འཕགས་མ་གཞན་གྱིས་མི་ཐུབ་མ་གདུགས་དཀར་མོ་ཅན་གྱི་སྒྲུབ་ཐབས།
རྒྱ་གར་སྐད་དུ། ཨཱཪྻ་སི་ཏ་ཏ་པཏྲཱ་པ་རཱ་ཛི་ཏཱ་སཱ་དྷ་ནཾ། བོད་སྐད་དུ། འཕགས་མ་གཞན་གྱིས་མི་ཐུབ་མ་གདུགས་དཀར་མོ་ཅན་གྱི་སྒྲུབ་ཐབས། འཕགས་མ་གཞན་གྱིས་མི་ཐུབ་མ་ལ་ཕྱག་འཚལ་ལོ། །འདིར་སྔོན་དུ་གསུངས་པའི་ཆོ་གས་སྙིང་གར་ཟླ་བའི་དཀྱིལ་འཁོར་ལ་ཨོཾ་ཡིག་དཀར་པོ་ལས་སྐྱེས་པའི་བཅོམ་ལྡན་འདས་མ་གདུགས་དཀར་མོ་ཅན་གཞན་གྱིས་མི་ཐུབ་མ་ཞལ་གསུམ་པ། ཕྱག་དྲུག་པ། ཞལ་སོ་སོ་ལ་སྤྱན་གསུམ་པའོ། །སྐུ་མདོག་དཀར་མོ། །སྔོན་པོ་དང༌། དམར་པོ་ནི་གཡས་དང་གཡོན་གྱི་ཞལ་ལོ། །འཁོར་ལོ་དང༌། ལྕགས་ཀྱུ་དང༌། གཞུ་རྣམས་གཡས་ཀྱི་ཕྱག་ན་བསྣམས་པའོ། །རྡོ་རྗེ་དཀར་པོ་དང༌། མདའ་དང༌། ཞགས་པ་དང་བཅས་པའི་སྡིགས་མཛུབ་ནི་གཡོན་གྱི་ཕྱག་ནའོ། །ཁྲོ་བོའི་ལྷ་སྟངས་དང་བཅས་པའི་སྡིགས་མཛུབ་ནི་གཡོན་གྱི་ཕྱག་ནའོ། །ཁྲོ་བོའི་ལྟ་སྟངས་དང་བཅས་པས་གདོན་ཐམས་ཅད་རྣམ་པར་འཇོམས་པར་བྱེད་པ། ལྷའི་རྒྱན་དང་ན་བཟས་བརྒྱན་པ། །འདྲེན་པ་རྣམ་པར་སྣང་མཛད་སྤྱི་བོར་བསྒོམས་ནས་ཕྱག་རྒྱ་བཅིང་བར་བྱའོ། །ལག་པ་གཡས་པའི་ཁུ་ཚུར་དང་སྡིགས་མཛུབ་སྙིང་གར་ཡང་དག་པར་བཀོང་ལ་ལག་པ་གཡོན་པ་རྡོ་རྗེ་ཁུ་ཚུར་འཕྱར་བའོ། །བཟླས་པ་ནི་ཨོཾ་སིཏཱ་ཏ་པ་ཏྲེ་ཨ་པ་རཱ་ཛི་ཏེ་སརྦ་ཀྲ་ཧཱ་ནུ་ཏྲཱ་ས་ཡ་ཏྲཱ་ས་ཡ་ཧ་ན་ཧ་ན་དྲུཾ་དྲུཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། འཕགས་མ་གཞན་གྱིས་མི་ཐུབ་མ་གདུགས་དཀར་མོ་ཅན་གྱི་སྒྲུབ་ཐབས་རྫོགས་སོ།།