ཀུ་རུ་ཀུལླེའི་ལས་རབ་ཏུ་བརྐྱང་བ་སྦྱོང་བ།
རྒྱ་གར་སྐད་དུ། ཀུ་རུ་ཀུལླེ་ཀརྨ་པྲ་ས་རཔྲ་ཡོག །བོད་སྐད་དུ། ཀུ་རུ་ཀུལླེའི་ལས་རབ་ཏུ་བརྐྱང་བ་སྦྱོར་བ། འཕགས་མ་ཀུ་རུ་ཀུལླེ་ལ་ཕྱག་འཆལ་ལོ། །ཨོཾ་ཀུ་རུ་ཀུལླེ་སྭཱཧཱ། འཕགས་མ་སྒྲོལ་མའི་སྙིང་པོའོ། །ས་གསུམ་ནུས་པ་གཞོམ་མེད་པའི། །དབང་གི་ལས་ནི་རབ་ཏུ་བརྐྱང༌། །སྔོན་གསུངས་ཏིང་འཛིན་ལ་གནས་ནས། །ཡི་གེ་འབུམ་དུ་བཟླས་པ་བྱ། །
ཕྱི་ནས་མེ་ཏོག་བདུག་པས་བྱུག །དྲི་དང་ཕྱེ་མ་གོས་ལ་སོགས། །སྔགས་འདིས་མངོན་པར་བསྔགས་གྱུར་ཏེ། །གང་ལ་བྱིན་དེ་དབང་དུ་འགྱུར། །དྲི་བཟང་བདུག་པས་བདག་བདུགས་ནས། །སྐྱེ་བོ་ཐམས་ཅད་དགའ་བར་འགྱུར། །གང་མིང་མེ་ཏོག་དམར་པོ་ཡི། །སྦྱིན་སྲེག་བྱས་ཏེ་དབང་དུ་འགྱུར། །བཟའ་བཏུང་ལ་ཡང་མངོན་པར་བསྔགས། །གང་ལ་བྱིན་དེ་དབང་འགྱུར་རོ། །སྐྱེས་བུ་ཆེན་པོ་དབང་བྱེད་ན། །ཡུངས་ཀར་དཀར་པོས་སྦྱིན་སྲེག་བྱ། །ཕྱི་ནས་ཚེས་གྲངས་རྒྱུ་སྐར་རྣམས། །བཟང་པོའི་ཉིན་ལ་བཅོམ་ལྡན་མ། །མཆོད་པ་ལ་སོགས་བྱས་ནས་ནི། །གུར་གུམ་གི་ཝང་ག་པུར་སོགས། །གྲོག་འམ་ནི་ཡང་ན་གོས། །འཁོར་ལོ་རྩིབས་ནི་བཅུ་དྲུག་པ། །ཨུཏྤལ་འདབ་མའི་རྣམ་པ་ལ། །འཁོར་ལོ་མངོན་པར་བྲི་བྱ་སྟེ། །འཁོར་ལོའི་དབུས་སུ་སྔགས་བཅས་ལ། །བསྒྲུབ་བྱ་ཡི་ནི་མིང་རྣམས་བྲི། །འཁྲུལ་འཁོར་ཀུ་རུ་ཀུལླེ་ཡི། །ཡི་གེ་བཞི་ཡི་འཁྲུལ་འཁོར་ཏེ། །བསྒྲུབ་བྱའི་མིང་ནི་ངེས་པར་བྲི། །ཕྱི་རོལ་ཨོ་ཡི་སུམ་འགྱུར་བྱ། །སྲད་བུ་དམར་པོས་ཡང་དག་བྲི།། མྱོས་བྱེད་རང་བཞིན་ཐུམ་བུ་ནི། །ལུས་ཀྱི་སྙིང་གའི་དབུས་སུ་གཞུག །སེང་ལྡེང་མེ་ལ་བསྲོ་བར་བྱ། །རྐང་པ་ནས་ནི་དགུག་པར་བྱ། །སྐྱེས་པའམ་ནི་ཡང་ན་བུད་མེད་དབང་བྱེད་ན། །ཟངས་མའི་ཁབ་ཀྱིས་སྐྱེ་གནས་རྐང་པ་དག་དབུག་བྱ། །འདི་ཉིད་དབང་དུ་འགྱུར་བར་ཐེ་ཚོམ་མེད་པ་སྟེ། །སྔགས་ཀྱི་རྒྱལ་པོ་འདི་ཉིད་དང་པ་ཆེན་པོ་ཡིས། །བཅོམ་ལྡན་འདས་མ་མཆོད་པར་བྱས་ནས་བཟླས་པར་བྱ། །རིམ་པ་འདི་ཉིད་ཀྱིས་ནི་ཀུན་གྱི་དངོས་གྲུབ་འགྱུར། །ཞེས་པ་ནི་ཀུ་རུ་ཀུལླེའི་ལས་རབ་ཏུ་བརྐྱང་བ་སྦྱོར་བ་རྫོགས་སོ།།