ཤེས་རབ་ཀྱི་ཕ་རོལ་ཏུ་ཕྱིན་མ་དཀར་མོའི་སྒྲུབ་ཐབས།
དགེ་འདུན་སྦྱིན་གྱི་བུ།
རྒྱ་གར་སྐད་དུ། ཤུ་ཀླཱུ་པྲཛྙཱ་པཱ་ར་མི་ཏཱ་སཱ་དྷ་ནཾ། བོད་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་མ་དཀར་མོའི་སྒྲུབ་ཐབས། འཕགས་མ་ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་རང་གི་སྙིང་གར་ཆུ་སྐྱེས་དཀར་པོ་དང་ཟླ་བའི་དཀྱིལ་འཁོར་ལ་ཕྱིར་ཡིག་དཀར་པོ་རྣམ་པར་བཀོད་པ་ལ་དེ་བཞིན་དུ་སྔོན་མ་བཞིན་དུ་ཐམས་ཅད་བྱའོ། །པྲཾ་ཡིག་དང་པདྨ་ཡོངས་སུ་གྱུར་པ་ལས་བཅོམ་ལྡན་འདས་མ་སྐུ་མདོག་དཀར་མོ་ཞལ་གཅིག་ཕྱག་གཉིས་པ་ལུང་དང་རྟོགས་པའི་གཟུགས་ཅན་མ། རིན་པོ་ཆེའི་ཅོད་པན་བསྣམས་པ། ཤེས་རབ་ཀྱི་ཕ་རོལ་ཏུ་ཕྱིན་པའི་པུསྟིས་མཚན་པའི་ཆུ་སྐྱེས་གཉིས་གཡོན་དང་གཡས་ཀྱི་ལོགས་ངག་གི་ནང་དུ་ལངས་བ་བསྣམས་པའི་ཕྱག་དག་གིས་ཆོས་འཆད་པའི་ཕྱག་རྒྱ་མཛད་པ། པདྨ་དཀར་པོ་དང་ཟླ་བ་ལ་རྡོ་རྗེ་སྐྱིལ་ཀྲུང་གིས་བཞུགས་པ། ལང་ཚོ་གཞོན་ཞིང་དར་ལ་བབ་པ། ན་བཟའ་དང་རྒྱན་རྣམ་པ་སྣ་ཆོགས་པས་བརྒྱན་པ། སོ་སོར་སྣང་བ་ཙམ་རབ་ཏུ་འཕྲོ་བའི་སྣ་ཚོགས་པའི་འོད་ཟེར་གྱི་ཚོགས་ཀྱིས་ནམ་མཁའ་གང་བ། མར་མེའི་ཕྲེང་བ་ལྟ་བུ་ཐོགས་པ་མེད་པའི་ཤེས་རབ་ཀྱི་ཕ་རོལ་ཏུ་ཕྱིན་པ་དཔག་ཏུ་མེད་པ་སྤྲོ་ཞིང་བསྡུ་བའི་སྦྱོར་བས་ཐམས་ཅད་རང་བཞིན་གཅིག་ཏུ་ལྷག་པར་མོས་པས་ཇི་སྲིད་ཤེས་རབ་ཀྱི་ཕ་རོལ་ཏུ་ཕྱིན་མ་མངོན་དུ་མ་གྱུར་པ་དེ་སྲིད་དུ་བསྒོམ་པར་བྱའོ། །དེ་ནས་གང་གི་ཚེ་དགོང་བར་གྱུར་ན་པདྨ་དཀར་པོ་སྣའི་རྩེ་མོར་ཙ་ན་ཀའི་ཚད་ཙམ་ཀུན་ནས་བྲིས་པ་བཞིན་དུ་རྣམ་པར་བསྒོམས་ལ། དེ་ལ་བཞུགས་པའི་ཤེས་རབ་ཀྱི་ཕ་རོལ་ཏུ་ཕྱིན་མ་ཤིན་ཏུ་ཕྲ་བར་གསུངས་པའི་གཟུངས་ལ་རྩེ་གཅིག་པའི་ཡིད་ཀྱིས་ཡང་དང་ཡང་དུ་མངོན་དུ་བྱ་ཞིང་བསྒོམ་པར་བྱའོ། །དེ་ནས་བསྐྱེད་པའི་རིམ་པའི་ཕྱོགས་ཀྱི་སྔགས་ནི་ཨོཾ་ཁྲཾ་སྭཱ་ཧཱ། རྫོགས་པའི་རིམ་པའི་ཕྱོགས་ལ་ནི། །སྔགས་མེད་དོན་དམ་རིམ་པའོ། །ཤེས་རབ་ཕ་རོལ་ཕྱིན་མ་ཡི། །མན་ངག་ཐོབ་པའི་རྣལ་འབྱོར་པ། །དགེ་འདུན་བྱིན་གྱི་བུ་ཡིས་ནི། །རིགས་ཀྱི་མིང་གིས་ཀྱང་འབད་ནས། །སེམས་ཅན་ཀུན་གྱི་དོན་
ཕྱིར་དུ། །སྒྲུབ་ཐབས་གསལ་པོ་འདི་བྲིས་སོ། །ཤེས་རབ་ཀྱི་ཕ་རོལ་ཏུ་ཕྱིན་མ་དཀར་མོའི་སྒྲུབ་ཐབས་སློབ་དཔོན་དགེ་འདུན་བྱིན་གྱི་བུས་མཛད་པ་རྫོགས་སོ།།