སྒྲོལ་མའི་རྟོག་པ་ལས་འབྱུང་བའི་ཀུ་རུ་ཀུལླེའི་སྒྲུབ་ཐབས།
རྒྱ་གར་སྐད་དུ། ཀལྤོ་ཀྟཾ་ཏཱ་རོདྦྷ་བ་ཀུ་རུ་ཀུལླེ་སཱ་དྷ་ནཾ། བོད་སྐད་དུ། སྒྲོལ་མའི་རྟོག་པ་ལས་འབྱུང་བའི་ཀུ་རུ་ཀུལླེའི་སྒྲུབ་ཐབས། ཀུ་རུ་ཀུལླེ་ལ་ཕྱག་འཚལ་ལོ། །དང་པོར་རེ་ཞིག་སྔགས་པས་ཡིད་དང་མཐུན་པའི་གནས་འགའ་ཞིག་ཏུ་སྟན་བདེ་བ་ལ་ཉེ་བར་འདུག་སྟེ། བཅོམ་ལྡན་འདས་མའི་བྲིས་སྐུ་ལ་སོགས་པ་བཀྲམ་སྟེ། ཕྱིའི་མཆོད་པ་རྣམས་བྱས་ནས་རང་གི་སྙིང་གར་དྲི་མ་མེད་པའི་ཟླ་བ་ཡོངས་སུ་གང་བའི་རྣམ་པ་ལ་དབྱངས་ཡིག་དང་པོ་ལས་བྱུང་བའི་ཟླ་བ་ཡིད་ཀྱིས་རྣམ་པར་བསམས་ནས་དེའི་སྟེང་དུ་ས་བོན་དགོད་པར་བྱའོ། །དྲོ་བ་རྣམས་ཀྱི་བཞི་པ་ནི། །མེ་ཡིག་སྟེང་དུ་ཉེ་བར་གནས། །ཨཱི་ཡིག་དང་ནེ་ཡང་དག་ལྡན། །མཁའ་གཉིས་ཀྱིས་ནི་རྣམ་པར་བརྒྱན། །དེ་ཡི་འོད་ཟེར་སྣ་ཚོགས་ཀྱིས། །འགྲོ་བ་རྣམས་ཀྱི་དྲི་མེད་བྱས། །ཆེན་པོ་ལ་སོགས་ཁམས་དག་པའི། །ཀུ་རུ་ཀུལླེའི་རིར་བཞུགས་ནས། །དེ་ཡི་འོད་ཀྱིས་ཡང་དག་བསྐུལ། །སྒྲོལ་མ་ཡིད་ཀྱིས་མདུན་དུ་བྱ། །
མཁས་པས་དེ་ཡི་ས་བོན་ལས། །མཆོད་པའི་སྤྲིན་ཆེན་སྤྲོ་བྱ་སྟེ། །མེ་ཏོག་བདུག་སྤོས་མར་མེ་དང༌། །དེ་བཞིན་དྲི་དང་ཞལ་ཟས་ཚོགས། །སྒེག་མོ་ཕྲེང་མ་གར་མ་གླུ། །སིལ་སྙན་ལ་སོགས་རྣམས་ཀྱིས་མཆོད། །དཀོན་མཆོག་གསུམ་ལ་བདག་སྐྱབས་མཆི།། སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང༌། །སངས་རྒྱས་བྱང་ཆུབ་ཡིད་ཀྱིས་གཟུང༌། །ཞེས་པའི་སྔགས་ནི་ལན་གསུམ་བརྗོད། །དེ་ནས་བཟོད་པར་གསོལ་བྱ་སྟེ། །དེ་ལ་ཚིགས་བཅད་འདི་ཡིས་སོ། །བདག་ནི་སླར་ཡང་བློ་རྨོངས་པས། །ཉེས་པ་འགའ་ཞིག་ཅི་བགྱིས་པ། །ལུས་ཅན་ཀུན་གྱི་སྐྱབས་གྱུར་པའི། །ལྷ་མོ་ཁྱེད་ལ་བཟོད་པར་གསོལ། །བྱམས་པའི་སེམས་ནི་གནས་པ་ཡིས། །དེ་ཚེ་སླར་ཡང་སྡུག་པར་བལྟ། །སྙིང་རྗེའི་སེམས་ནི་ཡང་དག་བསྐྱེད། །དགའ་བའི་སེམས་ནི་འཇུག་པར་བྱ། །ཕྱི་ནས་ཀུན་ལ་བཏང་སྙོམས་པའི། །སེམས་ཙམ་དུ་ནི་རྣམ་པར་གཞག །དེ་ནས་རང་བཞིན་རྣམ་བྲལ་བའི། །སྟོང་པ་ཉིད་ཉི་གསལ་བར་བྱ། །སྟོང་ཉིད་མེ་ཡིས་བསྲེགས་པ་ཡི། །ཕུང་པོ་ལྔ་པོ་སླར་མི་འབྱུང༌། ཨོཾ་ཤཱུ་ནྱ་དཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ ཧཾ། སྐད་ཅིག་སྟོང་ཉིད་སྦྱོར་བ་ཡིས། །སེམས་ཉིད་ཀྱི་ནི་ངལ་གསོ་བྱ། །སྔོན་གྱི་དམ་བཅའ་དྲན་བྱས་ལ། །ས་བོན་ཙམ་ནི་སླར་ཡང་བསམ། །བདག་ཉིད་གཅིག་པུ་མྱང་འདས་ན། །བདག་གིས་སེམས་ཅན་ཡོངས་སུ་བསླུས། །སྲིད་པའི་རྒྱ་མཚོ་གཏིང་མེད་ལས། །དེ་ལ་ཇི་ལྟར་གདོན་པར་བྱ། །སེམས་ཅན་རྣམས་ལ་བརྩེར་བཞུགས་པའི། །སེམས་བྲལ་སྟོང་ཉིད་སྤང་བར་བྱ། །ཆོས་ཀྱི་དབྱིངས་ཀྱི་རང་བཞིན་དུ། །སེམས་ཉིད་ཀྱིས་ནི་སེམས་བསྐྱེད་བྱ། །སངས་རྒྱས་བྱིན་རླབས་ས་བོན་ལས། །དེ་ལས་ཨུཏྤ་ལར་བཤད་དོ། །ཨ་ཡི་དབྱངས་ལས་བྱུང་བ་ཡི། །ཨུཏྤལ་ཟླ་བའི་དཀྱིལ་འཁོར་ལ། །ཟླ་བ་དེ་ལ་སླར་ཡང་ནི། །ས་བོན་ལས་བྱུང་དེ་ལ་སྦྱོར། །འཇིག་རྟེན་ཁམས་རྣམས་མ་ལུས་པ། །འདི་ཡིས་རྣམ་པར་སྤྱང་བར་བསམ། །སྦྱངས་ཤིང་རྟོགས་པ་དེ་ཡིས་ནི། །འོད་ཀྱིས་སངས་རྒྱས་བྱང་ཆུབ་རྣམས། །བསྐུལ་ཞིང་དེ་ལས་ཨུཏྤལ་ཏེ། །དེ་ཡིས་སྒྲོལ་མ་བསྐྱེད་པར་བསམ། །སྐུ་
མདོག་དམར་མོ་ཕྱག་བཞི་པ། །པདྨ་དམར་པོའི་སྟེང་བཞུགས་ཞིང༌། །གོས་ཟུང་དམར་པོ་དང་ལྡན་པ། །རྣ་རྒྱན་དམར་པོ་དང་བཅས་ཤིང༌། །ཕྱག་གཡས་མི་འཇིགས་པ་དང་ནི། །མདའ་ནི་བསྣམས་ཞིང་སླར་ཡང་འགེངས། །གཡོན་པ་གཞུ་འཛིན་གཉིས་པ་ནི། །ཤིན་ཏུ་དམར་བའི་ཨུཏྤལ་བསྣམས། །ཀུ་རུ་ཀུལླེའི་ཕུག་གནས་ཤིང༌། །འོད་དཔག་མེད་ཀྱི་དབུ་རྒྱན་ཅན། །པདྨ་དམར་པོའི་སྟན་གྱི་འོག །སྒྲ་གཅན་གྱི་ནི་སྟེང་གནས་པའི། །འདོད་ལྷའི་ཆུང་མའི་སྟེང་དུ་ནི། །མྱོས་པར་བྱེད་པ་བསྒོམ་པར་བྱ། །རྡོ་རྗེ་སྐྱིལ་ཀྲུང་གིས་གནས་ཤིང༌། །སྒྱུ་རྩལ་སྣ་ཚོགས་ཀུན་ལྡན་པ། །རྒྱན་རྣམས་ཀུན་གྱིས་ཡང་དག་བརྒྱན། །བཅོམ་ལྡན་འདས་མ་བསམ་པར་བྱ། །དམ་ཚིག་སྐུ་རུ་བསྡུ་སོགས་ཀྱིས། །ཡེ་ཤེས་འཁོར་ལོ་མཚོན་པར་བྱ། །སྐད་ཅིག་རྣམ་པར་ཡོངས་རྫོགས་པས། །ཡེ་ཤེས་འཁོར་ལོ་མདུན་དུ་གནས། །ཛཿཧཱུཾ་བཾ་ཧོཿ་ཞེས་པ་འདིས། དགུག་གཞུག་བཅིང་དང་མཉེས་པར་བྱ། །དམ་ཚིག་ཕྱག་རྒྱ་རབ་སྦྱོར་བས། །ཞལ་གྱི་ལམ་དུ་གཞུག་པར་བྱ། །ལག་པ་དག་ནི་ཐལ་སྦྱར་ནས། །གང་ཚེ་གུང་མོ་མིང་མེད་དག །རིང་དུ་རྩེ་མོར་བྱས་པ་ཡི། །རྩེ་མོའི་ནང་དུ་མིང་མེད་དེ། །མཛུབ་མོ་དག་ནི་གུང་མོར་འཁྱུད། །མཐེ་བ་ཆེན་དག་ནི་འོག་ཏུ་སོན། །འདི་བཞིན་བཅིངས་ནས་དམ་ཚིག་གི །འཁོར་ལོ་ལ་ནི་གཞུག་པར་བྱ། །དེ་ནས་དབང་བསྐུར་བ་ཞུ་བར་བྱ་སྟེ། སངས་རྒྱས་ལ་ཞེས་པའི་ཚིགས་སུ་བཅད་པ་བཀླག་པར་བྱའོ། །བྱང་ཆུབ་རྡོ་རྗེས་སངས་རྒྱས་ལ། །མཆོད་ཆེན་ཇི་ལྟར་བྱིན་པ་ལྟར། །བདག་ཀྱང་བསྐྱབ་པའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །དེ་བྱིན་ཆེན་པོར་གྱུར་པ་ཡིས། །རྒྱལ་སྲིད་མིང་གི་དབང་བསྐུར་བ། །མེ་ཏོག་དབང་བསྐུར་དེ་བཞིན་རྒྱལ། །སྤྱན་མ་ལ་སོགས་ལྷ་རྣམས་ཀྱིས། །དབང་བསྐུར་བ་ནི་རྡོ་རྗེ་ཆེ། །ཁམས་གསུམ་ཀུན་གྱིས་ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །སངས་རྒྱས་དབང་བསྐུར་སྒྲོལ་མ་ཡི། །ཆོས་ན་གཙུག་ཏོར་ནོར་བུར་བྱ། །འོད་ཟེར་དམར་པོ་སྣ་ཚོགས་པ། །འགྲོ་བ་གསུམ་པོ་གསལ་བར་མཛད། །རིན་ཆེན་དབང་བསྐུར་ཐོབ་གྱུར་ནས། །
དངོས་གྲུབ་ཐམས་ཅད་བསྒྲུབ་པར་བྱ། །ཆོ་ག་ཇི་ལྟར་སྔོན་གསུངས་པ། །ལོ་ཕྱེད་བརྟན་པར་འཇུག་པ་ཡིས། །ཐུན་མཚམས་གསུམ་དུ་གཏོར་མ་འབུལ། །བསྒོམ་པ་སྔོན་དུ་འགྲོ་བ་ཡིས། །སྒྲོལ་མ་ཡི་ནི་སྙིང་པོ་འདི། །མཉམ་པར་གཞག་ནས་སྔགས་བཟླས་སོ། །ཨོཾ་ཀུ་རུ་ཀུལླེ་ཧྲཱིཿཧཱུཾ་སྭཱ་ཧཱ། དེ་ནས་སྔོན་དུ་བསྙེན་པའི་ཡི་གེ་འབུམ་བཟླས་ནས། ཕྱིས་ལས་ཡང་དག་པར་བརྩམ་པར་བྱའོ། །ཆ་ཤས་ཀྱིས་ནི་ཤེས་རབ་འཕེལ། །ཡན་ལག་གཞན་གྱིས་དབང་དུ་བྱེད། །ཡན་ལག་གསུམ་པས་དེ་བཞིན་དུ། །མི་ཡིས་དུག་རྣམས་འགུགས་པར་བྱེད། །འཇིག་རྟེན་པ་ནི་ཐམས་ཅད་ཀྱི། །ཤིན་ཏུ་སྨྱོས་ཤིང་སྒེག་པ་ཡི། །བུད་མེད་རྣམས་ཀྱིས་མཆོད་པར་བྱད། །ཇི་ལྟར་འདོད་བཞིན་སྔགས་བཟུང་ནས། །ལྷ་ཡི་བུ་མོ་ཡིད་འོང་རྣམས། །ཟས་དང་སྟོན་མོ་སྦྱོར་བར་བྱེད། །མཁས་པས་རིམ་པར་གོམས་པ་ཡིས། །དངོས་གྲུབ་ཕྲ་མོ་འགྲུབ་པར་འགྱུར། །འདིར་ནི་དངོས་གྲུབ་ཆེན་པོ་ཡང༌། །འགྲུབ་པར་འགྱུར་བར་ཐེ་ཚོམ་མེད། །སྒྲོལ་མའི་རྟོག་པ་ལས་འབྱུང་བ་ཀུ་རུ་ཀུལླེའི་སྒྲུབ་ཐབས་རྫོགས་སོ།།