སྒྲུབ་ཐབས་བརྒྱ་དང་བརྒྱད་པ།
ཙནྡྲགོམིན།
རྒྱ་གར་སྐད་དུ། ཤ་ཏཾ་ཨཥྚ་སཱ་དྷ་ནཾ། བོད་སྐད་དུ། སྒྲུབ་ཐབས་བརྒྱ་དང་བརྒྱད་པ། བཙམ་ལྡན་འདས་འོད་དཔག་ཏུ་མེད་པ་ལ་ཕྱག་འཚལ་ལོ། །བླ་མའི་དྲིན་ཐོབ་བ་རྟུལ་ཞུགས་ལྡན། །བླ་མེད་ཡེ་ཤེས་སྒྲུབ་པ་པོས། །རི་བོ་དབེན་ཞིང་ཡིད་འོང་བར། །རིན་ཆེན་སྣ་ཚོགས་ཀྱིས་མཛེས་ཤིང༌། །ལྗོན་ཤིང་མང་པོས་རབ་ཏུ་གང༌། །སྐད་སྙན་བྱ་རྣམས་སྒྲ་འབྱིན་ཅིང༌། །ཆུ་གཙང་ཡན་ལག་བརྒྱད་ལྡན་འབབ། །རི་དྭགས་འཚེ་བ་མེད་པའི་གནས། །དྲི་ཞིམ་མེ་ཏོག་གིས་བཀྲམ་པའི། །ཤིང་ཏོག་ལ་སོགས་འབྲས་བུ་མང༌། །ལྷ་ཀླུ་ལ་སོགས་གླུ་ལེན་ཅིང༌། །གྲུབ་འཛིན་ཀུན་གྱིས་གནས་བཅས་པ། །ཕུན་སུམ་ཚོགས་པའི་གནས་དེར་ནི། །སྔགས་པས་ཀུན་ལ་ཕན་བརྩོན་པས། །བདེ་བའི་སྟན་ལ་བསྡད་ནས་ནི། །རང་སྙིང་ས་བོན་འོད་ཟེར་གྱིས། །འཕགས་མ་སྒྲོལ་སོགས་སྤྱན་དྲངས་ཏེ། །མཆོད་པ་ཀུན་གྱིས་རབ་མཆོད་ནས། །བདུན་པོ་རྣམ་པར་དག་པར་བྱ། །དེ་ནས་ཚད་མེད་བཞི་བསྒོམས་པས། །བྱང་ཆུབ་ཏུ་ནི་སེམས་བསྐྱེད་དོ། །འགྱུར་མེད་ཕྱིན་ཅི་མ་ལོག་པས། །དེ་དག་འཕགས་པའི་སྤྱོད་ཡུལ་ནི། །སྟོང་པ་ཉིད་དུ་རྣམ་པར་བསྒོམ། །ཨོཾ་སྭ་བྷཱ་ཝ་བི་ཤུདྡྷཿསརྦ་དྷརྨཱཿསྭ་བྷཱ་ཝ་བི་ཤུདྡྷོ྅ཧཾ། པདྨ་ཟླ་བར་ཡི་གེ་ཏཱཾ། །དེ་ལ་འཇིག་རྟེན་གསུམ་གཡོ་བའི། །སྒྲོལ་མ་ཞལ་བཞི་ཕྱག་བརྒྱད་པ། །དམར་སེར་བཟང་པོའི་ཞབས་ཀྱིས་ཞུགས། །སེར་དང་ལྗང་བུ་དམར་དང་དཀར།།
རྩ་ཞལ་གཡས་གཡོན་རྒྱབ་རིམ་བཞིན། །མཆོག་སྦྱིན་ཉི་མ་གདུགས་དང་དུང༌། །གཡས་པའི་ཕྱག་ན་རིམ་བཞིན་བསྣམས། །ཨུཏྤལ་ཞགས་པ་ཕྲེང་བ་དང༌། །གོ་ཁྲབ་རྣམས་ནི་གཡོན་ན་བསྣམས། །རྒྱན་རྣམས་ཀུན་གྱིས་ཡང་དག་རྫོགས། །ཡེ་ཤེས་དྲངས་ཏེ་གཞུག་པར་བྱ། །ཨོཾ་ཨཱཿཧཱུཾ། ཞེས་པས་སྐུ་གསུང་ཐུགས་བྱིན་བརླབ། །དབང་བསྐུར་རིམ་གྱིས་དབུ་བརྒྱན་བྱ། །ཡེ་ཤེས་ཟླ་བའི་ཏིང་འཛིན་སེམས། །སྐྱོ་བར་གྱུར་ན་བཟླས་པ་བྱ། །གཤེགས་དང་བསྡུ་བ་ལ་སོགས་བྱ། །འཇིག་རྟེན་གསུམ་པོ་གཡོ་བར་བྱེད་པའི་སྒྲོལ་མའི་སྒྲུབ་ཐབས་སོ།། །།པདྨ་ཟླ་བའི་གདན་ལ་ནི་ཨོཾ་ལས་བྱུང་བའི་སྒྲོལ་མ་ཉི་མའི་མདོག་ཅན། །ཞལ་གཅིག་ཕྱག་གཉིས་པ། ཕྱག་གཡས་སྐྱབས་སྦྱིན་པ། གཡོན་ཨུཏྤ་ལ་ཉི་མས་མཚན་པ་རོལ་པའི་སྟབས་ཀྱིས་བཞུགས་པ། རྒྱན་ཐམས་ཅད་དང་ཡང་དག་པར་ལྡན་པའོ། དགེ་བ་ཅན་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཧཱུཾ་ལས་བྱུང་བའི་སྒྲོལ་མ། པདྨ་དང་ཀུན་ད་ལྟར་དཀར་བ། ཟླ་བའི་འོད་མངའ་བ། ཞལ་གཅིག་ཕྱག་བཞི་པ། ཟླ་བ་དང་སྣ་ཚོགས་རྡོ་རྗེ་གཡས་གཉིས་ན་འཛིན་པ། ཨུཏྤ་ལ་དང་མེའི་འཁོར་ལོ་གཡོན་ན་བསྣམས་པ། རྒྱན་ཐམས་ཅད་དང་ལྡན་པ། རྣམ་པར་སྣང་མཛད་ཀྱི་དབུ་རྒྱན་དང་ལྡན་པ། སྐྱིལ་མོ་ཀྲུང་གིས་བཞུགས་པ། སྐུ་ཐམས་ཅད་ལས་བདུད་རྩི་འཛག་པའོ། །འཇིགས་རྟེན་ཐམས་ཅད་གཡོ་བར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་པ་ཧྲཱིཿལས་བྱུང་བའི་སྒྲོལ་མ་སེར་མོ་ཞལ་གཅིག་ཕྱག་གཉིས་མ། གཡས་གཡོན་གཉིས་ཀྱིས་ཕྲེད་བ་དང༌། ཨུཏྤ་ལའི་སྟེང་ན་པོ་ཏིང་འཛིན་པའོ། །རྒྱན་ཐམས་ཅད་ཀྱིས་བརྒྱན་པ་རོལ་པས་ཞུགས་པའོ། །སྙན་པ་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཨ་ལས་བྱུང་བའི་སྒྲོལ་མ་དཀར་མོ་ཞལ་གཅིག་ཕྱག་གཉིས་པ། གཡས་ན་པདྨ་དམར་པོ། །གཡོན་ན་ཨུཏྤ་ལ་སྔོན་པོས་བརྒྱན་པ། །སྤྱན་གསུམ་པ་རྒྱན་ཐམས་ཅད་ཀྱིས་བརྒྱན་པ། སྐྱེལ་མོ་ཀྲུང་གིས་བཞུགས་པའོ། །དབྱངས་ཅན་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་མ་ལས་བྱུང་བའི་ལྷ་མོ་སྐུ་མདོག་སེར་མོ་ཞལ་གཅིག་ཕྱག་གཉིས་མ་རྡོ་རྗེ་དང་ཨུཏྤ་ལ་བསྣམས་
པ། རྡོ་རྗེ་སྐྱིལ་མོ་ཀྲུང་གིས་བཞུགས་པ། སྣང་བ་མཐའ་ཡས་ཀྱི་དབུ་རྒྱན་དང་ལྡན་པར་བསམ་མོ། །ཤེས་རབ་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་གདན་ལ་བྷཱུཾ་ལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ། གཡས་ན་རིན་པོ་ཆེ་དང་མེ་ཏོག །གཡོན་ན་མཆོག་སྦྱིན་པ། ཞབས་རོལ་པས་བཞུགས་པའོ། །དཔལ་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དག་ཟླ་བའི་གདན་ལ་ཏཱཾ་ལས་བྱུང་བའི་ལྷ་མོ་སྔོན་མོ་ཞལ་གཅིག་ཕྱག་བཞི་མ། དང་པོ་གཉིས་ན་མདའ་གཞུ། འགོ་མ་གཉིས་ན་ཨུཏྤ་ལ་དང་རལ་གྲི་བསྣམས་པ། རོལ་པའི་ཞབས་ཀྱིས་བཞུགས་པའོ། །བློ་འཕེལ་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བ་དང་ཉི་མའི་སྟེང་དུ་ཧཱུཾ་ལས་བྱུང་བའི་སྒྲོལ་མ་ཞལ་གཅིག་ཕྱག་གཉིས་མ། ནག་མོ་ཁྲོས་མ་སྤྱན་གསུམ་མ། ཞལ་གདངས་པ་ཁྲོ་གཉེར་བསྙེར་བསྙེར་བ་ལྗགས་འདྲིལ་བ། སྟག་གི་པགས་པའི་གོས་འཆང་བ། གྲི་གུག་དང་ཐོད་ཁྲག་བསྣམས་པ། མི་མགོ་ལྔ་བཅུའི་དོ་ཤལ་འཆང་བའོ། །གསོད་པར་བྱེད་པའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བ་དང་ཉི་མའི་གདན་སྟེངས་སུ་ཛུཾ་ལས་ཡང་དག་པར་བྱུང་བའི་ལྷ་མོ་སྐུ་མདོག་སེར་མོ། ཞལ་གཅིག་ཕྱག་གཉིས་ཀྱིས་ཤིང་ཐོག་དང་མྱ་ངན་མེད་པའི་ཤིང་ལོ་བཟུང་བའོ། །རྒྱན་སྣ་ཚོགས་ཀྱིས་བརྒྱན་པ། རྡོ་རྗེ་སྐྱིལ་མོ་ཀྲུང་གིས་བཞུགས་པའོ། །རྒྱས་པར་བྱེད་པའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཨོཾ་ལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ། མདོག་ལྗང་སེར་དུ་བ་ལྟར་འདུག་པ། རྡོ་རྗེ་དང་དྲིལ་བུ་འཛིན་པ། རྒྱན་ཐམས་ཅད་དང་ལྡན་པ། མཆེ་བ་ཅུང་ཟད་གཙིགས་པའོ། །འདོད་གཟུགས་ཅན་གྱི་སྒྲོལ་མ་ཞེས་བྱ་བའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཧཱུཾ་ལས་བྱུང་བའི་ལྷ་མོ། །དཀར་དམར་མདོག་ཅན་ཞལ་གཅིག་ཕྱག་བཞི་མ་གཡས་ཀྱི་དང་པོ་ན་སྐྱབས་སྦྱིན་པ། གཡོན་མཆོག་སྦྱིན་པ་ཐ་མ་གཉིས་ཀྱིས་ཨུཏྤ་ལ་དང་ཕྲེང་བ་འཛིན་པ། ཞབས་རོལ་པས་བཞུགས་པའོ། །ཕན་པར་བརྩོན་པའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་ཨི་ལས་བྱུང་བའི་ལྷ་མོ་མདོག་མཐིང་སྔོན། ཞལ་གསུམ་ཕྱག་དྲུག་མ་གཡས་དམར་བ་གཡོན་སྔོ་བ། ཕྱག་དང་པོ་གཉིས་མདའ་གཞུ་འགེངས་པ། བར་
མ་ན་གླང་པོ་ཆེ་དང༌། རྒྱལ་མཚན། ཐ་མན་རལ་གྲི་དང་ཞགས་པ་བསྣམས་ཤིང་རོལ་པས་ཤིང་རྟའི་སྟང་ན་བཞུགས་པའོ། །གཡུལ་ལས་སྒྲོལ་བར་བྱེད་པའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཨོཾ་ལས་ལྷ་མོ་དཀར་མོ་ཞལ་གཅིག་ཕྱག་གཉིས་མ། རྒྱན་ཐམས་ཅད་ཀྱིས་བརྒྱན་པ། གཡས་ན་འཁོར་ལོ་རྩིབས་བརྒྱད་པ། གཡོན་བ་དན་ལྕེ་བརྒྱད་པ་བསྣམས་ཤིང༌། འགྱིང་བའི་ཚུལ་གྱིས་བཞུགས་པའོ། །རྒྱལ་བ་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ། །པདྨ་དང་ཉི་མའི་གདན་ལ་ཨ་ལས་བྱུང་བའི་ལྷ་མོ་གསེར་གྱི་མདོག་ཅན་ཞལ་གཅིག་ཕྱག་བཞི་མ་གཡས་དང་པོས་སྐྱབས་སྦྱིན་པ་འོག་མས་རྡོ་རྗེ། གཡོན་དང་པོས་མཆོག་སྦྱིན་པ་འོག་མས་ཨུཏྤ་ལ་དང་པོ་ཏིའོ། །ཞབས་རོལ་པས་བཞུགས་པའོ། །རྒྱན་ཐམས་ཅད་དང་ཡང་དག་པར་ལྡན་པའོ། །ཤེས་རབ་ཕ་རོལ་ཕྱིན་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ། །པདྨ་དང་ཉི་མའི་གདན་ལ་ཏཾ་ལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ། གཡས་མཆོག་སྦྱིན་པ་གཡོན་ཨུཏྤ་ལ་དང་བཅས་པའི་སྐྱབས་སྦྱིན་པ། མདོག་ལྗང་གུའོ། །འཕགས་མ་སྒྲོལ་མའི་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་གདན་སྟེང་ན་ཏྲཾ་ལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ། མདོག་དཀར་མོ་གཡས་ཀླུ་ཤིང་གི་མེ་ཏོག་བསྣམས་པ། གཡོན་བ་དན་རིན་པོ་ཆེས་མཚན་པ་འབར་བ། ན་བཟའ་དང་རྒྱན་སྣ་ཚོགས་མངའ་བ། རྒྱལ་པོའི་རོལ་པས་བཞུགས་པའོ། །ཡིད་འོང་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཨ་ལས་བྱུང་བའི་ལྷ་མོ་ཞལ་གཅིག་ཕྱག་བཞི་མ། མདོག་སེར་མོ། རྒྱན་ཐམས་ཅད་ཀྱིས་བརྒྱན་པ། ཕྱག་དང་པོ་གཉིས་ཀྱིས་རིན་པོ་ཆེ་དང་རལ་གྲི་།འོག་མ་གཉིས་ན་རྫ་རྡ་བརྡུང་བ་ལ་བརྩོན་པའོ། །ཞབས་རྡོ་རྗེའི་སྐྱིལ་ཀྲུང་གིས་བཞུགས་པའོ། །རྫ་རྔ་ཅན་གྱི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བཞི་གདན་ལ་བཾ་ལས་བྱུང་བའི་ལྷ་མོ་མདོག་སྔོ་ལྗང་ཞལ་གཅིག་ཕྱག་བཞི་མ། དང་པོ་གཉིས་ན་དུང་དང་རྒྱལ་མཚན། ཐ་མ་གཉིས་ན་རལ་གྲི་དང་ཨུཏྤ་ལ་སྔོན་པོ་བསྣམས་པའོ། །ཞབས་རོལ་པས་བཞུགས་པའོ། །དུང་ཅན་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་
ཟླ་བའི་གདན་ལ་ཧྲཱིཿལས་བྱུང་བའི་ལྷ་མོ་མདོག་སེར་མོ་ཞལ་བཞི་པ་གཡས་སྔོ་བ་རྒྱབ་དཀར་པ་གཡོན་དམར་བ། ཕྱག་གཡས་དང་པོ་ན་བུམ་པ། གཉིས་པ་ན་བགྲང་ཕྲེང༌། གསུམ་པ་ན་གདུགས། བཞི་པ་ན་གཎྜཱི། གཡོན་དང་པོ་ན་ཨ་མྲའི་འབྲས་བུ། གཉིས་པ་ན་ཨུཏྤ་ལ། གསུམ་པ་ན་ལྷུང་བཟེད། བཞི་པ་ན་སྡིགས་མཛུབ། རྒྱན་སྣ་ཚོགས་ཀྱིས་བརྒྱན་པ་ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། རྒྱས་པར་བྱེད་པའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཧཱུཾ་ལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ། རལ་གྲི་དང་འཁོར་ལོ་འཛིན་པ། རྒྱན་ཐམས་ཅད་ཀྱིས་བརྒྱན་པ། ཕྱག་རྒྱ་ཆེན་པོ་རབ་ཏུ་འགྲུབ་པར་བྱེད་པའི་བདག་ཉིད་ཅན་ཞལ་ནས་མི་འཇིགས་པ་སྦྱིན་པར་མཛད་པའོ། །ཚིག་སྙན་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཨོཾ་ལས་བྱུང་བའི་ལྷ་མོ་ཞལ་ལྔ་མ། སྐུ་ཟླ་བ་ལྟར་དཀར་བ། ཞལ་ལྔ་ཀུ་མུ་ད་དཀར་པོ་ལྟར་འབར་བ། ཕྱག་བཅུ་དང་ལྡན་པ། ཕྱག་དང་པོ་གཉིས་ཀྱིས་མ་ལོང་དང་དུང་འཛིན་པ། གཡས་གཉིས་པ་ན་རྡོ་རྗེ་དང༌། གསུམ་པ་ན་ཨུཏྤ་ལ་དཀར་པོ། བཞི་པ་ན་མཆོག་སྦྱིན་པ། ལྔ་པ་ན་མདའོ། །གཡོན་གྱི་གཉིས་པ་ན་མདུང་ཐུང་དང༌། གསུམ་པ་ན་འཁོར་ལོ། བཞི་པ་ན་དྲིལ་བུ། ལྔ་པ་ན་གཞུའོ། །རྒྱན་ཐམས་ཅད་ཀྱིས་བརྒྱན་པ། ཞབས་གཉིས་རོལ་པས་བཞུགས་པའོ། །ཟླ་བའི་མདོག་ཅན་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཨ་ལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ། སྐུ་མདོག་དཀར་མོ་ཕྱག་གཉིས་ཀྱིས་བུམ་པ་དང༌། མཆོག་སྩོལ་བའོ། །རྒྱན་དང་ན་བཟའ་སྣ་ཚོགས་པ་བསྣམས་པ། ཞབས་གཉིས་སྐྱིལ་ཀྲུང་དུ་བཞུགས་པའོ། །དཀར་མོ་ཆེན་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་གྱི་སྟེང་ན་སོ་ལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ་སེར་མོ་གླང་པོ་ཆེ་དང་སེང་གེའི་སྟེང་དུ་རོལ་པས་བཞུགས་པའོ། །ཕྱག་གཉིས་ན་རྡོ་རྗེས་མཚན་པའི་ཨུཏྤ་ལ་སེར་པོ་བསྣམས་ནས་སྐྱབས་སྦྱིན་དང༌། མཆོག་སྦྱིན་སྩོལ་བར་མཛད་པ། རྒྱན་ཐམས་ཅད་ཀྱིས་བརྒྱན་པའོ། །མི་ཕམ་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་གཾ་ལས་བྱུང་བའི་ལྷ་མོ་མདོག་དམར་ཞིང་འོད་འཕྲོ་བ། ཞལ་བཞི་ཕྱག་བརྒྱད་མ། གཡས་དཀར་བ་གཡོན་སེར་བ་
རྒྱབ་ཞལ་ནག་པ། རྒྱན་ཐམས་ཅད་ཀྱིས་བརྒྱན་པ། ཕྱག་གཡས་དང་པོ་ན་སེང་གེ་གཉིས་པ་ན་རྔ་ཟླུམ་གསུམ་པ་ན་དབྱུ་གུ། བཞི་པ་ན་ལྕགས་ཀྱུ། གཡོན་དང་པོ་ན་ཨུཏྤ་ལ། གཉིས་པ་ན་རྩེ་གསུམ། གསུམ་པ་ན་རྒྱལ་མཚན། བཞི་པ་ན་ཅེ་སྤྱང་བསྣམས་པ། ཞབས་རོལ་པས་བཞུགས་པའོ། །སྒྱུ་མ་ཆེན་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཨཿལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ། མདོག་སྔོན་མོ་སྤྱན་གསུམ་པ། ཅུང་ཟད་ཁྲོས་པ། རྒྱན་ཐམས་ཅད་ཀྱིས་བརྒྱན་པ། ཕྱག་གཡས་པ་ན་པི་ཝང་བསྒྲེང་བ། གཡོན་དུ་ཨུཏྤ་ལ་སྔོན་པོའི་ནང་དུ་ཁང་པ་བརྩེགས་པ་འཛིན་པ། ཞབས་རོལ་པས་བཞུགས་པའོ། །སྟོབས་ཆེན་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་ཧཱུཾ་ལས་བྱུང་བའི་ལྷ་མོ་མདོག་སྔོན་མོ་ཞལ་གཅིག་ཕྱག་གཉིས་མ། རྒྱན་ཐམས་ཅད་ཀྱིས་ཡང་དག་པར་བརྒྱན་པ། ཕྱག་གཡས་རལ་གྲི་གཡོན་སྡིགས་མཛུབ་བསྣམས་པ། ཞབས་ཕྱེད་ཀྲུང་དང་བཅས་པའོ། །གཏུམ་མོ་ཆེན་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཡཾ་ལས་བྱུང་བའི་ལྷ་མོ་མདོག་དུང་ཁ་ཞལ་གཅིག་ཕྱག་གཉིས་མ་རྒྱན་རྣམས་ཀྱིས་བརྒྱན་པ། གཡས་ན་ཏྲི་ཤཱུ་ལ་དང༌། གཡོན་ན་སྤུ་གྲི་བསྣམས་པ། ཞབས་སྐྱིལ་ཀྲུང་གིས་བཞུགས་པའོ། །སྡང་བ་ཐམས་ཅད་རླག་པར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཨོཾ་ལས་བྱུང་བའི་ལྷ་མོ་སྐུ་མདོག་དཀར་མོ་ཞལ་གཅིག་ཕྱག་བཞི་མ། ཞབས་རོལ་པས་བཞུགས་པ། རྒྱན་ཀུན་དང་ལྡན་ཞིང་མཇེས་བ། ཕྱག་གཡས་དང་པོ་སྐྱབས་སྦྱིན། གཡོན་དང་པོ་མེ་དཔུང་འཛིན་པ། འོག་མ་གཉིས་ཀྱིས་དབྱུག་པ་དང་ལྕགས་ཀྱུ་བསྣམས་པ་ཞབས་སྐྱིལ་ཀྲུང་དུ་བཞུགས་པ། རྨ་བྱའི་ཁྲི་ལ་མཛེས་པས་རོལ་པར་མཛད་པའོ། །རབ་ཏུ་ཞི་བ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ། བྷྲཱུཾ་ལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ། མདོག་སེར་མོ་རྒྱན་ཐམས་ཅད་ཀྱིས་ཡང་དག་པར་རྒྱན་མ། ཕྱག་གཡས་ན་ཉི་མ་དང་དབང་པོ། གཡོན་ན་ཟླ་བ་དང་ཐག་བཟངས་རིས་བསྣམས་པའོ། །ཞབས་རོལ་པས་བཞུགས་པའོ། །རྣམ་པར་རྒྱལ་བ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་
མའི་སྟེང་དུ་ཧཱུཾ་ལས་བྱུང་བའི་ལྷ་མོ་ཞལ་གསུམ་ཕྱག་བཞི་མ་མདོག་དམར་སེར་གཡས་དམར་བ་གཡོན་ལྗང་གུ། ཕྱག་དང་པོ་གཉིས་ཀྱིས་མཆོག་སྦྱིན་དང་ཨུཏྤ་ལ་བུམ་པས་མཚན་པ་བསྣམས་པ། ཞབས་རོལ་པས་བཞུགས་པ། སྐུ་ལ་འོད་འཕྲོ་བ། འོག་མ་གཉིས་ན་རྔ་ཡབ་དང་ཏིང་ཤགས་བསྣམས་པ། འབར་བའི་འོད་མངའ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཨ་ལས་བྱུང་བའི་ལྷ་མོ་མདོག་དམར་མོ་ཞལ་གཅིག་ཕྱག་གཉིས་མ། རྒྱན་ཐམས་ཅད་ཀྱིས་བརྒྱན་པ། ཕྱག་གཡས་ན་མུ་ཏིག་ཕྲེང་བ་ཐུགས་ཀར་འཛིན་པ། གཡོན་ན་ཨུཏྤ་ལའི་སྡོང་བུ་མཆོག་སྦྱིན་དང་བཅས་པ་རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པའོ། །གློག་ཕྲེང་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཧཱུཾ་ལས་བྱུང་བའི་ལྷ་མོ་མདོག་དམར་སེར་ཞལ་གཅིག་ཕྱག་གཉིས་མ། གཡས་མཆོག་སྦྱིན་ཞིང་གཡོན་པས་རྒྱལ་མཚན་རྡོ་རྗེ་ཕྱེད་པས་མཚན་པ་བསྣམས་པ། རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པའོ། །རྒྱལ་མཚན་ཅན་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཨ་ལས་བྱུང་བའི་ལྷ་མོ་མདོག་དམར་མོ་ཞལ་གཅིག་ཕྱག་གཉིས་མ། གཡས་རལ་གྲི་གཡོན་འཁོར་ལོ། །རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པའོ། །ཡེ་ཤེས་ཅན་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཏཾ་ལས་བྱུང་བའི་ལྷ་མོ་མདོག་ལྗང་གུ་ཞལ་གཅིག་ཕྱག་བཞི་མ་རྒྱན་ཐམས་ཅད་ཀྱིས་ཡང་དག་པར་བརྒྱན་པ། གཡས་དང་པོ་མཆོག་སྦྱིན། གཡོན་དང་པོ་ཨུཏྤ་ལ་འོག་མ་གཉིས་ན་མདའ་གཞུ་བསྣམས་པ། ཞབས་སྐྱིལ་ཀྲུང་གིས་བཞུགས་པའོ། །ཤེས་རབ་ཅན་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཡཾ་ལས་བྱུང་བའི་ལྷ་མོ་མདོག་ལྗང་གུ་ཞལ་གཅིག་ཕྱག་གཉིས་མ། རྒྱན་ཐམས་ཅད་ཀྱིས་ཡང་དག་པར་བརྒྱན་པ། གཡས་མཆོག་སྦྱིན་ཞིང་གཡོན་ཆང་གིས་གང་བའི་བུམ་པའོ། །ཞབས་རོལ་པས་བཞུགས་པའོ། །མྱོས་པར་བྱེད་པའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་རམ་ལས་བྱུང་བའི་ལྷ་མོ་མདོག་དཀར་མོ་ཞལ་གཅིག་པ་ཕྱག་གཉིས་མ། ཁྲོ་མོའི་ཆ་ལུགས་སྦྲུལ་གྱི་རྒྱན་ཅན། གཡས་རྡོ་རྗེ་གཡོན་སྡིགས་མཛུབ་
ཀྱིས་བསྡིགས་པ། ཞབས་རོལ་པས་རྒྱ་མཚོའི་དབུས་ན་བཞུགས་པའོ། །རེངས་པར་བྱེད་པའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་ཧཱུཾ་ལས་བྱུང་བའི་ལྷ་མོ་ནག་མོ་ཞལ་གཅིག་ཕྱག་གཉིས་མ། གཡས་རྡོ་རྗེ་གྲི་གུག་ག་གཡོན་ཐོད་པ་ཁྲག་གིས་གང་བ། གླང་ཆེན་གྱི་པགས་པའོ། །ཕག་གི་ཞལ་མངའ་བ། སྤྱན་གསུམ་ཁྲོ་གཉེར་ཅན་སྦྲུལ་གྱིས་བརྒྱན་པ། ཞབས་རོལ་པས་བཞུགས་པའོ། །ནག་མོ་ཆེན་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་གདན་ལ་ཧཱུཾ་ལས་བྱུང་བའི་ལྷ་མོ་ཞལ་གཅིག་ཕྱག་བཞི་མ་རྒྱན་ཐམས་ཅད་ཀྱིས་བརྒྱན་པ། གཡས་བསྐུམ་གཡོན་བརྐྱང་བས་བཞུགས་པ། ན་བཟའ་ནག་པོ་གསོལ་བ། མདོག་དམར་མོ། དབུ་སྐྲ་གྱེན་དུ་བརྫེས་པ། ཕྱག་གཡས་དང་པོ་ན་འཁོར་ལོ། གཉིས་པ་ན་རལ་གྲི་།གཡོན་གྱི་དང་པོ་ན་སྲིད་པའི་འཁོར་ལོ། གཉིས་པ་ན་སྡིགས་མཛུབ་བོ། །མཚན་མོ་ནག་མོ་ཞེས་བྱ་བའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་ཨོཾ་ལས་བྱུང་བའི་ལྷ་མོ་སྒྲོལ་མ་མདོག་ལྗང་གུ་ཞལ་གཅིག་ཕྱག་གཉིས་མ། ཕྱག་གཡས་ན་འཁོར་ལོ་གཡོན་ཁུ་ཚུར་སྡིགས་མཛུབ་དང་བཅས་པ་བསྣམས་པ། རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པའོ། །སྲུང་བར་བྱེད་པའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཨོཾ་ལས་བྱུང་བའི་ལྷ་མོ་སྐུ་མདོག་སྔོ་སྐྱ་ཞལ་གསུམ་ཕྱག་དྲུག་པ། གཡས་པ་རླུང་གི་བ་དན་དང༌། རི་དང་རྒྱ་མཚོའི་གླིང་བརྒྱ་དང༌། གཡོན་ན་མྱོས་བྱེད་ཀྱིས་གང་བའི་སྣོད་དང་ཞགས་པ་དང༌། རྔ་བོ་ཆེ་རྣམས་རིམ་བཞིན་དུ་བསྣམས་པ། ཞལ་གཡས་དམར་བ་གཡོན་དཀར་པོ། རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པའོ། །རྨོངས་བྱེད་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཏྲཾ་ལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ། གཡས་རིན་པོ་ཆེས་མཚན་པའི་ཨུཏྤ་ལ་སེར་པོ། གཡོན་སྐྱབས་སྦྱིན་པར་མཛད་པའི་ཕྱག་གིས་ཨུཏྤལ་སྔོན་པོ་པོ་ཏིས་མཚན་པ། མདོག་སེར་མོ་རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པའོ། །ཞི་བ་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཨ་ལས་བྱུང་བའི་ལྷ་མོ་མདོག་སྔོ་ལྗང་ཞལ་གཅིག་ཕྱག་གཉིས་མ། གཡས་ཨུཏྤ་ལ་
རྡོ་རྗེས་མཚན་པ། གཡོན་ཆོས་འཆད་པའི་ཕྱག་རྒྱ་ཅན་རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པའོ། །མཛེས་མ་ཆེན་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟང་དུ་ཨོཾ་ལས་བྱུང་བའི་ལྷ་མོ་མདོག་སེར་མོ་ཞལ་གཅིག་ཕྱག་གཉིས་མ་ཨུཏྤ་ལ་སྔོན་པོ་ཉི་མ་དང་ཟླ་བས་མཚན་པ་བསྣམས་ཤིང༌། གཡས་མཆོག་སྦྱིན་སྩོལ་བའི་ཕྱག་གིས་རིན་པོ་ཆེ་བསྣམས་པ། གཡོན་ཐུགས་ཀར་སྐྱབས་སྦྱིན་པ། རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་དང་མོའི་ཁྲི་ལ་བཞུགས་པའོ། །ཚངས་པའི་བུ་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཨོཾ་ལས་བྱུང་བའི་ལྷ་མོ་ཞལ་བཞི་ཕྱག་བརྒྱད་མ། མདོག་སྔོན་མོ་ཞལ་གཡས་དཀར་བ། རྒྱབ་གནག་པ་གཡོན་དམར་བརྒྱན་ཐམས་ཅད་ཀྱིས་བརྒྱན་པ། ཕྱག་དང་པོ་གཉིས་ཨུཏྤ་ལ་པོ་ཏིས་མཚན་པ་བསྣམས་པ། གཡས་གཉིས་པ་ན་གདུགས། གསུམ་པ་ན་མདའ། བཞི་པ་ན་དུང༌། གཡོན་གཉིས་པ་རྒྱལ་མཚན། གསུམ་པ་ན་གཞུ། བཞི་པ་ན་རིལ་བ་སྤྱི་བླུགས་བསྣམས་པ། རྒྱན་དང་ན་བཟའ་སྣ་ཚོགས་ཅན། ཞབས་རོལ་པས་ཁྲི་སྙན་ས་ལའི་པགས་པའི་གདན་ལ་བཞུགས་པའོ། །རིག་བྱེད་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་ཏཾ་ལས་བྱུང་བའི་ལྷ་མོ་སྐུ་མདོག་ལྗང་གུ་ཞལ་གཅིག་ཕྱག་གཉིས་མ་རུས་པའི་རྒྱན་དང་ལྡན་པ། ཕྱག་གཡས་མཆོག་སྦྱིན་གཡོན་པདྨ་དམར་པོ་ཐུགས་ཀར་བསྣམས་པའོ། །སྨད་གཡོགས་རི་དྭགས་ཀྱི་པགས་པས་བྱས་པ། ཞབས་རོལ་པ་དང་བྲག་ཕུག་ཏུ་བཞུགས་ཤིང་གསང་བའི་དྲང་སྲོང་དང་བཅས་པའོ། །གསང་བ་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་ན་མཾ་ལས་བྱུང་བའི་ལྷ་མོ་གསར་གྱི་མདོག་ཅན་ཞལ་བཞི་པ། གཡས་དཀར་བ་རྒྱབ་སྔོ་བ། གཡོན་དམར་བ། ཞབས་རོལ་པས་བཞུགས་པའོ། །ཕྱག་གཡས་དང་པོས་ནོར་བུས་མཚན་པའི་རྒྱལ་མཚན་བསྣམས་པ། གཉིས་པ་ན་འཁོར་ལོ། གསུམ་པ་ན་པདྨ་དམར་པོ་འདབ་མ་བརྒྱད་པ་ཡུ་བ་དང་བཅས་པ། བཞི་པ་ན་དུང་ངོ༌། །གཡོན་དང་པོ་ན་བུམ་པ། གཉིས་པ་ན་དཔལ་གྱི་བེའུ། གསུམ་པ་ན་ཉ། བཞི་པ་ན་གདུགས་བསྣམས་ཤིང་བཀྲ་ཤིས་པར་མཛད་པའོ། །རྒྱན་དང་ན་བཟའ་སྣ་ཚོགས་པས་བཀླུབས་པའོ། །བཀྲ་ཤིས་དོན་གྲུབ་པར་
བྱེད་པའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཨོཾ་ལས་བྱུང་བའི་ལྷ་མོ་མདོག་དཀར་མོ། ཞལ་གཅིག་ཕྱག་གཉིས་མ། ཕྱག་གཡས་ཐུགས་ཀར་ཕྲེང་བ་བསྣམས་པ། གཡོན་མཆོག་སྦྱིན་ཞིང་པདྨ་དཀར་པོ་བསྣམས་པ། རྒྱན་ཐམས་ཅད་ཀྱིས་བརྒྱན་པ། ཞབས་སྐྱིལ་ཀྲུང་དུ་བཞུགས་པའོ། །ཞི་བ་ཆེན་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་སྭ་ལས་བྱུང་བའི་ལྷ་མོ་མདོག་དམར་སེར། ཞལ་བཞི་ཕྱག་བཅུ་ཡིས་གཡས་ན་མདུང་རྩེ་གསུམ་པ། རྔ་ཡབ་དང༌། དགྲ་སྟ་དང༌། མེ་ལོང་དང༌། རྡོ་རྗེའོ། །གཡོན་གྱི་རིམ་པ་བཞིན་དུ་དྲིལ་བུ་དང༌། ཨུཏྤ་ལ་དང༌། གཏུན་ཤིང་དང༌། བུམ་པ་དང༌། འཁོར་ལོའོ། །རྒྱན་ཐམས་ཅད་ཀྱིས་བརྒྱན་པའོ། །རོལ་པས་བཞུགས་པའོ། །རིག་བྱེད་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་ཧཱུཾ་ལས་བྱུང་བའི་ལྷ་མོ་མདོག་སེར་མོ་ཞལ་གཅིག་ཕྱག་གཉིས་མ། ཕྱག་གཡས་གཡོན་ཐུགས་ཀར་བཀན་ཏེ། བྱང་ཆུབ་མཆོག་དང་ལྡན་པ་ལ་རྡོ་རྗེས་མཚན་པའོ། །རྒྱན་ཐམས་ཅད་ཀྱིས་བརྒྱན་ཅིང༌། ཞབས་སྐྱིལ་ཀྲུང་གིས་བུམ་པའི་ཁྲི་ལ་བཞུགས་པའོ། །ཡིད་མགྱོགས་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་ཧཱུཾ་ལས་བྱུང་བའི་ལྷ་མོ་མདོག་དམར་མོ་ཞལ་གཅིག་ཕྱག་གཉིས་མ། གཡས་གྲི་གུག །གཡོན་བནྡྷ་བསྣམས་པས་ཞག་དང་ཁྲག་ལ་དགྱེས་པ། སྟག་གི་གཡང་གཞི་གསོལ་བ། ཞལ་འཛུམ་པ་མཛད་ཅིང་རྐན་སྒྲ་འབྱིན་པ། འཇིག་རྟེན་གསུམ་གཡོ་བར་མཛད་པ། ཞབས་གཡས་བརྐྱང་བར་མཛད་པའོ། །ཐོད་པ་ཅན་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཏཱཾ་ལས་བྱུང་བའི་ལྷ་མོ་མདོག་སྔོན་མོ་ཞལ་གཅིག་ཕྱག་གཉིས་མ་ཕྱག་གཡས་ན་བུམ་པ། གཡོན་ན་ཅེ་སྤྱང་བསྣམས་པའོ། །ན་བཟའ་དཀར་པོ་གསོལ་བ། ཞབས་སེམས་དཔའི་སྐྱིལ་ཀྲུང་གིས་བཞུགས་པ། རིན་པོ་ཆེའི་རྒྱན་གྱིས་བརྒྱན་པའོ། །ཤུགས་ཅན་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཨ་ལས་བྱུང་བའི་ལྷ་མོ་མདོག་དཀར་མོ་ཞལ་བཞི་ཕྱག་བརྒྱད་མ། ཕྱག་གཡས་དང་པོས་ཕྲེང་བ་བསྣམས་པ། གཉིས་པ་ན་བདུད་རྩིས་གང་བའི་བུམ་པ། གསུམ་པ་ན་སྲིད་པའི་ཕྱག་ཤིང༌། བཞི་པ་ན་བུམ་
པ་དང་བཅས་པའི་མྱ་ངན་མེད་པའི་ཤིང༌། གཡོན་དང་པོས་ཉི་ཟླ། གཉིས་པས་རི་རབ། གསུམ་པས་པདྨའི་ནང་ནས་བྱུང་བའི་སྐྱེས་བུ། བཞི་པ་ན་ཚེས་འཆད་པའི་ཕྱག་རྒྱའོ། །རྒྱན་ཐམས་ཅད་ཀྱིས་བརྒྱན་པའོ། །ཞབས་སྐྱིལ་ཀྲུང་གིས་བཞུགས་པའོ། །ཚངས་པ་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །། པདྨ་དང་ཉི་མའི་གདན་ལ་ཨ་ལས་བྱུང་བའི་ལྷ་མོ་མདོག་སེར་མོ་ཞལ་གཅིག་ཕྱག་གཉིས་མ། རྒྱན་ཐམས་ཅད་ཀྱིས་བརྒྱན་པ། ན་བཟའ་རི་དྭགས་ཀྱི་པགས་པའི་སྨད་གཡོགས་མངའ་བ། ཕྱག་གཡས་པ་བརྐྱང་ནས་པུས་མོ་ལ་རེག་པ། གཡོན་པའང་དེ་བཞིན་དུ་མཛད་པ། ཨུཏྤལ་ལ་དང་ཨུཏྤ་ལ་རལ་གྲིས་མཚན་པའོ། །ཞབས་རོལ་བས་སེང་གེའི་གདན་ལ་བཞུགས་པའོ། །བདེན་པར་སྨྲ་བ་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་གྱི་སྟེང་དུ་ཨོཾ་ལས་བྱུང་བའི་ལྷ་མོ་མདོག་སེར་མོ་ཞལ་གཅིག་ཕྱག་གཉིས་མ་རྒྱན་ཐམས་ཅད་ཀྱིས་བརྒྱན་པ། གཡས་ན་རྩེ་གསུམ་བ་དན་དང་བཅས་པ་བསྣམས་པ། གཡོན་ན་ཨུཏྤ་ལ་བུམ་པས་མཚན་པའོ། །ཞབས་རོལ་པས་བཞུགས་པའོ། །ཕ་རོལ་ལས་རྒྱལ་བར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཧཾ་ལས་བྱུང་བའི་སྒྲོལ་མ་མདོག་དཀར་དམར་ཞལ་གཅིག་ཕྱག་གཉིས་མ་རྒྱན་ཐམས་ཅད་ཀྱིས་རབ་ཏུ་བརྒྱན་པ་ཕྱག་གཡས་ཨུཏྤ་ལ་དང་སེང་གེ་གཡོན་ལྕགས་ཀྱུ་བསྣམས་པ། ཞབས་རོལ་པས་བཞུགས་པའོ། །དེང་དཔོན་ཆེན་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་མཾ་ལས་སྐྱེས་པའི་ལྷ་མོ་མདོག་དམར་མོ་ཞལ་གཅིག་ཕྱག་བཞི་མ། གཡས་པས་ལྕགས་ཀྱུ་དང་ཞགས་པ། གཡོན་པས་ལྕགས་སྒྲོག་དང་དྲིལ་བུའོ། །རྒྱན་ཐམས་ཅད་ཀྱིས་རྒྱན་པ། ཕྱག་རྒྱ་ཆེན་པོ་ཨུཏྤ་ལ་གནས་པའོ། །ཞབས་རོལ་པས་བཞུགས་པའོ། །སྙིང་རྗེ་གནས་པར་བྱེད་པ་བཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉ་མའི་སྟེན་དུ་ཨ་ལས་ལས་བྱུང་བའི་ལྷ་མོ་མདོག་ལྗང་གུ། ཞལ་གཅིག་ཕྱག་གཉིས་པ་གཡས་ཨུ་ཏྤ་ལ་ལ་རྟ་མཆོག་གིས་མཚན་པའོ། །གཡོན་པ་ན་ནོར་བུའི་ཟ་མ་ཏོག་བསྣམས་པ། སྐྱིལ་ཀྲུང་དུ་བཞུགས་པ། རྒྱན་ཐམས་ཅད་ཀྱིས་བརྒྱན་པའོ། །ཆུད་མི་ཟ་བར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་པཾ་ལས་བྱུང་བའི་ལྷ་མོ་མདོག་དཀར་དམར་ཞལ་
གཅིག་ཕྱག་གཉིས་པ། གཡས་ན་རལ་གྲི་བསྣམས་པ། གཡོན་ན་ཨུཏྤ་ལ་མར་མེས་མཚན་པ་བསྣམས་བ། ཞབས་རོལ་པས་བཞུགས་པའོ། །ལམ་རབ་ཏུ་སྟོན་པར་བྱེད་པའི་སྒྲོལ་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་བྲུཾ་ལས་བྱུང་བའི་ལྷ་མོ་མདོག་སེར་མོ་ཞལ་གསུམ་ཕྱག་བཞི་གཡས་སྔོ་བ་གཡོན་དམར་བ། གཡས་རིན་པོ་ཆེ་དང་བཅས་པའི་མཆོག་སྦྱིན་པ། གཡོན་བུམ་པ་ཐུགས་ཀར་འཛིན་པ། ཐ་མ་གཉིས་ན་མདའ་གཞུའོ། །རྒྱན་ཐམས་ཅད་ཀྱིས་བརྒྱན་ཅིང་རོལ་པས་བཞུགས་པའོ། །མཆོག་སྟེར་བར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཨ་ལས་བྱུང་བའི་ལྷ་མོ་མདོག་དཀར་མོ་ཞལ་གཅིག་ཕྱག་གཉིས་མ། ཕྱག་གཡས་པ་ན་བུམ་པ། གཡོན་པ་ན་ལྡེ་མིག་བསྣམས་པ། རྒྱན་ཐམས་ཅད་ཀྱིས་བརྒྱན་པ། ཞབས་རོལ་བས་བཞུགས་པའོ། །དངོས་གྲུབ་སྟེར་བར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཨ་ལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ། རྒྱན་ཐམས་ཅད་ཀྱི་བརྒྱན་པ། གཡས་བུམ་པ་ལ་སྙིང་པོས་མཚན་པ། གཡོན་རིན་པོ་ཆེས་མཚན་པའི་ཁང་པ་བསྣམས་པ་ཞབས་རོལ་པས་བཞུགས་པའོ། །དངོས་གྲུབ་སྟོན་པར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཏྲཱཾ་ལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ་མདོག་དམར་སེར་ཕྱག་གཡས་རྡོ་རྗེ་གཡོན་མྱ་ངན་མེད་པའི་ཤིང་ལོ་བསྣམས་པའོ། །རྒྱན་དང་ན་བཟར་བཅས་པ་ཞབས་སྐྱིལ་ཀྲུང་དུ་བཞུགས་པ། ལང་ཚོ་དང་ལྡན་པའོ། །བུད་མེད་གཟུགས་ཅན་སོ་སོ་འབྲང་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་བཾ་ལས་བྱུང་བའི་ལྷ་མོ་དམར་སེར་ཞལ་གཅིག་ཕྱག་གཉིས་མ། གཡས་མྱ་ངན་མེད་པའི་ཤིང་ལ་ཕྱག་གིས་འཁྱུད་པར་བརྟེན་པའོ། །གཡོན་ཨུཏྤ་ལ་དམར་པོ་ཁ་བྱེ་བའི་ནང་དུ་གླང་པོ་ཆེ་འཛིན་པ། རྒྱན་དང་ན་བཟའ་དང་བཅས་པ། ཞབས་ཤིང་རྟའི་སྟེང་དུ་བཞུགས་པའོ། །དཔག་མེད་གནོན་པར་བྱེད་པའི་འོད་ཟེར་ཅན་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཧཱུཾ་ལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ་མདོག་སེར་མོ། གཡས་དགྲ་སྟ་དང་གཡོན་ཞགས་པ་བསྣམས་པ། རྒྱན་ཐམས་ཅད་དང་ཤིང་ལོའི་ན་བཟའ་
གྱོན་པ། ཞབས་རོལ་པས་བཞུགས་པའོ། །རི་ཁྲོད་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཧྲཱིཿལས་བྱུང་བའི་ལྷ་མོ་མདོག་དམར་མོ་ཞལ་གཅིག་ཕྱག་གཉིས་མ། གཡས་པ་གྲི་གུག །གཡོན་པ་ཁ་ཊྭཱཾ་ག་དང་ཐོད་པའོ། །རྒྱན་ཐམས་ཅད་ཀྱིས་བརྒྱན་པ་ན་བཟའ་དང་བཅས་པ་ཞབས་རོལ་པས་བཞུགས་པའོ། །རྣལ་འབྱོར་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཧྲཱིཿལས་བྱུང་བའི་ལྷ་མོ་མདོག་དཀར་མོ་ཞལ་གཅིག་ཕྱག་གཉིས་མ། གཡས་ན་ཞགས་པ། གཡོན་ན་ལྕགས་ཀྱུ་དང་བུམ་པའོ། །རྒྱན་དང་ན་བཟའ་སེར་མོ་བསྣམས་ཤིང་རོལ་པས་བཞུགས་པའོ། །གྲུབ་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཧཱུཾ་ལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ། གཡས་རལ་གྲི་དང་གཡོན་སྡིག་མཛུབ། ཞགས་པ་དང་བཅས་པའོ། རྒྱན་དང་ན་བཟའ་དང་བཅས་པ། ཞབས་ཕྱེད་ཀྲུང་དུ་བཞུགས་པའོ། གཏུམ་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཧྲཱིཿལས་བྱུང་བའི་ལྷ་མོ་མདོག་དཀར་མོ། ཞལ་གཅིག་ཕྱག་གཉིས་པ་གཡས་དཔག་བསམ་གྱི་ཤིང་དང༌། གཡོན་བདུད་རྩིས་གང་བའི་བུམ་པ་བསྣམས་པ། ཞབས་རོལ་པས་བཞུགས་པ། །རྒྱན་དང་ན་བཟའ་དང་བཅས་པའོ། །བདུད་རྩི་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་མུཾ་ལས་བྱུང་བའི་ལྷ་མོ་མདོག་དམར་མོ་ཞལ་གཅིག་ཕྱག་གཉིས་མ། གཡས་ན་སངས་རྒྱས་ཀྱི་སྤྲུལ་པའི་གཞལ་ཡས་ཁང་བསྣམས་པ། གཡོན་ན་ཨུཏྤ་ལ་སྔོན་པོ་བསྣམས་པ། རྒྱན་དང་ན་བཟའ་དང་ལྡན་པ་ཞབས་རོལ་པས་བཞུགས་པའོ། །སྐལ་བ་སྦྱིན་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཨོཾ་ལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ། ཕྱག་གཡས་ན་རིན་པོ་ཆེ། གཡོན་ན་ཨུཏྤ་ལ་སྔོན་པོ་བསྣམས་པ། རྒྱན་དང་ན་བཟའ་དང་བཅས་པ་ཞབས་རོལ་པ་དང་བཅས་པས་བཞུགས་པའོ། །སྐལ་བཟང་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མ་ལ་སྭ་ལས་བྱུང་བའི་ལྷ་མོ་མདོག་དཀར་མོ་ཞལ་གཅིག་ཕྱག་གཉིས་མ། ཕྱག་གཡས་ན་རི་དྭགས་རུ་རུའི་རི་མོ་ཅན་བསྣམས་པ། གཡོན་ན་ཨུཏྤལ་སྔོན་པོ་བསྣམས་པ། རྒྱན་དང་ན་བཟའ་དང་བཅས་པ་ཞབས་རོལ་པ་དང་
བཅས་པས་རྨ་བྱ་དང༌། ཅང་ཤེས་གྱི་ཁྲི་ལ་བཞུགས་པའོ། །མཛེས་པར་བྱེད་པའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཏཾ་ལས་བྱུང་བའི་ལྷ་མོ་མདོག་ལྗང་གུ་ཞལ་གཅིག་ཕྱག་གཉིས་མ་གཡས་མཆོག་སྦྱིན། གཡོན་ན་ཨུཏྤལ་བསྣམས་པ། རྒྱན་དང་ན་བཟའ་དང་བཅས་པ། ཞབས་ཕྱེད་ཀྲུང་དུ་བཞུགས་པའོ། །འདོད་པ་གྲུབ་པར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་ཨ་ལས་བྱུང་བའི་ལྷ་མོ་མདོག་དམར་སེར་ཞལ་གཅིག་ཕྱག་གཉིས་མ། གཡས་རིན་པོ་ཆེའི་མཛོད་ནས། གཡོན་ལྕགས་ཀྱུས་འདྲེན་པར་མཛད་མ། ཞལ་རྣམས་པར་རྒྱས་པ། རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པར་བསྒོམ་པར་བྱའོ། །དངོས་གྲུབ་ཐམས་ཅད་སྟེར་བར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཧཱུཾ་ལས་བྱུང་བའི་ལྷ་མོ་དུང་ཀ་ཞལ་གཅིག་ཕྱག་གཉིས་མ་ཕྱག་གཡས་ན་བྱ་ཁྭ་ཏ་བསྣམས་ཤིང༌། གཡོན་ན་དབྱུག་ཐོ་བསྣམས་པ། རྒྱན་རྣམས་ཀུན་རྫོགས་པ། ཞབས་ཀྱིས་རིམ་དྷ་ར་བརྫི་ཞིང་ཞབས་རོལ་པས་བཞུགས་པའོ། །མཐར་བྱེད་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉིད་མའི་སྟེང་དུ་ཧཱུཾ་ལས་བྱུང་བའི་ལྷ་མོ་ནག་མོ། ཞལ་གཅིག་ཕྱག་གཉིས་མ། གཡས་གཡོན་གཉིས་བེ་ཅོན་དང་སྡིགས་མཛུབ་འཛིན་པར་མཛད་མ། རྒྱན་ཐམས་ཅད་ཀྱིས་བརྒྱན་ཅིང་ཞབས་རོལ་པས་གླང་པོ་ཆེ་ལ་བཞུགས་པའོ། །དྲག་ཅིང་ཁྲོ་བའི་དབང་དུ་གྱུར་པས་ཞལ་གདངས་པ་འཇིགས་སུ་རུང་བར་བལྟའོ། །སྐྲག་པར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ། །།པདྨ་དང་ཟླ་བའི་སྟེང་དུ་ཏཾ་ལས་བྱུང་བའི་ལྷ་མོ་མདོག་ལྗང་གུ་ཞལ་གཅིག་ཕྱག་བཞི་མ་གཡས་གཉིས་ན་མཆོག་སྦྱིན་དང་བགྲང་ཕྲེང༌། གཡོན་གཉིས་ན་གླེགས་བམ་དང༌། ཨུཏྤལ་བསྣམས་པ་རྒྱན་ཐམས་ཅད་ཀྱིས་བརྒྱན་པ། སེམས་དཔའི་སྐྱིལ་ཀྲུང་དུ་བཞུགས་པའོ། །རབ་ཏུ་སྡུད་པར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་ཧཱུཾ་ལས་བྱུང་བའི་ལྷ་མོ་མདོག་ནག་མོ། ཞལ་གཅིག་ཕྱག་གཉིས་མ་གཡས་གྲི་གུག་གཡོན་ཞགས་པ་བསྣམས་པ་འཇིགས་པར་བྱེད་པ་སྐྲ་དང་སྨིན་མ་དམར་སེར་མཆེ་བ་ཅུང་ཟང་གཙིགས་བ་ཞལ་འཛུམ་པ་དང་བཅས་ཤིང་ཁྲོ་མོའི་ལུས་ཅན་ཞབས་རོལ་པས་བཞུགས་པའོ། །འཇིགས་པར་བྱེད་པ་ཞེས་བྱ་བའི་སྒྲོལ་མའི་སྒྲུབ་
ཐབས་སོ།། །།པདྨ་དང་ཟླ་བའི་སྟེང་དུ་ཧྲཱིཿ་ལས་བྱུང་བའི་ལྷ་མོ་མདོག་དཀར་མོ་ཞལ་གཅིག་ཕྱག་བཞི་མ། གཡས་གཡོན་གྱི་དང་པོ་གཉིས་ཀྱིས་ཉི་མ་དང་ཨུཏྤལ་དམར་པོ་ཁ་བྱེ་བ། ཐ་མ་གཉིས་ན་མདའ་གཞུ་བསྣམས་པ། རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པའོ། །དྲན་བྱེད་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཨ་ལས་བྱུང་བའི་ལྷ་མོ་མདོག་སེར་མོ་ཞལ་གཅིག་ཕྱག་གཉིས་མ། གཡས་ན་རྩེ་གསུམ་གཡོན་ན་རིལ་བ་བསྣམས་པ། རྒྱན་ཐམས་ཅད་ཀྱིས་བརྒྱན་ཅིང༌། མྱ་ངན་མེད་པའི་ཤིང་ལ་བརྟེན་པ། རོལ་པའི་ཞབས་ཀྱིས་བཞུགས་པའོ། །བརྟུལ་ཞུགས་ཆེན་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཨོཾ་ལས་བྱུང་བའི་ལྷ་མོ་མདོག་དཀར་མོ་ཞལ་གཅིག་ཕྱག་གཉིས་མ། རྒྱན་ཐམས་ཅད་ཀྱིས་བརྒྱན་པ། གཡས་ན་ནོར་བུ་རིན་པོ་ཆེ། གཡོན་ན་བུམ་པ་བསྣམས་པ། བྱང་ཆུབ་ཀྱི་ཤིང་ལ་རྒྱབ་བརྟེན་པ། ཞབས་རོལ་པས་བཞུགས་པའོ། །ཕན་པར་བརྩོན་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་སྟེང་དུ་མཾ་ལས་བྱུང་བའི་ལྷ་མོ་མདོག་ལྗང་གུ་ཞལ་གཅིག་ཕྱག་བཞི་མ། རྒྱན་ཐམས་ཅད་ཀྱིས་བརྒྱན་པ། ཕྱག་གཡས་ཀྱི་དང་པོས་སྐྱབས་སྦྱིན་པ། འོག་མ་མདའ། གཡོན་དང་པོ་ཨུཏྤལ། འོག་མས་གཞུ་བསྣམས་པ། ཞབས་རོལ་པས་བཞུགས་པའོ། །སྐྱོབ་པར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཏཾ་ལས་བྱུང་བའི་ལྷ་མོ་མདོག་སྔོན་མོ་ཞལ་གཅིག་ཕྱག་གཉིས་མ། གཡས་ན་པོ་ཏི་དང༌། ཨུཏྤ་ལ་དང་བཅས་པ། གཡོན་སྐྱབས་སྦྱིན་དང་ཨུཏྤ་ལ་དང་བཅས་པའོ། །རྒྱན་ཐམས་ཅད་ཀྱིས་བརྒྱན་ཅིང་ཞབས་སྐྱིལ་ཀྲུང་དང་བཅས་པའོ། །གུས་བྱེད་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་གྷཾ་ལས་བྱུང་བའི་ལྷ་མོ་མདོག་སེར་མོ་ཞལ་གཅིག་ཕྱག་གཉིས་མ། གཡས་ཀྱིས་སྐྱབས་སྦྱིན་ཞིང༌། གཡོན་ན་ཨུཏྤ་ལའི་སྟེང་ན་སྙན་པར་སྨྲ་བའི་སྒྲ་དང་བཅས་པ་བསྣམས་པ། ཀྲྀཥྞ་ས་རའི་པགས་པ་ཕྲག་པ་ལ་བཀལ་བའོ། །བདེ་བ་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཉི་མའི་གདན་ལ་ཧྲཱིཿལས་བྱུང་བའི་ལྷ་མོ་མདོག་དམར་མོ་ཞལ་གཅིག་ཕྱག་གཉིས་མ། རྒྱན་ཐམས་ཅད་ཀྱིས་བརྒྱན་པ། ཕྱག་གཡས་ན་རལ་གྲི་།གཡོན་ན་
སེང་གེ་ཁ་ནང་དུ་བལྟ་བའོ། །ཞབས་རོལ་པས་བཞུགས་པའོ། །ངག་གི་དབང་ཕྱུག་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཏཾ་ལས་བྱུང་བའི་ལྷ་མོ་ཞལ་གཅིག་ཕྱག་གཉིས་མ། ཕྱག་གཡས་ཨ་ཤྭ་ཀའི་སྡོང་པོ་ལ་འཁྱུག་པ། གཡོན་ན་བུམ་པ་བསྣམས་པ། རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པའོ། །ཞི་བར་བྱེད་པ་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཧཱུཾ་ལས་བྱུང་བའི་ལྷ་མོ་སྔོ་ལྗང་ཞལ་གསུམ་ཕྱག་དྲུག་མ་གཡས་དཀར་གཡོན་དམར་བ། གཡས་གཡོན་གྱི་དང་པོ་གཉིས་ཀྱིས་རལ་གྲི་དང་པོ་ཏི། བར་མ་གཉིས་ཏིང་ངེ་འཛིན་དུ་སྣོལ་བ། ཐ་མ་གཉིས་ན་མདའ་གཞུའོ། །རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པའོ། །ཞི་ཞིང་ཕྲ་བ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཨོཾ་ལས་བྱུང་བའི་ལྷ་མོ་མདོག་དཀར་མོ་ཞལ་གཅིག་ཕྱག་གཉིས་མ། གཡས་འཁོར་ལོ་གཡོན་ཏིང་ངེ་འཛིན་དུ་བཞུགས་པའོ། །རྒྱན་ཐམས་ཅད་ཀྱིས་བརྒྱན་པ། ཞབས་རྡོ་རྗེ་སྐྱིལ་ཀྲུང་དུ་བཞུགས་པའོ། །རྟག་པ་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །པདྨ་དང་ཟླ་བའི་སྟེང་དུ་སཾ་ལས་བྱུང་བའི་ལྷ་མོ་མདོག་སེར་མོ་ཞལ་གཅིག་ཕྱག་གཉིས་མ། གཡས་རྡོ་རྗེ་རྒྱ་གྲམ། གཡོན་ནེའུ་ལེའི་རྒྱལ་བུ་བསྣམས་པ། རྒྱན་ཐམས་ཅད་ཀྱིས་རྒྱན་པ། ཞབས་རོལ་པས་བཞུགས་པའོ། །ཀུན་འགྲོ་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཧྲཱི་ལས་བྱུང་བའི་ལྷ་མོ་མདོག་དམར་མོ་ཞལ་གཅིག་ཕྱག་གཉིས་མ། གཡས་རིན་པོ་ཆེ་གཡོན་དང་འཕན་ལྕེ་གཉིས་པ་བསྣམས་པ། རྒྱན་ཐམས་ཅད་ཀྱི་བརྒྱན་པ། ཞབས་གཡོན་བརྐྱང་བས་བཞུགས་པའོ། །རྗེས་འགྲོ་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཏཾ་ལས་བྱུང་བའི་ལྷ་མོ་མདོག་སེར་མོ་ཞལ་གཅིག་ཕྱག་གཉིས་མ། གཡས་ན་གསིལ་བྱེད་བསྣམས་པ། གཡོན་ན་པདྨ་ལ་གནས་པའི་རྒྱ་གྲམ་བསྣམས་པ། རྒྱན་ཐམས་ཅད་ཀྱིས་བརྒྱན་པ། ཞབས་རོལ་བས་བཞུགས་པའོ། །དོན་ཀུན་གྲུབ་པར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཧཱུཾ་ལས་བྱུང་བའི་ལྷ་མོ་མདོག་དཀར་མོ་ཞལ་གཅིག་ཕྱག་གཉིས་མ། གཡས་བུམ་པ་གཡོན་ལྕགས་ཀྱུ་བསྣམས་པའོ། །རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་
བཞུགས་པའོ། །ཟང་པོ་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཨ་ལས་བྱུང་བའི་ལྷ་མོ་རྒྱན་ཐམས་ཅད་དང་ལྡན་མ་ཞལ་གཅིག་ཕྱག་གཉིས་མ་གཡས་ན་མྱ་ངན་མེད་པའི་ཤིང༌། གཡོན་མཆོག་སྦྱིན་ནོ། །མདོག་སེར་མོ་ཞབས་དཀྱིལ་ཀྲུང་དུ་བཞུགས་པའོ། །གསང་བྱེད་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་སྭ་ལས་བྱུང་བའི་ལྷ་མོ་ལྷ་མོ་མདོག་ལྗང་གུ་ཞལ་གཅིག་ཕྱག་གཉིས་མ་གཡས་ན་རིན་པོ་ཆེ་བརྩིགས་པ་བསྣམས་པ། གཡོན་ཨུཏྤལ་མཆོག་སྦྱིན་དང་བཅས་པའོ། །རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པའོ། །གསོ་བྱེད་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །པདྨ་དང་ཟླ་བའི་གདན་ལ་ཙུཾ་ལས་བྱུང་བའི་ལྷ་མོ་མདོག་སེར་མོ་ཞལ་གཅིག་ཕྱག་གཉིས་མ། གཡས་རིན་པོ་ཆེ་དང་བཅས་པའི་མཆོག་སྦྱིན། གཡོན་རིན་པོ་ཆེས་གང་བའི་ནོར་བུའི་རྐྱལ་པ་བསྣམས་པ། ཞབས་རོལ་པས་བཞུགས་པའོ། །ནོར་སྟེར་མ་ཞེས་བྱ་བའི་གོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཧཱུམ་ལས་བྱུང་བའི་ལྷ་མོ་མདོག་སྔོན་མོ་ཞལ་གཅིག་ཕྱག་གཉིས་མ་རྒྱན་ཐམས་ཅད་ཀྱིས་རྒྱན་པ། གཡུས་དང་པོ་སྐྱབས་སྦྱིན་པ། གཡོན་ཆོས་འཆད་པའི་ཕྱག་རྒྱ་ཅན་ཞབས་རོལ་པས་བཞུགས་པའོ། །མི་འཇིགས་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་བཾ་ལས་བྱུང་བའི་ལྷ་མོ་མདོག་སྔོན་མོ་ཞལ་གཅིག་ཕྱག་གཉིས་མ། གཡས་ན་ཨུཏྤལ་སྔོན་པོ། གཡོན་ཤེལ་གྱི་ཕྲེང་བ་བསྣམས་པ། རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པའོ། །བསོད་ནམས་ཅན་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཏཾ་ལས་བྱུང་བའི་ལྷ་མོ་མདོག་སེར་མོ་ཞལ་གཅིག་ཕྱག་བཞི་པ། རྒྱན་ཐམས་ཅད་ཀྱིས་བརྒྱན་པ། ཕྱག་གཡས་གཡོན་དང་པོ་གཉིས་ཀྱིས་སྦྱིན་བོར་རབ་ཏུ་དགའ་བའི་ཕྱག་རྒྱ་བཅིངས་པ། གཡས་ཀྱི་འོག་མ་ན་རལ་གྲི་།གཡོན་གྱི་འོག་མ་ན་ཤིང་མྱ་ངན་མེད་པའི་ཡལ་ག་བཟུང་བའོ། །གཻ་ཏ་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཧྲཱི་ལས་བྱུང་བའི་ཧ་མོ་མདོག་དཀར་མོ་ཞལ་གཅིག་ཕྱག་གཉིས་མ། གཡས་རིལ་བ་སྤྱི་བླུགས་དང་བཅས་པའི་མཆོག་སྦྱིན་པ། གཡོན་ཨུཏྤལ་སྔོན་པོ་དང་བཅས་པའི་སྐྱབས་སྦྱིན་པ། རྒྱན་
ཐམས་ཅད་དང་ལྡན་པའི་ན་བཟའ་བསྣམས་པའོ། །ཞབས་རོལ་པས་བཞུགས་པའོ། །སྤྱན་རས་གཟིགས་དབང་ཕྱུག་ལས་སྐྱེས་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཧཱུམ་ལས་བྱུང་བའི་ལྷ་མོ་མདོག་དཀར་མོ། གཡས་ན་ཕྲང་དང་དཔལ་བེའུ། གཡོན་པདྨ་དང་བུམ་པ་བསྣམས་པ། ཞལ་གཅིག་ཕྱག་གཉིས་པ་རྒྱན་ཐམས་ཅད་ཀྱིས་བརྒྱན་པ། ཕབས་རོལ་བས་བུམ་པའི་སྟེང་ན་བཞུགས་པའོ། །མི་འཇིགས་པ་སྲེད་ལེན་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཡ་ལས་བྱུང་བའི་ལྷ་མོ་མདོག་ལྗང་གུ་ཞལ་གཅིག་ཕྱག་གཉིས་མ། གཡས་ན་འབྲས་ཀྱི་སྙེ་མ། གཡོན་ན་མེ་ལོང་ཕྲེང་བ་དང་བཅས་པ་བསྣམས་པའོ། །རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པའོ། །དཀའ་ཐུབ་ཆེན་མོ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཏཾ་ལས་བྱུང་བའི་ལྷ་མོ་མདོག་ལྗང་གུ་ཞལ་གཅིག་ཕྱག་གཉིས་མ་གཡས་སྐྱབས་སྦྱིན་གཡོན་ཨུཏྤལ་བསྣམས་པ། རྒྱན་ཐམས་ཅད་ཀྱིས་བརྒྱན་ཅིང་ཞབས་རོལ་པས་བཞུགས་པ། རྐུན་པོ་དང་ཆོམ་རྐུན་ལས་རྒྱལ་བ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ཛཾ་ལས་བྱུང་བའི་ལྷ་མོ་མདོག་ལྗང་གུ་ཞལ་གཅིག་ཕྱག་གཉིས་པ། གཡས་ན་རྨ་བྱའི་སྒྲོ་བསྣམས་པ། གཡོན་སྐྱབས་སྦྱིན་པའི་ཕྱག་གིས་ཨུཏྤལ་བསྣམས་པ། རྒྱན་ཐམས་ཅད་ཀྱིས་རྒྱན་པ། ཞབས་རོལ་པས་བཞུགས་པའོ། །སྦྲུལ་ལས་སྐྱོབ་པར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཧཱུཾ་ལས་བྱུང་བའི་ལྷ་མོ་མདོག་ལྗང་གུ་ཞལ་གཅིག་ཕྱག་གཉིས་མ་གཡས་སྐྱབས་སྦྱིན་པ། གཡོན་ཨུཏྤལ་དང་བཅས་པའི་སྐྱབས་སྦྱིན་པ། རྒྱན་ཐམས་ཅད་ཀྱིས་བརྒྱན་པ། ཞབས་རོལ་པས་བཞུགས་པའོ། །སེང་གེའི་འཇིགས་པ་ལས་སྐྱོབ་པར་བྱེད་བ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཨ་ལས་བྱུང་བའི་ལྷ་མོ་མདོག་ལྗང་གུ་ཞལ་གཅིག་ཕྱག་གཉིས་མ། རྒྱན་ཐམས་ཅད་དང་ལྡན་པ་ཕྱག་གཡས་ན་ཟླ་བ་བསྣམས་ཤིང་སྐྱབས་སྦྱིན་པར་མཛད་པ། གཡོན་ཨུཏྤལ་བསྣམས་ཤིང་སྐྱབས་སྦྱིན་པར་མཛད་པ། ཞབས་རོལ་པས་མེའི་ས་བོན་ལས་གཞལ་བ་མཛད་པའོ། །མེ་ལས་སྐྱོབ་པར་
བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཨོཾ་ལས་བྱུང་བའི་ལྷ་མོ་མདོག་ལྗང་གུ་ཞལ་གཅིག་ཕྱག་གཉིས་མ། རྒྱན་ཐམས་ཅད་དང་ལྡན་པ། ཕྱག་གཡས་སྐྱབས་སྦྱིན་པ། གཡོན་ཨུཏྤལ་དང་བཅས་པའི་སྐྱབས་སྦྱིན་པ། ཞབས་རོལ་བ་དང་བཅས་པས་གླང་པོ་ཆེ་མནན་པའོ། །གླང་པོ་ཆེ་ལས་སྐྱོབ་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་སྟེང་དུ་ཧཱུཾ་ལས་བྱུང་བའི་ལྷ་མོ་མདོག་དཀར་ལྗང་ཞལ་གཅིག་ཕྱག་གཉིས་པ། གཡས་སྐྱབས་སྦྱིན་པའི་ཕྱག་རྒྱས་སྦྱིན་ལག་མཐེ་བོང་གིས་མནན་པའོ། །གཡོན་ཨུཏྤལ་དང་བཅས་པའི་སྐྱབས་སྦྱིན་པའོ། །རྒྱན་ཐམས་ཅད་ཀྱིས་བརྒྱན་ཅིང་ཞབས་རོལ་བས་སྟག་ལ་བཅིབས་པའོ། །སྟག་ལས་སྐྱོབ་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བའི་གདན་ལ་ལཾ་ལས་བྱུང་བའི་ལྷ་མོ་མདོག་སྔོ་ལྗང༌། ཞལ་གཅིག་ཕྱག་གཉིས་པ་གཡས་སྐྱབས་སྦྱིན་ཞིང༌། གཡོན་ཨུཏྤལ་ཐུགས་ཀར་སྐྱབས་སྦྱིན་དང་བཅས་པས་བཟུང་བའོ། །རྒྱན་ཐམས་ཅད་ཀྱིས་བརྒྱན་ཅིང་ཞབས་རོལ་བས་ཆུའི་སྟེང་དུ་བཞུགས་པའོ། །ཆུ་ལ་སྐྱོབ་པར་བྱེད་པ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།པདྨ་དང་ཟླ་བ་དང་ཉི་མའི་སྟེང་དུ་ཧྲིཿལས་བྱུང་བའི་ལྷ་མོ་མདོག་དམར་མོ་ཞལ་གཅིག་ཕྱག་གཉིས་མ། རྒྱན་ཐམས་ཅད་དང་ལྡན་པ། གཡས་སྐྱབས་སྦྱིན་པ། གཡོན་ཨུཏྤལ་ལའི་སྟེང་དུ་ལྕགས་ཀྱུས་མཚན་པ་བསྣམས་པའོ། །ཞབས་རོལ་པས་མིའི་དབང་པོ་མནན་པའོ། །རང་གི་ལུས་ཀྱི་འོད་ཟེར་དམར་པོས་དེའི་ལུས་བཀང་ལ་རྣག་གི་གནས་སུ་བཞག་གོ །ཞི་མཛད་མ་ཞེས་བྱ་བའི་སྒྲོལ་མའི་སྒྲུབ་ཐབས་སོ།། །།དེ་ནས་ཐུབ་པའི་ལྷ་མོ་ཞེས་བྱ་བའི་སྒྲོལ་མ་ནི། སྔར་བསྟན་པའི་ཆོ་ག་ལས་བདུད་རྩིའི་དཀྱིལ་འཁོར་དུ་ས་བོན་ལྔ་པའི་སྡེ་ཚན་གྱི་དང་པོ་ལ་དང་པོ་གཉིས་པས་མནན་ལ་ཟླ་ཚེས་ཕྱེད་པའི་ཐིག་ལེས་བརྒྱན་པའོ། །དེ་ལས་གྲུབ་པའི་སྒྲོལ་མ་བསྒོམ་པར་བྱའོ། །མཆོག་ཏུ་རྣམས་པར་མཛེས་མ། ཞལ་གཅིག་པ་ཡིད་དུ་འོང་བ་མོ་ལྗང་གུ་ཕྱག་གཉིས་མ། གཡས་མཆོག་སྦྱིན་པ་གཡོན་ཨུཏྤལ་འཛིན་པའོ། །པདྨ་དང་ཟླ་བ་ལ་གནས་པ་རྒྱན་ཐམས་ཅད་ཀྱིས་རྒྱན་པར་བསམ་མོ། །ལག་པ་ཉིས་ཐལ་མོ་སྦྱར་ལ་མཛུབ་མོ་གཉིས་ཀྱིས་གུང་མོའི་སེན་མོ་བཀབ་ལ་སྲིན་ལག་ནང་དུ་བཅུག་སྟཾ་མཐེ་བོང་མནན་པ་ནི་ཨུཏྤལ་ཁ་བྱེ་བའི་ཕྱག་རྒྱའོ། །ཨོཾ་ཏཱ་རེ་
ཏུཏྟཱ་རེ་ཏུ་རེ་སྭཱ་ཧཱ། དེ་ནས་སྙིང་གའི་ས་བོན་ལས་འོད་ཟེར་འཕྲོས་པས་ཛཿདང་ཧཱུཾ་ལ་སོགས་པས་ཡེ་ཤེས་ཀྱི་དཀྱིལ་འཁོར་སྤྱན་དྲངས་ལ་གཞུག་ཅིང་དབང་དུ་བྱའོ། །གནས་གསུམ་ལ་ནི་རྡོ་རྗེ་གསུམ། །བྱིན་གྱིས་རླབས་ལ་སྐུལ་སོགས། །འཁོར་ལོ་པདྨ་རྡོ་རྗེ་དང༌། །ཨོཾ་ཨཱཿཧཱུཾ་ལས་རྟག་པ་དང། །འོད་དཔག་མེད་དང་མི་བསྐྱོད་པ། །དེ་ནས་ཐུགས་ཀའི་ས་བོན་ལས། །འོད་འཕྲོས་ཡེ་ཤེས་སེམས་དཔའ་ནི། །ང་མའི་ཚུལ་ཅན་སྤྱན་དྲངས་ཏེ། །དབང་བསྐུར་རིགས་ཀྱི་བདག་པོ་ནི། འོད་དཔག་མེད་ཀྱིས་སྤྱི་བོར་བརྒྱན། །དེ་ནས་ས་བོན་ལས་བྱུང་བའི། །འོད་ཀྱི་ལྷ་ཡི་སྤྲོ་བསྡུ་ལས། །སྐྱོན་ཐུགས་ཀའི་ས་བོན་ལས། །འོད་འཕྲོས་སྣོད་བཅུད་མ་ལུས་ཞུ། །བདག་ཀྱང་ས་བོན་དེ་དག་ལས། །ཤིན་ཏུ་ཕྲ་བར་བསམ་མི་ཁྱབ། །རྣམ་པར་མི་རྟོག་དེ་དམིགས་ཤིང༌། །ནམ་མཁའི་དཀྱིལ་ལྟར་རབ་དབེན་པ། །བདེ་བར་གཤེགས་པ་ཀུན་གྱི་གནས། །དེ་ནས་སྐྱོན་བཟླས་པ་ནི། །འབུམ་ཕྲག་བཞིའམ་འོན་ཏེ་དྲུག །འབུམ་ཕྲག་བཅུ་ཡིས་ལས་རྣམས་འགྲུབ། །རྣལ་འབྱོར་པ་ནི་གང་ཞིག་གིས། །འདི་དོན་ཉམས་སུ་གང་ལེན་པ། །ཐོག་མ་ཐ་མ་མེད་ཞི་བའི། སྒྲོལ་མ་ཡུམ་མཆོག་ཉིད་གྱུར་ནས། །དངོས་གྲུབ་གཉིས་སོགས་འཐོབ་འགྱུར་ཏེ། །ཡོན་ཏན་དཔག་མེད་འབྱུང་བར་གསུངས། །དེ་ལྟར་སྟོང་དང་སྙིང་རྗེའི་བདག་ཉིད་སྲིད་པ་གསུམ་སྐྱེས་ཟད་ངེས་ཤེས་དང་ནི། །ཤེས་བྱ་གཉིས་སུ་མེད་སྐུ་ཀུན་དུ་བཟང་པོའི་སྤྱོད་པའི་བདག་ཉིད་སྣ་ཚོགས་ཡུམ། །བཅོམ་ལྡན་འདས་མའི་སྒྲུབ་ཐབས་རྒྱུད་འཛིན་ལེགས་བཀོད་པ་ལས་བསོད་ནམས་དྲི་མ་མེད། །བདག་གིས་གང་ཐོབ་དེས་ནི་འགྲོ་བ་མ་ལུས་རྟག་བདེ་མྱ་ངན་འདས་ཐོབ་ཤོག །ལྷ་མོ་སྒྲོལ་མའི་སྒྲུབ་ཐབས་བརྒྱ་རྩ་བརྒྱད་པ་ཞེས་བྱ་བ། སློབ་དཔོན་ཆེན་པོ་ཙནྡྲ་གོ་མིས་མཛད་པ་རྫོགས་སོ།། །།རྒྱ་གར་གྱི་མཁན་པོ་དཱི་པཾ་ཀཱ་ར་ཤྲཱི་ཛྙཱ་ན་དང༌། ལོ་ཙཱ་བ་དགེ་སློང་ཚུལ་ཁྲིམས་རྒྱལ་བས་བསྒྱུར་བའོ། །སླད་ཀྱིས་རྒྱ་གར་གྱི་པཎྜི་ཏ་དཱ་ན་ཤཱི་ལ་དང༌། བོད་ཀྱི་ལོ་ཙཱ་པ་བློ་གྲོས་གྲགས་པས་བཅོས་ཏེ་གཏན་ལ་ཕབ་པའོ།།