གཤིན་རྗེ་གཤེད་ནག་པོའི་སྒྲུབ་ཐབས།
ཧཱུཾ་གི་ས་བོན་ལས་སྐྱེས་ནས། །རྣམ་པར་དག་པར་བྱ་བའི་བར་དུའོ། །དེ་ནས་ཉི་མ་ལ་གནས་པའི་ཡི་གེ་ཧཱུཾ་ཡོངས་སུ་གྱུར་པའི་གཤིན་རྗེ་མཐར་བྱེད་ཁྲོ་བ་དང་བཅས་པ་སྐྲ་གྱེན་དུ་འགྲེང་པ། ཞལ་དྲུག་པ། ཕྱག་དྲུག་པ། ཞབས་དྲུག་པ་མ་ཧེ་ལ་ཞོན་པ། གཡོན་བརྐྱང་བའི་ཞབས་ཀྱིས་གནས་པ། མིའི་མགོ་བོའི་ཕྲེང་བས་རྣམ་པར་བརྒྱན་པ། ཤིན་ཏུ་འཇིགས་པར་བྱེད་པའི་རྣམ་པ་ཅན། སྟག་གི་པགས་པའི་ཤམ་ཐབས་ཅན། གཡས་པ་ན་རལ་གྲི་དང༌། ཐོ་བ་དང༌། རྡོ་རྗེའོ། །གཡོན་པ་ན་དྲིལ་བུ་དང༌། རྡོ་རྗེ་ཞགས་པ་དང༌། གཏུན་ཤིང་བསྣམས་པ། དབུ་རྒྱན་མི་བསྐྱོད་པའི་རྣམ་པར་བསྒོམ་པར་བྱའོ། །དེ་ནས་དམ་ཚིག་གི་ཕྱག་རྒྱ་བཅིང་བར་བྱའོ། །ཐལ་མོ་སྦྱར་བ་བཅིངས་ཏེ། མཐེབ་ཆེན་གཉིས་ཁ་ཕྱེ་སྟེ་སྡིགས་མཛུབ་གཉིས་ཀྱང་ཁ་ཕྱེ་ཞིང་གུང་མོ་གཉིས་ཚིགས་གསུམ་པ་བཅག་པར་བྱའོ། །ཨོཾ་ཧྲཱིཿཥྚྲཱྀཿབི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་བྱ་བའི་བཟླས་བ་བྱའོ། །གཤིན་རྗེ་ནག་པོའི་སྒྲུབ་པའི་ཐབས་རྫོགས་སོ། །ཁམས་པ་ལོ་ཙཱ་བ་བ་རི་དགེ་སློང་དྷརྨ་ཀཱིརྟིས་བསྒྱུར་བའོ།། །།