སྒྲོལ་མ་ནོར་སྦྱིན་མའི་སྒྲུབ་ཐབས།
རྒྱ་གར་སྐད་དུ། དྷ་ན་དཱ་ན་ཏཱ་རཱ་སཱ་དྷ་ནཾ། བོད་སྐད་དུ། སྒྲོལ་མ་ནོར་སྦྱིན་མའི་སྒྲུབ་ཐབས། འཕགས་མ་སྒྲོལ་མ་ལ་ཕྱག་འཚལ་ལོ། །སྒྲོལ་མ་ལྗང་གུ་ཞལ་གཅིག་མ། །ཕྱག་བཞི་སྤྱན་གཉིས་ཁྱོད་མཉེས་ཕྱིར། །གང་གི་དཀྱིལ་འཁོར་འཁོར་ལོ་ཡི། །ལྷ་མོ་བཅུ་གཉིས་སྤྱན་
གཉིས་མ། །བཅོམ་ལྡན་འཕགས་མ་སྒྲོལ་མ་ཡི། །ཁྱད་འཕགས་ཤིན་ཏུ་རྙེད་དཀའ་བའི། །ནོར་སྦྱིན་རིམ་པའི་སྒྲུབ་པའི་ཐབས། །བསྡུས་ནས་བདག་གིས་བཤད་པར་བྱ། །རྣལ་འབྱོར་པས་སྔ་བར་བྱང་ཆུབ་ཏུ་སེམས་བསྐྱེད་ནས་རང་གི་སྙིང་གར་ཟླ་བ་ལ་ཏཱཾ་ཡིག་ལྗང་གུ་བལྟས་ལ་ཁ་བསང་བ་ལ་སོགས་པ་བྱའོ། །ཨོཾ་སྭཱ་བྷཱ་བ་ཤུདྡྷཿ་སརྦ་དྷརྨཱཿ་སྭཱ་བྷཱ་བ་ཤུདྡྷོ྅ཧཾ་ཞེས་བརྗོད་ནས་ཨོཾ་ཨ་མྲྀ་ཏེ་ཧཱུཾ་ཕཊ། ཅེས་པ་འདིས་སེ་གོལ་གྱིས་ཕྱོགས་བཅུར་བགེགས་བསྐྲད་ནས། རང་གི་སྙིང་གར་པཾ་ཡིག་ལས་སྐྱེས་པའི་ཆུ་སྐྱེས་དམར་པོའི་སྟེང་དུ་ཨ་ཡིག་ལས་སྐྱེས་པའི་ཟླ་བ་ལ་གནས་པའི་རང་གི་ས་བོན་བསྒོམས་ནས། དེའི་འོད་ཟེར་གྱིས་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་གདན་དྲངས་ནས་མདུན་གྱི་ནམ་མཁའ་ལ་བཞུགས་ཏེ་ཡང་དག་པར་མཆོད་ནས། སྡིག་པ་བཤགས་པ་ལ་སོགས་པ་བྱ་ཞིང་སྟོང་པ་ཉིད་དུ་བསྒོམས་ནས་བྱིན་གྱིས་བརླབས་ཏེ། རཾ་ཡིག་དམར་པོ་ཡོངས་སུ་གྱུར་པ་ལས། ཉི་མ་ལ་གནས་པའི་ཧཱུཾ་ཡིག་ནག་པོ་ལས་སྐྱེས་པའི་སྣ་ཚོགས་རྡོ་རྗེ་རྣམ་པར་བལྟས་ནས། དེའི་འོད་ཟེར་གྱིས་རྡོ་རྗེའི་ར་བ་དང༌། རྡོ་རྗེའི་གུར་དང༌། རྡོ་རྗེའི་ས་གཞི་ཡང་བསམ་པར་བྱའོ། །དེ་ནས་སྣ་ཚོགས་རྡོ་རྗེའི་སྟེགས་བུ་པ་བཾ་ཡིག་དམར་པོ་ལས་སྐྱེས་པའི་ཆུ་སྐྱེས་ཀྱི་སྟེང་དུ་ཨ་ཡིག་ལས་ཟླ་བ་ལ་གནས་པའི་བྷྲཱུཾ་ཡིག་དཀར་པོ་ཡོངས་སུ་གྱུར་པ་ལས་འཁོར་ལོ་དཀར་པོའོ། །བྷྲཱུཾ་ཡིག་དབུས་སུ་བལྟས་ལ་པདྨ་དང་ཟླ་བ་དང༌། ཉི་མའི་ས་བོན་ཡོངས་སུ་གྱུར་པ་ལས་སྐྱེས་པའི་རིན་པོ་ཆེ་ཐམས་ཅད་ཀྱི་རང་བཞིན་གྲུ་བཞི་ལ་སོགས་པའི་ཡོན་ཏན་དང་ལྡན་པའི་འཁོར་ལོ་གཉིས་སོ། །སྙིང་པོའི་འཁོར་ལོ་ལ་གནས་པའི་ཆུ་སྐྱེས་འདབ་མ་བརྒྱད་པའི་ཟེའུ་འབྲུ་ལ་ཟླ་བ་དགུས་ཉེ་བར་མཛེས་པ་སྒོ་བཞི་ལ་གནས་པའི་ཉི་མའི་འོད་ཟེར་འབར་བའི་གཞལ་ཡས་ཁང་བལྟ་བར་བྱའོ། །དེ་ནས་དབུས་སུ་ཟླ་བའི་སྟེང་དུ་དེ་བཞིན་དུ་ཏཱཾ་ཡིག་གོ །དེ་ལ་སྤྲོ་བ་དང་བསྡུ་བ་བྱའོ། །དེ་ནས་དེའི་ས་བོན་ལས་བཅོམ་ལྡན་འདས་མ་སྒྲོལ་མར་བདག་ཉིད་བསྒོམ་པར་བྱ་སྟེ། ཟླ་བའི་གདན་ལ་ཞི་བའི་འོད་དང་ལྡན་ཞིང་སེམས་དཔའི་སྐྱིལ་ཀྲུང་གིས་བཞུགས་པ་སྐུ་མདོག་ལྗང་སྔོན། ཞལ་གཅིག་པ། སྤྱན་གཉིས་པ།
ཕྱག་བཞི་པ། བགྲང་ཕྲེང་དང༌། མཆོག་སྦྱིན་དང༌། ཨུཏྤ་ལ་དང༌། པོ་ཏི་བསྣམས་པ། གོས་དང་རྒྱན་སྣ་ཚོགས་པ་དང་ལྡན་པའོ། །དེ་ནས་ཨོཾ་ནི་སྤྱི་བོ་རུའོ། །ཏཱ་ནི་དཔྲལ་བ་ལའོ། །རེ་ནི་སྤྱན་ལའོ། །ཏུ་ནི་མགྲིན་པ་ལའོ། །ཏྟཱ་ནི་དཔུང་པ་ལའོ། །རེ་ནི་སྙིང་གར་རོ། །ཏུ་ནི་ལྟེ་བ་ལའོ། །རེ་ནི་གསང་བ་ལའོ། །སྭཱ་ནི་པུས་མོ་ལའོ། །ཧཱ་ནི་རྐང་པ་དག་ལ་དགོད་པར་བྱའོ། །དེ་ནས་སྙིང་གར་པདྨ་དང་ཟླ་བ་ལ་གནས་པའི་རང་གི་ས་བོན་གྱི་འོད་ཟེར་གྱིས་བསྐུལ་ནས་སྤྱན་མ་ལ་སོགས་པའི་ལྷ་མོ་རྣམས་ཀྱིས་བདག་ལ་དབང་བསྐུར་ཞིང་དོན་ཡོད་གྲུབ་པས་དབུ་བརྒྱན་པར་བསམ་པར་བྱའོ། །ཡང་ན་སྙིང་པོ་ལ་གནས་པའི་ཟླ་བ་ལ་རྡོ་རྗེ་སྒྲོལ་མ་ལ་སོགས་པའི་ལྷ་མོ་རྣམས་སྐད་ཅིག་གིས་བལྟས་ཏེ། ཕྱི་ནས་བསྒོམ་པར་བྱ་སྟེ། ཤར་དུ་རྡོ་རྗེ་སྒྲོལ་མ་སྟེ། །ནག་མོ་ཕྱག་ན་རྡོ་རྗེ་བསྣམས། །ལྷོ་རུ་རིན་ཆེན་སྒྲོལ་མ་སྟེ། །སེར་མོ་ཕྱག་ན་རིན་ཆེན་བསྣམས། །ནུབ་ཏུ་པདྨའི་སྒྲོལ་མ་སྟེ། །དམར་མོ་ཕྱག་ན་ཆུ་སྐྱེས་བསྣམས། །བྱང་དུ་སངས་རྒྱས་སྒྲོལ་མ་སྟེ། །དཀར་མོ་ཕྱག་ན་འཁོར་ལོ་བསྣམས། །མེ་མཚམས་མེ་ཏོག་སྒྲོལ་མ་སྟེ། །དཀར་མོ་མེ་ཏོག་ཕྲེང་བ་བསྣམས། །བདུག་སྤོས་སྒྲོལ་མ་བདེན་བྲལ་དུ། །ནག་མོ་སྤོས་པོར་ཕྱག་ན་བསྣམས། །རླུང་མཚམས་མར་མེའི་སྒྲོལ་མ་སྟེ། །སེར་མོ་མར་མེའི་སྡོང་བུ་བསྣམས། །དྲི་ཡི་སྒྲོལ་མ་དབང་ལྡན་མཚམས། །དམར་མོ་དྲི་ཡི་དུང་ཆོས་བསྣམས། །འདི་རྣམས་སྣ་ཚོགས་པད་འདབ་ལ། །ཟླ་བརྒྱད་ལ་གནས་ཟླ་བའི་འོད། །སེམས་དཔའི་སྐྱིལ་ཀྲུང་གིས་བཞུགས་ཤིང༌། །ཕྱག་གཡོན་ན་ནི་ཨུཏྤལ་བསྣམས། །ཞལ་ནི་འཛུམ་ཞིང་སྣ་ཚོགས་པའི། །རྒྱན་དང་གོས་རྣམས་འཆང་བ་པོ། །ཤར་སྒོར་རྡོ་རྗེ་ལྕགས་ཀྱུ་མ། །ནག་མོ་རྡོ་རྗེ་ལྕགས་ཀྱུའི་ཕྱག །ལྷོ་རུ་རྡོ་རྗེ་ཞགས་པ་མ། །སེར་མོ་རྡོ་རྗེ་ཞགས་པའི་ཕྱག །ནུབ་ཏུ་རྡོ་རྗེ་ལྕགས་སྒྲོག་མ། །དམར་མོར་རྡོ་རྗེ་ལྕགས་སྒྲོག་བསྣམས། །བྱང་དུ་རྡོ་རྗེ་དྲིལ་བུ་མ། །དཀར་མོ་རྡོ་རྗེ་དྲིལ་བུའི་ཕྱག །འདི་རྣམས་བསྒོ་བཞི་ལ་ཉི་མ་ལ་བལྟ་ཞིང་ཉི་མའི་འོད་དང་ལྡན་པ་རལ་པ་དམར་སེར་གྱི་གྱེན་དུ་བརྫེས་པ། ཞབས་གཡས་བརྐྱང་གིས་བཞུགས་པ། སྦྲུལ་གྱ་རྒྱན་གྱིས་བརྒྱན་པ། ཞལ་འཇིགས་པ་སྟག་གི་པགས་པའི་ན་བཟའ་བསྣམས་
པ། ཕྱག་གཡོན་པས་ཨུཏྤལ་བསྣམས་པའོ། །དེ་ནས་ཡེ་ཤེས་སེམས་དཔའ་དང་ལྷན་ཅིག་ཏུ་བྱས་ཏེ་ཡིད་མི་གཡོ་བའི་རང་གི་ས་བོན་ཤིན་ཏུ་ཕྲ་མོའི་བསྒོམ་པར་བྱའོ། །དེ་ནས་སྔགས་བཟླས་པར་བྱ་སྟེ། ཨོཾ་ཏཱ་ར་ཏུཏྟཱ་རེ་ཏུ་རེ་དྷཱ་ནཾ་མེ་ད་ད་སྭཱ་ཧཱ། དེ་ནས་ལངས་ཏེ་དམ་ཚིག་ལ་ཨོཾ་ཨ་ཀཱ་རོ་མུ་ཁཾ་ཞེས་པ་ལ་སོགས་པའི་སྔགས་ཀྱིས་ཨུཏྤ་ལའི་ཕྱག་རྒྱས་གཏོར་མ་ཕུལ་ནས་སྨོན་ལམ་གདབ་པར་བྱའོ། །ལྷ་རྣམས་ཀྱི་འཁོར་ལོ་རང་གི་ས་བོན་གྱི་ནང་དུ་བསྒོམས་ནས་རང་ལྷའི་ང་རྒྱལ་བྱས་ནས་ཅི་བདེར་གནས་པར་བྱའོ། །ཉི་མའི་གུང་དང་ཕྱི་དྲོའི་ཐུན་མཚམས་དག་ལ་རང་གི་སྙིང་གའི་ས་བོན་ལས་སྐད་ཅིག་གིས་ལྷ་རྣམས་ཀྱི་འཁོར་ལོ་སྔོན་མ་བཞིན་དུ་སྤྲོས་ཏེ་བསྒོམས་ནས་བཟླས་པ་ལ་སོགས་པ་བྱའོ། །ཕྱི་དྲོ་དང་ཉི་མ་གུང་ཐུན་ལ་ཡང་ཁྱད་པར་འདིའོ། །མེ་ཏོག་ལ་སོགས་པས་ཡེ་ཤེས་པའི་དཀྱིལ་འཁོར་ཡང་དག་པར་མཆོད་ནས་ཨོཾ་ཏཱ་རེ་ཏུཏྟཱ་རེ་ཏུ་རེ་མུཿ་ཞེས་པ་འདིས་གཤེགས་སུ་གསོལ་ལོ། །སྒྲོལ་མ་ནོར་སྦྱིན་མའི་སྒྲུབ་ཐབས་རྫོགས་སོ།།