དཔལ་ཛཾ་བྷ་ལའི་སྒྲུབ་ཐབས།
རྒྱ་གར་སྐད་དུ། ཤྲཱི་ཛཾ་བྷ་ལ་སཱ་དྷ་ནཾ། བོད་སྐད་དུ། དཔལ་ཛཾ་བྷ་ལའི་སྒྲུབ་ཐབས། ཛཾ་བྷ་ལ་ལ་ཕྱག་འཚལ་ལོ། །དང་པོར་རེ་ཞིག་གནས་ཀྱི་དོན་ཐམས་ཅད་དང་རང་གི་ལུས་ཀྱང་སྟོང་བར་བསྒོམ་པའོ། །དེའི་རྗེས་ལ་ཅུང་ཟད་དམར་བའི་ཟླ་བའི་དཀྱིལ་འཁོར་ལ་ཐབས་དང་ཤེས་རབ་ཀྱི་རང་བཞིན་ཉིད་གནོད་སྦྱིན་གྱི་ཤིང་རྟ་གྲུ་གསུམ་པདྨ་འདབ་མ་བརྒྱད་པའི་རྣམ་པའོ། །དེའི་དབུས་སུ་བཾ་ཡིག་ལས་ནོར་རྒྱུན་མ་སྐུ་མདོག་སེར་མོ་ཕྱག་ན་འབྲས་ཀྱི་སྙེ་མ་དང་མཆོག་སྦྱིན་མཛད་པ། རྒྱན་ཐམས་ཅད་ཀྱིས་བརྒྱན་པ། གནོད་སྦྱིན་མོ་བརྒྱད་ཀྱིས་ཡོངས་སུ་བསྐོར་བ་འདི་ལྟ་སྟེ། བཟང་མོ་དང༌། རབ་ཏུ་བཟང་མོ་དང༌། སྦས་མ་དང༌། རབ་ཏུ་སྦས་མ་དང༌། ལྷ་མོ་དང༌། དབྱངས་ཅན་མ་དང༌། འཕགས་མ་དང་
ཆུ་ཤེལ་མ་རྣམས་ཀྱིས་ཡོངས་སུ་བསྐོར་བའོ། །ལྷ་མོ་ཆེན་མོ་དེའི་བྷ་གའི་དབུས་སུ། ཛཾ་ཡིག་གི་བདག་ཉིད་སངས་རྒྱས་ལྔའི་ཅོད་པན་ཅན། ཕྱག་གཡས་ན་བཱི་ཛ་པཱུ་ར་ཀ །གཡོན་ན་ནེའུ་ལེ་བསྣམས་པའོ། །དེ་བཞིན་གཤེགས་པ་ལྔས་རིན་པོ་ཆེ་སྣ་ཚོགས་པའི་ཆར་འབེབས་བཞིན་པ་དུང་ཅན་གྱི་མགོ་དང༌། པདྨ་ཅན་གྱི་མགོའི་གཏེར་ཆེན་པོ་ལ་ཞབས་གཉིས་བཞུགས་པ་རང་གི་ཁང་པའི་ཕྱོགས་གཅིག་ཏུ་བསམ་པར་བྱའོ། །སྐུ་མདོག་སེར་བོ་ཨུཏྤ་ལ་སྔོན་པོའི་ཕྲེང་བ་བསྣམས་པའི་དཔལ་ལྡན་མགོན་པོ་ཛཾ་བྷ་ལ་ནོར་རྒྱུན་མ་ལ་ཡང་དག་པར་འཁྱུད་པ། བྱང་ཆུབ་སེམས་ཀྱི་ཐིག་ལེ་ལས་སྐྱེས་པའི་རིན་པོ་ཆེའི་ཚོགས་ཀྱིས་ནམ་མཁའ་མ་ལུས་པར་ཁྱབ་པར་བསྒོམ་པར་བྱ་སྟེ། འབབ་པའི་དུས་སུ་ཤར་ཕྱོགས་སུ་གང་བ་བཟང་པོ་སྔོན་པོ། ལྷོ་ཕྱོགས་སུ་རྣམ་ཐོས་སྲས་སེར་པོ། ནུབ་ཕྱོགས་སུ་ནོར་སྦྱིན་དམར་པོའོ། །བྱང་ཕྱོགས་སུ་ནོར་བུ་བཟང་པོ་སེར་པོའོ། །མེའི་མཚམས་སུ་ཙི་པི་ཀུཎྜ་ལི་དམར་པོ། བདེན་བྲལ་དུ་ཀི་ལི་མི་ལི་སྔོན་པོ། རླུང་དུ་སྤྱོད་པའི་དབང་པོ་སེར་པོ། དབང་ལྡན་དུ་ཁའི་དབང་པོ་སེར་པོའོ། །དེ་ཐམས་ཅད་ཀྱང་ནོར་སྦྱིན་མོའི་བྷ་གའི་དབུས་ན་གནས་པའི་རིན་པོ་ཆེའི་ཆར་འབེབས་བཞིན་པའི་ཛཾ་བྷ་ལ་བཞིན་དུ་བསྒོམ་པར་བྱའོ། །ཤར་སྒོར་གནོད་སྦྱིན་ཆེན་པོ་གཅེར་བུ་འབྲས་བུ་འཆང་བ་རིན་པོ་ཆེའི་ཆར་འབེབས་པའོ། །ལྷོ་སྒོར་པདྨ་དང་པདྨ་ཆེན་པོ་དག་གོ །ནུབ་སྒོར་ཀི་ལི་དང་མ་ཧཱ་ཀི་ལི་དག་གོ །བྱང་སྒོར་གང་བ་དང་གང་བ་བཟང་པོ་དག་གོ །དེ་དག་རྣམས་ཀྱང་གཅེར་བུ་འབྲས་བུ་འཆང་བའོ། །མགོན་པོ་ཛཾ་བྷ་ལ་ལ་གོ་རིམས་བཞིན་དུ་སྔགས་ཀྱི་ཡི་གེ་རྣམས་དགོད་པར་བྱའོ། །ཨོཾ་ནི་སྤྱི་བོར་རོ། །ཛཾ་ནི་ཞལ་ལའོ། །བྷ་ལ་ནི་ཕྱག་གཉིས་ལའོ། །ཛ་ཐུགས་ཀར་རོ། །ལེན་ལྟེ་བ་ལའོ། །དྲཱ་ཡ་ནི་བརླ་གཉིས་ལའོ། །སྭཱ་ཧཱ་ནི་པུས་མོ་གཉིས་ལའོ། །སྤྱི་བོར་ནོར་བུ་བཟང་པོའོ། །སྤྱན་གཉིས་ལ་རྣམ་ཐོས་སྲས་སོ། །ཁ་ལ་མུ་ཁེནྡྲའོ། །ནུ་མའི་བར་དུ་གང་བ་བཟང་པོའོ། །ལྟེ་བར་ནོར་སྦྱིན་ནོ། །བརླ་གཉིས་ལ་ཀི་ལི་མི་ལིའོ། །རྐང་པ་དག་ལ་ཙི་པི་ཀུཎྜ་ལིའོ། །ཡན་ལག་
ཐམས་ཅད་ལ་ཙ་རེནྡྲའོ། །ད་ནི་ཡི་གེ་དགོད་པར་བྱའོ། །ཨོཾ་སྤྱི་བོར་རོ། །ཛླུཾ་དཔྲལ་བར་རོ། །ཙླུཾ་རྣ་བ་དག་ལའོ། །སཾ་མགོ་བོའི་རྒྱབ་ཏུ་དགོད་པར་བྱའོ། །ད་ནི་ལག་པ་ལ་དགོད་པར་བྱ་བ་སྟེ། ལྷ་རྣམས་ཀྱི་ཡི་གེ་ཨོཾ་མཁྲིག་མགུལ་དུ། ཛླུཾ་ལག་པའི་དབུས་སུ། ཙླུཾ་སོར་མོ་ཐམས་ཅད་ཀྱི་རྩེ་མོ་ལ། སཾ་སོར་མོ་ཐམས་ཅད་ཀྱི་རྩ་བ་ལའོ། །ཨོཾ་ཛཾ་བྷ་ལ་ཛ་ལེནྡྲ་ཡེ་སྭཱ་ཧཱ། ཞེས་པས་རབ་ཏུ་གནས་པར་བྱའོ། །མཛུབ་མོ་ལ་ནོར་བུ་བཟང་པོ། གུང་མོ་ལ་གང་བ་བཟང་པོ། མིང་མེད་ལ་ནོར་སྦྱིན། མཐེའུ་ཆུང་ལ་རྣམ་སྲས། དེ་བཞིན་དུ་ཁའི་དབང་པོ་ལག་པའི་མཐིལ་དུ། མཁྲིག་མགུལ་དུ་ཀི་ལི་མི་ལི། མཐེབ་ཆེན་ལ་ཙི་པི་ཀུཎྜ་ལི། མཛུབ་མོ་དང་བཅས་པའི་མཐེབ་ཆེན་གྱི་བར་དུ་ཙ་རེནྡྲའོ། །ལག་པའི་དབུས་སུ་ཛཾ་བྷ་ལ་ཛ་ལེནྡྲཱའོ། །རྡོ་རྗེའི་ཆུ་ལ་སོགས་པའི་བདུད་རྩི་ལྔ་དེའི་ངོ་བོ་མ་ཡིན་ཀྱང༌། རྡོ་རྗེ་ཆུ་དང་ཆུ་བ་སྲེས་ནས་ཁྱོར་བས་བཏུང་སྟེ། ཁྱོར་བ་བརྒྱ་རྩ་བརྒྱད་ཐུན་མཚམས་གསུམ་དུ་དབུལ་བར་བྱའོ། །རིང་པོར་མི་ཐོགས་པར་ཛཾ་བྷ་ལ་དང་འདྲ་བར་འགྱུར་རོ། །ནོར་དང་གསེར་འཕེལ་ཞིང་ས་གཞི་རྫས་ཀྱིས་ཡོངས་སུ་གང་བར་འགྱུར་རོ། །ཨོཾ་ཛླུཾ་ཙླུཾ་སཾ་ཞེས་བརྗོད་ཅིང་ཆུ་ཁྱོར་བས་དབུལ་བར་བྱའོ། །གྲུབ་པར་མ་གྱུར་ན་དཔལ་རྡོ་རྗེ་ཧཱུཾ་མཛད་དུ་བདག་ཉིད་བསྒོམས་ལ་ཛཾ་བྷ་ལའི་སྐུ་གཟུགས་ལ་དུག་དང་སྐེ་ཚེ་དང་ནིམ་པའི་ལོ་མ་དང༌། དྷ་དུ་ར་དང༌། དུར་ཁྲོད་ཀྱི་སོལ་བས་བྱུགས་ལ་བསྲོ་ཞིང་སྐམ་པར་བྱའོ། །ཕྱི་ནས་དུར་ཁྲོད་ཀྱི་མེ་ལ་ཁྲོས་པས་བདུགས་ན་དེས་པར་འགྲུབ་པར་འགྱུར་རོ། །དཔལ་ལྡན་ཛཾ་བྷ་ལའི་སྒྲུབ་ཐབས་རྫོགས་སོ།།