གཤིན་རྗེ་དགྲ་ནག་པོའི་སྒྲུབ་ཐབས།
རྒྱ་གར་སྐད་དུ། ཀྲིཥྞ་ཡ་མཱ་རི་སཱ་དྷ་ནཾ། བོད་སྐད་དུ། གཤིན་རྗེ་དགྲ་ནག་པོའི་སྒྲུབ་ཐབས། བཅོམ་ལྡན་འདས་གཤིན་རྗེ་གཤེད་ལ་ཕྱག་འཚལ་ལོ། །དཔའ་བོ་ཐོད་པའི་ཕྲེང་བ་ཅན། །སྦྲུལ་སོགས་རྒྱན་གྱིས་རྔམ་བྱས་པའི། །གཤིན་རྗེ་གཤེད་མགོན་ཕྱག་འཚལ་ནས། །དེ་ཡི་སྒྲུབ་ཐབས་བྲི་བར་བྱ། །བདེ་བའི་སྟན་ལ་ཡང་དག་འདུག །སྙིང་གར་ཉི་མ་ཧཱུཾ་ཡིག་དགོད། །དེར་སྐྱེས་མཆོད་པའི་ཁྱད་པར་གྱིས། །གུས་པས་ཁྱབ་བདག་ཡང་དག་མཆོད།། དེ་ཡི་མདུན་དུ་ཕྱོགས་བྱས་ཏེ། །སྡིག་པ་བཤགས་པ་ལ་སོགས་བྱ། །འགྲོ་ཀུན་རང་བཞིན་མེད་པར་ནི། །སྐད་ཅིག་གིས་བལྟས་དེ་ཉིད་ལས། །སྙིང་གའི་ས་བོན་རྟགས་ལས་བྱུང༌། །ཞབས་ཀྱི་ཆུ་སྐྱེས་གཡོན་བརྐྱང་བ། །ཁྲོ་གཉེར་བསྡུས་ཤིང་ཞལ་འཇིགས་ལ། །སྨ་ར་སྨིན་མ་དབུ་སྐྲ་སེར། །ཞལ་གསུམ་ལྗགས་ནི་བསྐྱོད་པ་ཡིས། །འཇིགས་བྱེད་མཆེ་བ་གཙིགས་པ་ཅན། །སྤྱན་ནི་དམར་ཞིང་གསུས་ཆེན་ལ། །སྤྲིན་ནག་གསར་བའི་འོད་ཟེར་ཅན། །ཉི་མའི་དཀྱིལ་འཁོར་ལ་གནས་ཤིང༌། །མ་ཧེ་ཡི་ནི་མཚན་ལ་བཞུགས། །སྟག་གི་ཤམ་ཐབས་མིའུ་ཐུང༌། །ང་རྒྱལ་
ཐམས་ཅད་འཇོམས་མཛད་པ། །ཉི་མའི་འོད་ཟེར་གཟི་མདངས་ཆེ། །ས་སྟེང་མ་ལུས་ཀུན་དུ་མཆོད། །འབར་ཞིང་འབར་པའི་ཕྲེང་བ་རྣོ། །དུས་མཐའ་ཡི་ནི་མེ་དང་མཚུངས། །རྡོ་རྗེ་རལ་གྲི་གཏུན་ཤིང་དྲག །རོ་ལངས་སྟ་རེ་ཞགས་པ་བསྣམས། །ཕྱག་གཡས་དང་ནི་གཡོན་པ་ཡི། །དྲུག་པོ་རྣམས་སུ་མཛེས་པར་བསྣམས། །ཁྲོ་བཅས་འཇིགས་བྱེད་ཤིན་ཏུ་དྲག །གཤིན་རྗེ་མཐར་བྱེད་བདུད་འཇོམས་པ། །ཧཱུཾ་ཡིག་གིས་གང་མགྲིན་བསམས་ནས། །འདིར་ནི་དེ་ཡི་ང་རྒྱལ་བྱ། །སྙིང་གར་ཉི་རྡོར་སྙིང་འོད་ཀྱིས། །གཤིན་རྗེ་སྡང་བ་བཟའ་བར་བྱ། །མདུན་ཕྱོགས་དེ་ནས་མཆོད་ནས་ནི། །རང་དང་རྣམ་པ་གཅིག་བྱས་ཏེ། །ཛཿཧཱུཾ་བཾ་ཧོཿས་བོན་བཞིས། །ཡང་དག་དགུག་དང་གཞུག་པ་དང༌། །བཅིང་དང་མཉེས་པས་བདག་མཆོད་ཅིང༌། །བསམ་གཏན་གྱིས་ནི་མཆོད་བྱས་ནས། །ཡང་དག་བསྟོད་ནས་སྔགས་བཟླས་བྱ། །དགེ་བ་ཡོངས་སུ་བསྔོ་བྱ་ཞིང༌། །ལངས་ནས་ལྷ་ཡི་རྣལ་འབྱོར་གྱིས། །བརྩེ་བ་གཅིག་པུའི་ཡིད་ཀྱིས་སྤྱད། །དེ་བཞིན་ཉི་མ་སོ་སོར་བྱ། །དངོས་གྲུབ་ཐོབ་པའི་མཚན་མ་འབྱུང༌། །འདོད་པའི་དངོས་གྲུབ་བསྒྲུབ་བྱ་བ། །ལས་མཆོག་རབ་ཏུ་བརྐྱང་ན་ཡང༌། །ལས་ཀྱི་རྗེས་སུ་འབྲངས་བའི་ཚུལ། །མངས་པས་ཁོ་བོས་མ་བཤད་དོ། །བླ་མའི་མན་ངག་དེ་ཡང་ནི། །རྒྱུད་ལས་མངོན་འདོད་བསྒྲུབ་པར་བྱ། །མཁས་པས་འཁོར་ལོ་གཞན་རྣམས་ཀྱང༌། །ཀུན་ནས་འབད་པས་ཤེས་པར་བྱ། །གཏོར་མ་ཉེར་སྤྱོད་རྣལ་འབྱོར་གྱིས། །ཐུན་མཚམས་བཞི་རུ་ཆོ་ག་བྱ། །བཟླས་པའི་སྔགས་ནི། ཨོཾ་ཧྲཱིཿཥྚྲཱྀཿབི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། བདག་གི་བླ་མའི་མན་ངག་ལས་རྟོགས་ནས། །སྒྲུབ་ཐབས་ཆོ་ག་བྱས་པའི་བསོད་ནམས་ཀྱིས། །འཇིག་རྟེན་པ་རྣམས་ཐམས་ཅད་གྱུར་པ་འདིས། །མངོན་པར་འདོད་པའི་འབྲས་བུ་མྱུར་ཐོབ་ཤོག །གཤིན་རྗེའི་དགྲ་ནག་པོའི་སྒྲུབ་ཐབས་རྫོགས་སོ།།