ཧཱ་ལ་ཧཱ་ལའི་སྒྲུབ་ཐབས།
ལྷན་ཅིག་སྐྱེས་པའི་རོལ་པ།
རྒྱ་གར་སྐད་དུ། ཧཱ་ལ་ཧཱ་ལ་སཱ་དྷ་ནཾ། བོད་སྐད་དུ། ཧཱ་ལ་ཧཱ་ལའི་སྒྲུབ་ཐབས། བཅོམ་ལྡན་འདས་ཧཱ་ལ་ཧཱ་ལ་ལ་ཕྱག་འཚལ་ལོ། །བསམ་པ་ཐམས་ཅད་རྫོགས་བྱེད་པའི། །ཧཱ་ལ་ཧཱ་ལར་གུས་ཕྱག་འཚལ། །སྙིང་རྗེའི་བདག་ཉིད་སྒྲུབ་པའི་ཐབས། །མདོར་བསྡུས་དེ་ནི་བརྗོད་པར་བྱ། །དང་པོར་ཡིད་དང་མཐུན་པའི་གནས་སུ་ཙནྡན་ལ་སོགས་པས་ལེགས་པར་བྱུགས་ལ་ཐང་ཀ་ལ་སོགས་པ་གནས་པར་བཞུགས་སུ་གསོལ་ཏེ་བཅོམ་ལྡན་འདས་ལ་མཆོད་པར་བྱའོ། །མེ་ཏོག་ལ་སོགས་པ་དབུལ་བའི་སྔགས་ནི། ཨོཾ་བཛྲ་པུཥྤེ་ཧཱུཾ། ཨོཾ་བཛྲ་དྷཱུ་པེ་ཧཱུཾ། ཨོཾ་བཛྲ་དཱི་པེ་ཧཱུཾ། ཨོཾ་བཛྲ་གནྡྷེ་ཧཱུཾ། ཨོཾ་བཛྲ་ནཻ་བི་དྱེ་ཧཱུཾ་ཞེས་བྱ་བ་ལ་སོགས་པས་སོ། །ཨོཾ་སརྦ་ཏ་ཐཱ་ག་ཏ་པཱུ་ཛ་མེ་གྷ་པྲ་ས་ར་ས་མུ་ཏྲ་སྥ་ར་ཧི་མཾ་ག་ག་ན་ཁཾ་ཧཱུཾ་མཆོད་པ་ཐམས་ཅད་དབུལ་བའི་སྔགས་སོ། །རབ་ཏུ་མཆོད་པ་དེའི་མདུན་དུ། །བདེ་བའི་སྟན་ལ་རབ་གནས་ཏེ། །འགྲོ་ལ་བྱམས་པ་རྣམ་པར་བསྒོམ། སྙིང་རྗེ་ཡང་ནི་བརྩེ་ཆེན་པོས། །ཧྲཱིཿཡིག་ཟླ་བའི་སྟེང་དུ་ནི། །སྔགས་པས་སྙིང་གར་དགོད་པར་བྱ། །སངས་རྒྱས་སྲས་བཅས་གསལ་པོར་ནི། །ནམ་མཁའ་གང་བར་བལྟ་བར་བྱ། །ཧྲཱིཿཡིག་འོད་ཟེར་མཆོད་པས་ནི། །དེ་ལ་རབ་ཏུ་བསྐོར་ཞིང་མཆོད། །སྡིག་པ་ལ་སོགས་བཤགས་པར་བྱ། །བསོད་ནམས་འཕེལ་ཕྱིར་བྱ་བ་ནི། །མཆོག་གསུམ་སྐྱབས་འགྲོ་ལ་སོགས་བྱ། །སྔགས་འདི་དག་ནི་བརྗོད་བྱ་སྟེ། །ཆོས་རྣམས་བདག་ནི་མེད་པའི་མཆོག །སྙིང་རྗེ་ཡིས་ནི་གསལ་བྱེད་པ། །ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། ཞེས་བྱ་བའི་སྔགས་ཀྱི་དོན་མངོན་དུ་བྱས་པ། དངོས་པོ་དང་བཅས་བདག་ཉིད་ཀྱང༌། །གཟུང་དང་འཛིན་པ་རྣམ་གྲོལ་བའི། །ཡེ་ཤེས་ཙམ་དུ་བསྒོམ་པར་བྱ། །སོ་སོ་རང་གི་རིག་པས་བལྟ། །ཧྲཱིཿཡིག་ཟླ་བའི་སྟེང་གནས་པ། །དེ་སྐྱེས་པདྨ་དཀར་པོ་བསམ། །ཧྲཱིཿཡིག་དང་ལྡན་པད་དཀར་ལས། །དེ་ནས་སངས་རྒྱས་ཚོགས་སྤྲོས་ཏེ། །འགྲོ་བ་སངས་རྒྱས་བྱས་ནས་སུ། །ཡང་ནི་དེ་རུ་གཞུག་པར་བྱ། །དེ་ཉིད་གྱུར་ལས་ཧཱ་ལ་སྟེ། །ཞལ་གསུམ་ཕྱག་དྲུག་ཞི་བའི་ཆས། །རིན་ཆེན་མི་གཡོའི་རི་ཕུག་བརྟེན། །པདྨ་དམར་དང་ཟླ་གནས་པའི། །རོལ་པས་གནོན་ཅིང་ཡང་དག་གནས། །དཀར་པོ་སེར་པོ་སྔོ་ཆེན་པོ། །རྩ་བ་གཡོན་དང་
ཅིག་ཤོས་ཞལ། །སྟག་གི་ཤམ་ཐབས་སྤྱན་གསུམ་པ། །རྒྱན་རྣམས་ཀུན་གྱིས་མཛེས་པ་ཡི། །མཆོག་སྦྱིན་ཕྲེང་དང་མདའ་གཡས་ཕྱག །གཡོན་པས་འདོད་པའི་ནུ་མ་འཛིན། །པདྨ་དཀར་པོ་དབྱུག་པ་ནི། །ཡལ་ག་གསུམ་པའི་དབྱུག་པ་སྟེ། །ཕྱག་གི་ཡལ་ག་དག་གིས་བསྣམས། །སྣ་ཚོགས་མེ་ཏོག་གིས་བཀང་བའི། །གཡོན་པར་ཐོད་པ་དགོད་པར་བྱ། །སྤྲུལ་གྱིས་དཀྲིས་པའི་རྩེ་གསུམ་ཡང༌། །དེ་བཞིན་པདྨའི་སྟེང་གཡས་དགོད། །དཔག་མེད་གཙུག་གི་ནོར་བུ་བྱས། །ཐོད་པའི་ཕྲེང་བས་དབུ་ལ་བརྒྱན། །རལ་པའི་དབུ་རྒྱན་ཆེར་འཛིངས་ལ། །ཟླ་བ་ཕྱེད་པའི་དུམ་བུ་ལྡན། །རྟོག་པའི་དྲ་བ་རྣམ་བཅོམ་པའི། །སངས་རྒྱས་ཚོགས་ཀྱི་འོད་ཟེར་སྤྲོ། །ཧཱ་ལ་ཧཱ་ལ་འདིར་གྱུར་ནས། །རང་སྙིང་མགྲིན་པ་སྤྱི་བོར་ཡང༌། །ཧཱུཾ་ཨཱཿཨོཾ་ནི་བསྒོམ་པར་བྱ། །ཟླ་བ་ལ་གང་དམར་དཀར་རིམ། །དེ་བཞིན་སྙིང་དང་མགྲིན་པའི་བར། །ཧྲཱིཿཡིག་ཟླ་བ་ལ་གནས་པ། །དེ་ནི་བརྟན་དང་གཡོ་དངོས་ཀུན། །དེ་ཡི་རྣམ་པར་བསྒོམ་པར་བྱ། །ལོག་པའི་རྣམ་པར་རྟོག་སྤངས་ནས་སུ། །མཉམ་པར་གཞག་པས་སྔགས་བཟླས་བྱ། །ཨོཾ་ཧཱ་ལ་ཧཱ་ལ་ཧྲཱིཿ། ནང་གི་བཟླས་པ་ཤིན་ཏུ་གསལ། །བུལ་བ་མ་ཡིན་མྱུར་བའང་མིན། །ཇི་ལྟར་བདེ་བས་བཟླས་པར་བྱ། །བསྡུས་པས་རབ་ཏུ་མཆོད་པ་བྱ། །ཡང་དག་བསྟོད་ཅིང་བརྟན་བྱས་ལ། །ཡི་གེ་བརྒྱ་པ་བརྗོད་པར་བྱ། །ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿབྷ་ག་བཱ་ན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་བ་མ་ཧཱ་ས་མ་ཡ་སཏྭ་ཨཱཿཞེས་བྱའོ། །ཨོཾ་སེམས་ཅན་ཀུན་གྱི་དོན་མཛད་བདག །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་འབྱོན་པར་མཛད་དུ་གསོལ། །དེ་ལྟར་འདི་ཡིས་བསྐུལ་ནས་ནི། །སྔགས་འདི་དག་ནི་བརྗོད་པར་བྱ། །ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱ་ནུདྤན་ན་ཏྭཱཏ་མུཿཞེས་བྱའོ། །རྣལ་འབྱོར་བསམ་གཏན་ལངས་ནས་སུ། །རང་གིས་ཅི་ནུས་སྦྱིན་པ་བཏང༌། །མ་ལུས་རྣམ་རྟོག་དང་བྲལ་བས། །གཟུགས་སོགས་འདོད་ཡོན་སྤྱོད་བྱེད་པས། །རིང་པོ་མི་ཐོགས་སྒྲུབ་པོ་མཆོག །བླ་མེད་བྱང་ཆུབ་ཐོབ་པར་འགྱུར།།
སྒྲུབ་ཐབས་བྲིས་ལས་གང་ཐོབ་པའི། །བདག་གི་དགེ་བ་མཆོག་གིས་ནི། །དེ་ཡིས་འགྲོ་བ་མ་ལུས་པ། །མྱུར་དུ་ཧཱ་ལ་ཧཱ་ལར་ཤོག །ཧཱ་ལ་ཧཱ་ལའི་སྒྲུབ་ཐབས་སློབ་དཔོན་ལྷན་ཅིག་སྐྱེས་པ་རོལ་པས་མཛད་པ་རྫོགས་སོ། །པཎྜི་ཏ་དོན་ཡོད་རྡོ་རྗེ་དང༌། ལོ་ཙཱ་བ་དགེ་སློང་བ་རིས་བསྒྱུར་བའོ།། །།