གཙུག་ཏོར་རྣམ་པར་རྒྱལ་མའི་སྒྲུབ་ཐབས།
རྒྱ་གར་སྐད་དུ། ཨུཥྞཱི་ཥ་བི་ཛ་ཡཱ་སཱ་དྷ་ནཾ། བོད་སྐད་དུ། གཙུག་ཏོར་རྣམ་པར་རྒྱལ་མའི་སྒྲུབ་ཐབས། འཕགས་མ་གཙུག་ཏོར་རྣམ་པར་རྒྱལ་མ་ལ་ཕྱག་འཚལ་ལོ། །བསམ་གཏན་མ་ཆགས་འགྲོ་ལ་མཉེས། །འགྲོ་མགོན་པདྨ་ལ་བཏུད་ནས། །རང་ཉིད་སྒྲུབ་ཐབས་དྲན་བྱའི་ཕྱིར། །རྣམ་པར་རྒྱལ་མའི་སྒྲུབ་ཐབས་བཤད། །ས་འཛིན་ལ་སོགས་ཡིད་འོང་བའི། །ཕྱོགས་འགའ་ཞིག་ཏུ་གནས་ནས་ནི། །ཤིན་ཏུ་འཇམ་པའི་སྟན་ལ་འདུག །རྣལ་འབྱོར་བསམ་བྱ་བསམ་པར་བྱ། །སེམས་ཅན་རྣམས་ཀྱི་བདེ་འབྱུང་བ། །དེ་ལ་བྷྲཱུཾ་བཅས་འོད་ཟེར་འཕྲོས། །སངས་རྒྱས་རྣམས་ནི་གསལ་བྱས་ནས། །དུས་གསུམ་གཤེགས་རྣམས་མཆོད་པར་བྱ། །མཆོད་ཅིང་དེ་རྣམས་མདུན་དུ་ནི། །ལུས་སོགས་ལས་སྐྱེས་སྡིག་པ་རྣམས། །བགྱིད་སྩལ་དབྱེ་བས་ཡང་དག་སྐྱེས། །མན་ངག་རིག་པས་ཐམས་ཅད་བཤགས། །དེ་ལ་བྱུང་བ་རྣམ་པར་སྦྱང༌། །དགེ་བ་ཀུན་ལ་རྗེས་ཡི་རང༌། །དཀོན་མཆོག་གསུམ་ལ་སྐྱབས་སོང་ནས། །སྤྲོས་པ་དང་བཅས་རིམ་པ་བཞིན། །མན་ངག་གིས་ནི་བརྟན་བྱས་ནས། །ཇི་སྲིད་བྱང་ཆུབ་བར་དུ་བསྒྲུབ། །བརྩེ་བས་སེམས་ཅན་རྣམས་ལ་དམིགས། །བྱང་ཆུབ་སེམས་ཉིད་བསྒོམ་པར་བྱ། །མཚན་མེད་དམིགས་པ་མེད་པ་ཡི། །རང་བཞིན་མེད་པ་མཁའ་དབྱིངས་བཞིན། །དེ་ལ་ཨ་ཡིག་ལས་བྱུང་བའི། །ཆུ་སྐྱེས་ལ་གནས་ཟླ་དཀྱིལ་ལ། །ས་བོན་ལས་བྱུང་ལྷ་མོ་ནི། །ཞལ་གསུམ་སོ་སོར་སྤྱན་གསུམ་པ། །ལང་ཚོ་གཞོན་ཞིང་ཕུན་སུམ་ཚོགས། །སྒེག་པ་ལ་སོགས་ཉམས་དང་ལྡན། །སངས་རྒྱས་ཀུན་གྱི་ཡོན་ཏན་གང༌། །རྒྱན་རྣམས་ཀུན་གྱིས་རྣམ་པར་བརྒྱན། །འོད་ཟེར་དང་ལྡན་ན་བཟའ་ནི། །སྟོན་ཀའི་ཟླ་བ་དང་མཚུངས་པ། །རྗེ་བུ་ནཱ་དའི་གསེར་མདོག་ཅན། །གཡས་པའི་ཞལ་ནི་ཞི་བའོ། །དུས་མཐའི་མེ་འབར་སྤྲིན་བཞིན་འཕྲོ། །འཇིགས་ཤིང་མི་བཟད་གཡོན་པའི་ཞལ། །ཕྱག་གཡས་ཉིད་ཀྱི་ཐུགས་ཀར་ནི། །སྣ་ཚོགས་རྡོ་རྗེ་
ཡང་དག་བསྣམས། །གཉིས་པ་ཆུ་སྐྱེས་སྟེང་གནས་པའི། །སངས་རྒྱས་དང་ནི་གསུམ་པར་མདའ། །མཆོག་སྦྱིན་ཕྱག་རྒྱ་བཞི་པའོ། །གཡོན་ན་གོ་རིམས་ཇི་བཞིན་དུ། །སྡིགས་མཛུབ་དང་བཅས་ཞགས་པ་དང༌། །གཞུ་དང་དེ་བཞིན་མི་འཇིགས་པ། །བུམ་པ་གང་བ་བསྣམས་པ་ནི། །མཆོད་རྟེན་ནང་བཞུགས་བསྒོམ་པར་བྱ། །སྙིང་གར་ས་བོན་དང་བཅས་པའི། །པདྨ་བསམ་བྱ་དེ་སྟེང་དུ། །འོད་ཟེར་དཀར་པོའི་དྲ་བ་ཡིས། །བྶྦུལ་ཞིང་གདན་དྲངས་ནམ་མཁའ་ལ། །སངས་རྒྱས་སྤྲིན་ཚོགས་ཆེན་པོ་དང༌། །བྱང་ཆུབ་སེམས་དཔའ་མཐའ་དག་འཁོད། །བརྩེ་ཆེན་བདག་ཉིད་དེ་རྣམས་ཀྱང༌། །རང་རྒྱུད་དུས་གསུམ་འཁོར་བར་བསམ། །དབང་བསྐུར་རབ་ཏུ་སྦྱིན་པར་མཛད། །འབད་པས་རྟག་ཏུ་བསམ་པར་བྱ། །མཆོད་རྟེན་ནང་བཞུགས་ཨོཾ་དང་ཏྲཱཾ། །ཨཱཿཡིག་འོད་ཟེར་རབ་ཏུ་འཕྲོ། །ཧཱུཾ་ཧྲཱིཿཨཾ་ཨཱཿཞེས་པ་ཡི། །ས་བོན་ལས་སྐྱེས་གོ་རིམ་པ་བཞིན། །སྤྱི་བོ་དཔྲལ་བ་མགྲིན་པའི་གནས། །སྙིང་ག་ལྟེ་བ་རྐང་པའི་གནས། །ཟླ་བའི་དཀྱིལ་འཁོར་དབུས་གནས་པའི། །འཇིག་རྟེན་དབང་ཕྱུག་རྣལ་འབྱོར་བསམ། །སྟོན་ཀའི་ཟླ་འོད་དང་མཚུངས་པ། །འོད་ཟེར་ངག་གི་ཕྲེང་བ་འཕྲོ། །ཆུ་སྐྱེས་རྡོ་རྗེ་དག་ལས་བྱུང། །གཡས་པ་དག་གིས་རྔ་ཡབ་བསྣམས། །པདྨ་རྡོ་རྗེ་འཛིན་པ་དག །དེ་ཡི་གཡས་གཡོན་ལོགས་སུའོ། །མདུན་དུ་མི་གཡོ་བ་དང་ནི། །འདོད་པའི་རྒྱལ་པོ་གཡས་ཕྱོགས་སུ། །རྒྱབ་ཀྱི་ཕྱོགས་སུ་དབྱུག་སྔོན་ཅན། །གཡོན་དུ་སྟོབས་ཆེན་དགོད་པར་བྱ། །རལ་གྲི་ལྕགས་ཀྱུ་དབྱུག་པ་དང། །རྡོ་རྗེ་རྣམས་ནི་ཕྱག་ན་བསྣམས། །གློག་བཅས་རྡོ་རྗེ་ལྟུང་བཞིན་པའི། །དུས་མཐའི་ཆུ་འཛིན་དང་མཚུངས་པ། །སྤྱན་ནི་སོས་ཀའི་ཉི་འོད་བཞིན། །གདུག་པ་རྣམས་ཀྱི་སྲོག་འཕྲོག་བྱེད། །ཀུན་གྱི་ཕྱག་གཡོན་རྣམས་ན་ནི། །སྡིགས་མཛུབ་དང་བཅས་ཞགས་པ་བསྣམས། །འོད་ཟེར་འབར་བའི་ཕྲེང་བས་འཁྲིགས། །སྣ་ཚོགས་པདྨ་ཉི་དཀྱིལ་བཞུགས། །སྔགས་པས་ཉིན་དང་མཚན་མོ་རུ། །རྣལ་འབྱོར་ལྡན་པ་འདི་ཡིས་བསྒོམ། །རྡོ་རྗེའི་ཐེག་པར་རབ་ཞུགས་ནས། །དེ་ཡིས་མྱུར་དུ་བྱང་ཆུབ་འཐོབ། །ཅེས་པ་ནི་གཙུག་ཏོར་རྣམ་པར་རྒྱལ་མའི་སྒྲུབ་ཐབས་རྫོགས་སོ།། །།