རྗེ་བཙུན་འཕགས་པ་འཇམ་དཔལ་བསྒོམ་པའི་མན་ངག།
རྒྱ་གར་སྐད་དུ། ཨཱཪྻ་མཉྫུ་ཤྲཱི་བྷཊྚཱ་ར་ཀ་བྷཱ་བ་ནོ་པ་དེ་ཤ་།བོད་སྐད་དུ། རྗེ་བཙུན་འཕགས་པ་འཇམ་དཔལ་བསྒོམ་པའི་མན་ངག་འཕགས་པ་འཇམ་དཔལ་ལ་ཕྱག་འཚལ་ལོ། །དབུས་སུ་འཇམ་དཔལ་སྐུ་མདོག་དམར་པོ་དགོད་པར་བྱའོ། །མདུན་དུ་དྲ་བ་ཅན་གྱི་འོད་སྐུ་མདོག་ལྗང་གུ་ར་ཡིག་ལས་སོ། །གཡས་སུ་སྐྲ་ཅན་མ་སྐུ་མདོག་དམར་མོ་པ་ཡིག་ལས་སོ། །རྒྱབ་ཏུ་ཟླ་འོད་སྐུ་མདོག་ཟླ་བ་ལྟ་བུ་ཙ་ཡིག་ལས་སོ། །གཡོན་དུ་ན་ཡིག་ལས་ཉེ་བའི་སྐྲ་ཅན་མ་སྐུ་མདོག་དམར་མོ་བསྒོམ་པར་བྱའོ། །ཕྱག་ན་མཆོག་སྦྱིན་དང་ཨུཏྤ་ལ་ནི་འཇམ་དཔལ་གྱིའོ། །ཕྱག་གཡོན་ན་པདྨ་བསྣམས་ཤིང་གཡས་མཆོག་སྦྱིན་ནི་དྲ་བ་ཅན་གྱི་འོད་དོ། །ཨུཏྤལ་དང་མཆོག་སྦྱིན་གྱི་ཕྱག་རྒྱ་ནི་ཉེ་བའི་སྐྲ་ཅན་མའོ། །མཆོག་སྦྱིན་དང་པདྨའི་ཕྱག་ནི་ཟླ་འོད་དོ། །པདྨ་དམར་པོ་བསྣམས་ཤིང་མཆོག་སྦྱིན་གྱི་ཕྱག་ནི་སྐྲ་ཅན་མའོ། །ལྟེ་བའི་སྟེང་དུ་འཁོར་ལོ་རྩིབས་བརྒྱད་པ་འཁོར་བཞིན་པ་མེའི་འོད་དང་མཚུངས་པའོ། །དེའི་སྟེང་དུ་ཟླ་བའི་དཀྱིལ་འཁོར། དེའི་སྟེང་དུ་འཁོར་ལོ་རྩིབས་བཞི་པའོ། །འཁོར་ལོའི་བར་དུ་ཡི་གེ་གཞན་རྣམས་བསྒོམ་པར་བྱའོ། །དེ་བཞིན་དུ་སྔགས་ཀྱི་ཡི་གེ་རྣམས་ལྷ་རྣམས་ཀྱི་གཟུགས་སོ། །དེ་རྣམས་ཀྱི་ཐུགས་ཀར་ཡི་གེ་གཞན་རྣམས་དེ་བཞིན་དུའོ། །དེ་ནས་ཡི་གེ་མཐའ་དག་ཡོན་ཏན་ཀུན་གྱི་རོ་དང་ལྡན་པས་ཕྱོགས་བཅུ་ཇི་སྙེད་པ་རྣམས་ཁྱབ་པར་བལྟ་བར་བྱའོ། །རྗེ་བཙུན་འཕགས་པ་འཇམ་དཔལ་བསྒོམ་པའི་མན་ངག་རྫོགས་སོ།།