ལྷ་མོ་འོད་ཟེར་ཅན་གྱི་སྒྲུབ་ཐབས།
རྒྱ་གར་སྐད་དུ། མཱ་རཱི་ཙྱཻ་དེ་བཱི་སཱ་དྷ་ནཾ། བོད་སྐད་དུ། ལྷ་མོ་འོད་ཟེར་ཅན་གྱི་སྒྲུབ་ཐབས།ལྷ་མོ་འོད་ཟེར་ཅན་ལ་ཕྱག་འཚལ་ལོ། །དེ་ལ་དང་པོར་ཉི་མའི་དཀྱིལ་འཁོར་བསམས་ལ། དེའི་སྟེང་དུ་ས་བོན་ལྔ་པའི་ལྔ་པ་ལ། དང་པོའི་གཉིས་པ་རྫོགས་པར་བྱས་ལ། ཟླ་བ་ཕྱེད་པ་དང་ཐིག་ལེས་བརྒྱན་པར་བསམ། དེ་ལས་བྱུང་བའི་ལྷ་མོ་འོད་ཟེར་ཅན་སྐུ་མདོག་དམར་བ། ཞལ་དྲུག་པ། ཞལ་དང་པོ་དམར་བ། གཉིས་པ་ནག་པ། གསུམ་པ་ལྗང་གུ། བཞི་པ་སེར་བ། ལྔ་པ་དཀར་བ། སྟེང་གི་དབུ་ཕག་གདོང་ནག་པོ། ཨ་ཤྭ་ཀ་དང༌། མཆོད་རྟེན་གྱིས་བརྒྱན་པ། གསུས་ཁྱིམ་ཆེ་བ། ཐོད་པའི་ཕྲེང་བ་ཅན། དབུ་སྐྲ་དམར་སེར་གྱེན་དུ་བརྫེས་པ། སྦྲུལ་གྱི་ཞགས་པ་དང་སྟག་ལྤགས་ཀྱི་ཤམ་ཐབས་ཅན། བགེགས་རྣམས་ལྟུང་བར་མཛད་པ། ཁ་དོག་སྣ་ཚོགས་པའི་ཤིང་རྟ་ལ་གཡོན་བརྐྱང་བས་བཞུགས་པ། ཕྱག་གཡས་པ་ན་རལ་གྲི་དང༌། རྡོ་རྗེ་དང༌། གཏུན་ཤིང་དང༌། མདའ་དང་རྡོ་རྗེ་རྩེ་གཅིག་པ་དང༌། དགྲ་སྟ་བསྡམས་པ། གཡོན་པ་སྡིགས་མཛུབ་ཞགས་པ་དང་བཅས་པ་དང༌། ཐོད་པ་དང་ཨ་ཤྭ་ཀའི་ཡལ་ག་དང༌། ཚངས་པའི་མགོ་བོ་དང༌། གཞུ་དང༌། ཏྲི་ཤཱུ་ལ་བསྣམས་པའོ། །སྤྱན་གསུམ་པར་བསམ་ཞིང༌། མདུན་དུ་ཤིང་ཟླུམ་པོའི་དབུས་སུ་ལག་པ་གཉིས་སྡིགས་མཛུབ་བསྒྲེང་བར་བསམས་ལ། བདག་ཉིད་བཅོམ་ལྡན་འདས་མ་ཡུམ་འོད་ཟེར་ཅན་ཡིན་ནོ་ཞེས་པའི་ང་རྒྱལ་བསྐྱེད་པར་བྱའོ། །དེ་ནས་ཕྱག་རྒྱ་བཅིང་བར་བྱ་སྟེ། རྡོ་རྗེ་ཐལ་མོ་ཁ་སྦྱར་ལ། གུང་མོ་གཉིས་གཤིབས་ལ་མྱུ་གུར་བྱས་ཏེ། མཐེ་བོང་གཉིས་སྐྱིལ་མོ་ཀྲུང་དུ་བསྣོལ་མཛུབ་མོ་གཉིས་རྩེ་མོར་དགུག་པར་བྱའོ། །དེ་ནས་བཟླས་པའི་སྔགས་ནི། ཨོཾ་མཱ་རཱི་ཙྱཻ་མཱཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ལྷ་མོ་འོད་ཟེར་ཅན་གྱི་སྒྲུབ་ཐབས་རྫོགས་སོ།།