ཨོ་ཌྱན་གྱི་འོད་ཟེར་ཅན་གྱི་སྒྲུབ་པའི་ཐབས།
རྒྱ་གར་སྐད་དུ། ཨོཾ་ཌི་ཡཱ་ཎ་མཱ་རཱི་ཙྱེ་སཱ་དྷ་ནི། བོད་སྐད་དུ། ཨོཌྱན་གྱི་འོད་ཟེར་ཅང་ཡི་སྒྲུབ་པའི་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །དང་པོ་རེ་ཞིག་རང་གི་སྙིང་གར་ཨཾ་ཡིག་ཡོངས་སུ་གྱུར་པ་ལས་ཉི་མའི་དཀྱིལ་འཁོར་རོ། །དེའི་སྟེང་དུ་དང་པོའི་བཅུ་གསུམ་གྱི་ས་བོན་ཟླ་ཕྱེད་ཐིག་ལེས་བརྒྱན་པའོ། །དེ་ཁོ་ན་བཞིན་དུ་སྡིག་པ་བཤགས་པ་ལ་སོགས་པ་བྱས་ནས་དེ་ཉིད་ཀྱིས་ཡོངས་སུ་རྫོགས་པའི་མཾ་པོ། །དེ་ཐམས་ཅད་ཡོངས་སུ་གྱུར་པ་ལས་འོད་ཟེར་ཅན་མདོག་དམར་ལ་ཞལ་དྲུག་པ་ཕྱག་བཅུ་གཉིས་མ་ཞལ་དང་པོ་དམར་བ། གཉིས་པ་ནག་པོ། གསུམ་པ་ལྗང་གུ། བཞི་པ་སེར་པོ། ལྔ་པ་དཀར་པོ། མགོ་བོའི་སྟེང་ན་གནས་པའི་ཕྱག་གི་ཞལ་ནི་ནག་པོ་སྟེ་དྲུག་པའོ། །མཆོད་རྟེན་དང་མྱ་ངན་མེད་པས་བརྒྱན་པ། རྣམ་པར་སྣང་མཛད་སེར་པོས་དབུ་བརྒྱན་པ། གསུས་པ་འཕྱང་བ། ཐོད་པའི་ཕྲེང་བས་བརྒྱན་པ། སྐྲ་ཁམ་པ་གྱེན་དུ་འགྲེང་བ། སྦྲུལ་གྱིས་བརྒྱན་པ། སྟག་གི་པགས་པའི་ཤམ་ཐབས་ཅན། གཡོན་བརྐྱང་པའི་ཞབས་ཕག་གིས་བགེགས་ཀྱི་ཚོགས་མནན་པའི་སྟེང་ན་གནས་པའོ། །གཡས་པའི་ཕྱག་ན་རལ་གྲི་དང༌། རྡོ་རྗེ་དང༌། གཏུན་ཤིང་དང༌། མདའ་དང༌། རྡོ་རྗེ་རྩེ་གཅིག་པ་དང་དགྲ་སྟའོ། །གཡོན་པའི་ཕྱག་ན་སྡིགས་མཛུབ་དང་བཅས་པའི་ཞགས་པ་དང༌། ཐོད་པ་དང༌། མྱ་ངན་མེད་པའི་ཡལ་ག་དང༌། ཚངས་པའི་མགོ་བོ་དང༌། གཞུ་དང༌། རྩེ་གསུམ་མོ། །སྤྱན་གསུམ་ཟླུམ་ཞིང་དམར་བ། ཞལ་མཆེ་བ་གཙིགས་པའོ། །ཤིང་རྟའི་དབུས་ན་གནས་པའོ། །ལྷ་མོ་གཞན་ནི་ཕྱག་གཉིས་པ་སྡིགས་མཛུབ་དང་བཅས་པའི་ཞགས་པ་མྱ་ངན་མེད་པའི་ཡལ་ག་ཡང་བསྒོམ་པར་བྱའོ། །བདག་ཉིད་བཅོམ་ལྡན་འདས་མ་ཞེས་པའོ། །དེ་ནས་ཕྱག་རྒྱ་བཅིང་བར་བྱ་སྟེ། རྡོ་རྗེ་ཐལ་མོ་སྦྱར་ལ་གུང་མོ་གཉིས་མཉམ་པར་
བཀུག་སྟེ། མཐེབ་ཆེན་གཉིས་སྐྱིལ་མོ་ཀྲུང་བཅས་ལ། རྩེ་མོའི་ཚིགས་ནི་ཅུང་ཞིག་བསྐུམ་པའོ། །སྔགས་ནི། ཨོཾ་མཱ་རཱི་ཙྱཻ་ཨོཾ་མཱཾ་ཧཱུཾ་ཧཱུཾ་ཧཱུཾ་ཕཊ་ཕཊ་སྭཱཧཱ། ཨོ་ཌྱན་གྱི་འོད་ཟེར་ཅན་གྱི་སྒྲུབ་ཐབས་རྫོགས་སོ། །པཎྜི་ཏ་དོན་ཡོད་རྡོ་རྗེ་དང༌། ཁམས་པ་ལོ་ཙཱ་བ་དགེ་སློང་བ་རིས་བསྒྱུར་བའོ། །