འཕགས་པ་དཔའ་བོ་གཅིག་ཏུ་གྲུབ་པའི་སྒྲུབ་ཐབས།
རྒྱ་གར་སྐད་དུ། ཨཱཪྻ་སིདྡྷེ་ཀ་བཱི་ར་སཱ་དྷ་ནཾ། བོད་སྐད་དུ། འཕགས་པ་དཔའ་བོ་གཅིག་ཏུ་གྲུབ་པའི་སྒྲུབ་ཐབས། དཔལ་ལྡན་འཇམ་དཔལ་དབྱངས་ལ་ཕྱག་འཚལ་ལོ། །འོད་གསལ་སྟོན་ཀའི་ཟླ་བ་མཚུངས། །འཇམ་དཔལ་རྡོ་རྗེ་ལ་ཕྱག་འཚལ། །དེ་ཡི་སྒྲུབ་ཐབས་གསལ་པོ་མཆོག །མདོར་བསྡུས་བདག་གིས་བརྗོད་པར་བགྱི། །དང་པོར་རེ་ཞིག་སྔགས་པས་ཡིད་དང་མཐུན་ཞིང་གཙང་བའི་ས་ཕྱོགས་སུ་སྟན་བདེ་བའི་དབུས་སུ་འདུག་སྟེ། རང་གི་སྙིང་གར་ཨ་ཡིག་ལས་བྱུང་བའི་ཟླ་བ་ལ་མཾ་དཀར་པོ་དེ་ཉིད་དགོད་པར་བྱའོ། །དེའི་འོད་ཟེར་གྱིས་ནམ་མཁའ་གང་བས་བཅོམ་ལྡན་འདས་དང་བླ་མ་རྗེ་བཙུན་ནམ་མཁའ་ལ་བལྟས་ཏེ། དེ་ནས་བཅོམ་ལྡན་འདས་ཀྱི་མདུན་དུ་འདུག་ལ་ཡིད་ཀྱིས་རང་བཞིན་གྱི་མཆོད་པས་འཇམ་དཔལ་དང་བླ་མ་རྗེ་བཙུན་ཡང་མཆོད་ཅིང་ཕྱག་བཙལ་ནས་དགེ་བ་སྤེལ་བའི་དོན་དུ་དེང་ནས་སྡིག་པ་ཐམས་ཅད་བདག་གིས་སོ་སོར་བཤགས་སོ། །བསོད་ནམས་ཐམས་ཅད་ལ་རྗེས་སུ་ཡི་རང་ངོ༌། །དེ་ཡང་བླ་ན་མེད་པའི་སངས་རྒྱས་ཀྱི་བྱང་ཆུབ་ཏུ་བདག་གིས་ཡོངས་སུ་བསྔོ་བར་བགྱིའོ། །བྱང་ཆུབ་མ་ཐོབ་ཀྱི་བར་དུ་སངས་རྒྱས་དང་ཆོས་དང་དགེ་འདུན་རྣམས་ལ་སྐྱབས་སུ་མཆིའོ། །ཡང་དག་པའི་བྱང་ཆུབ་ཏུ་སེམས་བསྐྱེད་པར་བགྱིའོ། །དེ་ནས་
བཅོམ་ལྡན་འདས་ཀྱི་ས་བོན་ལྷན་ཅིག་ཏུ་གྱུར་པར་བལྟའོ། །བརྟན་པ་དང་གཡོ་བའི་ཁམས་གསུམ་པོ་ཐམས་ཅད་རྟེན་ཅིང་འབྲེལ་པར་འབྱུང་བ་རྣམ་པར་དཔྱད་མི་བཟོད་པ་རྨི་ལམ་དང༌། སྒྱུ་མ་དང༌། གཟུགས་བརྙན་ལྟ་བུར་བལྟ་ཞིང་རང་བཞིན་གྱིས་འོད་གསལ་བ་ཡོངས་སུ་དག་པ་འབའ་ཞིག་གི་བདག་ཉིད་དུ་བསྒོམ་པར་བྱའོ། །ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ་ཞེས་པ་འདིས་བརྟན་པར་བྱའོ། །ཡང་ན་སྨོན་ལམ་གྱི་སྟོབས་ལས་བྱུང་བའི་ཟླ་བ་ལ་མཾ་ཡིག་དཀར་པོ་བལྟས་ཏེ། དེའི་འོད་ཟེར་འཕྲོས་པས་འཇམ་དཔལ་རྡོ་རྗེ་བདག་ཉིད་ལ་རབ་ཏུ་ཞུགས་ཏེ། མཾ་ལས་བྱུང་བར་བསྒོམ་མོ། །སྟོན་ཀའི་ཟླ་བའི་རྣམ་པ་ཅན། ཟུར་ཕུད་ལྔ་དང་ལྡན་པ། རྒྱན་ཐམས་ཅད་ཀྱིས་བརྒྱན་པ། ཕྱག་གཡོན་ན་ཨུཏྤ་ལ་སྔོན་པོ་བསྣམས་པ། ཕྱག་གཡས་པས་མཆོག་སྦྱིན་མཛད་པ། སྣ་ཚོགས་པདྨ་དང་ཟླ་བའི་གདན་ལ་རྡོ་རྗེ་སྐྱིལ་ཀྲུང་གིས་བཞུགས་པའོ། །དེ་ནས་རང་གི་སྙིང་གར་ཟླ་བ་ལ་མཾ་ནོར་བུ་ཆུ་ཤེལ་གྱི་འོད་ལྟ་བུ་འོད་ཟེར་རྣམས་ཀྱིས་ནམ་མཁའི་ཁོང་ན་གནས་པའི་འགྲོ་བ་རྣམས་ཀྱི་དོན་བྱེད་པ་གསལ་བཞིན་པ་ཇི་སྲིད་སྐྱོ་བར་མ་གྱུར་པད་སྲིད་དུ་བསྒོམ་པར་བྱའོ། །བསྒོམས་པས་སྐྱོ་ན་སྔགས་བཟླས་པར་བྱའོ། །ཨོཾ་བཱ་ཀྱཻ་དཾ་ན་མཿཉེ་བའི་སྙིང་པོ་ཡང་བཟླས་པར་བྱའོ། །ཨོཾ་ཧྲཱི་ཧཱུཾ་དེ་ནས་ཡི་གེ་བརྒྱ་པ་བཟླས་ནས་འཇམ་པའི་རྡོ་རྗེའི་ང་རྒྱལ་བྱས་ཏེ་ལངས་ལ་ཡང་དེ་བཞིན་དུ་གནས་པར་བྱའོ་ཞེས་སོ། །ཟླ་བ་དྲུག་གིས་ངག་གི་དབང་ཕྱུག་འགྲུབ་པར་འགྱུར་རོ། །རྟག་ཏུ་གོམས་པའི་སྦྱོར་བས་སྐྱེ་བ་འདི་ལ་སངས་རྒྱས་ཉིད་ཀྱང་འགྲུབ་པར་འགྱུར་རོ། །དེ་ལྟར་བསམ་གཏན་ལ་གནས་པས་སྔོན་དུ་བསྙེན་པ་འབུམ་ཕྲག་བརྒྱད་བཟླས་ནས་རལ་གྲི་ལ་སོགས་པའི་དངོས་གྲུབ་བསྒྲུབ་པར་བྱའོ། །དེ་ལ་ཟླ་བ་གཟས་ཟིན་པའམ། ཉི་མ་གཟས་ཟིན་པ་ལ་ཁབ་ལེན་གྱི་ལྕགས་ལས་བརྡུངས་པའི་རལ་གྲི་ལག་པས་བཟུང་སྟེ་ཟླ་བ་ལ་བལྟས་ནས་ཇི་སྲིད་གྲོལ་བར་མ་གྱུར་པ་དེ་སྲིད་དུ་བཟླས་པ་བྱས་པས་རལ་གྲིའི་རིག་པ་འཛིན་པར་འགྱུར་རོ། །དེ་བཞིན་དུ་རྡོ་རྗེ་དང༌། འཁོར་ལོ་དང༌། རྩེ་གསུམ་དང༌། ཐོ་བ་དང༌། ཞགས་པ་དང༌། ལྕགས་ཀྱུ་ལ་སོགས་པ་དང༌། མིག་སྨན་དང༌། རྐང་མགྱོགས་དང༌། ཐིག་ལེ་དང༌། དབང་དུ་བྱ་བའི་རྫས་ལ་སོགས་པ་བསྒྲུབ་པར་བྱའོ། །
རིག་པ་འཛིན་པ་དང༌། བཅུད་ལེན་དང༌། ལེགས་པར་སྦྱར་བ་རྣམས་བསྒྲུབ་པར་བྱའོ། །འོ་ཐུག་གི་བཟའ་བ་དང༌། ཞོའི་བཟའ་བ་དང༌། མར་དང་བཅས་པའི་ཤ་ཀ་རས་སྣོད་བཀང་སྟེ། ལག་པས་བཀབ་ལ་བཟླས་པ་བྱས་ལ་བཟའ་པར་བྱའོ། །ལོ་ལྔ་བརྒྱ་རུ་འཚོ་བར་འགྱུར་རོ། །སྲན་མ་ཥ་ཁར་བཅུག་ལ་བཟླས་པར་བྱའོ། །མྱུ་གུ་འབྱུང་བར་འགྱུར་རོ། །དེ་མིད་ན་ཚིགས་བཅད་ལ་མཁས་པར་འགྱུར་རོ། །ཐོས་པ་འཛིན་པར་འགྱུར་བ་དང༌། ངག་དང་ལྡན་ཞིང་བློ་རྣོ་བར་འགྱུར་རོ། །བིལ་བ་རྣམས་ཀྱི་སྦྱིན་སྲེག་འབུམ་ཕྲག་གཅིག་བྱས་ན་འཇིག་རྟེན་གསུམ་གྱི་རྒྱལ་པོ་འགྲུབ་པར་འགྱུར་རོ། །ཇི་ལྟར་རྙེད་པའི་མེ་ཏོག་དཀར་པོས་སྦྱིན་སྲེག་འབུམ་ཕྲག་བཞི་བྱས་ན་ངག་གི་གྲུབ་པ་ཐོབ་སྟེ། ངག་གི་དབང་ཕྱུག་དང་མཚུངས་པར་འགྱུར་རོ། །མར་དང་འབྲུ་དམར་པོ་ལྔའི་སྦྱིན་སྲེག་བྱས་ན་འབུམ་ཕྲག་བཞི་ཙམ་གྱིས་གནོད་སྦྱིན་མོ་འགུགས་པར་འགྱུར་རོ། །ས་འོག་གི་གཞོན་ནུ་མ་ཡང་ངོ༌། །བྲཧྨའི་ཕྱེ་མ་སོར་བཞི་ཙམ་ལ་བརྒྱ་རྩ་བརྒྱད་མངོན་པར་བསྔགས་ལ་ནང་པར་སྔ་བར་དཀྱིལ་འཁོར་བྱས་ལ་ཇི་ལྟར་འབྱོར་པས་བཅོམ་ལྡན་འདས་ལ་མཆོད་ལ་མར་རམ་ཀཉྫི་བཏུང་བར་བྱའོ། །ཤུ་དག་ཞོ་ཕྱེད་ཀྱི་ཚད་ལ་དེ་བཞིན་དུ་མངོན་པར་བསྔགས་ལ་མར་རམ་འོ་མའམ་མར་ཁུ་དང༌། ཟླ་བ་གཅིག་ཏུ་བཏུང་བར་བྱའོ། །དིག་པ་དང༌། ལྐུགས་པ་དང༌། ལྡིབ་པ་རྣམས་རྣམ་པར་ཉམས་པར་བྱེད་དོ། །ཟླ་བ་དྲུག་ན་གཞན་ཡང་མ་ཐོས་པའི་བསྟན་བཅོས་རྣམས་ཀྱང་མངོན་དུ་འགྱུར་རོ། །རྨོངས་པ་རྣམ་པར་ཉམས་པར་འགྱུར་ཞིང་ཐོས་པ་འཛིན་པར་འགྱུར་རོ། །ཁུ་བྱུག་ལྟར་དབྱངས་སྙན་པར་འགྱུར་བ་དང༌། ངག་གསལ་པོར་འགྱུར་རོ། །འཕགས་པ་འཇམ་དཔལ་རྡོ་རྗེ་དཔའ་བོ་གཅིག་ཏུ་གྲུབ་པའི་སྒྲུབ་ཐབས་རྫོགས་སོ།།