འཕགས་མ་སྒྲོལ་མ་དུག་སེལ་མའི་སྒྲུབ་ཐབས།
རྒྱ་གར་སྐད་དུ། ཨཱཪྻ་ཛཱཾ་གུ་ལཱི་ཏཱ་རཱ་སཱ་དྷ་ནཾ། བོད་སྐད་དུ། འཕགས་མ་སྒྲོལ་མ་དུག་སེལ་མའི་སྒྲུབ་ཐབས། སྒྲོལ་མ་དུག་སེལ་མ་ལ་ཕྱག་འཚལ་ལོ། །ཛཱཾ་གུ་ལཱི་ཡི་གཟུགས་འཛིན་པའི། །བཅོམ་ལྡན་སྒྲོལ་མ་ལ་ཕྱག་འཚལ། །
སེམས་ཅན་ཀུན་ལ་བརྩེ་བའི་ཕྱིར། །དེ་ཡི་སྒྲུབ་ཐབས་མཆོག་གྱུར་བྲི། །དང་པོར་རེ་ཞིག་སྔགས་པས་གཙང་ཞིང་ཁྲུས་བྱས་ནས་ཕྲེང་བ་དང་གོས་དཀར་པོ་བགོས་ཏེ། སྐྱེ་བོས་དབེན་པའི་ས་ཕྱོགས་སུ་བྱུག་པ་བྱས་ལ་དྲི་བཟངས་དཀར་པོས་ཆག་ཆབ་བཏབ་ནས་མེ་ཏོག་དཀར་པོ་གཅལ་དུ་བཀྲམ་སྟེ། སྟན་བདེ་བ་ལ་འདུག་ནས་འགྲོ་བ་རྣམས་ལ་བྱམས་པ་དང་སྙིང་རྗེ་བསྒོམ་པར་བྱའོ། །ཨོཾ་སྭ་བྷཱ་བ་ཤུདྡྷཿ་སརྦ་དྷརྨཱཿསྭ་བྷཱ་བ་ཤུདྡྷོ྅ཧཾ་ཞེས་བརྗོད་པར་བྱའོ། །དེ་ནས་སྟོང་པ་ཉིད་མངོན་དུ་བྱ་ཞིང་བསམས་ནས་པཾ་ཡིག་དཀར་པོ་ལས་སྐྱེས་པའི་པདྨ་དཀར་པོ་འདབ་མ་བརྒྱད་པའོ། །དེའི་སྟེང་དུ་ཨཾ་ཡིག་ལས་སྐྱེས་པའི་ཟླ་བའི་དཀྱིལ་འཁོར་གྱི་སྟེང་དུ་ཧྲཱིཿ་ཡིག་དཀར་པོ་འོད་ཟེར་གྱི་ཚོགས་དཔག་ཏུ་མེད་པ་འཕྲོ་བའོ། །དེ་ལས་བྱུང་བའི་བཅོམ་ལྡན་འདས་མ་དུག་སེལ་མ་བསྒོམ་པར་བྱ་སྟེ། སྐུ་མདོག་དཀར་མོ་ཕྱག་བཞི་པ། རལ་པའི་ཅོད་པན་ཅན། ན་བཟའ་དཀར་པོའི་སྟོད་གཡོགས་ཅན། རིན་པོ་ཆེ་དཀར་པོའི་རྒྱན་དང་ལྡན་མ་སྦྲུལ་དཀར་པོས་བརྒྱན་པ། སེམས་དཔའི་སྐྱིལ་ཀྲུང་གིས་བཞུགས་པ། །རྩ་བའི་ཕྱག་གཉིས་ཀྱིས་པི་ཝང་བསྒྲེང་བ། གཉིས་པའི་གཡས་དང་གཡོན་པས་སྦྲུལ་དཀར་པོ་དང༌། མི་འཇིགས་པའི་ཕྱག་རྒྱ་མཛད་པ། ཟླ་བའི་འོད་ཟེར་གྱི་ཕྲེང་བ་ཅན་བསྒོམ་པར་བྱའོ། །སྤྱི་བོ་དང་མགྲིན་པ་དང་ནུ་མའི་བར་དུ་ཟླ་བའི་དཀྱིལ་འཁོར་ལ་གནས་པའི་ཨཱཿཧྲཱིཿ་ཧཱུཾ་གི་ཡི་གེ་ལ་སོགས་པ་ཇི་སྲིད་མི་ངལ་གྱི་བར་དུ་བསྒོམ་པར་བྱའོ། །དེ་ནས་སྔགས་བཟླས་པར་བྱ་སྟེ། ཧྲཱིཿཡིག་འབུམ་ཕྲག་བདུན་བཟླས་ནས་མེ་ཏོག་དཀར་པོས་སྦྱིན་སྲེག་ཁྲི་ཕྲག་བདུན་བྱའོ། །མཁས་པས་རྒྱན་ཐམས་ཅད་དཀར་པོ་གདགས་པར་བྱའོ། །དེ་ནས་བྱ་ཁྱུང་གི་དབང་ཕྱུག་གི་མཐུས་བསྟན་བཅོས་ཐམས་ཅད་ལ་མི་འཇིགས་པའི་མཁས་པར་འགྱུར་རོ་ཞེས་སོ། །འཕགས་མ་སྒྲོལ་མ་དུག་སེལ་མའི་སྒྲུབ་ཐབས་རྫོགས་སོ།། །།