གཏུམ་པོ་ཆེན་པོའི་སྒྲུབ་ཐབས་ཆོ་ག་དང་བཅས་པ།
འོད་ཟེར་འབྱུང་གནས་གྲགས་པ།
རྒྱ་གར་སྐད་དུ། ཙཎྜ་མ་ཧཱ་རོ་ཥ་ཎ་སཱ་དྷ་ན་ཀལྤ། བོད་སྐད་དུ། གཏུམ་པོ་ཆེན་པོའི་སྒྲུབ་ཐབས་ཆོ་ག་དང་བཅས་པ། འཕགས་པ་མི་གཡོ་བ་ལ་ཕྱག་འཚལ་ལོ། །པུས་མོའི་ལྷ་ང་སར་བཙུགས་ཕྱག་གཡས་རལ་གྲི་བསྣམས། །ཅིག་ཤོས་ཕྱག་ནི་ཁུ་ཚུར་སྡིགས་མཛུབ་ཞགས་པ་བསྣམས། །སྐུ་ལུས་སྲ་མཁྲེགས་གཏུམ་ཞིང་འབར་བ་ཁྲོ་བའི་སྤྱན། །བགེགས་འཇོམས་མི་གཡོ་སྲིད་པའི་བགེགས་རྣམས་ཞི་བར་མཛད། །ཕྱོགས་བཅུར་བཞུགས་པའི་སངས་རྒྱས་དང༌། །བྱང་ཆུབ་སེམས་དཔའ་འདྲེན་པ་རྣམས། །དེ་རྣམས་རྣམ་པ་སྣ་ཚོགས་པའི། །མེ་ཏོག་ལ་སོགས་བློ་ཡིས་མཆོད། །སྡུག་བསྔལ་རྣམས་བལྟས་
བསྐྱབ་པའི་ཕྱིར། །བདག་གི་ལུས་ཉིད་དབུལ་བར་བགྱི། །སྔགས་པས་དགེ་བ་སྤེལ་བའི་ཕྱིར། །སྡིག་པ་རྣམས་ནི་བཤགས་པར་བགྱི། །རྫོགས་སངས་རྒྱས་དང་བྱང་སེམས་ཚོགས། །སློབ་དང་མི་སློབ་སེམས་ཅན་གྱི། །བསོད་ནམས་རང་བཞིན་མ་ལུས་པ། །དེ་ལ་རྗེས་སུ་ཡི་རང་ངོ༌།། དཀོན་མཆོག་གསུམ་ལ་སྐྱབས་སུ་འགྲོ། །རྫོགས་པའི་བྱང་ཆུབ་ངེས་པར་བསྟེན། །ཚད་མེད་པ་ཡི་གནས་བཞི་པོ། །རིམ་པ་ཇི་བཞིན་བསྒོམ་པར་བྱ། །མཚན་ཉིད་དང་བྲལ་སྟོང་པ་ཉིད། །རྒྱུ་དང་བྲལ་བས་མཚན་མ་མེད། །སྨོན་ལམ་ལས་ཀྱང་རྣམ་གྲོལ་བའི། །ངོ་བོ་ཉིད་ཀྱི་རང་བཞིན་བསྒོམ། །སྣ་ཚོགས་པདྨ་ཉི་མའི་དབུས། །ཧཱུཾ་ཡིག་ལས་བྱུང་བཞུགས་པར་བསྒོམ། །དཔའ་བོ་སྤྱན་གཉིས་དམར་པོ་སྟེ། །ཕྱག་གཉིས་རིན་ཆེན་ཅོད་པན་ཅན། །མགོན་པོ་སྡིག་པ་འཕྲལ་དུ་སྤང༌། །ཇི་ལྟར་འདོད་པ་ཡོངས་སུ་སྐོང༌། །ཟར་མའི་མེ་ཏོག་ལྟ་བུའི་མདོག །སངས་རྒྱས་དྲི་མེད་འོད་ཟེར་འགྱེད། །མཆེ་བས་མཆུ་ནི་ངེས་པར་མནན། །རྒྱན་རྣམས་ཀུན་གྱིས་རྣམ་པར་བརྒྱན། །གཡོན་པ་སྡིགས་མཛུབ་ཞགས་པ་སྟེ། །པུས་མོ་གཡོན་པ་ས་ལ་བཙུགས། །ཕྱག་ན་རལ་གྲི་བསྣམས་པ་ཡི། །དཔལ་ལྡན་ཁྲོ་བོ་གཏུམ་པོ་ཆེ། །འཇིགས་བྱེད་ཆེན་པོ་ཟུར་གྱིས་གཟིགས། །མི་བཟད་འཇིགས་པར་བྱེད་པ་པོ། །ཡེ་ཤེས་སེམས་དཔའ་གཟི་བརྗིད་ཆེ། །དམ་ཚིག་སེམས་དཔའ་མཚུངས་པར་བལྟ། །སྔགས་པས་དེ་ཡི་ཐུགས་ཀ་རུ། །ས་བོན་མཚན་མ་ཡང་དག་ལྡན། །ལྷ་ཡི་རྣམ་པར་སྦྱོར་བ་ཡིས། །བསམ་གཏན་སྐྱོན་སྔགས་བཟླས་བྱ། །དེ་ལས་གསུངས་པའི་དངོས་གྲུབ་ནི། །ཐེ་ཚོམ་མེད་པ་ཉིད་དུ་འཐོབ། །དེ་ལ་སྔགས་ཀྱི་རྒྱལ་པོ་ནི་འདི་ཡིན་ཏེ། ཨོཾ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ། །སྔགས་ཀྱི་རྒྱལ་པོ་འདི་ལན་ཅིག་བརྗོད་པས། སྡིག་པ་ཐམས་ཅད་ངེས་པར་སྲེག་ཅིང་ཐམས་ཅད་དུ་ངེས་པར་སྲུང་བ་དང༌། སྦེད་པར་བྱེད་དོ། །སྲན་མ་ལ་སོགས་པ་རྣམས་ཀྱིས་བྲབས་ན་འབྱུང་པོ་ལ་སོགས་པའི་འཇིགས་པ་འཇོམས་པར་བྱེད་དོ། །ཁམ་ཕོར་སོ་མ་བཏང་བ་ལ་ཐོད་ལེ་ཀོར་གྱིས་མངོན་པར་བྲིས་ནས་སྒོ་ལྟག་ལ་དབྱངས་ན་བྱིས་པ་གསར་དུ་སྐྱེས་པ་རྣམས་སྲུང་བར་བྱེད་དོ། །སྤྲ་ཚིལ་གྱིས་གཟུགས་སོར་བཞིའི་ཚད་དུ་བྱས་ནས་
དེའི་སྙིང་གར་བསྒྲུབ་བྱའི་མིང་དང་བཅས་པའི་སྔགས་གྲོ་ག་ལ་མངོན་པར་བྲིས་ཏེ་བཅུག་ནས་དེའི་ཁར་ཚེར་མ་བཅུག་ན་ཕྱིར་རྒོལ་བ་ཕུར་བུས་འདེབས་པར་འགྱུར་རོ། །རྐང་པ་ལ་བཙུགས་ན་འགྲོ་འཕྲོ་ལ་རེངས་པར་འགྱུར་རོ། །སྙིང་གར་བཙུགས་ན་ཁྲོས་པ་ཞི་བར་འགྱུར་རོ། །མིའི་རྗེ་ངར་གྱི་ཕུར་བུའམ། ལྕགས་ཀྱི་ཕུར་བུ་གང་དང་གང་གིས་མིང་བཟུང་སྟེ་ལུས་ལ་བཏབ་ན་དེ་དང་དེ་རྣམ་པར་འཇིག་པར་འགྱུར་རོ། །དགྲའི་སྒོ་ཁར་སྦས་ན་བརླག་པར་འགྱུར་རོ། །ཁྱི་ནག་པོའི་ཐོད་པ་ལ་མིང་དང་བཅས་པ་བྲིས་ནས་ཀླུའི་གནས་སུ་སྦས་ན་མཛེས་ཟིན་པར་འགྱུར་རོ། །རབས་ཆད་ཀྱི་ཐོད་པ་ལ་སྔགས་དང་བཅས་ཏེ་བྲིས་ནས་རབས་ཆད་ཀྱི་དུར་ཁྲོད་དུ་སྦས་ན་རབས་ཆད་པར་འགྱུར་རོ། །རོ་མཚོ་ལྐུགས་པར་སྦས་ན་ཐམས་ཅད་རེངས་པར་འགྱུར་རོ། །མེ་ཐབ་ཏུ་སྦས་ན་རིམས་ཀྱིས་འཆིའོ། །དུར་ཁྲོད་ཀྱི་ཐལ་བ་ལ་མངོན་པར་བསྔགས་ནས་དགྲ་བོའི་སྒོ་གླེགས་ལ་བཏགས་ན་དེ་སྐྲོད་པར་འགྱུར་རོ། །རལ་གྲི་ལ་མངོན་པར་བསྔགས་ནས་གཡུལ་དུ་ཞུགས་ན་རྒྱལ་བར་འགྱུར་རོ། །བྱ་བ་གང་ལ་འཇུག་པ་ན་གཏོར་མ་བཏང་ན་དེ་འགྲུབ་པར་འགྱུར་རོ། །སྔགས་པས་དགེ་བ་དང་མི་དགེ་བའི་ལས་གང་དང་གང་འདོད་བ་བཟླས་པ་ཙམ་གྱིས་འགྲུབ་པར་འགྱུར་རོ། །བདག་གིས་བྲིས་ལས་གང་ཐོབ་པའི། །དགེ་བས་སེམས་ཅན་དོན་གྲུབ་ཅིང༌། །དེས་འདིར་འཇིག་རྟེན་མ་ལུས་པ། །རྫོགས་པའི་བྱང་ཆུབ་སྣོད་ལྡན་ཤོག །གཏུམ་པོ་ཆེན་པོའི་སྒྲུབ་ཐབས་ཆོ་ག་དང་བཅས་པ་རྫོགས་སོ།། །།སློབ་དཔོན་འོད་ཟེར་འབྱུང་གནས་གྲག་པས་མཛད་པའོ།།