རྡོ་རྗེ་ཙ་རྩི་ཀའི་སྒྲུབ་ཐབས།
རྒྱ་གར་སྐད་དུ། བཛྲ་རྩརྩི་ཀ་སཱ་དྷ་ནཾ། བོང་སྐད་དུ། རྡོ་རྗེ་ཙརྩི་ཀའི་སྒྲུབ་ཐབས། རྡོ་རྗེ་ཙ་ཙི་ཀ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་ག་འདིས་སྟོང་པ་ཉིད་དུ་བསྒོམས་པའི་རྗེས་ལ་ཆུ་སྐྱེས་འདབ་མ་བརྒྱད་པའི་སྟེང་དུ་ཉི་མ་ལ་གནས་པའི་ཧཱུཾ་ཡིག་ལས་སྐྱེས་པའི་རྡོ་རྗེའི་ལྟེ་བ་ལས་ཙཾ་ཡིག་གནས་པར་བསམས་ནས་དེ་ཡོངས་སུ་གྱུར་པ་ལས་རྡོ་རྗེ་ཙ་རྩི་ཀ་ཞལ་གཅིག་པ་སྤྱན་གསུམ་པ། སྐྱིལ་ཀྲུང་ཕྱེད་པའི་གར་སྟབས་ཀྱིས་རོའི་གདན་ལ་བཞུགས་པ། སྐུ་ལུས་རིད་ཅིང་མཆེ་བ་གཙིགས་པ་འཇིག་ས་པ་མི་མགོའི་ཕྲེང་
བའི་རྒྱན་གྱིས་མགུལ་པའི་ཕྱོགས་རྣམ་པར་བརྒྱན་པ། ཕྱག་རྒྱ་ལྔའི་རྒྱན་གྱིས་བརྒྱན་ཅིང་མི་བསྐྱོད་པའི་ཅོད་པན་ཅན། སྟག་གི་པགས་པའི་ཤམ་ཐབས་མནབས་པ། སྐྲ་གྲོལ་བ། ཕྱག་དྲུག་པ། གཡས་ན་རྡོ་རྗེ་དང༌། རལ་གྲི་དང༌། འཁོར་ལོ་བསྣམས་པ། གཡོན་ན་ཐོད་པ་དང༌། ནོར་བུ་དང༌། ཆུ་སྐྱེས་བསྣམས་པ། སྐུ་མདོག་དཀར་མོའོ། །ལས་ཀྱི་རྗེས་སུ་འབྲང་བའི་གཟུགས་ཁ་དོག་དཀར་པོ་ལ་སོགས་པ་དང་ལྡན་པར་བསྒོམས་ནས། རང་གི་སྙིང་གའི་ཙཾ་ཡིག་གི་ཡེ་ཤེས་ཀྱི་འཁོར་ལོ་སྤྱན་དྲངས་ཤིང་མདུན་དུ་ཡང་དག་པར་བཞུགས་ནས། མཆོད་པ་ལ་སོགས་པ་བྱས་ཏེ་རབ་ཏུ་བཅུག་ནས། དེ་ནས་སྔགས་བཟླས་པར་བྱ་སྟེ། ཨོཾ་བཛྲ་ཙརྩི་ཀེ་ཧཱུཾ་སྭཱ་ཧཱ་ཞེས་སོ། །རྡོ་རྗེ་ཙརྩི་ཀའི་སྒྲུབ་ཐབས་རྫོགས་སོ།།