ངན་སོང་ལས་སྒྲོལ་མའི་སྒྲུབ་ཐབས།
རྒྱ་གར་སྐད་དུ། དུརྒ་ཏི་ཨུཏྟཱ་རི་ཎཱི་སཱ་དྷ་ནཾ། བོད་སྐད་དུ། ངན་སོང་ལས་སྒྲོལ་མའི་སྒྲུབ་ཐབས། །འཕགས་མ་སྒྲོལ་མ་ལ་ཕྱག་འཚལ་ལོ། །ན་མ་ཨཱཪྻཱ་བ་ལོ་ཀི་ཏེ་ཤཱ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ན་མོ་བྷ་ག་བ་ཏཻ་ཨཱཪྻ་ཏཱ་ར་ཡཻ། ཨོཾ་ཏཱ་རེ་ཏུཏྟཱ་རེ་ཏུ་རེ་བཱི་རེ་དུརྒ་ཏི་ཨུཏྟཱ་ར་ཡ། ཧྲཱིཾ་ཧྲཱིཾ་ཧྲཱིཾ་སརྦ་དུཿཁཱཏ་མོ་ཙ་ནི་བྷ་ག་བ་ཏི་དུརྒཱ་ཏྭཱ་ར་ཎོ་མ་ཧཱ་ཡོ་གེཤྩ་རི་ཧྲིའཾ་ན་མོ་ཏུ་རེ་སྭཱ་ཧཱ། འདིར་བཅོམ་ལྡན་འདས་མ་ངན་སོང་ལས་སྒྲོལ་བའི་སྒྲོལ་མ་ལྗང་སྔོན་ཕྱག་བཞི་པ། གཡོན་པས་ཞགས་པ་བསྣམས་པ། གཡས་པས་ལྕགས་ཀྱུ་བསྣམས་ཤིང་གུས་པས་དབྱུགས་འབྱིན་པ། གཡས་པས་མཆོག་སྦྱིན་པ། མཛེས་པའི་ཕྲེང་བ་དང་ན་བཟའ་མནབས་པ། ཕྱག་གཡོན་པས་ཨུཏྤ་ལ་སྔོན་པོ་བསྣམས་ཤིང་ན་བཟའ་དཀར་པོ་སྐུ་ལ་མནབས་པ་པདྨའི་གདན་ལ་བཞུགས་པ་དུས་གསུམ་དུ་བསྒོམ་པར་བྱའོ། །སྡུག་བསྔལ་ཐམས་ཅད་ལས་སྒྲོལ་ཞིང་བཅིངས་པ་རྣམས་གྲོལ་བར་བྱེད་དེ། ལྕགས་སྒྲོག་གིས་བསྡམས་པ་དང༌། ཞགས་པས་བཅིངས་པ་དང༌། གདོན་གྱིས་རེངས་པ་ལས་སྒྲོལ་བར་བྱེད་དོ། །བཅིངས་པའི་གནས་སུ་བཟླས་པར་བྱའོ། །སྟོང་ངམ་བརྒྱད་བརྒྱ་ཉི་མ་རེ་རེ་ལ་བཟླས་པས་གྲོལ་བར་འགྱུར་རོ། །གལ་ཏེ་མི་གྲོལ་ན་དེའི་ཚེ་མགོ་འགས་ཤིང་བཅད་པར་འགྱུར་བས་བདེ་བར་འགྱུར་རོ། །ཆེ་གེ་མོ་གྲོལ་བར་གྱིས་ཤིག །གལ་ཏེ་མ་གྲོལ་ན་དེའི་ཚེ་མགོ་འགས་པར་འགྱུར་རོ། །རིམས་ཆེན་པོར་འགྱུར་རོ། །མི་བཟད་པའི་ཟུག་རྔུ་ཆེན་པོར་འགྱུར་རོ། །སྒྲུབ་པ་པོ་མཐོང་བས་སྟེར་བར་འགྱུར་རོ། །ཉི་མ་བདུན་གྱིས་ངེས་པར་གྲོལ་བར་འགྱུར་རོ། །འདི་ནི་བཅོམ་ལྡན་འདས་ངན་སོང་ལས་སྒྲོལ་བའི་སྒྲོལ་མས་གསུངས་སོ། །ཧཱུཾ་ཧྲཱིཾ་ཛཿལན་བདུན་དུ་མེ་ཏོག་ལ་མངོན་པར་བསྔགས་ནས་སྦྱིན་པར་བྱའོ། །མཆོད་པའི་དབུས་སུ་ཁཾ་ཏཱཾ། གཡོན་སྐོར་གྱིས་བྷྲཱུཾ་ཨཱཾ་ཛྲཱིཾ་ཧཱུཾ། གཡས་སྐོར་གྱིས་ལཱཾ་མཱཾ་པཱཾ་པཱཾ་ཏཱཾ་ཞེས་སོ། །ངན་སོང་ལས་སྒྲོལ་མའི་སྒྲུབ་ཐབས་རྫོགས་སོ།། །།