རྡོ་རྗེ་ལྕགས་སྒྲོག་གི་སྒྲུབ་ཐབས་ཀྱི་ཆོ་ག།
རྒྱ་གར་སྐད་དུ། བཛྲ་ཤྲྀཾ་ཁ་ལཱ་སཱ་དྷ་ན་ཨུ་པ་ཡི་ཀ །བོད་སྐད་དུ། རྡོ་རྗེ་ལྕགས་སྒྲོག་གི་སྒྲུབ་ཐབས་ཀྱི་ཆོ་ག །འཕགས་མ་རྡོ་རྗེ་ལྕགས་སྒྲོག་མ་ལ་ཕྱག་འཚལ་ལོ། །དང་པོར་རེ་ཞིག་སྔགས་པས་སྟན་བདེ་བ་ལ་ཉེ་བར་འདུག་སྟེ། ཆོས་ཐམས་ཅད་སྟོང་པ་ཉིད་དོ་ཞེས་དེ་བཞིན་དུ་བརྗོད་ནས། གཞན་གང་ཞིག་རྣམས་ཀྱང་འདིས་ཆོས་རྣམས་སྟོང་པ་ཉིད་ཀྱི་མཐར་བལྟ་ཞིང་ཕུན་སུམ་ཚོགས་པར་བསྐྱེད་ནས། དཀོན་མཆོག་གསུམ་ལ་སྐྱབས་སུ་འགྲོ་བ་ལ་སོགས་པ་བྱའོ། །དེ་ནས་ཇི་སྲིད་སེམས་ཅན་དང་སེམས་ཅན་གྱིས་བསྡུས་པ་རྣམས་ཡང་དག་པར་བླངས་ནས་བདག་གིས་ཐམས་ཅད་མཁྱེན་པའི་ཡེ་ཤེས་ལ་དགོད་པར་བྱའོ་ཞེས་སོ། །དེ་ནས་སྙིང་གར་སྣ་ཚོགས་ཆུ་སྐྱེས། དེའི་སྟེང་དུ་ཉི་མའི་དཀྱིལ་འཁོར། དེ་ནས་ཧཱུཾ་ཡིག་ལས་སྐྱེས་པའི་རྡོ་རྗེ་ལྕགས་སྒྲོག་མའི་བདག་ཉིད་འཆིང་བ་ཐམས་ཅད་གཅོད་པ། གདུག་པའི་སེམས་ཅན་རྣམས་འདུལ་བ། སྐུ་མདོག་ལྗང་གུ་ཞལ་གསུམ་པ། སྤྱན་གསུམ་གསུམ་པ་གཡས་པའི་ཞལ་སེར་སྐྱ་ལ་སྤྱན་སེར་སྐྱ། ཞལ་གཡོན་པ་ཁྲོ་གཉེར་ཅན། དམར་པོ་མཆེ་བ་གཙིགས་པའོ། །ཞལ་དང་པོ་ཅུང་ཟད་བཞད་པའོ། །ཕྱག་བརྒྱད་པ་གཡས་ཀྱི་དང་པོས་མི་འཇིགས་པ་སྦྱིན་པ། གཉིས་པ་ན་རྡོ་རྗེ། གསུམ་པ་ན་རྡོ་རྗེ་ལྕགས་སྒྲོག །བཞི་པ་ན་མངའ། གཡོན་གྱི་ཕྱག་དང་པོ་ན་ཐོད་པ་ཁྲག་གིས་ཡོངས་སུ་གང་བ། གཉིས་པ་ན་སྡིགས་མཛུབ། གསུམ་པ་ན་ཞགས་པ། བཞི་པ་ན་གཞུའོ། །སངས་རྒྱས་ཀྱི་སྤྲིན་ཚོགས་འཕྲོ་བ་ཤིན་ཏུ་རོལ་པའི་སྟབས་ཀྱིས་བཞུགས་པ། བྱི་ལའི་པགས་པའི་སྟོད་གཡོགས་བྱས་པའི་རྡོ་རྗེ་ལྕགས་སྒྲོག་མ་བསྒོམ་པར་བྱའོ། །སྐད་ཅིག་གིས་བྱང་ཆུབ་ཀྱང་ཐོབ་ན་དངོས་གྲུབ་གཞན་སྨོས་ཅི་དགོས། ཨོཾ་བཛྲ་ཤྲྀཾ་ཁ་ལེ་ཧཱུཾ་ཕཊ་སྭཱ་ཧཱ་ཞེས་སོ། །རྡོ་རྗེ་ལྕགས་སྒྲོག་གི་སྒྲུབ་ཐབས་ཀྱི་ཆོ་ག་རྫོགས་སོ།། །།