རྟོག་པ་བདུན་བརྒྱ་པ་ལས་གསུངས་པའི་རྟ་མགྲིན་གྱི་སྒྲུབ་ཐབས།
རྒྱ་གར་སྐད་དུ། སཔྟ་ཤ་ཏི་ཀ་ཀལྤོཀྟ་ཧ་ཡ་གྲཱྀ་བ་སཱ་དྷ་ནཾ། བོད་སྐད་དུ། རྟོག་པ་བདུན་བརྒྱ་པ་ལས་གསུངས་པའི་རྟ་མགྲིན་གྱི་སྒྲུབ་ཐབས། དཔལ་རྟ་མགྲིན་ལ་ཕྱག་འཚལ་ལོ། །དངོས་པོ་ཐམས་ཅད་རང་བཞིན་གྱིས་མི་གནས་པ་ཞེས་པ་ནི་བདེ་བར་གཤེགས་པ་རྣམས་ཀྱི་དགོངས་པར་རིག་པར་བྱས་ནས། དེ་ནས་རི་རབ་ཡན་ལག་བརྒྱད་པ་རིན་པོ་ཆེ་སྣ་བདུན་གྱི་རང་བཞིན་ལ་དེའི་དབུས་སུ་དཔག་ཚད་སྟོང་གི་ཚད་ཀྱི་གདན་ལ་ཉེ་བར་འདུག་སྟེ། དཀོན་མཆོག་གསུམ་ལ་སྐྱབས་སུ་འགྲོ་བ་ལ་སོགས་པ་སྔོན་དུ་འགྲོ་བས་ལུས་དང་ངག་དང་ཡིད་བྱིན་གྱིས་བརླབས་ལ། དེ་ཡིས་དེ་བཞིན་དུ་ནམ་མཁའ་ཁྱབ་པའི་ཉི་མའི་དཀྱིལ་འཁོར་ལ་མངོན་པར་ཁྱབ་པར་སྤྲུལ་ནས། དེ་ལ་དེ་བཞིན་དུ་ཧཱུཾ་ཡིག་འབར་བ་ལས་འོད་ཟེར་གྱི་རྣམ་པར་བསམ་ཞིང༌། དེ་ནས་ལུས་ངག་ཡིད་ཐམས་ཅད་རྡོ་རྗེ་རྣམས་ཀྱིས་ཕྱག་འཚལ་བས་ཨོཾ་ཨཱཿ་ཧཱུཾ་ཞེས་པ་འདིས་ཕྱོགས་བཅུའི་མཐར་ཐུག་པའི་འཇིག་རྟེན་གྱི་ཁམས་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་རྣམས་གདན་དྲངས་ནས་ཡེ་ཤེས་ཀྱི་རྣམ་པས་རབ་ཏུ་ཞུགས་ཏེ། སླར་ཡང་ཧཱུཾ་ཡིག་གཉིས་པས་རྟ་མགྲིན་ཡང་དག་པར་བསྐུལ་ཞིང་གདན་དྲངས་ནས་རབ་ཏུ་ཞུགས་ཏེ་ཧཱུཾ་ཡིག་གསུམ་པས་བདག་ཉིད་དེ་བཞིན་དུ་རྟ་མགྲིན་བཞིན་དུ་རྡོ་རྗེའི་རང་བཞིན་གྱི་བདག་ཉིད་ཅན་སྐུ་མདོག་དམར་པོ་འཇིགས་སུ་རུང་བ་སྤྱན་གསུམ་པ། དྲག་པོ་སྨ་ར་དམར་སེར་ཅན། གསུས་པ་ཆེ་བ། ཞལ་མཆེ་བ་གཙིགས་པ། ཐོད་པའི་ཕྲེང་བ་ཅན། རལ་བའི་ཅོད་པན་ཅན། འོད་དཔག་ཏུ་མེད་པས་དབུ་བརྒྱན་པ། ཞལ་གཉིས་པ་སྔོ་ཞིང་འཇིགས་སུ་རུང་བའི་ཧཱི་ཧཱིའི་སྒྲ་སྒྲོགས་ཤིང་ཚངས་པའི་སྒོ་ངའི་རྩེ་མོ་ནས་རྣམ་པར་གནོན་པ། གཉིས་པས་སྲིད་པ་ལ་སོགས་པའི་མཐར་ཐུག་པ་ལའོ། །ཀླུ་བརྒྱད་ཀྱིས་བརྒྱན་པ། མིའུ་ཐུང་གི་རྣམ་པ་ཅན། སྟག་གི་པགས་
པའི་ཤམ་ཐབས་ཅན། སྦྲུལ་གྱི་རྒྱན་གྱིས་བརྒྱན་པ། ལྷ་དང་ལྷ་མ་ཡིན་མཐའ་དག་ལ་བསྡིགས་པར་མཛད་པ། རྡོ་རྗེ་དང་དབྱུག་པ་བསྣམས་པ། རྟ་མགྲིན་ལས་ཁ་དོག་སྣ་ཚོགས་པའི་འོད་ཟེར་སྤྲོ་བ་དང་བསྡུ་བ་བསམ་པར་བྱའོ། །སྔགས་ནི་ཨོཾ་ཧ་ཡ་གྲཱྀ་བ་ཧྲཱིཿཧཱུཾ་ཕཊ་སྭཱ་ཧཱ་ཞེས་ཏེ། བཅོམ་ལྡན་འདས་འདིའི་མཐུས་ཡིད་བཞིན་གྱི་ནོར་བུ་དང༌། བུམ་པ་བཟང་པོ་དང༌། དཔག་བསམ་གྱི་ཤིང་དང༌། བཅུད་དང༌། བཅུད་ཀྱིས་ལེན་ལ་སོགས་པའི་དངོས་གྲུབ་རྣམས་བསྒྲུབ་པས་མངོན་དུ་འགྱུར་རོ་ཞེས་རྟོག་པ་བདུན་བརྒྱ་པ་ལས་གསུངས་སོ། །ཅིས་ཀྱང་བཅོམ་ལྡན་འདས་ཀྱི་བཟླས་པ་འབུམ་ཕྲག་གསུམ་བྱས་པས་འཁོར་ལོས་སྒྱུར་པ་དང་རྒྱལ་སྲིད་གཉིས་མངོན་དུ་འགྱུར་རོ། །ལྷའི་བུ་མོ་དཔག་ཏུ་མེད་པའི་འཁོར་གྱིས་བསྐོར་ཞིང་རིག་འཛིན་མ་མདུན་དུ་བྱས་ཏེ། དེ་ལ་བདེ་བའི་འབྲས་བུ་ཉམས་སུ་མྱོང་ཞིང་གནས་སོ། །ལྷའི་དབང་པོས་གདུགས་འཛིན་པར་འགྱུར་རོ། །ཚངས་པའི་སྔགས་པ་དང༌། ཐག་བཟངས་རིས་ཀྱི་དམག་དཔོན་དང༌། འཕྲོག་བྱེད་དང༌། སོ་སོར་འཕྲོག་བྱེད་དང༌། ལྷ་རྣམས་མཐའ་དག་སྟོབས་མེད་པར་འགྱུར་རོ། །གཅེར་བུ་པའི་སློབ་དཔོན་བདེ་བྱེད་དང་མཐའ་དག་གི་ཡོན་ཏན་རྣམས་ཉེ་བར་སྟོན་པར་བྱེད་དོ། །ཇི་སྲིད་བཅོམ་ལྡན་འདས་ཀྱི་བྱམས་པ་མངོན་པར་མ་རྟོགས་པ་དེ་སྲིད་དུ་གནས་སོ། །མངོན་པར་རྟོགས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་འགྱུར་རོ། །རྟོག་པ་བདུན་བརྒྱ་པ་ལས་གསུངས་པའི་རྟ་མགྲིན་གྱི་སྒྲུབ་ཐབས་རྫོགས་སོ། །