དཔལ་རྡོ་རྗེ་ཕག་མོའི་རྟོག་པ་དོན་ཐམས་ཅད་སྒྲུབ་པ།
རྒྱ་གར་སྐད་དུ། །ཤྲཱི་བཛྲ་བཱ་རཱ་ཧཱི་ཀཱལྤ་སརྦ་ཨརྠ་སཱ་དྷ་ནཾ། བོད་སྐད་དུ། དཔལ་རྡོ་རྗེ་ཕག་མོའི་རྟོག་པ་དོན་ཐམས་ཅད་སྒྲུབ་པ། བཅོམ་ལྡན་འདས་མ་འཕགས་མ་རྡོ་རྗེ་ཕག་མོ་ལ་ཕྱག་འཚལ་ལོ། །དེ་ནས་བཅོམ་ལྡན་འདས་མ་གསང་བའི་དབང་ཕྱུག་མ་ལྷ་མོ་རྣམས་དང་བཅས་པ་རྣམས་ཀྱི་བདག་མོ་ཆེན་མོ་ཆེར་གསང་བ་ཆེན་མོ་སྒྱུ་མ་ཆེན་མོ་དབང་ཕྱུག་ཆེན་མོ་འཇིག་རྟེན་གསུམ་པོ་བསྡུ་བ་དང་སླར་ཡང་འཇིག་རྟེན་གསུམ་དུ་སྤྲོ་བར་བྱ་བ་ནི། འདི་ནི་གསང་བ་པ་རྣམས་ཡུམ། །སྒྱུ་མ་ཆེན་མོར་རྣམ་པར་གྲགས། །འཇིག་རྟེན་གསུམ་པོ་སྐྲག་མཛད་པའི། །རིག་སྔགས་འདི་ཐོབ་དབང་ཕྱུག་ཆེ། །གང་གིས་རྣམ་པར་ཤེས་ཙམ་གྱིས། །སྒྲུབ་བྱེད་དབང་ཕྱུག་རིག་སྔགས་ཀྱིས། །ལྷ་ཡི་ཚོགས་རྣམས་ཀུན་བཅས་དང༌། །གནོད་སྦྱིན་ལྷ་མིན་མི་དང་ནི། །རིག་འཛིན་ཤ་ཟ་སྲིན་པོ་དང༌། །ལྟོས་འགྲོ་མི་འམ་ཅིར་བཅས་རྣམས། །དབང་དུ་འགུགས་བྱེད་འབྱུང་རྣམས་ནི། །ཆུ་སྐྱེས་ཐང་ལས་སྐྱེས་རྣམས་ཀྱང༌། །ངོ་མཚར་ཆེར་བྱེད་རིག་སྔགས་ལ། །མིག་འཕྲུལ་ལྟར་བྱེད་དེ་བཞིན་དུ། །རྨོངས་དང་རེངས་བྱེད་དེ་བཞིན་དུ། །རྣམ་པར་ཞེ་སྡང་སྐྲོད་སོགས་དང༌། །དབང་དུ་འགུགས་བྱེད་རྨུགས་པ་དང༌། །དཔག་མེད་ངོ་མཚར་རྣམ་པར་རྣམས། །རིག་སྔགས་བཀླགས་པས་འགྲུབ་འགྱུར་ཏེ། །སྒྲུབ་པ་པོ་ཡི་ངག་ཀྱང་འགྲུབ། །དེ་ལ་བཟླས་མེད་བརྟུལ་ཞུགས་མེད། །སྨྱུང་གནས་ཆོ་གས་བསྒྲུབ་མི་དགོས། །ལྷ་མོས་བདེན་པ་དག་ལ་གསུངས། །ཉོན་མོངས་མེད་པར་དངོས་གྲུབ་འགྱུར། །ཁྱོད་ཀྱི་སྔགས་ནི་སྒྱུ་མ་ཆེ། །འཇིག་རྟེན་གསུམ་པོ་ཐམས་ཅད་སྒྲུབ། །རྣལ་འབྱོར་ཆེན་པོར་རབ་བཤད་བྱ། །ལྷ་མོ་ཡི་གེའི་ཕྲེང་བ་ཡིས། །ཨོཾ་ན་མོ་བྷ་ག་བ་ཏི་བཛྲ་བཱ་རཱ་ཧཱི་བཾ། ཨཱཪྻཱ་པ་ར་ཛི་ཏེ། ཏྲཻ་ལོ་ཀྱ་མཱ་ཏེ་མ་ཧཱ་བི་དྱེ་ཤྭ་རི། སརྦ་བྷཱུ་ཏ་བྷ་ཡཱ་བ་ཧེ་མ་ཧཱ་བཛྲེ། བཛྲཱ་ས་ནེ། ཨ་ཛི་ཏེ། ཨ་པ་རཱ་ཛི་ཏི། བ་ཤྱཾ་ཀ་རི་ནེ་ཏྲ་བྷྲ་མ་ཎི། བི་ཥ་ཎི། ཤོ་ཥ་ཎི། རོ་ཥ་ཎི། ཀྲོ་དྷེ་ཀ་རཱ་ལི་ནི། ཏྲཱ་ས་ནི། མཱ་ར་ཎི། བྲཱ་བྷེ་ད་ནི། ཨ་བ་ར་ཛ་ཡེ། བི་ཛ་ཡེ། ཛཾ་བྷ་ནི་སྟྭཾ་བྷ་ནི། མོ་ཧ་ནི། བཛྲ་བཱ་རཱ་ཧཱི། མ་ཧཱ་ཡོ་གི་ནཱི་ཀཱ་མེ་ཤྭ་རཱི་ཁ་གེ། ཏདྱ་ཐཱ་པྲོ་ཏཾ་གེ་པྲོ་ཏཾ་གེ །ཧ་ན་ཧ་ན། པྲཱ་ཎཱ་ན་ཀིཾ་ཀི་ནི། ཁིཾ་ཁི་ནི། དྷུ་ན་དྷུ་ན་བཛྲ་ཧསྟེ། ཤོ་ཥ་ཡ་
ཤོཥ་ཡ་ཁ་ཊྲཱཾ་ག་ཀ་པཱ་ལ་དྷཱ་རི་ཎི། མ་ཧཱ་བི་སི་ཏ་མཱཾ་སཱ་ཤ་ནི། མཱ་ནུ་ཥ་ཨནྟ་པྲཱ་བྲི་ཏེ། སཱ་ནྣི་དྷྱཾན་ར་སི་ར་མཱ་ལཱ་གྲ་ཐི་ཏ་དྷཱ་རི་ཎི། སུཾ་བྷ་ནི་སུཾ་བྷེ། ཧ་ན་ཧ་ན། པྲཎཱཾ། སརྦ་པཱ་ཤཱུ་བ་ནཱ། མ་ཧཱ་མཱཾ་ས་ཙྪེ་ད་ནི། ཀྲོ་དྷ་མཱུརྟྟེ། དཾ་ཥྚྲཱ་ཀ་རཱ་ལི་ནི་མ་ཧཱ་མུ་དྲེ། ཤྲིའི་ཧེ་རུ་ཀ་དེ་བ་སྱཱ་གྲ་མ་ཧི་ཥི། ས་ཧ་སྲ་ཤི་རེ། ས་ཧ་སྲ་བ་ཧ་བེ། ཤ་ཏ་ས་ཧ་སྲ་ཨ་ན་ནེ། ཛྭ་ལི་ཏ་ཏེ་ཛཾ་སེ། ཛྭ་ལ་མུ་ཁི་པིཾ་ག་ལ་ལོ་ཙ་ནེ། བཛྲ་ཤཱ་རཱི་རེ། བཛྲ་ཨཱ་ས་ནི། མི་ལི་ཏེ། ཧེ་ཧེ། ཧ་ཧ། ཧཱུཾ་ཧཱུཾ། ཁ་ཁ། དྷུ་དྷུ། དྷུ་རུ་དྷུ་རུ། མུ་རུ་མུ་རུ། མུཉྩ་མུཉྩ་ཨ་དྭཻ་ཏེ་མ་ཧཱ་ཡོ་གི་ནི། པ་ཋི་ཏ་སིདྡྷེ། དྲེཾ་དྷཾ་དྲེཾ་དྷཾ། གྲཾ་གྲཾ། ཧེ་ཧེ། ཧཱ་ཧཱ། བྷཱི་མེ། ཧ་ས་ཧ་ས། བི་རེ། ཧཱ་ཧཱ། ཧོ་ཧོ། ཧཱུཾ་ཧཱུཾ། ཏྲཻ་ལོ་ཀྱ་བི་ནཱ་ཤ་ནི། ཤ་ཏ་ས་ཧ་སྲ་ཀོ་ཊི་ཏ་ཐཱ་ག་ཏ་པ་རི་བཱ་རེ་ཧཱུཾ་ཧཱུཾ་ཕཊ་སིཾ་ཧ་རཱུ་པེ། ཁ་ག་ཛཾ་རཱུ་པེ་གཿ། ཏྲཻ་ལོ་ཀྱ་ཨུ་ད་རེ། ས་མུ་དྲ་མེ་ཁ་ལེ། གྲས་གྲས་ཧཱུཾ་ཧཱུཾ་ཕཊ། བཱི་ར་ཨ་དྭཻ་ཏེ་ཧཱུཾ་ཧཱུཾ། ཧཱཿཧཱཿ། མ་ཧཱ་བི་ཤུ་མོ་ཧ་ནི། མ་ཧཱ་ཡོ་གེ་ཤྭ་རི་ཏྭཾ། ཌཱ་ཀི་ནཱི་ལོ་ཀཱ་ནཱཾ་བནྡྷ་ནི་སཏྱཿ། པྲ་ཏྱ་ཡ་ཀཱ་རི་ཎི་ཧཱུཾ་ཧཱུཾ་ཕཊ། བྷཱུ་ཏ་ཏྲཱ་ས་ནི། མ་ཧཱ་བཱི་རེ། པ་ར་མ་སིདྡྷེ། ཡོ་གི་ཤྭ་རི་ཕཊ། ཧཱུཾ་ཧཱུཾ་ཕཊ། ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། འདི་ནི་བཅོམ་ལྡན་འདས་མ་སྒྱུ་མ་ཆེན་མོ་བཀླགས་པས་འགྲུབ་པའི་སྒྲུབ་ཐབས་སོ། །ཟླ་བ་གཟས་བཟུང་བའམ། ཉི་མ་གཟས་བཟུང་བ་མཐོང་ནས་ལན་ཉི་ཤུ་རྩ་གཅིག་བཀླག་པར་བྱའོ། །དེ་ནས་དངོས་གྲུབ་ཏུ་འགྱུར་རོ། །ཇི་སྲིད་བཀླགས་པ་དེ་སྲིད་དུ་བུད་མེད་སྟེང་ཕྲག་གཅིག་གི་རྗེས་སུ་འཇུག་པར་འགྱུར་རོ། །ལྷན་ཅིག་བརྗོད་པས་དབང་དུ་འགྱུར་རོ། །ཁྲོ་བའི་སེམས་ཀྱིས་སྙིང་པོར་བྱེད་པས་སྐྲོད་པ་དང་རྣམ་པར་ཞེ་སྡང་བ་དང་རེངས་པར་ཡང་བྱེད་དོ། །དབང་དུ་བྱ་བར་འདོད་པས་མེ་ཏོག་ལ་ཡོངས་སུ་བཟླས་ནས་ནམ་མཁའ་ལ་འཕངས་ན། ཚངས་བ་ལ་སོགས་པ་མཐོང་བར་བྱེད་དོ། །དུར་ཁྲོད་ཀྱི་སོལ་བ་ལ་ལན་ཅིག་བཟླས་ནས་ཁྱིམ་དང་གྲོང་དང་གྲོང་ཁྱེར་དུ་འཕངས་ན་སྲེག་པར་མཐོང་བར་བྱེད་དོ། །རྨ་བྱའི་སྒྲོ་ལ་ལན་ཅིག་བཟླས་ནས་ནམ་མཁའ་ལ་བསྐོར་ན་སླར་ཡང་ཞི་བར་བྱེད་དོ། །ཀར་ལ་ལན་ཅིག་བཟླས་ནས་ཕྱོགས་བཞིར་གཏོར་ན་དཔུང་ཚོགས་ཡན་ལག་བཞིར་མཐོང་བར་བྱེད་དོ། །རྨ་བྱའི་སྒྲོས་ཕྱིར་བཟློག་ནས་བསྐོར་ན་སླར་ཡང་མེད་པར་བྱེད་པར་འགྱུར་རོ། །ད་ནི་སྒྱུ་མ་ཆེན་མོའི་དུར་ཁྲོད་བརྗོད་པར་བྱེ་སྟེ། ཤར་ཕྱོགས་ཀྱི་ཆ་ལ་དཀྱིལ་འཁོར་
གྱི་སྒྲུབ་པ་པོ་རྗེས་སུ་འཛིན་པ་ཞེས་བྱ་བའི་དུར་ཁྲོད་དོ། །བྱང་དུ་གཉིས་སུ་མེད་པར་བྱེད་པའོ། །ནུབ་ཏུ་ཁྲོ་བོའི་གདོང་ངོ༌། །ལྷོ་རུ་མུན་པ་མི་བཟད་པའོ། །མེ་རུ་འཇིགས་པ་ཆེན་པོའོ། །བདེན་བྲལ་དུ་རྣལ་འབྱོར་མང་པོའི་འདུས་པ་ཆེན་པོའོ། །རླུང་དུ་སེང་གེའི་སྒྲ་ཕཊ་ཆེན་པོ་སྒྲོགས་པའོ། །དབང་ལྡན་དུ་ཆུ་སྐྱེས་ས་བོན་ཞེས་བྱ་བའི་དུར་ཁྲོད་རྣམས་སོ། །འདི་རྣམས་སུ་ཇི་ལྟ་བ་བཞིན་དུ་སྦྱོར་བས་ལུས་དང་ཡན་ལག་སྲེག་པ་དང༌། ཕྱེད་སྲེག་པ་དང་ལུས་ཉམས་པ་དང༌། ལུས་ཕྱེད་ཉམས་པ་འཇིགས་པའི་རྣམ་པ་འཇིགས་པར་བྱེད་པ་དང༌། །མདུང་གིས་ཕུག་པའི་རོ་བཅིངས་པ་དང༌། སྐྱནྣ་ར་དང༌། ཀཾ་ཀོ་ལ་ལི་དང༌། ཨ་མྲ་དང༌། ཤི་རི་ཥ་དང༌། ཨུ་དུ་མྺཱ་ར་དང༌། ཨ་ཤྭདྠཱ་དང༌། ནཱ་ག་གེ་སར་གྱི་ཤིང་རྣམས་སོ། །གོ་རིམས་བཞིན་དུ་མ་ཧེ་དང་བྱི་ལ་དང༌། དོམ་དང་སྟག་དང༌། བྱ་རྒོད་དང་ཕག་དང༌། ཤ་ཟའི་གདོང་བ་ཅན་རྫུ་འཕྲུལ་ཆེན་པོའི་གནོད་སྦྱིན་རྣམས་སོ། །ཀུན་ནས་དུར་ཁྲོད་བརྒྱད་དུ་ཅེ་སྤྱང་དང་བྱ་རྒོད་དང་འུག་པ་དང་བྱ་རོག་དང་རོ་ལངས་ལ་སོགས་པ་ཞེས་སོ་ལྷ་མོ་སྒྱུ་མ་ཆེན་མོའི་དུར་ཁྲོད་དོ།། །།རྡོ་རྗེ་ཕག་མོ་ལ་ཕྱག་འཚལ་ལོ། །ཨོཾ་ཧྲཱིཿགྷ་ཊ་ཡ་གྷ་ཊ་ཡ་སརྦ་དུཥྚཱཾ་ཧཱུཾ་ཕཊ་སྭཱ་ཧཱ། གཏོར་མ་ཕུལ་ནས་བསམ་གཏན་བྱའོ། །ལྟེ་བའི་དབུས་སུ་རཾ་ཡིག་ཡོངས་སུ་གྱུར་པ་ལས་མེའི་དཀྱིལ་འཁོར་གྲུ་གསུམ། དེའི་དབུས་སུ་པདྨ་དམར་པོ་འདབ་མ་བཞི་པ། དེའི་སྟེང་དུ་ཧྲཱིཿཡིག་བསྐལ་པའི་མེ་བཞིན་དུ་རབ་ཏུ་འབར་བཞིན་པ། དེ་ཡོངས་སུ་གྱུར་པ་ལས་བདག་ཉིད་རྡོ་རྗེ་ཕག་མོ་སྐུ་མདོག་དམར་མོའོ། །འདབ་མ་བཞི་ལ་བདུད་རྩི་ལྔས་གང་བའི་པདྨའི་སྣོད་བསམ་པར་བྱའོ། །ཡི་དགས་ཀྱི་གདན་ལ་གཡས་བརྐྱང་གི་སྟགས་ཀྱིས་བཞུགས་པ། གཅེར་བུ་སྐྲ་གྱེན་དུ་བརྫེས་པ་ཐོད་པའི་དབུ་རྒྱན་ཅན། ཕྱག་རྒྱ་ལྔ་དང་ལྡན་པ། ཕྱག་བཞི་པའི་གཡས་ན་རྡོ་རྗེ་དང་ལྕགས་ཀྱུ་བ་བསྣམས་པ། གཡོན་ན་ཁ་ཊྲཱཾ་ག་དང་ཐོད་པ་དང་སྡིགས་མཛུབ་ཀྱི་ཞགས་པ་བསྣམས་པ། ཞལ་གཅིག་པ་སྤྱན་གསུམ་པ། ཁྲོ་གཉེར་བསྡུས་ཤིང་ཞལ་གཙིགས་པའོ། །རྡོ་རྗེ་རྣམ་དང་ཤིན་ཏུ་འཇིགས་བྱེད་མ་དང༌། ལྟོ་ཆེན་མ་དང༌། ལྗགས་བསྐྱོད་མ་རྣམས་བསྒོམ་པར་བྱའོ། །ཨོཾ་བཛྲ་བཱ་རཱ་ཧཱི་ཨཱ་བེ་ཤ་ཡ་
སརྦ་དུཥྚཱཾ་ཧྲིཾ་སྭཱ་ཧཱ། ཉེ་བའི་སྙིང་པོའོ། །ཨོཾ་ཧྲཱི་ཧཱུཾ་ཧྲཱིཾ་ཧྲཱིཾ་སྙིང་པོའོ། །འབུམ་བཟླས་པར་བྱའོ། །འདིར་ཏིང་ངེ་འཛིན་དུ་གྱུར་པས་འགྲུབ་པར་ཐེ་ཚོམ་མེད་དོ། །ཨོཾ་ཨ་ཧྲཱིཿཧཱུཾ་ཧཾ་ཧཿསྔགྶ་འདིས་ཤ་ཆེན་ཕྱེ་མར་བྱས་ནས་རི་མོའི་མདུན་དུ་སྤོས་དབུལ་བར་བྱའོ། །ཉིན་རེ་བཞིན་ཇི་སྲིད་དུ་ལན་ཉི་ཤུ་རྩ་གཅིག་གིས་འགྲུབ་སྟེ་གཞན་དུ་མ་ཡིན་ནོ། །ཨོཾ་ཧཱུཾ་ཧཱུཾ་ཧཾ་ཧཿཧཿཧྲིཾ་ཧྲིཾ་ཕེཾ་ཕེཾ་ཕེཾ་ཕཊ་ཀ་རཾ་ཞེས་མཚན་མོ་གཏོར་མ་དབུལ་ནས་བདུད་ཐམས་ཅད་ཞི་བར་བྱ་བའི་ཕྱིར་མཚན་མོ་གཏོར་མ་དང་ཡོ་བྱད་ལྔ་སྦྱིན་པར་བྱའོ། །གང་འགའ་ཞིག་ཏུ་སྨྲ་བར་ཡང་མི་བྱ་སྟེ། རྡོ་རྗེ་རྣལ་འབྱོར་མས་འདིར་བྱིན་གྱིས་རློབ་པར་ཐེ་ཚོམ་མེད་དོ། །དཔལ་རྡོ་རྗེ་ཕག་མོ་རྟོག་པ་ལས་གསུངས་པའི་དོན་ཐམས་ཅད་སྒྲུབ་པའི་ཐབས་རྫོགས་སོ།།