དབང་དུ་བྱེད་པའི་སྒྲོལ་མའི་སྒྲུབ་ཐབས།
རྡོ་རྗེ་མྱུ་གུ།
རྒྱ་གར་སྐད་དུ། བ་ཤྱ་ཏཱ་རཱ་སཱ་དྷ་ནཾ། བོད་སྐད་དུ། དབང་དུ་བྱེད་པའི་སྒྲོལ་མའི་སྒྲུབ་ཐབས། འཕགས་མ་སྒྲོལ་མ་ལ་ཕྱག་འཚལ་ལོ། །ཏཱཾ་ཡིག་ལས་སྐྱེས་པའི་ཨུཏྤལ་ཏཱཾ་ཡིག་གི་དབུས་སུ་མནན་པར་བསམས་ལ། དེ་
ཡོངས་སུ་གྱུར་པ་ལས་འཕགས་མ་སྒྲོལ་མ་སྐུ་མདོག་ལྗང་གུ་ཕྱག་གཡོན་པ་ན་ཨུཏྤ་ལ་བསྣམས་ཤིང་གཡས་པ་མཆོག་སྦྱིན་མཛད་པ་བཟང་པོའི་སྟན་ལ་བཞུགས་པ། དོན་ཡོད་གྲུབ་པས་དབུ་བརྒྱན་པར་བསམས་ནས་ཡེ་ཤེས་སེམས་དཔའ་དང་རོ་གཅིག་ཏུ་བྱས་ཏེ། ཨོཾ་ཏཱ་རེ་ཏུཏྟཱ་རེ་ཏུ་རེ་ཆེ་གེ་མོའི་དབང་དུ་གྱིས་ཤིག་སྭཱ་ཧཱ། ཞེས་པས་བསྒྲུབ་བྱའི་མིང་དང་བཅས་པས་གོང་དུ་བསྟན་པའི་གྲངས་ངེས་པའི་བཟླས་པ་བྱའོ། །མདའ་ལ་སོགས་པའི་མཚན་མ་མེད་ཀྱང་ཨུཏྤ་ལས་བསྒྲུབ་བྱའི་སྐེ་བཅིངས་ཏེ། རང་གི་ལུས་ཀྱི་འོད་ཀྱི་ཚོགས་ཀྱིས་དེའི་ལུས་ལ་བཀང་སྟེ་རང་གི་དབང་དུ་བྱ་བའི་གནས་སུ་གཞག་པར་བྱའོ་ཞེས་སོ། །དབང་དུ་བྱེད་པའི་སྒྲོལ་མའི་སྒྲུབ་ཐབས་སློབ་དཔོན་རྡོ་རྗེ་མྱུ་གུས་མཛད་པ་རྫོགས་སོ།།