བཅོམ་ལྡན་འདས་ཡུམ་ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས།
དྲི་མ་མེད་པའི་ལྷ།
རྒྱ་གར་སྐད་དུ། བྷ་ག་བ་ཏཱི་པྲཛྙཱ་པ་རཱ་མི་ཏཱ་སཱ་དྷ་ནཾ། བོད་སྐད་དུ། བཅོམ་ལྡན་འདས་ཡུམ་ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས། བཅོམ་ལྡན་འདས་ཡུམ་ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་ལོ། །སྔར་བཤད་པ་ལྟར་གདོང་པ་བཀྲུ་བ་ལ་སོགས་པ་བྱས་ནས། དེའི་རྗེས་ལ་བདག་ཉིད་ཀྱི་སྙིང་གར་པདྨ་འདབ་མ་བརྒྱད་པའི་དབུས་སུ་ཨ་ལས་བྱུང་བའི་ཟླ་བའི་དཀྱིལ་འཁོར་གྱི་དབུས་སུ་ཡི་གེ་དྷཱིཿ། དེ་ལས་བྱུང་བའི་པདྨ་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་གྱིས་མཚན་པ། འདི་དག་ཡོངས་སུ་གྱུར་པ་ལས། ཤེས་རབ་ཀྱི་ཕ་རོལ་ཏུ་ཕྱིན་མ་པདྨ་དང༌། ཟླ་བའི་གདན་ལ་རྡོ་རྗེ་སྐྱིལ་མོ་ཀྲུང་གིས་བཞུགས་པ། སྐུ་མདོག་དཀར་བ་གཡས་ཀྱིས་མཆོག་སྦྱིན་པ། གཡོན་པ་ན་པདྨ་བསྣམས་པ། རྒྱན་ཐམས་ཅད་ཀྱིས་བརྒྱན་པ། བསམ་གཏན་ལ་གཅིག་ཏུ་གཞོལ་བ། མེ་ཏོག་དྲི་ཞིམ་པོས་བརྒྱན་པའི་རལ་པ་དང་ཅོད་པན་ཏེ། རེ་ཞིག་དེ་ལྟ་བུར་བསམས་ལ། མཆོད་པའི་དུས་ཀྱི་ཚེ་དཀྱིལ་འཁོར་གྱི་གནས་སུ་ལྷ་བརྒྱད་པོ་བདག་ཉིད་དང་འདྲ་བ་དང་ལྷན་ཅིག་ཏུ་སྔགས་འདིས་མཆོད་པར་བྱའོ། །ཨོཾ་པྲཛྙེ་མཧཱ་པྲཛྙེ་ཧཱུཾ། ཤེས་རབ་ཀྱི་ཕ་རོལ་ཏུ་ཕྱིན་མའི་སྒྲུབ་ཐབས་རྫོགས་སོ།།