སྐྲག་སེམས་ཅན་ཚོགས་མང་རྣམས། །ཡང་དག་ཡེ་ཤེས་བསྐྱབ་འདོད་པས། །ཡིད་བཞིན་ནོར་བུའི་སེམས་འབྱུང་བའི། །སྣ་ཚོགས་རྣམ་པས་དེ་རྣམས་མཆོད། །འཇིག་རྟེན་པ་རྣམས་བསྐྱབ་པའི་ཕྱིར། །བདག་གི་ལུས་འདི་དབུལ་བར་བགྱི། །དེ་ནས་དགེ་ལ་མངོན་པར་སྤེལ་ཕྱིར་འདིར་སྔགས་པས། །བདག་ནི་འཇིགས་པས་སྡིག་པ་ཐམས་ཅད་བཤགས་པར་བགྱི། །འགྲོ་བའི་དགེ་བ་རྣམས་ལ་དགའ་བས་རྗེས་ཡི་རང༌། །དཀོན་མཆོག་གསུམ་ལ་བདག་ནི་སྐྱབས་སུ་ཉེ་བར་མཆི། །ཡང་དག་སངས་རྒྱས་བྱང་ཆུབ་སེམས་ནི་བདག་གིས་གཟུང༌། །སླར་ཡང་འདི་ཡང་བརྩམ་པར་བྱ་སྟེ། གཟུང་དང་འཛིན་པ་སྤངས་ཤིང་འགྲོ་བ་འདི་ནི་རྨི་ལམ་དང་ནི་མིག་འཕྲུལ་ལྟ་བུ་སྟེ། །རྣམ་པར་དག་ཅིང་རང་བཞིན་འོད་གསལ་གྱུར་པ་དེ་ཡང་ནམ་མཁའ་ལྟ་བུར་རྣམ་པར་བརྟེན། །བདག་ཉིད་ཀྱང་ནི་ཡིད་ཀྱི་རོལ་པ་དག་ཏུ་བརྟགས་ཤིང་ཡང་དག་སྡུད་པར་ངེས་བྱས་ལ། །ཡང་ན་མུཿ་ཡིག་འོད་ཟེར་དྲ་བས་བསྐོར་བ་དེ་ལས་བྱུང་བ་དག་ནི་བསྒོམ་པར་བྱ། །དེ་དག་ཡོངས་སུ་གྱུར་ལས་ཡོངས་རྫོགས་དཀྱིལ་འཁོར་ཏེ། །ཁ་བའི་འོད་ཟེར་གུར་གུམ་འདེ་གུས་རབ་བྱུགས་པ། །དབྱངས་ཡིག་འབར་བའི་ཕྲེང་བ་མཉམ་པར་རབ་ཏུ་འཁྲིགས། །ཕྱོགས་སྒོ་གསལ་ཞིང་འབར་བར་རྣམ་པར་བསམ་པར་བྱ། །དེ་ནས་སླར་ཡང་མུཿཡིག་ས་བོན་ལས་བྱུང་བ། །འོད་ཀྱི་དཀྱིལ་འཁོར་དམར་པོ་རབ་ཏུ་རྣམ་བསྒོམ་བྱ། །ཀ་ཁ་ལ་སོགས་ཡི་གེ་མ་ལུས་ཡང་དག་བསྐོར། །སྟེང་དུ་ཤིན་ཏུ་འོད་གསལ་གུར་གུམ་ལྟ་བུར་དམར། །དེ་ལ་ཡང་ནི་སྔགས་པས་མུཿཡིག་བལྟ་བར་བྱ། །དེ་ལས་
བྱུང་བའི་ཡིད་འོང་འབར་བའི་འདབ་མ་སྟེ། །འབར་བའི་ཨུཏྤལ་སྔོན་པོ་འོད་ཀྱི་དྲ་བ་ཅན། །མུཿཡིག་རྣམ་པའི་ས་བོན་དབུས་སུ་རྣམ་པར་བསམ། །དེ་ལས་བྱུང་བའི་འོད་ཟེར་ལས་ནི་སངས་རྒྱས་སྤྲོས་པས་འགྲོ་རྣམས་རབ་ཏུ་འགེངས་པར་བྱེད། །ཟླ་བ་ལ་གནས་བུང་བའི་ཡན་ལག་ལྟ་བུའི་འོད་ཟེར་ཤིན་ཏུ་འབར་བའི་ལྕང་ལོ་ཅན། །ཤིན་ཏུ་མཐུག་པའི་མུན་པ་རབ་འཐིབས་ཞལ་གྱི་འོད་ཟེར་དྲ་བས་འཇོམས་ཤིང་མེད་པར་བྱེད། །རྣམ་ཀུན་མཆོག་ནི་རབ་ཏུ་སྦྱིན་བྱེད་ཆེད་དུ་བྱེད་པའི་དཔལ་ལྡན་དབྱངས་ཀྱི་དབང་ཕྱུག་སྟེ། །འགྱིང་དང་སྒེག་པའི་ཉམས་ཀྱིས་མངོན་པར་རོལ་བྱེད་པ། །ཞལ་གྱི་ཆུ་སྐྱེས་འཛུམ་ཞིང་རབ་ཏུ་བཞད་གྱུར་པ། །དཔའ་བོ་གཞོན་ནུའི་རྒྱན་ནི་རབ་ཏུ་འཆང་བ་པོ། །དེ་ཡི་གོ་འཕང་ཐོབ་པར་འདོད་པས་བསམ་པར་བྱ། །དེ་ལྟར་ངག་དབང་རྣམ་བསམས་ནས། །མུཿཡིག་སྙིང་གར་བསྒོམ་པར་བྱ། །ཁ་དོག་དམར་པོ་འབར་བའི་འོད། །འབྱུང་ཞིང་སྒྲོལ་མའི་དཀྱིལ་འཁོར་ལ། །དེ་ལས་སྐྱེས་པའི་རྩིབས་བརྒྱད་པའི། །འཁོར་ལོ་མི་ཤེས་མུན་པ་འཇོམས། །སྣ་ཚོགས་འོད་ཀྱིས་དག་པར་བྱ། །ཡེ་ཤེས་རང་བཞིན་ཁྱབ་བདག་བལྟ། །སྤྲུལ་པའི་ཉི་མས་མཚན་པའི་འོད། །སྒྲོན་མ་གསལ་བའི་འོད་ཚོགས་འདྲ། །མེ་ཏོག་དམར་པོའི་རྣམ་པ་ལྟར། །ཡི་གེ་དམར་པོ་ཀུན་དུ་བཀྲམ། །དེ་ལ་རེ་ཞིག་འཁོར་ལོའི་རྩིབས་རྣམས་སུ་ཡི་གེ་བསམ་པར་བྱ་སྟེ། ཤར་དང༌། ལྷོ་དང༌། ནུབ་དང༌། བྱང་ཕྱོགས་རྣམས་སུ་གོ་རིམས་བཞིན་དུ་ཨ་ར་པ་ཙའོ། །ན་ཡིག་ནི་ལྟེ་བར་རོ། །མེ་དང་བདེན་བྲལ་དང༌། །རླུང་དང་དབང་ལྡན་རྣམས་སུ་སྔོན་མ་བཞིན་དུ་ནི་བྲཿབཉྩཱ་ཞེས་སོ། །དེ་བཞིན་དུ་བར་བར་རྣམས་སུ་ཨ་ལ་སོགས་པའི་དབྱངས་ཀྱི་ཚོགས་རྣམས་དང་ཕྱི་རོལ་དུ་ནི་ཀ་ཡིག་ལ་སོགས་པའི་གསལ་བྱེད་རྣམས་སོ། །འདི་མི་གཡོ་བར་ངེས་པར་བྱས་ལ་ཕྱིས་འཁོར་ལོའི་ཡི་གེའི་ཚོགས་ཀྱི་འོད་ཟེར་གྱིས་སེམས་ཀྱི་མུན་པའི་དཀྱིལ་འཁོར་འཇོམས་པ་རང་གི་ལུས་ཀྱི་བ་སྤུའི་ཁུང་བུ་རྣམས་ནས་ཕྱིར་བྱུང་སྟེ། ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་དེ་བཞིན་གཤེགས་པ་རྣམས་ཀྱི་ཐུགས་ཀྱི་ཡེ་ཤེས་ཀྱི་བདུད་རྩི་དང་ལྷན་ཅིག་རོ་གཅིག་ཏུ་མཉམ་པར་གྱུར་ནས། དེ་རྣམས་སླར་ལོག་སྟེ་བ་སྤུའི་བུ་ག་དེ་ཉིད་དུ་རབ་ཏུ་ཞུགས་ནས་རང་གི་ལུས་པོ་
གསལ་བར་བྱེད་པར་ཡུན་རིང་དུ་བསམ་པར་བྱའོ། །བརྟན་པའི་སེམས་ཀྱིས་ཡང་ཕྱི་ནས་སྤྲོ་བ་དང་བསྡུས་པའི་རིམ་པས་ཇི་སྲིད་མངོན་སུམ་དུ་མ་གྱུར་པ་དེ་སྲིད་དུ་བསྒོམ་པར་བྱའོ། །འཇམ་དཔལ་དང་ནི་གཉིས་མེད་གོ་འཕང་འཆང་ཞིང་ཡི་གེ་དང་བཅས་ཡིད་ལ་འདོད་བྱེད་པ། །འདིར་ནི་འཁོར་ལོ་གསལ་པོར་ཉེ་བར་བསྐོར་ཞིང་ཉིན་དང་མཚན་མོ་བསམ་གཏན་བྱེད་པར་མངོན་སྦྱོར་བས། །དེ་ཡིས་སྔོན་མ་མཐོང་བའི་ངག་གི་རང་བཞིན་གྲངས་མེད་རིག་པའི་ཚོགས་ནི་མ་ལུས་དེ་ཡང་ནི། །ཇི་ལྟར་འདོད་པས་ཡིད་ནི་རབ་ཏུ་འཇུག་ཕྱིར་ནོར་བུའི་འོད་ལྟར་རབ་གསལ་མུན་པ་སྟུག་པ་འཇོམས། །འཁོར་ལོ་འདི་ནི་ཕན་པར་ཤེས་ནས་ཡིད་བྱེད་པའི། །ངོ་མཚར་ཆེད་དུ་ཡང་ནི་རབ་ཏུ་བརྟག་པར་གྱིས། །ཡོངས་སུ་བརྟགས་པས་བདེ་གཤེགས་རང་གི་ངོ་བོ་ཉིད། །རིང་པོར་མི་ཐོགས་པར་ནི་རབ་ཏུ་རྟོགས་པར་འགྱུར། །གང་འདིར་འཁོར་ལོ་རྣམ་པར་བཀོད་པའི་བསོད་ནམས་ཅི་སྐྱེས་པ། །བདག་དང་སྐྱེ་འགྲོའི་ཡིད་རྣམས་འཁོར་ལོ་དེ་ཡིས་གསལ་བར་ཤོག །འཆར་ཀའི་ཉི་མ་ལྟ་བུས་གཏི་མུག་མུན་ཚོགས་འདིར་བཅོམ་ནས། །འགྲོ་ཚོགས་འདི་ནི་ངག་དབང་དཔལ་གྱི་རོལ་བར་འགྲོ་བར་ཤོག །བརྟན་པའི་འཁོར་ལོའི་སྒྲུབ་ཐབས་སློབ་དཔོན་བྷཱ་བ་སྐནྡྷས་མཛད་པ་རྫོགས་སོ།།