རྡོ་རྗེ་ལུ་གུ་རྒྱུད་ཀྱི་སྒྲུབ་ཐབས།
ཛཻ་ཏ་རི་དགར་ལས་རྣམ་པར་རྒྱལ་བ།
རྒྱ་གར་སྐད་དུ། བཛྲ་ཤྲཱྀ་ཁཾ་ལེ་སཱ་དྷ་ནཾ། བོད་སྐད་དུ། རྡོ་རྗེ་ལུ་གུ་རྒྱུད་ཀྱི་སྒྲུབ་ཐབས། བཅོམ་ལྡན་འདས་མ་རྡོ་རྗེ་ལུ་གུ་རྒྱུད་ལ་ཕྱག་འཚལ་ལོ། །སྔར་བསྟན་པའི་ཆོ་གས་སྙིང་གར་ཟླ་བའི་དཀྱིལ་འཁོར་ལ་ཧཱུཾ་གི་ཡི་གེ་ལྗང་གུ་ལས་གྲུབ་པའི་རྡོ་རྗེ་ལུ་གུ་རྒྱུད་ཞལ་གསུམ་ཕྱག་དྲུག་མ། ཞལ་གཡས་པ་དང་ཅིག་ཤོས་སྔོ་བ་དང་དཀར་བ། ཞལ་སོ་སོ་ལ་སྤྱན་གསུམ་གསུམ་
མངའ་བ། ཕྱག་གཡས་གསུམ་ན་རྡོ་རྗེ་དང་ལྕགས་སྒྲོག་དང་མདའ། ཕྱག་གཡོན་གསུམ་ན་སྡིགས་མཛུབ་དང་ཞགས་པ་དང༌། གཞུའོ། །སྐུ་མདོག་སྔོ་བསངས་སུ་ལྗང་བ། ཞལ་ཅུང་ཟད་བཞད་པ། རྒྱན་ཐམས་ཅད་ཀྱིས་བརྒྱན་པ་སེམས་ཅན་སྡང་བ་རྣམས་འཇོམས་པར་བྱེད་པར་བདག་ཉིད་བསྒོམས་ལ་ཕྱག་རྒྱ་བཅིང་བར་བྱའོ། །དེ་ལ་ལག་པ་གཉིས་ཁུ་ཚུར་སོ་སོར་བཅིངས་ལ་མཐེའུ་ཆུང་དང་མཛུབ་མོ་ལྕགས་སྒྲོག་གི་རྣམ་པར་བཅིང་བར་བྱའོ། །དེ་ནས་བཟླས་པ་ནི། ཨོཾ་བཛྲ་ཤྲཱྀ་ཁམ་ལེ་ཧཱུཾ་ཕཊ་སྭཱ་ཧཱ། ཞེས་པའོ། །འདི་ནི་རྡོ་རྗེ་ལུ་གུ་རྒྱུད་ཀྱི་སྒྲུབ་ཐབས། སློབ་དཔོན་ཆེན་པོ་ཛཻ་ཏ་རི་དགར་ལས་རྣམ་པར་རྒྱལ་བས་མཛད་པ་རྫོགས་སོ།། །།རྒྱ་གར་གྱི་མཁན་པོ་པཎྜི་ཏ་སུ་མ་ཏི་ཀཱིརྟི་དང༌། བོད་ཀྱི་ལོ་ཙཱ་བ་མཁས་པ་མར་བ་ཆོས་ཀྱི་དབང་ཕྱག་གིས་བསྒྱུར་ཅིང་ཞུས་ཏེ་གནས་ལ་ཕབ་པའོ།།