དཔལ་ལྡན་འཕགས་མ་རིགས་བྱེད་མའི་སྒྲུབ་ཐབས།
རྒྱ་གར་སྐད་དུ། ཨཱཪྻ་ཤྲཱི་མ་ཏཱི་ཀུ་རུ་ཀུལླེ་སཱ་དྷ་ནཾ། བོད་སྐད་དུ། དཔལ་ལྡན་འཕགས་མ་རིགས་བྱེད་མའི་སྒྲུབ་ཐབས། འཕགས་མ་ཀུ་རུ་ཀུ་ལླེ་ལ་ཕྱག་འཚལ་ལོ། །རང་གི་སྙིང་གར་ཟླ་བའི་དཀྱིལ་འཁོར་ལ་ཧྲཱིཿཡིག་ལས་སྐྱེས་པའི་ཨུཏྤ་ལ་དམར་པོའི་དབུས་སུ་ཧྲཱིཿཡིག་གིས་མནན་པ་བསམས་ལ་དེ་ཡོངས་སུ་གྱུར་པ་ལས་འཕགས་མ་རིགས་བྱེད་མ་སྐུ་མདོག་དམར་མོ་པདྨ་དམར་པོ་དང་ཟླ་བའི་གདན་ལ་བཞུགས་པ། འོད་ཟེར་དམར་པོའི་དཀྱིལ་འཁོར་ཅན། ན་བཟའ་དམར་པོ་སྣ་ཚོགས་པའི་སྟོང་གཡོགས་ཅན། འོད་དཔག་ཏུ་མེད་པས་དབུ་བརྒྱན་པ། ཕྱག་བཞི་པ། རྩ་བའི་ཕྱག་དག་གིས་ཨུཏྤ་ལ་དམར་པོའི་མདེ་འུས་རྣམ་པར་མཛེས་པའི་མདའ་དང་བཅས་པའི་མེ་ཏོག་གི་གཞུ་རྣ་བའི་རྩར་འགེངས་པ། གཡོན་སྡོང་བུ་དང་བཅས་པའི་ཨུཏྤ་ལ་དམར་པོ་ཁ་བྱེ་བ་བསྣམས་པ། གཡས་པ་མཚོག་སྦྱིན་མཛད་པའོ། །སྒེག་པའི་ཉམས་ཆེན་པོས་རོལ་པར་བལྟས་ཏེ། ཡེ་ཤེས་སེམས་དཔའ་དང་ལྷན་ཅིག་ཏུ་བྱས་ནས་རང་གི་ལུས་ཀྱི་འོད་ཟེར་དམར་པོའི་ལྕགས་ཀྱུས་བཀུག་པའི་ལྷ་དང༌། ལྷ་མ་ཡིན་དང༌། ནམ་མཁའ་ལྡིང་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། གནོད་སྦྱིན་དང༌། སྐྱེས་པ་དང༌། བུད་མེད་བརྒྱ་སྟོང་ལ་སོགས་པའི་ཚོགས་ཤིན་ཏུ་གུས་པར་ལུས་འདུད་
ཅིང་མཆོག་ཏུ་དབང་དུ་གྱུར་པར་ཕྱོགས་བཅུ་རྣམས་སུ་ཡང་དག་པར་བལྟའོ། །ཨོཾ་ཀུ་རུ་ཀུལླེ་ཧྲཱིཿསྭཱ་ཧཱ། ཞེས་པའི་སྔགས་བཟླས་པ་འབུམ་ནས་བརྩམས་ནས། ཇི་སྲིད་བཅོམ་ལྡན་འདས་མ་མངོན་སུམ་དུ་མ་གྱུར་གྱི་བར་དུ་བཟླས་པར་བྱའོ། །དེ་ནས་འགའ་ཞིག་དབང་དུ་བྱ་པར་འདོད་ན་ཇི་ལྟར་གསུངས་པའི་ཆོ་གས་བཟླས་པ་འབུམ་བྱས་ནས་གུས་ཤིང་འདུད་པའི་ལྷ་དང་ལྷ་མ་ཡིན་ལ་སོགས་པའི་དབུས་སུ་འཇུག་ཅིང་རང་གི་ལུས་ཀྱི་འོད་ཟེར་གྱི་ལྕགས་ཀྱུས་བསྒྲུབ་བྱ་བཀུག་ལ་མདུན་དུ་བཀོད་ནས། རང་གི་སྙིང་གར་ཨུཏྤ་ལ་དམར་པོ་འདབ་མ་བཅུ་དྲུག་པ། དེའི་སྙིང་གར་ཡཾ་བསམས་ནས་འཕགས་པ་ཡན་ལག་མེད་པའི་རྡོ་རྗེས་གསུངས་པའི་རིམ་པས་བུང་བའི་ལྕགས་ཀྱུ་བསྒོམས་ལ། དེའི་མིང་གི་ཡི་གེ་རང་གི་སྙིང་གའི་སྔགས་ཀྱིས་ཤིན་ཏུ་མནན་ནས་དེ་བཞིན་དུ་མདས་སྙིང་གར་ཕུག་སྟེ་ཆགས་པ་ཆེན་པོས་བརྒྱལ་ཞིང་གཞུ་རྒྱུད་ཀྱིས་རྐང་པ་བཅིངས་ཤིང་སྐེ་ཨུཏྤ་ལའི་ཞགས་པས་བཅིངས་ནས་ཡང་དག་པར་བཀུག་སྟེ་རང་གི་རྐང་པ་དག་གི་དྲུང་དུ་བསྒྱེལ་ལ། སྐྱེས་པ་ཡིན་ན་ལྕགས་ཀྱུས་སྙིང་གར་དབུག་པར་བྱའོ། །བུད་མེད་ཀྱི་ཆོས་འབྱུང་ལའོ། །ཨོཾ་ཀུ་རུ་ཀུལླེ་ཆེ་གེའམ་ཆེ་གེ་མོ་ཨཱ་ཀཪྵ་ཡ་ཧྲཱིཿསྭཱ་ཧཱ། ཞེས་བྱ་བའི་སྔགས་བཟླས་པར་བྱའོ། །བསྒྲུབ་བྱ་ཁུག་ནས། དེ་ལ་དེ་བཞིན་དུ་སྔགས་ལ་དབང་དུ་བྱ་བ་ནང་དུ་སྤེལ་ལ་བཟླས་པར་བྱའོ། །བརྒྱ་བཟླས་པས་སྐྱེས་པ་དང༌། མི་མོ་དང༌། རྒྱལ་པོ་དང༌། བློན་པོའི་ཚོགས་ཕལ་པ་དབང་དུ་འགྱུར་རོ། །ཁྲི་བཟླས་པས་མངའ་རིས་ཀྱི་འཇིག་རྟེན་ནོ། །འབུམ་བཟླས་པས་རྒྱལ་པོའོ། །འབུམ་ཕྲག་བདུན་གྱིས་ལྷ་དང་ལྷ་མ་ཡིན་གྱི་བུ་མོའོ། །བྱེ་བས་ནམ་མཁའ་ལྡིང་དང༌། གླང་པོ་ཆེ་ས་སྲུང་གི་བུ་ལ་སོགས་པའི་ལྷའི་དུད་འགྲོ་རྣམས་དང༌། དུད་འགྲོ་ཕལ་པ་རྣམས་ཀྱང་ངོ༌། །གུས་པས་རྒྱུན་མི་ཆད་པར་དུས་རིང་པོ་དཔག་ཏུ་མེད་པར་བཟླས་ནས་གསུམ་ཡང་དབང་དུ་བྱེད་པར་འགྱུར་རོ། །དཔལ་ལྡན་འཕགས་མ་རིགས་བྱེད་མའི་སྒྲུབ་ཐབས་རྫོགས་སོ།།