ནོར་རྒྱུན་མའི་སྒྲུབ་ཐབས།
རྒྱ་གར་སྐད་དུ། བ་སུ་དྷཱ་རཱ་སཱ་དྷ་ནཾ། བོད་སྐད་དུ། ནོར་རྒྱུན་མའི་སྒྲུབ་ཐབས། ལྷ་མོ་ནོར་རྒྱུན་མ་ལ་ཕྱག་འཚལ་ལོ། །དེ་ནས་ནོར་རྒྱུན་མ་བསྒོམ་པར་འདོད་པས་དེའི་ཚེ་སྔོན་མ་བཞིན་དུ་ཐམས་ཅད་བྱས་ནས། འོན་ཀྱང་དྲུག་པའི་ས་བོན་ལ་ཟླ་བ་ཕྱེད་པ་དང་ཐིག་ལེས་བརྒྱན་པའོ། །དེ་དེ་བཞིན་དུ་ཡོངས་སུ་རྫོགས་པ་ལས་ནོར་རྒྱུན་མ་སྐུ་མདོག་སེར་མོ་ཕྱག་གཡོན་ན་འབྲུའི་སྙེ་མ་དང་རིན་པོ་ཆེ་སྣ་ཚོགས་པའི་ཆར་འབབ་བཞིན་པའི་བུམ་པ་བསྣམས་པ། ཕྱག་གཡས་པ་མཆོག་སྦྱིན་མཛད་པ། རྒྱན་ཐམས་ཅད་ཀྱིས་བརྒྱན་པ། གྲོགས་
མོའི་འཁོར་གྱིས་བསྐོར་བར་བསྒོམ་པར་བྱའོ། །བདག་ཉིད་དེ་བཞིན་དུ་ནོར་རྒྱུན་མ་ཞེས་སོ། །ལག་པ་གཉིས་ཁུ་ཚུར་བཅིངས་ནས་གུང་མོའི་ཚིགས་གསུམ་པ་བཅག་པ་ནོར་རྒྱུན་མའི་ཕྱག་རྒྱའོ། །དེ་ནས་སྔགས་བཟླས་པར་བྱའོ། །ཨོཾ་བ་སུ་ནི་དྷ་ན་ཀྵེ་ཏྲེ་སྭཱ་ཧཱ། བཅོམ་ལྡན་འདས་མའི་བྲིས་སྐུ་བཀྲམ་ནས་མཆོད་པ་ཆེན་པོ་བྱས་ཏེ་བསྒོམས་ནས་ཉལ་བར་བྱའོ། །དེ་ནས་བཅོམ་ལྡན་འདས་མའི་དངོས་གྲུབ་ཏུ་འགྱུར་རོ། །ནོར་རྒྱུན་མའི་སྒྲུབ་ཐབས་རྫོགས་སོ།།