ཆོས་ཀྱི་དུང་གི་ཏིང་ངེ་འཛིན་འཇམ་དཔལ་གྱི་སྒྲུབ་ཐབས།
རྒྱ་གར་སྐད་དུ། དྷརྨཱ་ཤཾ་ཁ་ས་མཱ་དྷི་མཉྫུ་ཤྲཱི་སཱ་དྷ་ནཾ། བོད་སྐད་དུ། ཆོས་ཀྱི་དུང་གི་ཏིང་ངེ་འཛིན་འཇམ་དཔལ་གྱི་སྒྲུབ་ཐབས། འཕགས་པ་འཇམ་དཔལ་ལ་ཕྱག་འཚལ་ལོ། །དེ་ལ་འདིར་ཆོས་ཀྱི་དུང་གི་ཏིང་ངེ་འཛིན་ནི་ཆུའི་དཀྱིལ་འཁོར་ཟླུམ་པོ་དཀར་པོའི་སྟེང་དུ་གེ་སར་དང་བཅས་པའི་པདྨ་འདབ་མ་བརྒྱད་པའི་ཟེའུ་འབྲུ་ལ་འཆི་བ་འཇོམས་ཤིང་ཆོས་ཐམས་ཅད་གསལ་བར་མཛད་པའི་ཕྱིར་མཾ་ཡིག་གི་ས་བོན་ལས་སྐྱེས་པའི་སྐུ་མདོག་དཀར་པོ་ཕྱག་གཉིས་པ་རྡོ་རྗེ་སྐྱིལ་མོ་ཀྲུང་གི་སྟེང་ན་ཏིང་ངེ་འཛིན་གྱི་ཕྱག་རྒྱ་དང་ལྡན་པ། གཞོན་ནུ་རྒྱན་དང་ལྡན་པ། ཟུར་ཕུད་ལྔ་དང་ལྡན་པ་གསལ་ཞིང་དྲི་མ་མེད་པའི་ཡེ་ཤེས་ཀྱི་རང་བཞིན་འཇམ་དཔལ་གྱི་སྐུར་བདག་ཉིད་བསྒོམ་པར་བྱའོ། །རང་གི་སྙིང་གར་ཟླ་བའི་སྟེང་དུ་པདྨ་ལ་བཾ་ཡིག་ལས་སྐྱེས་པའི་དུང༌། དེའི་དབུས་སུ་ཨོཾ་བཛྲ་ཛི་ཧྭ་རཾ་ཞེས་པས་ལྕེ་རྡོ་རྗེའི་ལྕེའི་སྟེང་དུ་རིན་པོ་ཆེ་དང་པདྨ་ལ་ཏིང་ངེ་འཛིན་དང་ཡང་དག་པར་ལྡན་པའི་སངས་རྒྱས་འོད་དཔག་མེད། དེའི་སྟེང་དུ་རྐན་ལ་བཾ་ཡིག་མགོ་ཐུར་དུ་བསྟན་པ་བདུད་རྩིའི་ཐིག་ལེ་འབབ་བཞིན་པའོ། །དེ་བཞིན་དུ་གོ་རིམས་བཞིན་དུ་ཟླ་བ་ཕྱེད་དང༌། ཟླ་བ་དང་ཟླ་བ་དྲུག་གིས་མཐར་ཐུག་པ་བསྒོམ་པར་བྱའོ། །དངོས་གྲུབ་ཀྱི་མཚན་མ་མཐོང་ནས་དཀྱིལ་འཁོར་བྲི་བར་བྱའོ། །དེ་ལ་ཕྱི་རུ་ཟུར་བཞི་པ་སྒོ་བཞི་པ་སྒོ་རྐྱང་དང་ལྡན་པའོ། །སྒེག་མོ་མ་དང༌། ཕྲེང་བ་མ་དང༌། གླུ་མ་དང༌། གར་མ་དང༌། མེ་ཏོག་མ་དང༌། བདུག་སྤོས་མ་དང༌། མར་མེ་མ་དང༌། དྲི་ཆབ་མ་རྣམས་དཀྱིལ་འཁོར་གྱི་ཕྱིར་དགོད་པར་བྱའོ། །དེའི་ནང་དུ་སྒོ་མེད་པའི་རེ་ཁཱ་དཀར་པོ་ཟླུམ་པོ་ཅིག་བྲི་བར་བྱའོ། །དེའི་དབུས་སུ་པདྨ་དཀར་པོ་དེ་བཞིན་དུ་བྲིས་ནས་སྨིན་དྲུག་དང༌། དབོ་དང་ས་ག་ལ་སོགས་པའི་ཟླ་བ་གང་བ་ལ་ཞལ་ཟས་ལ་སོགས་པའི་མཆོད་པ་སྔོན་དུ་འགྲོ་བས་གཏོར་མ་ཕུལ་ནས། ཏིང་ངེ་འཛིན་དང་ལྡན་པས་དཀྱིལ་འཁོར་གྱི་དབུས་སུ་རྡོ་རྗེ་སྐྱིལ་ཀྲུང་གིས་ཉེ་བར་བཞུགས་པའི་འཇམ་དཔལ་གྱི་སྐུ་ལ་ཡོངས་སུ་བསྐོར་བའི་འོད་དཔག་མེད་ཀྱི་སྐུའི་བདག་ཉིད་ཆོས་ཀྱི་དབྱིངས་དང་མཚུངས་པའི་འོད་གསལ་བ་བསྒོམ་པར་བྱའོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་ཕྱག་རྒྱས་ཕྱོགས་ཐམས་ཅད་ནས་བྱོན་ཏེ་རང་གི་ལུས་ངག་ཡིད་རྣམས་ལ་རབ་ཏུ་བཞུགས་ཏེ་བརྟན་པར་གྱུར་ནས་སེམས་བརྟན་པར་བྱའོ། །
རང་གི་སྙིང་གར་ཟླ་བ་དང་པདྨ་ལ་གནས་པའི་དུང་གསལ་པོ་བལྟ་བར་བྱའོ། །དེ་ལ་ཡི་གེའི་རང་བཞིན་ཐམས་ཅད་ཀྱིས་ཡོངས་སུ་བསྐོར་ཞིང་གནས་པའི་གེ་སར་གྱི་ཐིག་ལེ་ལས་ངག་གི་རྡུལ་ཕྲ་རབ་མགྲིན་པའི་ཕྱོགས་ནས་ཐོབ་པའི་དབྱངས་ཀྱི་གཟུགས་སུ་འགྱུར་རོ། །དབྱངས་ལ་སྒྲ་ལས་ཡི་གེའི་གཟུགས་ཉིད་ལྕེ་ལས་བྱུང་ཞིང་རྡོ་རྗེའི་རྣམ་པས་རིམ་པ་བཞིན་དུ་ནམ་མཁའ་མ་ལུས་པ་གསལ་བར་མཛད་པས་ནམ་མཁའ་ཐམས་ཅད་དུ་འཕྲོས་པའི་སྒྲིབ་པ་དང་བྲལ་བའི་དབྱངས་བཅུ་དྲུག་གི་རྣམ་པར་བལྟ་བར་བྱ་ཞིང༌། དབྱངས་ཀྱིས་ནམ་མཁའ་གང་བའོ། །ཨོཾ་ཝཱ་ཀྱཻ་དཾ་ན་མཿཞེས་པའི་སྔགས་བཟླས་པར་བྱའོ། །སྐྱིལ་མོ་ཀྲུང་མ་བཤིག་པར་མཚན་མོ་རིལ་པོ་བཟླས་པས་དངོས་གྲུབ་ཀྱི་མཚན་མར་འགྱུར་ཏེ། ལྕེ་ལ་འོད་ཟེར་འཕྲོ་བར་འགྱུར་རོ། །གྲུབ་པ་བརྒྱད་ཅུའི་སྒྲ་ཡང་ཐོས་པར་འགྱུར་རོ། །མཆུ་དང་སོ་རྣམས་ལས་ཀྱང་སྣ་ཚོགས་པའི་འོད་ཟེར་འཕྲོ་བར་འགྱུར་རོ། །དེ་ནས་དེ་ལྟ་བུ་ལ་སོགས་པའི་ཇི་ལྟར་སེམས་པའི་ཚིག་དང་ཚིགས་སུ་བཅད་པའི་ཚིག་དང༌། ཚིགས་བཅད་དང༌། སྔགས་དང༌། རིག་པ་དང༌། སྙིང་པོ་རྣམས་དུང་ལས་འབད་པ་མེད་པར་དེ་བཞིན་དུ་འབྱུང་བར་འགྱུར་རོ། །ཁོང་དུ་མ་ཆུད་པའི་བསྟན་བཅོས་རྣམས་ཀྱང་ཁོང་དུ་ཆུད་པར་འགྱུར་རོ། །ཐམས་ཅད་མཁྱེན་པ་ཉིད་དང་ཡུན་མི་རིང་བར་ལྷ་ཉིད་དུ་འགྱུར་རོ་ཞེས་སོ། །ཆོས་ཀྱི་དུང་གི་ཏིང་ངེ་འཛིན་འཇམ་དཔལ་གྱི་སྒྲུབ་ཐབས་རྫོགས་སོ།།