ངག་གི་རྒྱལ་པོའི་སྒྲུབ་ཐབས།
རྒྱ་གར་སྐད་དུ། བཱ་གཱི་རཱ་ཛ་སཱ་དྷ་ནཾ། བོད་སྐད་དུ། ངག་གི་རྒྱལ་པོའི་སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །གཞོན་ནུའི་རྣམ་པར་མཛད་པ་ཡིས། །འཇིག་རྟེན་རྗེས་སུ་འཛིན་མཛད་པ། །དེ་བཞིན་ཉིད་ཀྱི་ལམ་སྟོན་པའི། །འཇམ་པའི་དབྱངས་ལ་ཕྱག་འཚལ་ལོ། །འཇམ་དཔལ་གྱི་རྟོག་པ་ལས་གསུངས་པའི་ཆོ་གས་ངག་གི་རྒྱལ་པོའི་སྒྲུབ་ཐབས་བཤད་པར་བྱའོ། །དང་པོ་རེ་ཞིག་ཟུར་བཞི་སྒོ་བཞི་པ། རིན་པོ་ཆེ་སྣ་ཚོགས་པས་བརྒྱན་ཅིང་བླ་བྲེས་ཀྱིས་མཛེས་པར་བྱས་པ། མུ་ཏིག་གི་རང་བཞིན་གྱིས་རྒྱལ་མཚན་དང་བ་དན་ལ་སོགས་པས་བརྒྱན་པའི་གཞལ་ཡས་ཁང་རྣམ་པར་བསམས་ནས། དེ་ལ་དབུས་སུ་དར་གྱི་གདན་ལ་དེའི་སྟེང་དུ་ཉེ་བར་འདུག་སྟེ། དེ་ནས་བྱང་ཆུབ་ཏུ་སེམས་བསྐྱེད་པར་བྱ་སྟེ། སེམས་ཅན་དང་སེམས་ཅན་གྱི་རྒྱུད་ཀྱིས་བཟུང་བ་ཇི་སྙེད་པ་དེ་རྣམས་ཐམས་ཅད་འཇམ་དཔལ་གྱི་ཡེ་ཤེས་ལ་རབ་ཏུ་དགོད་པར་བྱའོ་ཞེས་སོ། །གང་ཡང་སྐད་ཅིག་གིས་མི་རྟག་པ་དང༌། བདག་མེད་པ་དང༌། སེམས་ཅན་གྱི་སྡུག་བསྔལ་རྣམས་རྨི་ལམ་དང༌། མིག་འཕྲུལ་ལྟ་བུ་དང༌། གཟུགས་བརྙན་ཙམ་སྟེ། གདོད་མ་ནས་ཞི་བ། རང་བཞིན་གྱིས་ཡོངས་སུ་དག་པ། ངོ་བོ་ཉིད་མེད་པ་ལས་སྐྱེས་ཤིང་སྐྱེ་བ་མེད་པ་ཡང་དག་པའི་མཐའི་དེ་བཞིན་ཉིད་དུ་གྱུར་པ་ཆོས་ཐམས་ཅད་སྟོང་པའོ་ཞེས་སྟོང་པ་ཉིད་དུ་ལྷག་པར་གསུངས་ཏེ། སེམས་ཅན་འདི་རྣམས་སྲེད་པའི་དབང་གིས་མ་རིག་པས་མདོངས་ཤིང་ལས་ཀྱི་རྣམ་པར་སྨིན་པ་མི་མཐོང་བ་དེ་རྣམས་ལ་རྟེན་ཅིང་འབྲེལ་བར་འབྱུང་བ་ཟབ་མོའི་ལས་ཀྱི་བྱ་བ་ལ་ཞུགས་ནས་བདག་གིས་ཆོས་བསྟན་པར་བྱའོ་ཞེས་སྙིང་རྗེའི་ཕྱིར་ཡང་ལྷག་པའི་ཚིག་གོ །དེའི་ཕྱིར་བཅོམ་ལྡན་འདས་ཀྱིས་འདུས་པ་ལ་སོགས་པ་གསུངས་ཏེ། སྟོང་པ་ཉིད་དང་སྙིང་རྗེ་དབྱེར་མེད་པར་
བྱང་ཆུབ་ཀྱི་སེམས་ཤེས་པར་བྱ་སྟེ། འདིར་བྱང་ཆུབ་ཀྱི་སེམས་བསྐྱེད་པར་བྱ་བ་ལས་བསྐྱེད་པ་ནི་བྱང་ཆུབ་སེམས་དཔའ་ཞེས་གསུངས་སོ། །དེ་ནས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཡིད་ཀྱིས་དེ་བཞིན་དུ་མཆོད་པར་བྱའོ། །དེ་ནས་རང་གི་སྙིང་གར་ཧཱུཾ་ཡིག་ཁ་དོག་དམར་པོ་ཉི་མ་བྱེ་བ་འབུམ་བརྒྱ་སྟོང་གི་འོད་འབར་བའི་བདག་ཉིད་ཡེ་ཤེས་ཀྱི་སྐུར་བལྟ་བར་བྱ་སྟེ། དེས་དེ་བཞིན་དུ་ཉི་མའི་དཀྱིལ་འཁོར་བསྒོམས་ནས་དེའི་སྟེང་དུ་ཟླ་བའི་དཀྱིལ་འཁོར་ལ་གུར་གུམ་གྱི་མདོག་ལྟ་བུ་དེ་ལ་ཡི་གེའི་མཆོག་དཔག་ཏུ་མེད་པའི་བསོད་ནམས་བྱེ་བ་བརྒྱ་སྟོང་ངེས་པར་མཾ་གི་ཡི་གེ་ཁ་དོག་ལྔ་དང་ཡང་དག་པར་ལྡན་པ་ནམ་མཁའི་ཕྱོགས་ཀྱི་མཐར་ཐུག་པར་བལྟའོ། །དེ་ནས་ཡེ་ཤེས་སྤྲོས་པས་ཡང་དག་པར་བསྐུལ་ཏེ། བཅོམ་ལྡན་འདས་འཇམ་དཔལ་གསེར་བཙོ་མའི་མདོག་ལྟ་བུ། གཞོན་ནུ་ཟུར་ཕུད་ལྔ་པ། ཆོས་ཀྱི་འཁོར་ལོའི་ཕྱག་རྒྱ་དང་ཡང་དག་པར་ལྡན་པ། ཤེས་རབ་ཀྱི་ཕ་རོལ་ཏུ་ཕྱིན་པས་བརྒྱན་པའི་ཨུཏྤལ་སྔོན་པོ་བསྣམས་པ། སེང་གེའི་སྟེང་ན་རོལ་པའི་སྟབས་ཀྱིས་བཞུགས་པ། རྒྱན་ཐམས་ཅད་ཀྱིས་བརྒྱན་པ། སྒེག་ཅིང་འོད་ཟེར་རྒྱ་མཚོའི་རླབས་ཀྱིས་ཁམས་གསུམ་ཀུན་ནས་འགེངས་པར་མཛད་པ། རྟག་ཏུ་ལེགས་སྦྱར་གྱི་ཚིགས་སུ་བཅད་པ་དང་རྐྱང་པ་དཔག་ཏུ་མེད་པ་ལེགས་པར་སྦྱོར་ཞིང་གསུང་པའི་སྒྲས་ཆོས་སྟོན་པར་མཛད་པའོ། །སྤྲོ་བ་དང་བསྡུ་བ་སྔོན་དུ་འགྲོ་བས་དགུག་གཞུག་བྱས་ནས། ཨོཾ་མཉྫུ་བཛྲ་ཧཱུཾ་ཞེས་པའི་སྔགས་འདིས་བརྟན་པར་བྱས་ནས་འཇམ་པའི་རྡོ་རྗེའི་ང་རྒྱལ་བསྒོམ་པར་བྱའོ། །དེ་ནས་བསྒོམས་པས་ངལ་ན་སྔགས་བཟླས་པར་བྱའོ། །ཨོཾ་མཉྫུ་བཛྲ་ཧཱུཾ། བཅོམ་ལྡན་འདས་ཀྱི་ཆོ་ག་འདིས་མཁས་པས་སྤྱོད་ལམ་གཙང་མ་ཕུན་སུམ་ཚོགས་པས་འབུམ་ཕྲག་བདུན་བཟླས་པར་བྱའོ། །ངག་གི་རྒྱལ་པོའི་སྒྲུབ་ཐབས་རྫོགས་སོ།།