དབྱངས་ཅན་མ་ཆེན་མོའི་སྒྲུབ་ཐབས།
རྒྱ་གར་སྐད་དུ། མ་ཧཱ་སཱ་ར་སྭ་ཏཱི་སཱ་དྷ་ནཾ། བོད་སྐད་དུ། དབྱངས་ཅན་མ་ཆེན་མོའི་སྒྲུབ་ཐབས། འཕགས་མ་དབྱངས་ཅན་མ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་འདིར་སྟོང་པ་ཉིད་ཇི་སྲིད་མངོན་དུ་བྱས་ཤིང་གནས་ནས་ཆུ་
སྐྱེས་དཀར་པོ་ཁྲུ་བདུན་གྱི་ཚད་ཙམ། དེའི་སྟེང་དུ་ཟླ་བའི་དཀྱིལ་འཁོར། དེའི་དབུས་སུ་དྷྲཱིཿཡིག་དཀར་པོ། དེ་ལས་ཆུ་སྐྱེས་དཀར་པོ་ལ་རང་གི་ས་བོན་གྱི་སྙིང་པོ་ཅན་བསྒོམ་པར་བྱའོ། །དེ་ལས་ཡང་བཅོམ་ལྡན་འདས་མ་དབྱངས་ཅན་མ་ཆེན་མོ་རྗེས་སུ་བསམ་པར་བྱའོ། །སྟོན་ཀའི་ཟླ་བའི་འོད་ཀྱི་རྣམ་པ་ཅན། ཆུ་སྐྱེས་དཀར་པོ་ལ་ཟླ་བའི་དཀྱིལ་འཁོར་ལ་བཞུགས་པ། ཕྱག་གཡས་པ་མཆོག་སྦྱིན་པ། གཡོན་པ་སྡོང་བུ་དང་བཅས་པའི་ཆུ་སྐྱེས་དཀར་པོ་བསྣམས་པ། ཞལ་འཛུམ་ཞིང་ཤིན་ཏུ་བརྩེ་བའི་བདག་ཉིད་ཅན། ཙནྡན་དཀར་པོ་དང་མེ་ཏོག་གི་ན་བཟའ་མན་བས་པ། མུ་ཏིག་གི་དོ་ཞལ་གྱིས་ཐུགས་ཀ་ཉེ་བར་མཛེས་པ་རིན་པོ་ཆེ་སྣ་ཚོགས་ཀྱི་རྒྱན་དང་ལྡན་པ་ལོ་བཅུ་གཉིས་ཀྱི་རྣམ་པ་ཅན། ནུ་མ་འབུར་ཞིང་ནང་རྒྱས་པ། རྐེད་པ་བྱིན་གྱིས་ཕྲ་བ། ནང་ནས་འོད་ཟེར་གྱི་ཚོགས་འཕྲོ་བས་འཇིགས་རྟེན་གསུམ་པོ་སྣང་བར་མཛད་པའོ། །དེ་ནས་དེའི་མདུན་དུ་བཅོམ་ལྡན་འདས་མ་ཤེས་རབ་མའོ། །གཡས་སུ་བློ་ཅན་མའོ། །རྒྱབ་ཏུ་བློ་གྲོས་མའོ། །གཡོན་དུ་དྲན་པ་མའོ། །འདི་རྣམས་རང་གི་གཙོ་མོ་དང་སྐུ་མདོག་ལ་སོགས་པ་མཚུངས་ཤིང༌། ཞལ་མངོན་པར་ཕྱོགས་པས་བཞུགས་པར་བསམ་པར་བྱའོ། །དེ་ནས་རང་གི་ལྟེ་བའི་ཕྱོགས་སུ་ཟླ་བའི་དཀྱིལ་འཁོར་ལ་ཨོཾ་ཡིག་དཀར་པོ་བསྒོམས་ནས་དེ་ལས་བྱུང་བའི་དག་གི་རང་བཞིན་མ་ལུས་པའི་ཕྲེང་བ་བར་མཆད་པ་རབ་ཏུ་འབབ་བཞིན་པ་བསམས་ནས་སྔགས་ཀུན་ནས་བཟླས་པར་བྱའོ། །དེ་ལ་སྔགས་ནི་འདིའོ། །ཨོཾ་ཧྲཱིཿམཧཱ་མཱ་ཡཾ་གེ་མ་ཧཱ་སྭ་ར་སྭ་ཏྱེ་ན་མཿདེ་བཞིན་དུ་གསོ་སྦྱོང་བླངས་ནས་མི་སྨྲ་བར་གནས་ནས་རྒྱུན་དུ་ལྷའི་ང་རྒྱལ་དང་བཅས་པས་སྔགས་བཟླས་ཤིང་ལས་གཞན་མི་བྱེད་པས་ཟླ་བ་གཅིག་གིས་དབྱངས་ཅན་མའི་ངག་ཐོབ་པར་འགྱུར་རོ། །ཟླ་བ་གསུམ་གྱིས་ཚངས་པར་སྤྱོད་པ་ཉམས་པས་ཀྱང་འགྲུབ་པོ། །ཟླ་བ་དྲུག་གིས་དབྱངས་ཅན་མ་དང་མཚུངས་པར་འགྱུར་རོ་ཞེས་སོ། །དེ་ནས་སྨན་བརྗོད་པར་བྱ་སྟེ། རའི་འོ་མ་དང༌། ཨ་རུ་ར་དང༌། ཚ་བ་གསུམ་དང༌། མ་ནུ་པ་ཏྲ་དང༌། ཤུ་དག་དང༌། སེ་འབྲུ་དང༌། རྒྱ་མཚན་རྣམས་མར་ལ་ལན་བདུན་མངོན་པར་བསྔགས་ནས་འཐུངས་ན། དབྱངས་ཅན་
མའི་དངོས་གྲུབ་ཏུ་འགྱུར་རོ། །ཡོན་ཏན་བཞི་འགྱུར་ར་འོ་མ། །མར་བཅུག་ནས་ནི་བཅོ་བར་བྱ། །བློ་ལྡན་མི་ནི་ངལ་འཇམ་གྱིས། །སྨན་ནི་ཆོས་པ་ཙམ་གྱིས་སོ། །ཟླ་བ་གཅིག་ཙམ་རབ་སྦྱོར་བས། །བླ་མེད་དག་ནི་ཐོབ་པར་འགྱུར། །ཟླ་བ་དྲུག་ཏུ་ལས་སྒྱོར་བས། །ངག་གི་དབང་ཕྱག་མངོན་གསུམ་འགྱུར། །ཁུ་བྱུག་མྱོས་པའི་དབྱངས་དང་ལྡན། །སྙན་པའི་དབྱངས་ནི་སྐྱེ་འགྱུར་ཏེ། །སེམས་ཉིད་བསྒོམས་པའི་ནུས་པ་ཡིས། །འདིར་ནི་ཐེ་ཚོམ་མི་བྱའོ། །དབྱངས་ཅན་མ་ཆེན་མོའི་སྒྲུབ་ཐབས་རྫོགས་སོ།།