ཀུ་རུ་ཀུལླེའི་སྒྲུབ་ཐབས།
ནག་པོ་སྤྱོད་པ།
རྒྱ་གར་སྐད་དུ། ཀུ་རུ་ཀུལླེ་སཱ་དྷ་ནཾ། བོད་སྐད་དུ། ཀུ་རུ་ཀུལླེའི་སྒྲུབ་ཐབས། ཀུ་རུ་ཀུལླེ་ལ་ཕྱག་འཚལ་ལོ། །ཆུ་སྐྱེས་རྣམ་པར་རྒྱས་པར་བུང་བ་འཁོར་འདྲའི་སྤྱན། །མངོན་གསར་མཆོག་གི་དཔལ་མོ་འཕྲོག་པའི་ལུས་ཀུན་མཛེས། །ཨུཏྤལ་རྒྱས་པའི་གཞུ་རྒྱས་མདའ་དང་ལྕགས་ཀྱུས་མཚན། །འདོད་པའི་སྦྲུལ་འཇོམས་ཀུ་རུ་ཀུལླེ་ལ་ཕྱག་འཚལ། །དང་པོར་རེ་ཞིག་བསྒོམས་པའི་ཐོག་མར་སྐྱེ་བོས་དབེན་པའི་ས་ཕྱོགས་སུ་དྲི་ལྔས་བྱུགས་ཏེ། བརྟུལ་ཞུགས་དང་ལྡན་པ་སེམས་དགའ་བས་སྟན་བདེ་བ་ལ་ཉེ་བར་འདུག་སྟེ། དེའི་ཕྱི་ནས་སྙིང་གར་ར་ཡིག་དམར་པོ་ལས་ཉི་མའི་དཀྱིལ་འཁོར་འབར་ཞིང་འཁྲིགས་པ་ལ། དེ་ནས་རང་གི་སྙིང་གར་དབྱངས་ཡིག་དང་པོ་ལས་ཟླ་བའི་དཀྱིལ་འཁོར། །དེ་ནས་སའི་ཕ་རོལ་གྱི་ས་བོན་གྱི་འོག་ཏུ་མེས་རྣམ་པར་བརྒྱན་པ་བཞི་བའི་དབྱངས་ཀྱིས་བརྒྱན་པའོ། །དེ་ནས་ས་བོན་ལས་སྨིག་རྒྱུ་འབར་བས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་སྣང་བར་མཛད་ནས་དཔལ་ལྡན་ཀུ་རུ་ཀུལླེའི་གཟུགས་སུ་བཀོད་ནས་སླར་ལོག་སྟེ། དེ་ཉིད་དུ་ས་བོན་ལ་རབ་ཏུ་ཞུགས་ཏེ་སྨིག་རྒྱུའི་དྲ་བར་བསྒོམ་པར་བྱའོ། །དེའི་ཕྱི་ནས་ནམ་མཁའི་ཕྱོགས་སུ་མདུན་དུ་ལོ་བརྒྱད་གཉིས་ལོན་པའི་རྣམ་པ་འབར་ཞིང་དབུ་སྐྲ་དམར་སེར་གྱེན་དུ་བརྫེས་པ་ལ་ཐོད་པ་ལྔས་དབུ་བརྒྱན་པ། བྱ་ཁྱུད་གི་གདན་ལ་རྡོ་རྗེ་སྐྱིལ་ཀྲུང་གིས་བཞུགས་པ། འོད་ཟེར་དཀར་པོའི་དཀྱིལ་འཁོར་དང་ལྡན་པ། ཕྱག་དྲུག་པ། གཡས་དང་གཡོན་གྱི་དང་པོ་གཉིས་ཀྱིས་འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་མཛད་པ། གཉིས་པའི་གཡོན་པ་དང༌། གཡས་པ་དག་གིས་མི་འཇིགས་པ་དང༌། ཀུནད་དཀར་པོའི་དོག་པ་བསྣམས་པ། ཕྱག་ལྷག་མ་གཉིས་ཀྱིས་བགྲང་ཕྲེང་དང༌། སྤྱི་བླུགས་བསྣམས་པ། སྒེག་པའི་ཉམས་དང་ལྡན་པ། གསེར་གྱི་གདུ་བུས་ལག་པ་བརྒྱན་པ། ལང་ཚོ་གཞོན་ཞིང་རྒྱས་པ། ན་བཟའ་དཀར་པོ་བསྣམས་པ། སྟོད་ཀོར་དཀར་པོ་ཅན། །རྒྱན་ཐམས་ཅད་ཀྱིས་བརྒྱན་པ། དེ་བཞིན་གཤེགས་པ་ལྔའི་དབུ་རྒྱན་ཅན། ཐུགས་ཀར་ཨུཏྤ་ལ་དཀར་པོའི་ཟེའུ་འབྲུ་ལ་ཟླ་བའི་དཀྱིལ་འཁོར་ལ་དེའི་ས་བོན་བཀོད་ནས་ང་རྒྱལ་རྣམ་པར་བསྒོམ་པར་བྱ་སྟེ། བདག་ཉིད་རྗེ་བཙུན་མ་ཀུ་རུ་ཀུལླེ་ཞེས་སོ། །དེ་ནས་རང་གི་སྙིང་གར་དབྱངས་ཡིག་དང་པོ་ལས་ཡང་དག་པར་བྱུང་བའི་ཟླ་བའི་
དཀྱིལ་འཁོར་ལ་གནས་པ། བརྒྱད་པའི་ས་བོན། དེ་ལས་བྱུང་བའི་ཉེར་སྤྱོད་ལྔའི་མཆོད་པ་དང་ལྡན་པ་རྣམ་པ་སྣ་ཚོགས་པའི་ལྷ་མོ་རྣམས་ཀྱིས་མཆོད་པའི་འོད་ཟེར་གྱི་དྲ་བ་སྤྲོས་པས་མཆོད་པར་བྱ་བ་ནི་མཆོད་པའོ། །མཆོད་ནས་མཆོག་གི་སྙིང་རྗེ་ཅན་གི་རྣལ་འབྱོར་པ་གུས་པས་འདུད་ཅིང་ལུས་དང་ངག་དང་ཡིད་ཀྱིས་ཕྱག་འཚལ་བ་ནི་འཚལ་བའོ། །ཕྱག་འཚལ་ནས་ཡང་སྡིག་པ་བཤགས་པ་དང༌། བསོད་ནམས་ལ་རྗེས་སུ་ཡི་རང་པ་ལ་སོགས་པ་བྱ་སྟེ། བདག་གིས་སྡིག་པ་མི་དགེ་བའི་ལས་ཅི་བགྱིས་པ་དང༌། བགྱིས་པ་ལ་རྗེས་སུ་ཡི་རང་བ་དེ་ཐམས་ཅད་བཅོམ་ལྡན་འདས་མའི་སྤྱན་སྔར་མངོན་སུམ་དུ་བཤགས་སོ། །དེའི་རྗེས་སུ་བྱང་ཆུབ་ཏུ་སེམས་བསྐྱེད་པར་བྱ་བ་ནི་སྲིད་པའི་རྒྱ་མཚོར་ལྷུང་བ་དེ་རྣམས་གདོན་པར་བྱ་བའི་ཕྱིར་སེམས་ཀྱི་རྡོ་རྗེ་མཆོག་ཏུ་བྱའོ་ཞེས་བདག་ཉིད་བྱང་ཆུབ་ཏུ་སེམས་བསྐྱེད་པར་བྱའོ། །དེའི་ཕྱི་ནས་ཚད་མེད་པའི་གནས་བཞི་བསྒོམ་པར་བྱའོ། །དེའི་རྗེས་སུ་བསྒོམ་པ་ཐམས་ཅད་རྣམ་པར་དཔྱད་ནས། རང་བཞིན་གྱིས་ལུས་ཡོངས་སུ་གཏོང་བའི་ངོ་བོ་ཉིད་རྣམ་པར་དག་པའི་སྔགས་ཀྱི་དོན་མངོན་དུ་བྱ་ཞིང་འཇིག་རྟེན་གསུམ་གྱི་བདག་ཉིད་སྟོང་པ་ཉིད་དུ་རྣམ་པར་བསྒོམས་ཏེ་སྔགས་འདིས་རང་གི་སེམས་བྱིན་གྱིས་བརླབ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཕྱི་ནས་སྔོན་དུ་གསུངས་པའི་སྨོན་ལམ་གྱི་སྟོབས་ལས་སེམས་ཅན་གྱི་དོན་ལ་མངོན་པར་བལྟ་བཞིན་པའི་སྔགས་པའི་ལུས་ལྷའི་སྐུར་བསྐྱེད་པར་བྱའོ། །སྔགས་དགོད་པའི་རིམ་པས་ལྷའི་སྐུར་མཚོན་པའོ། །དེའི་རྗེས་སུ་ནམ་མཁའི་ཕྱོགས་སུ་དྲུག་པའི་ས་བོན་ལས་སྐྱེས་པའི་པདྨ་དཀར་པོ་རྣམ་པར་རྒྱས་པའོ། །དེའི་སྟེང་དུ་བརྒྱད་པའི་ས་བོན་ཐིག་ལེ་དང་བཅས་པས་བརྒྱན་པའི་འོག་ཏུ་དྲུག་པའི་དབྱངས་དང་བཅས་པའོ། །དེའི་སྟེང་དུ་སྣ་ཚོགས་རྡོ་རྗེ། །དེས་ས་གཞི་རྡོ་རྗེའི་རང་བཞིན་དང༌། །རྡོ་རྗེའི་བླ་རེ་དང༌། རྡོ་རྗེའི་རབ་ཡང་བསམ་པར་བྱའོ། །དེའི་དབུས་སུ་ཨེ་ཡིག་གི་རྣམ་པ་རབ་ཏུ་གསལ་བའི་ཆོས་འབྱུང་ཡེ་ཤེས་དཀར་པོ་རྣམ་པར་བསྒོམ་པར་བྱའོ། །དེའི་དབུས་སུ་བརྒྱད་པའི་ས་བོན་དཀར་པོའི་འོག་ཏུ་མེས་རྣམ་པར་བརྒྱན་པ། །སྟེང་དུ་བཞི་པའི་དབྱངས་ཀྱིས་བརྒྱན་པ་ཚེག་དྲག་དང་བཅས་པ། དེ་ལས་བྱུང་བའི་ཆུ་སྐྱེས་དཀར་པོ་འདབ་མ་བརྒྱད་པ། དེའི་
སྟེང་དུ་ཟེའུ་འབྲུ་ལ་ས་བོན་དང་མཚུངས་པ། དེ་ལས་བྱུང་བའི་ཉི་མ་དེའི་སྟེང་དུ་དབྱངས་ཡིག་དང་པོ་ལས་བྱུང་བའི་ཟླ་བ་དང་ཉི་མ་ལ་དཔེ་བྱད་བཟང་པོ་བརྒྱད་ཅུས་སྤྲས་པ་དང་ཟླ་བ་མཐོང་བའི་བདག་ཉིད་མཚན་སུམ་ཅུ་རྩ་གཉིས་ཀྱིས་རྣམ་པར་བརྒྱན་པ། འདི་དག་གི་དབུས་སུ་ས་བོན་དཀར་པོ། དེ་ཡོངས་སུ་གྱུར་པ་ལས་ཨུཏྤ་ལ་དཀར་པོ་ལ་ཀཱ་ལི་དང་ཨཱ་ལི་ལ་རང་གི་སེམས་རབ་ཏུ་ཞུགས་པར་བལྟའོ། །ཕྱི་ནས་ཟླ་བའི་གདན་དང་པདྨ་སེམས་གཅིག་ཏུ་གྱུར་པ་ཁུ་བ་བཞིན་དུ་བདག་ཉིད་རྣམ་པར་བསྒོམས་ནས། དེ་ནས་སྔོན་དུ་གསུངས་པའི་ཀུ་རུ་ཀུལླེའི་སྐུར་བདག་ཉིད་བསྒོམ་པར་བྱའོ། །དེ་ནས་བསྒོམ་པར་བྱ་བ་རང་གི་སྙིང་གར་ར་ཡིག་ལས་ཉི་མ་རྣམ་པར་བསྒོམས་ཏེ། དེའི་ལྟེ་བ་ལས་བོན་སླར་ཡང་བསྒོམ་པར་བྱའོ། །དེ་ལས་བྱུང་བའི་འོད་ཟེར་གྱིས་མགོན་པོ་འོད་དཔག་ཏུ་མེད་པ་གདན་དྲངས་ནས་གསང་བ་དང་གཞན་གྱི་མཆོད་པས་དེ་ཡང་དག་པར་མཆོད། །ཡང་དབང་བསྐུར་བ་ཞུ་བར་བྱའོ། །དེ་ལ་འདིས་ཞུ་བ་སྟེ། ཨ་བྷི་ཥིཉྩནྟུ་མཱཾ། ཨ་མི་ཏཱ་བྷཱ་ན། ཞེས་པས་སོ། །དེ་ནས་མགོན་པོ་འོད་དཔག་ཏུ་མེད་པ་དེས་བདུད་རྩི་ལྡས་ཡོངས་སུ་གང་བའི་བུམ་པ་རང་གི་ཐུགས་ཀ་ནས་འཕྲོ་བར་བསྒོམ་པར་བྱའོ། །དེ་ནས་བདུད་རྩི་ལྔས་གང་བའི་བུམ་པ་དེ་རྣམས་ཀྱིས་བཅོམ་ལྡན་འདས་མ་ལ་ཁྲུས་གསོལ་བར་བྱའོ་ཞེས་སོ། །དེ་ནས་རང་གི་ཐུགས་ཀར་རབ་ཏུ་ཞུགས་པར་བསམ་པར་བྱའོ། །དེ་ནས་རྣམ་པར་བཀོད་པས་སྤྱི་བོར་མགོན་པོ་འོད་དཔག་ཏུ་མེད་པ་བསམ་པར་བྱའོ། །དེ་ནས་ཐུན་མཚམས་གསུམ་དུ་བསྒོམ་ཞིང་བསྒོམ་པར་བྱ་བ་བཀོད་ནས་སྔགས་བཟླས་པར་བྱའོ། །སྔགས་དགོད་པ་བསྡུས་པ་ནི་དྲུག་པའི་གསུམ་པའི་ས་བོན་ལ་ཟླ་བ་ཕྱེད་པས་ཐིག་ལེའི་འོག་ཏུ་བརྒྱན་པ་ལྔ་པའི་དབྱངས་ཀྱི་དབྱེ་བ་ལས་སྟེང་དུ་གཙུག་ཏོར་གྱི་ཆའི་མཐར་ཐུག་པར་དགོང་པར་བྱའོ། །དང་པོའི་དབྱངས་ཡིག་དཀར་པོ་ལས་བྱུང་བ་ཟླ་བ་ཕྱེད་པས་རྣམ་པར་བརྒྱན་པ་བཀོད་ནས་མགྲིན་པ་དམར་པོ་ལ་གསུམ་པ་གསུམ་པའི་ས་བོན་ཟླ་བ་ཕྱེད་པས་རྣམ་པར་བརྒྱན་པ། འོག་ཏུ་མེ་ཡིས་རྣམ་པར་བརྒྱན་པ་བཞི་པའི་དབྱངས་དང་ལྡན་པས་ལྟེ་བའི་འོག་གསང་གནས་ཀྱི་མཐར་ཐུག་པ་སེར་པོའོ། །དང་པོའི་གཉིས་པའི་ས་བོན་ལ་ཟླ་བ་ཕྱེད་པས་རྣམ་པར་བརྒྱན་པ་བཀོད་ནས་རྐང་པའི་མཐར་ཐུག་
པ་ལྗང་གུའོ། །ས་དང་ཆུ་དང༌། མེ་དང༌། རླུང་དང༌། ནམ་མཁའ་དང་ལྔའོ། །ཀྵཾ་ཛཾ་ཁཾ་གཾ་སྐཾ་སཾ། ཛཿཧཱུཾ་བཾ་ཧོཿཁཾ་རཾ། མགོ་བོ་དང༌། སྙིང་ག་དང༌། སྤྱི་བོ་དང༌། ལྟེ་བ་དང༌། མགྲིན་པར་བྱ་སྟེ། དུག་ནག་པོའི་ཕུང་པོ་ལ་སོགས་པ་ལས་བྱུང་བ་ཡང་དག་པར་འཇོམས་པར་བྱེད་ད། །དེ་ནས་རྩ་བའི་སྔགས་བཏུ་བ་ནི་དང་པོ་ལ་ཡི་གེའི་དབང་པོ་སྦྱིན་པར་བྱའོ། །དེ་ནས་ལྔ་པའི་ལྔ་པ་དང་བདུན་པའི་ལྔ་པའི་མཐའ་ལ་ཐིག་ལེ་གཉིས་ཀྱིས་བརྒྱན་པའོ། །དེ་ནས་དང་པོའི་དང་པོའི་ས་བོན་ལ་ལྔ་པའི་དབྱངས་ཀྱིས་བརྒྱན་པའོ། །དྲུག་པའི་གཉིས་པའི་ས་བོན་ལ་ལྔ་པའི་དབྱངས་དང་ལྡན་པའོ། །ཡང་དང་པོའི་དང་པོའི་ས་བོན་ལ་ལྔ་པའི་དབྱངས་དང་ལྡན་པའོ། །དྲུག་པའི་གསུམ་པའི་ས་བོན་ལ་དེ་ནས་དང་པོའི་བཅུ་གཅིག་པས་རྣམ་པར་བརྒྱན་པའོ། །བདུན་པའི་བཞི་པའི་ས་བོན་ལ་འོག་ཏུ་མེས་རྣམ་པར་བརྒྱན་པའོ། །མགོ་ལ་བཞི་པའི་དབྱངས་དང་ལྡན་པར་བྱས་ནས་མཐའ་ལ་ཚེག་དྲག་དང་བཅས་པ་མཐའ་ལ་ན་མོ་སླར་ཡང་བཽ་ཥ་ཊ་དེའི་མཐའ་ལ་བཟླས་པར་བྱའོ། །སྭཱ་ཧཱའི་མཐའ་ཅན་སླར་ཡང་ཐམས་ཅད་ལ་བྱའོ། །བཅོ་ལྔ་པོའི་ས་བོན་འདི་རྣམས་ཀྱི་སྔགས་ཀྱི་ཡི་གེའི་གྲངས་ཀྱི་འབུམ་དུ་བཟླས་ལ་བཅུ་ཆས་མེ་ཏོག་དཀར་པོས་སྦྱིན་སྲེག་བྱའོ། །གཡས་སུ་སྲོག་རབ་ཏུ་འཇུག་པས་ཉི་མ་དང་ཟླ་བར་གྱུར་པར་བཅིང་བ་དང༌། གཡས་གཡོན་གྱི་སྲོག་བཅིང་བར་བྱས་ནས་སྔགས་པས་རྟག་ཏུ་བཟླས་པར་བྱའོ། །ཤེལ་དང་མུ་ཏིག་གི་འབྲས་བུའི་བགྲང་ཕྲེང་གིས་བརྒྱ་རྩ་བརྒྱད་ཀྱི་རྡོག་པོ་སྲད་བུས་བརྒྱུ་བར་བྱའོ། །སྲོག་འབྱུང་བའི་དུས་སུ་རྡོག་པོ་བསྐྱོད་པར་བྱའོ། །བདག་ཉིད་གང་ཞིག་དངོས་གྲུབ་འདོད་པས་སྲོག་འཛུག་པ་ན་སྔགས་བཟླས་པར་བྱའོ། །ཨོཾ་མཿཀྵཿཀུ་རུ་ཀུལླེ་ཧྲཱིཿན་མོ་བཽ་ཥ་ཊ་སྭཱ་ཧཱ། ལྷ་མོའི་སྙིང་གའི་སྔགས་སོ། །ཨོཾ་ཤྭེ་ཏེ་ཧཱུཾ་ཕཊ་མགོ་ལའོ། །ཨོཾ་ཤྭེ་ཏེ་ཛཱ་ཊ་ནི་སྭཱཧཱ་སྐྲ་ལའོ། །ཨོཾ་རཏྣཱ་མི་ཏཱ་བྷཱ་པདྨ་ཙཱ་བེ་ཏི་གོ་ཆའོ། །ཨོཾ་ཙ་ཀྵུཿས་མནྟ་ཙཀྵུར་བི་ཤོ་དྷ་ནེ་སྭཱ་ཧཱ་མིག་ལའོ། །ཨོཾ་བྷཱ་ཡ་ནཱ་ས་ནི་ཏཱ་ས་ནི་ཏྲཱ་སེ་ཏཱ་སེ་ཏྲཱ་ས་ཡ་ཏྲཱ་ས་ཡ་སརྦ་ནཱ་ག་ཡ་ཀྵ་བྷཱུ་ཏན་བྷྲྀ་ཊི་ཏྲ་བཻ་ར་ཏྲ་ཤྭེ་ཏ་ཛཱ་ཊ་ནི་ཧཱུཾ་ཧཱུཾ་ཕཊ་ཕཊ་སྭཱཧཱ། མཚོན་ཆའོ། །
མུ་ཏིག་གི་བགྲང་ཕྲེང་གིས་བཟླས་པར་བྱའོ། །བདུད་རྩི་ལྔའི་བཟའ་བ་སྔགས་འདིས་སྦྱང་བར་བྱའོ། །ཨོཾ་ཨཱཿཧཱུཾ་ཞེས་པའི་ཡི་གེ་གསུམ་གྱི་དེ་ཉིད་གསུམ་གྱིས་དེ་བྱིན་གྱིས་བརླབས་པས་སྔགས་འགྲུབ་བོ་ཞེས་སོ། །རང་གི་སྙིང་གར་དབྱངས་ཡིག་དང་པོ་ལས་ཐོད་པ་གསུམ་བསམ་ཞིང་སྟེང་དུ་པདྨའི་སྣོད་དོ། །དེའི་དབུས་སུ་ས་བོན་ལྔའོ། །དེ་ནས་ས་བོན་ལས་བྱུང་བས་པཱུ་ལི་ར་མ་ལ་ཡར་སོང་ནས་སླར་ཡང་ཇི་སྲིད་ཛཱ་ལནྡྷ་རའི་བར་དུའོ། །དེ་ནས་ཛཱ་ལནྡྷ་ར་ར་སོང་ནས་དེ་བཞིན་གཤེགས་པ་རྣམས་རྟོགས་པར་བྱའོ། །དེ་ལ་ཐམས་ཅད་གཅིག་ཏུ་གྱུར་པས་མྱུར་དུ་ཟླ་བའི་དཀྱིལ་འཁོར་གྱི་གཟུགས་སུ་བལྟ་བ་ནི་བདུད་རྩིའོ། །དྲིལ་བུའི་བུ་གའི་ལམ་ནས་འཛག་པར་བྱེད་པའི་བདུད་རྩི་དེས་ཕུང་པོ་དང་ཁམས་དང་སྐྱེ་མཆེད་རྣམས་ཆིམ་པར་བྱའོ། །ཚིམ་པ་དང་དེའི་སྣོད་ལ་ཡང་གནས་པར་བྱའོ། །དེ་ལ་དྲིལ་བུའི་སྟེང་དུ་ཧཱུཾ་ཡིག་མགོ་ཐུར་དུ་འཕྱང་བའོ། །དེ་ལ་སྟེང་དུ་ཨོཾ་ཡིག་བལྟ་བར་བྱའོ། །དེ་ནས་རང་གི་སྙིང་གའི་ས་བོན་ལ་པདྨའི་སྣོད་ལ་ཡེ་ཤེས་ཀྱི་བདུད་རྩི་དྲི་མ་མེད་པའོ། །དེ་ནས་ཡཾ་ཡིག་ཡོངས་སུ་གྱུར་པ་ལས་རླུང་གི་དཀྱིལ་འཁོར་བ་དན་གྱིས་མཚན་པ་གཞུའི་རྣམ་པ་ནག་པོའོ། །དེའི་སྟེང་དུ་རཾ་ཡིག་ཡོངས་སུ་གྱུར་པ་ལས་མེའི་དཀྱིལ་འཁོར་གྲུ་གསུམ་རཾ་ཡིག་འབར་བས་མཚན་པ་མེའི་འོད་དུ་ལྡན་པའི་མདངས་ཅན་ནོ། །དེའི་སྟེང་དུ་ལྟེ་བར་འདབ་མ་དཀར་པོ་བརྒྱད་དང་ལྡན་པའི་ཟེའུ་འབྲུ་དང་བཅས་པ་གསང་བའི་སྦུབས་ཀྱི་མཐར་ཐུག་པར་སོན་བར་བསམ་པར་བྱའོ། །དེའི་དབུས་སུ་ཧྲཱིཿཡིག་འབར་བའི་ཕྲེད་བ་འཁྲིགས་པས་ཤིན་ཏུ་གསལ་བདེ་ཡོངས་སུ་གྱུར་པ་ལས་བཅོམ་ལྡན་འདས་མ་ཀུ་རུ་ཀུལླེ་ཡེ་ཤེས་ཀྱི་བདུད་རྩིས་ཚིམ་པར་བྱ་ཞིང༌། དེ་བཞིན་གཤེགས་པ་ལྔ་ཞུགས་པ་བསྒོམ་པར་བྱའོ། །འདིས་ཡེ་ཤེས་ཀྱི་བདུད་རྩིའི་ཆར་འབབ་པར་བསམ་ཞིང་དུག་གཡོ་བ་ཐམས་ཅད་ཟིལ་གྱིས་གནོན་པར་སྦྱོར་བར་བསམ་པའི་སྔགས་རིག་པས་རྟག་ཏུའོ། །དེ་ནས་སྔགས་པས་དུག་ཞི་བར་འདོད་པས་དཀར་པོའི་ཚེས་གཅིག་ནས་བརྩམས་ཏེ་ཐུན་མཚམས་གསུམ་དུ་ཁྲི་ཕྲག་རེ་རེ་ལ་དེ་བཞིན་དུ་ཉི་མ་སོ་སོ་
ལ་བཅོམ་ལྡན་འདས་མའི་སྐུ་ལ་དམིགས་ཏེ་གོས་དཀར་པོ་བཟུང་ནས་ལུས་ལ་བགོ་བར་བྱའོ། །དེའི་རྗེས་སུ་རང་གི་སྙིང་གའི་ཟླ་བ་ལ་གནས་པའི་ཧྲཱིཿཡིག་དཀར་པོ་ཡོངས་སུ་གྱུར་པ་ལས་ཆུ་སྐྱེས་འདབ་མ་བརྒྱད་པའི་སྡོང་བུ་སྐྱེ་གནས་ཀྱི་མཐར་ཐུག་པར་སོན་པ་བསྒོམ་པར་བྱའོ། །དེའི་འདབ་མ་བརྒྱད་ལ་དབྱངས་ཡིག་བརྒྱད་ཡོངས་སུ་གྱུར་པ་ལས་བུང་བ་བརྒྱད་དགའ་བ་དང་མགུ་བ་དང་རྒྱས་པའོ། །ནག་པོ་དང་དམར་པོ་གོ་རིམས་བཞིན་དུ་བཟློག་པས་རང་གི་སྣ་ནས་ནགས་སུ་ཨུ་ཌི་ཡར་འདོད་ཞིང་རང་གི་སྣ་བུག་གཡས་གཡོན་གྱི་བུ་གནས་འཐོན་ཏེ། བསྒྲུབ་བྱ་དུག་གིས་མནར་བའི་སྣ་གཡས་ཀྱི་བུ་ག་ནས་རབ་ཏུ་ཞུགས་ཏེ་སྟོབས་དང་ལྡན་པས་གཅོད་ཅིང་དུག་རྣམས་རྙིང་བར་བྱའོ། །བརྒྱད་པའི་དང་པོ་དབྱངས་ཡིག་དང་པོ་ལས་ཅུང་ཟད་དཀར་བའི་འདབ་མ་དང་ལྡན་པས་རྣམ་པར་བརྒྱན་པ་ཞེས་རྣམ་པར་བསམ་ཞིང་དུག་གིས་མནར་བའི་སྣ་བུག་གཡས་ནས་འཐོན་པར་བསམ་པར་བྱའོ། །ཕྱི་ནས་རྣལ་འབྱོར་པས་བགྲང་ཕྲེང་གིས་མངོན་པར་བསྣུན་ཅིང་སྤྱི་བླུགས་ཀྱི་ཆུས་དབང་བསྐུར་བྱས་པས་དུག་གིས་མནར་བ་ལངས་པར་བྱེད་དོ། །དུས་གསུམ་དུ་རྣམ་པར་བསྒོམས་པར་གྱུར་པས་རང་ཉིད་ཁྱུད་གི་གཙུག་གི་ནོར་བུའོ། །སྒྲུབ་པ་པོ་མགལ་མེའི་འཁོར་ལོ་བཞིན་དུ་སྔགས་ཀྱི་གཟུགས་ཀྱིས་རྟག་ཏུ་མངོན་པར་དགའ་བ་དང་ལྡན་པར་གྱུར་པས་རྒྱུན་མི་འཆད་པར་གོམས་པའི་ཡིད་ཀྱིས་གདམས་དག་ངེས་པས་སོ། །མཐའ་ཡས་ལ་སོགས་པ་རིགས་ལྡན་རྣམས་ཏེ། དེ་ལ་ཀླུ་རྣམས་དགོད་དར་བྱ་སྟེ། གནས་རྣམས་ཐམས་ཅད་དུའོ། །སྔོན་དུ་ཡི་གེ་རྣམས་དགོད་པར་བྱ་སྟེ། དབྱངས་རྣམས་ཀྱི་ཁྱད་པར་ལས་སོ། །དེའི་ཕྱི་ནས་མཐའ་ཡས་དང་རིགས་ལྡན་དག་གིས་དབུ་སྐྲ་བཅིངས་པའི་གནས་དག་གསེར་གྱི་མདོག་ལྟ་བུའོ། །འཛོག་པོས་རྣ་རྒྱན་དུ་བྱས་ཤིང་གདེངས་པའོ། །ལག་གདུབ་པདྨ་ཆེན་པོ་གསེར་བཙོ་མའི་འོད་ལྟ་བུ། སྟོབས་ཀྱི་རྒྱུ་དཀར་པོས་མཆོད་ཕྱིར་ཐོགས་བྱས་པའོ། །ནོར་རྒྱས་པདྨ་དམར་པོའི་འོད་ལྟ་བུས་སྐ་རགས་བྱས་པ། ཀུནད་དང་བནྡུ་ཀ་འདྲེས་པ་ལྟ་བུའི་པདྨ་དང་དུང་སྐྱོད་དག་གིས་རྐང་པ་དག་ལའོ། །འདི་ལྟ་བུའི་རྒྱན་དྲག་པོས་བརྒྱན་
ནས་སྔགས་རིག་པས་རྟག་ཏུ་ཀུ་རུ་ཀུལླེའི་གཟུགས་དང་དབྱིབས་ཀྱི་བྱ་ཁྱུང་གི་གདན་གྱི་སྟེང་དུ་གནས་པས་གཡོ་བ་དང་མི་གཡོ་བ་ཐམས་ཅད་བསྒྲུབ་པར་བྱའོ། །འདི་ཉིད་ཀྱིང་རིམ་པས་སྒྲུབ་པ་པོ་བདག་ཉིད་བསྒོམས་པར་གྱུར་པས་རང་ཉིད་བྱ་ཁྱུང་གི་གཙུག་གི་ནོར་བུའོ། །དེ་ལ་གནས་པས་བཟླས་པ་བྱ་ཞིང་སྔགས་པས་ཐུན་མཚམས་གསུམ་དུ་ཏིང་ངེ་འཛིན་གྱིས་སོ། །སྔགས་འདི་ཉིད་ཀྱིས་ཞོའི་ཟས་ཨརྐའི་སྣོད་དུ་བྱས་ནས་བཟའ་བར་བྱས་པའི་སྔགས་པས་རྒྱ་མཚོའི་དུག་འཇོམས་པར་བྱེད་དོ། །བུམ་པ་གང་བའམ། དུང་གཡས་སུ་འཁྱིལ་བར་ལན་ཉི་ཤུ་རྩ་གཅིག་བཟླས་པས་ཆུ་དུག་གིས་ན་བས་བཏུང་བར་བྱའོ། །དཀར་པོའི་བསམ་གཏན་གྱི་དབྲལ་བར་ཐིག་ལེའི་གཟུགས་ཀྱིས་དུག་མེད་པར་བྱེད་དོ། །བསམ་གཏན་སེར་པོས་རེངས་པར་བྱེད་དོ། །བསམ་གཏན་དམར་པོས་ཀླུའི་དུག་གི་གཟུགས་རྨོངས་པར་བྱེད་དོ། །བསམ་གཏན་ནག་པོས་དུག་ཡང་དག་པར་འཕོ་བར་བྱེད་དོ། །ལྗང་གུའི་བསམ་གཏན་གྱིས་སླར་ཡང་འཚོ་བར་བྱེད་དོ་ཞེས་པ་ནི་བསམ་གཏན་གྱི་ཁྱད་པར་དུ་གསུངས་སོ། །དཔལ་ལྡན་སྒྱུ་འཕྲུལ་དྲ་བ་རྣལ་འབྱོར་གྱི་རྒྱུད་ཆེན་པོ་སྟོང་ཕྲག་བཅུ་དྲུག་པ་ལས་བྱུང་བའི་ཀུ་རུ་ཀུལླེའི་སྒྲུབ་ཐབས་མཆོག་ཏུ་གྱུར་པ་སློབ་དཔོན་དཔལ་ནག་པོ་སྤྱོད་པའི་ཞབས་ཀྱིས་མཛད་པ་རྫོགས་སོ།།