རྟོག་པ་ལས་གསུངས་པའི་འོད་ཟེར་ཅན་དཀར་མོ་ཕྱག་བཅུ་པའི་སྒྲུབ་ཐབས།
རྒྱ་གར་སྐད་དུ། ཀལ་པོཀྟ་ད་ཤ་བྷུ་ཛ་སཱི་ཏ་མཱ་རཱི་ཙྱཻ་སཱ་དྷ་ནཾ། བོད་སྐད་དུ། རྟོག་པ་ལས་གསུངས་པའི་འོད་ཟེར་ཅན་དཀར་མོ་ཕྱག་བཅུ་པའི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་པཾ་ཡིག་ལས་སྐྱེས་པའི་སྣ་ཚོགས་པདྨའི་སྟེང་དུ་ཟླ་བ་ལ་མཾ་ཡིག་དཀར་པོ་ལས་སྐྱེས་པའི་འོད་ཟེར་ཅན་དཀར་མོ་ཞལ་ལྔ་པ། ཕྱག་བཅུ་པ། ཞབས་བཞི་པའི་བདག་ཉིད་དུ་སྐད་ཅིག་གིས་བསམ་པར་བྱའོ། །དེ་ལ་རྩ་བའི་ཞལ་དཀར་པོ། གཡས་ནག་པོ། གཡོན་ཕག་ཞལ་དམར་མོ། རྒྱབ་ཞལ་ལྗང་གུ། དབུའི་སྟེང་དུ་ཞལ་སེར་མོ། རིན་པོ་ཆེ་སྣ་ཚོགས་པའི་ཟུར་ཕུད་གསུམ་གྱིས་བརྒྱན་ཅིང་རལ་པའི་ཅོད་པན་ཅན། ཕྱག་གཡས་པ་ལྔ་རྣམས་ན་ཉི་མའི་དཀྱིལ་འཁོར་དང༌། རྡོ་རྗེ་སྔོན་པོ་དང༌། མདའ་དང༌། ལྕགས་ཀྱུ་དང་ཁབ་ཕྱག་ན་བསྣམས་པའོ། །གཡོན་པ་ལྔ་རྣམས་ན་ཟླ་བའི་དཀྱིལ་འཁོར་དང༌། གཞུ་དང༌། མྱ་ངན་མེད་པའི་ལོ་མ་དང༌། ཞགས་པ་དང་བཅས་པའི་སྡིགས་མཛུབ་དང༌། སྐུད་པ་བསྣམས་པའོ། །ལང་ཚོ་གཞོན་ཞིང་ཕུ་དུང་སྟོད་གཡོགས་དཀར་པོ་ཅན། མཆོད་རྟེན་གྱི་ནང་ན་གནས་པ། ཕག་བདུན་གྱི་ཤིང་རྟ་ལ་ཞོན་པ། ཁྱབ་འཇུག་དང༌། དབང་པོ་དང༌། བདེ་བྱེད་དང༌། ཚངས་པ་རྣམས་ཞབས་བཞིས་མནན་པ། དེའི་ཤིང་རྟའི་དབུས་སུ་གནས་པའི་ཆུ་སྲིན་མནན་པའི་བཅོམ་ལྡན་འདས་མ་གཞན་ཏེ། སྐུ་མདོག་ནག་མོ་ཕག་གི་གདོང་པ་ཅན། རྡོ་རྗེ་དང་སྡིགས་མཛུབ་ནི་གཡས་དང་གཡོན་གྱི་ཕྱག་ནའོ། །གཡས་ཕྱོགས་སུ་གཞན་བཅོམ་ལྡན་འདས་མ་ནི་ཕག་ཞལ་དམར་མོ་ཕྱག་བཞི་བ་གཡས་པ་གཉིས་ཀྱིས་ལྕགས་ཀྱུ་དང་ཁབ་བསྣམས་པའོ། །ཕྱག་
གཡོན་པ་གཉིས་ཀྱིས་ཞགས་པ་དང་བཅས་པའི་སྡིགས་མཛུབ་དང་སྐུད་པ་བསྣམས་པའོ། །མཛེས་པའི་རྒྱན་གྱིས་བརྒྱན་པའོ། །གཡོན་གྱི་ཕྱོགས་སུ་རྗེ་བཙུན་མ་གཞན་རྣམས་ནི་ཕག་ཞལ་དམར་མོའོ། །རྣ་བའི་བར་དུ་བསྐང་བའི་གཞུ་དང་མདའ་དང༌། རྡོ་རྗེ་དང༌། མྱ་ངན་མེད་པའི་ཤིང་གི་ཡལ་ག་ནི་གཡས་དང་གཡོན་གྱི་ཕྱག་ན་བསྣམས་པའོ། །སྣ་ཚོགས་པའི་རྒྱན་གྱིས་བརྒྱན་པ་སྟེ། ཤིང་རྟ་འདྲེན་པའི་ཕག་གི་འོག་ནས་ཉི་མ་ལ་སོགས་པའི་གཟུགས་གཟའ་དགུ་སྟེ། ཉི་མས་ཉེ་བར་འཚེ་བའི་ནད་ཀྱི་ཚོགས་ཀྱང་མིའི་གཟུགས་ཀྱི་འོག་ཏུ་ལྟུང་བར་བསམ་པར་བྱའོ། །དེ་ནས་སྙིང་གའི་ཟླ་བ་ལ་གནས་པའི་མཾ་གི་ས་བོན་གྱི་འོད་ཟེར་གྱིས་དེ་བཞིན་གཤེགས་པ་རྣམས་གདན་དྲངས་ཏེ། དབང་བསྐུར་བ་བླངས་ནས་དབུ་ལ་རྣམ་པར་སྣང་མཛད་ཀྱིས་རྒྱས་གདབ་པའོ། །དེ་ནས་སྙིང་གའི་ས་བོན་ལས་དེ་བཞིན་དུ་ཕྲེང་བའི་རྣམ་པ་ལྟ་བུའི་སྔགས་ཀྱི་ཡི་གེ་རྣམས་ཁ་ནས་འཐོན་ནས་ལྟེ་བ། ལྟེ་བ་ནས་ཁ་རུ། ཁ་ནས་སླར་ཡང་ལྟེ་བ་ལ་སོགས་པར་འཁོར་ལོ་འཁོར་བའི་རིམ་པ་བཞིན་དུ་སྔགས་བཟླས་པར་བྱའོ། །དེ་ལ་སྔགས་ནི་འདི་ཡིན་ཏེ། ཨོཾ་མཱ་རཱི་ཙྱཻ་མཱཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། རང་གི་ས་བོན་གྱི་བྱིན་གྱིས་བརླབས་ལ་ཟས་ལ་སོགས་པ་ཐམས་ཅད་ལ་རྗེས་སུ་གནས་པར་བྱའོ། །ངལ་ན་ཡི་གེ་བརྒྱ་བའི་སྔགས་བརྗོད་ལ་ཅི་བདེར་གནས་པར་བྱའོ། །རྟོག་པ་ལས་གསུངས་པའི་འོད་ཟེར་ཅན་དཀར་མོ་ཕྱག་བཅུ་པའི་སྒྲུབ་ཐབས་རྫོགས་སོ།།