ཡི་གེ་གཅིག་པའི་རབ་ཏུ་སྦྱོར་བ་ཅུང་ཟད་པ།
རྒྱ་གར་སྐད་དུ། ཨེ་ཀཱ་ཀྵ་ར་ཀ་ཏི་པ་ཡ་པྲ་ཡོ་གི །བོད་སྐད་དུ། ཡི་གེ་གཅིག་པའི་རབ་ཏུ་སྦྱོར་བ་ཅུང་ཟད་པ། འཕགས་པ་འཇམ་པའི་མགོན་ལ་ཕྱག་འཚལ་ལོ། །ཐླྷིཾ་ཞེས་པ་ནི་བྱ་བ་ཀུན་གྲུབ་ནུས། །རབ་མཆོག་ཤིན་ཏུ་གསང་པ་ལས་ཀུན་པ། །ཡི་གེ་གཅིག་པ་ཞེས་བྱ་རིག་སྔགས་རྒྱལ། །སེམས་ཅན་
ཀུན་གྱི་རིམ་ལས་འདའ་མི་བྱེད། །སེམས་ཅན་ཀུན་གྱི་མཐུ་དང་ནི། །སེམས་ཅན་ཀུན་གྱི་བཀྲ་ཤིས་ཏེ། །སྒྲུབ་པ་པོ་ཡི་གསང་སྔགས་ཀུན། །འཇིག་རྟེན་ཀུན་གྱི་གཙོ་བོ་སྟེ། །ནོར་རྣམས་ཀུན་གྱི་དབང་ཕྱུག་གོ །སྡང་བ་ཀུན་གྱི་བྱམས་བདག་ཉིད། །སྐྱེ་བོ་ཀུན་གྱི་བརྩེ་བ་ཅན། །བགེགས་རྣམས་ཐམས་ཅད་འཇོམས་པར་བྱེད། །མདོར་བསྡུས་ནས་ཇི་ལྟ་ཇི་ལྟར་རབ་ཏུ་སྦྱོར་བ་དེ་ལྟ་དེ་ལྟར་བྱེད་པར་འགྱུར་རོ། །མ་བསྒྲུབ་པར་ཡང་ལས་ཐམས་ཅད་བྱེད་དོ། །སྔགས་བཟླས་ནས་གང་ལ་རིག་པ་དེ་དབང་དུ་འགྱུར་རོ། །གོས་ལ་མངོན་པར་བསྔགས་ནས་གོན་ན་སྐལ་བ་དང་ལྡན་པར་འགྱུར་རོ། །སོ་ཤིང་ལ་མངོན་པར་བསྔགས་ནས་ཟོས་ན་སོའི་ཟུག་རྔུ་འཇོམས་པར་འགྱུར་རོ། །ཀ་ར་བཱི་ར་དཀར་པོའི་ཤིང་ལ་ལན་བདུན་མངོན་པར་བསྔགས་ནས་ཟོས་ན་མ་བསླངས་པར་ཡང་ཟས་རྙེད་པར་འགྱུར་རོ། །མིག་གི་ཟུག་རྔུ་ལ་རྒྱ་མ་ཚ་ཕྱེ་མར་བྱས་ནས་ལན་བདུན་མངོན་པར་བསྔགས་ཏེ་མིག་ཏུ་བླུགས་ན་མིག་གི་ཟུག་རྔུ་འཇོམས་པར་འགྱུར་རོ། །གླང་པོ་ཆེའི་ལྕི་བ་ལ་སྤྲིན་ལས་བྱུང་བའི་ཤ་མོ་པ་ལཱཀྵའི་ལོ་མ་ལ་དྲིལ་ནས་མེ་ཆུང་ངུ་ལ་བསྲེགས་ནས་ལེགས་པར་བླངས་ཏེ་དྲོད་བདེ་བ་ཙམ་བྱས་ནས་རྒྱ་ཚའི་ཕྱེ་མ་དང་སྦྱར་ཏེ། ལན་བདུན་མངོན་པར་བསྔགས་ནས་རྣ་བར་བླུགས་ན་དེའི་སྐད་ཅིག་ལ་ཟུག་རྔུ་ཞི་བར་འགྱུར་རོ། །བུད་མེད་བུ་སྐྱེ་བའི་དུས་སུ་མངལ་དམ་ཞིང་ཟུག་རྔུར་གྱུར་པ་ལ་བ་ཤ་ཀའི་རྩ་བ་སྲོག་ཆགས་མེད་པའི་ཆུ་ལ་བཏབ་ནས་ལྟེ་བའི་ཕྱོགས་སུ་བྱུག་པ་བྱས་ན་བདེ་བར་སྐྱེ་བར་འགྱུར་རོ། །རྨ་རེད་ཅན་གྱི་སྐྱེས་བུ་ལ་མར་རྙིང་པ་ལ་ལན་བརྒྱ་རྩ་བརྒྱད་བཟླས་ནས་འཐུངས་ཤིང་དེའི་ཕྱོགས་སུ་བྱུགས་ན་དེའི་སྐད་ཅིག་དེ་ལ་དེ་བཞིན་དུ་རྨ་རེད་པ་མེད་པར་འགྱུར་རོ། །མ་ཞུ་བ་དང༌། ཟུག་པ་དང༌། གཅོང་ཅན་ལ་ཡང་རྭ་ཚའམ་ཚྭ་ལ་ལན་བདུན་མངོན་པར་བསྔགས་ཏེ་བཟའ་བར་བྱས་ན་དེ་ནས་ནད་ལས་གྲོལ་ཞིང་དེའི་ཉིན་མོ་ནས་བདེ་བར་འགྱུར་རོ། །བུ་ཚ་སྐྱེ་བའི་ཆོས་ལྡན་མ་བུ་སྐྱེ་བར་འདོད་ན་རྟ་དྲིའི་རྩ་བ་དང་བའི་འོ་མ་མཉེས་ཤིང་བསྲེས་ཏེ། ལན་ཉི་ཤུ་རྩ་ལྔ་བཟླས་ནས་རྡུལ་དང་ལྡན་པའི་དུས་སུ་བཏུང་བར་བྱའོ། །ཕ་རོལ་གྱི་བུད་མེད་སྤངས་ཏེ་རང་གི་ཆུང་མ་ལ་མངོན་པར་འགྲོ་བར་བྱས་ན་བུ་སྐྱེ་བར་འགྱུར་རོ། །རིམས་ཉིན་གཅིག་པ་དང༌། ཉིན་གཉིས་པ་དང༌། ཉིན་གསུམ་པ་དང༌། ཉིན་བཞི་པ་དང༌།
རྟག་པའི་རིམས་རྣམས་ལ་མར་དང་བཅས་པའི་ཐུག་པ་ལ་བརྒྱ་རྩ་བརྒྱད་མངོན་པར་བསྔགས་ནས་ཟོས་ན་བདེ་བར་འགྱུར་རོ། །མཁའ་འགྲོ་མ་དང་གདོན་གྱིས་ཟིན་པ་རྣམས་ལ་བདག་ཉིད་ཀྱི་ཁར་བརྒྱ་རྩ་བརྒྱད་མངོན་པར་བསྔགས་ནས་བལྟས་ན་བདེ་བར་འགྱུར་རོ། །བྱིས་བའི་མ་མོ་དང༌། ལུས་སྲུལ་པོ་དང༌། རོ་ལངས་དང༌། གཞོན་ནུའི་གདོན་ལ་སོགས་པ་རྣམས་དང༌། མི་ཐམས་ཅད་ལ་གདུག་པ་མི་བཟད་པས་ཟིན་པ་རྣམས་བདག་ཉིད་ཀྱི་ལག་པ་ལ་བརྒྱ་རྩ་བརྒྱད་མངོན་པར་བསྔགས་ནས་བཟུང་ཞིང་མགོ་བོ་ལ་རེག་ན་བདེ་བར་འགྱུར་རོ། །ལན་གཅིག་བཟླས་ན་བདག་ཉིད་སྲུང་བར་འགྱུར་རོ། །གཉིས་བཟླས་ན་སྲུང་བ་ཆེན་པོར་འགྱུར་རོ། །གསུམ་བཟླས་ན་ཁྱིམ་སྲུང་བར་འགྱུར་རོ། །བཞི་བཟླས་ན་གྲོང་སྲུང་བར་འགྱུར་རོ། །ལྔ་བཟླས་ན་གྲོང་ཁྱེར་སྲུང་བར་འགྱུར་རོ། །དེ་བཞིན་དུ་ཇི་སྲིད་དྲུག་བཟླས་ན་དམག་ཚོགས་སྲུང་བར་འགྱུར་རོ། །འདི་རྣམས་དང་གཞན་ལས་ཕྲ་མོ་མ་གསུངས་པ་ཡང་བྱེད་དོ། །སྔགས་འདིས་དེ་བཞིན་དུ་བུད་མེད་ཀྱི་མོ་ནད་ལ་སོགས་པ་རྣམས་ལ་ཨ་ལཾ་མུ་ཤའི་རྩ་བ་ལོ་མ་དང་མཉེས་ཤིང་བརྒྱ་རྩ་བརྒྱད་མངོན་པར་བསྔགས་ནས་འོ་མ་དང་བསྲེས་ཏེ་བཏུང་བར་བྱས་ན་བདེ་བར་འགྱུར་རོ། །ཏ་མཐའ་ར་མཐའ་ཡང་དག་སྦྱོར། །ས་མཐའ་ཨི་ཡི་དབྱངས་ཀྱིས་མཛེས། །ཟླ་ཕྱེད་ཐིག་ལེས་མནན་པར་བྲི། །བླ་མའི་མན་ངག་བལྟ་ཞིང་བཟླས། །ཡི་གེ་གཅིག་པའི་རབ་ཏུ་སྦྱོར་བ་ཅུང་ཟད་པ་རྫོགས་སོ།།