ལྷ་མོ་ནོར་གྱི་རྒྱུན་གྱི་སྒྲུབ་པའི་ཐབས།
དྲི་མ་མེད་པའི་ལྷ།
རྒྱ་གར་སྐད་དུ། བ་སུ་དྷཱ་ར་སཱ་དྷ་ནཾ། བོད་སྐད་དུ། ལྷ་མོ་ནོར་གྱི་རྒྱུན་གྱི་སྒྲུབ་པའི་ཐབས། ལྷ་མོ་ནོར་གྱི་རྒྱུན་ལ་ཕྱག་འཚལ་ལོ། །དེ་ནས་ལྷ་མོ་ནོར་གྱི་རྒྱུན་བསྒོམ་པར་འདོད་ན་ཐམས་ཅད་སྔ་མ་བཞིན་དུ་བྱས་ལ། གཞན་དུ་ནས་བོད་དྲུག་པའི་གསུམ་པ་ལ་ཟླ་བ་ཕྱེད་པ་དང༌། ཐིག་ལེས་བརྒྱན་པ་དེ་ཉིད་ལས་བྱུང་བའི་ལྷ་མོ་ནོར་གྱི་རྒྱུན་སྐུ་མདོག་སེར་པོ། ཕྱག་གཡས་མཆོག་སྦྱིན་པ། གཡོན་འབྲས་སཱ་ལུའི་སྙེ་མ་དང༌། རིན་པོ་ཆེ་སྣ་ཚོགས་པའི་ཆར་འབེབས་པའི་བུམ་པ་བསྣམས་པ། རྒྱན་ཐམས་ཅད་ཀྱིས་བརྒྱན་པ་སྟེ། གྲོགས་ཀྱི་ལྷ་མོས་བསྐོར་བའི་ལྷ་མོ་ནོར་གྱི་རྒྱུན་ནི་བདག་ཉིད་ཡིན་ནོ་ཞེས་བསྒོམ་པར་བྱའོ། །ལག་པ་གཉིས་ཀྱི་ཁུ་ཚུར་བཅིངས་ལ་གུང་མོའི་ཚིགས་གསུམ་པ་བཅག་པ་འདི་ནི་ལྷ་མོ་ནོར་གྱི་རྒྱུན་གྱི་ཕྱག་རྒྱའོ། །དེ་ནས་བཟླས་བརྗོད་བྱས་ཏེ། ཨོཾ་ཤྲཱི་བ་སུ་ནི་དྷ་ན་ཀྵེ་ཏྲེ་སྭཱ་ཧཱ། རས་བྲིས་ལ་སོགས་པར་བཅོམ་ལྡན་འདས་ལྷ་མོ་ནོར་གྱི་རྒྱུན་སྤྱན་དྲངས་ལ་མཆོད་པ་ཡང་བྱ་སྟེ། བསྒོམ་པར་བྱའོ། །དེས་ནི་འགྲུབ་པར་འགྱུར་བར་ཐེ་ཚོམ་མེད་དོ། །ལྷ་མོ་ནོར་གྱི་རྒྱུན་སྒྲུབ་པའི་ཐབས་རྫོགས་སོ།། །།