གསེར་མདོག་ཅན་གྱི་ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས།
རྒྱ་གར་སྐད་དུ། ཀ་ན་ཀ་ཝརྞ་པྲཛྙཱ་པཱ་ར་མི་ཏཱ་སཱ་དྷཱ་ནཾ། བོད་སྐད་དུ། གསེར་མདོག་ཅན་གྱི་ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས། འཕགས་མ་ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་ལོ། །དང་པོར་རེ་ཞིག་སྒྲུབ་པ་པོས་སྟན་བདེ་བ་ལ་འདུག་ནས། རང་གི་སྙིང་གར་དབྱངས་ཡིག་དང་པོ་ཡོངས་སུ་གྱུར་པ་ལས་ཟླ་བའི་དབུས་སུ་དྷཱིཿཡིག་སེར་པོ་བསྒོམས་ཏེ། དེ་ལས་བྱུང་བའི་མེ་ཏོག་ལ་སོགས་པ་རྣམས་ཀྱིས་བསྒོམ་པར་བྱ་བ་དང་ལྡན་པའི་བཅོམ་ལྡན་འདས་མ་རང་གི་སྙིང་གའི་ས་བོན་གྱི་ཆས་གདན་དྲངས་ནས་རང་གི་མདུན་དུ་བཞུགས་ཏེ། ཡང་དག་པར་མཆོད་ནས་དེའི་མདུན་དུ་སྡིག་པ་བཤགས་པ་ལ་སོགས་པ་བྱའོ། །དེའི་རྗེས་ལ་ཚད་མེད་པའི་གནས་བཞི་བསྒོམས་པ་སྔོན་དུ་འགྲོ་བས་སྐད་ཅིག་གིས་སྟོང་བ་ཉིད་བསྒོམ་པར་བྱ་སྟེ། སྔགས་འདིའོ། །ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ་ཉཧཾ་ཞེས་སོ། །ཕྱི་ནས་ནམ་མཁའི་ཕྱོགས་སུ་དབྱངས་ཡིག་དང་པོ་ཡོངས་སུ་གྱུར་
པ་ལས་ཟླ་བའི་དཀྱིལ་འཁོར་ལ་དྷཱིཿཡིག་སེར་པོ་ལ། ཨ་ཡིག་ལ་སོགས་པའི་དབྱངས་བཅུ་དྲུག་གིས་ཡོངས་སུ་བསྐོར་བའོ། །དེ་ནས་ཀ་ལ་སོགས་པ་གསལ་བྱེད་སུམ་ཅུ་རྩ་གཉིས་ཀྱི་ཕྲེང་བས་ཡོངས་སུ་བསྐོར་བའོ། །དྷཱིཿཡིག་ཡོངས་སུ་གྱུར་པ་ལས་ཤེས་རབ་ཀྱི་ཕ་རལ་ཏུ་ཕྱིན་པའི་པོ་ཏིས་ཉེ་བར་མཚན་པ་བསྒོམ་པར་བྱའོ། །ཐམས་ཅད་ཡོངས་སུ་གྱུར་པ་ལས་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མ་སྐུ་མདོག་སེར་མོ་སྣ་ཚོགས་པདྨ་ལ་རྡོ་རྗེ་སྐྱིལ་ཀྲུང་གིས་བཞུགས་པ་ཞལ་གཅིག་པ། ཕྱག་གཉིས་ཆོས་འཆད་པའི་ཕྱག་རྒྱ་མཛད་པ། རྒྱན་ཐམས་ཅད་ཀྱིས་བརྒྱན་པ། རིན་པོ་ཆེའི་ཅོད་པན་ཅན། གཡོན་ལོགས་སུ་པདྨའི་དབུས་སུ་ཤེས་རབ་ཀྱི་ཕ་རོལ་ཏུ་ཕྱིན་པའི་བུ་སྟི་བསྣམས་པ་བསྒོམ་པར་བྱའོ། །དཔྲལ་བར་ཨོཾ་ཡིག་སེར་པོ། མགྲིན་པར་ཨཱཿདྐར་པོ་སྙིང་གར་དྷཱིཿཡིག་སེར་པོ། ལྟེ་བར་ཧཱུཾ་ཡིག་ནག་པོའི་སྔགས་བཟླས་པར་བྱའོ། །ཨོཾ་ཨཱཿདྷཱིཿཧཱུཾ་སྭཱ་ཧཱ། གསེར་མདོག་ཅན་གྱི་ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས་རྫོགས་སོ།།