ཚེ་འཕེལ་བའི་ཆོ་ག།
ཙནྡྲགོམིན།
རྒྱ་གར་སྐད་དུ། ཨཱ་ཡུཪྺརྡྷ་ནི་བིདྷིཿ། བོད་སྐད་དུ། ཚེ་འཕེལ་བའི་ཆོ་ག །རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །སྔོན་དུ་གསུངས་པའི་རིམ་པས་
སྒྲོལ་མ་དཀར་མོ་ཞལ་གཅིག་པ་ཕྱག་གཉིས་པ། སྐྱོལ་མོ་ཀྲུང་དུ་བཞུགས་པར་བསྒོམས་ཏེ། ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ས་བོན་གྱི་གེ་བལྟའོ། །དེ་ལ་འོད་འཕྲོས་པས་མདུན་གྱི་ནམ་མཁའ་ལ་མགོན་པོ་ཚེ་དཔག་ཏུ་མེད་པ་སྐུ་མདོག་དཀར་པོ་མཉམ་གཞག་གི་ཕྱག་རྒྱ་ཅན་ཡུམ་དང་བཅས་པ། ཕྱག་གི་སྟེང་ན་རིན་པོ་ཆེའི་བུམ་པ་ཅན་གྱི་མདུན་དུ་མི་བསྐྱོད་པ་སྔོན་པོ་གཡས་པ་ས་གནོན། གཡོན་རིན་པོ་ཆེའི་བུམ་པ་ཅན་གྱིས་ཡུམ་ལ་འཁྱུད་པ། གཡས་སུ་རིན་འབྱུང་གསེར་བཙོ་མའི་མདོག་ཅན་ཕྱག་གཡས་མཆོག་སྦྱིན། གཡོན་ནི་སྔ་མའི་ཚུལ་དང་མཚུངས་སོ། །རྒྱབ་ཏུ་རྣམ་སྣང་དམར་པོ། གཡས་བྱང་ཆུབ་མཆོག་གི་ཕྱག་རྒྱ་ཅན། གཡོན་དུ་དོན་ཡོད་གྲུབ་པ་ལྗང་གུ་སྐྱབས་སྦྱིན་གྱི་ཕྱག་རྒྱ་ཅན་ཏེ་རིགས་ལྔ་དང༌། ཡུམ་ཐམས་ཅད་ནི་རང་སྣང་གི་ཡུམ་མོ། །དེ་དག་ལ་བྱང་ཆུབ་སེམས་དཔའི་ཚོགས་དཔག་ཏུ་མེད་པས་བསྐོར་བར་དམིགས་ཏེ། སྐྱབས་འགྲོ་ལ་སོགས་པ་ཚུལ་བཞིན་དུ་བྱའོ། །ཚེ་འཕེལ་བར་གསོལ་བ་གདབ་པ་ནི། ཨོཾ་ན་མོ་བྷ་ག་ཝ་ཏེ་ཨ་མི་ཏཱ་བྷཱ་ཝ་ཏི་ཏ་ཐཱ་ག་ཏ། སརྦ་བུདྡྷ་བོ་དྷི་ས་ཏྭ་སྱ་ཨ་ཧཾ་ཨཱ་ཡུཪྺརྡྷ་ནི། པྲཱ་ཎ་ཝརྡྷ་ནི། ཛཱི་བ་ཝརྡྷུ་ནི། ཨ་དྷིཥྛཱ་ན་ཨ་དྷིཥྛི་ཏེ་སྭཱ་ཧཱ། ཞེས་པ་དང༌། སྣང་བ་མཐའ་ཡས་ལ་སོགས་པ་ཡབ་རྣམས་ཀྱིས་སོ་སོའི་ཡུམ་ལ་བསྐུལ་ཏེ་ཚེའི་དངོས་གྲུབ་བརྟན་པར་བྱས་ནས། བདག་ཉིད་ལ་དབང་བསྐུར་བའི་སྦྱོར་བ་ལ་ཞུགས་ཏེ་འདུག་པར་བསམ། བདག་ཉིད་ཀྱང་སྤྱི་བོ་ཚངས་པའི་བུ་ག་ཁ་ཕྱེ་སྟེ་སྙིང་གའི་ཆུ་སྐྱེས་ལ་གནས་པའི་འབྱུང་བ་བཞིའི་རྩ་ཀ་ཕྱེ་སྟེ། རྩ་ཐམས་ཅད་སོ་སོར་ཁ་ཕྱེ་བར་བསམ། དེ་ནས་དེ་བཞིན་གཤེགས་པ་ཐམས་ཅད་ཀྱིས་བདག་ལ་འཆི་མེད་ཀྱི་དབང་བསྐུར་ཏེ། ཡེ་ཤེས་ཀྱི་བདུད་རྩིའི་རྒྱུན་ཚང་པའི་བུ་ག་ནས་བླུགས་པས་རྩ་ཐམས་ཅད་ཁེངས་པ་དང༌། ཁྱད་པར་དུ་ཆུ་སྐྱེས་ཀྱི་རྩ་ལྔ་གང་བས་སྲོག་འཛིན་པ་རྣལ་དུ་ཚུད་དེ་འཆི་བ་མེད་པར་བསམ་ཞིང་སྔགས་འདི་ཉེར་གཅིག་བཟླས་སོ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཨཱ་ཡུཪྺརྡྷ་ཀ་དྷ་བྷྱཿསྭཱ་ཧཱ། ཞེས་པས་དེ་བཞིན་གཤེགས་པ་རྣམས་སྣང་བ་མཐའ་ཡས་ལ་འདུས་ཏེ། དེ་དབུ་རྒྱན་གྱི་ཚུལ་དུ་བདག་གི་སྤྱི་བོར་བྱོན་པས་ཚེ་རྟན་པར་འགྱུར་རོ། །གཞན་རྣམས་གཤེགས་སུ་གསོལ། དེས་སྐྱོ་ནས་ལྡང་བར་འདོད་ན་མི་དམིགས་པས་ཟིན་པའི་དགེ་བ་བསྔོའོ། །
སྔ་མ་ལྟར་ཐུན་བཞི་ལ་སོགས་པ་བསྒོམས་ན་ཟླ་བ་དྲུག་གིས་འཆི་བ་མེད་པའི་དངོས་གྲུབ་ཏུ་འགྱུར་རོ། །གཞན་ཡང་ཅི་རིགས་པས་ཀྱང་འཕེལ་ལོ། །སྒྲོལ་མ་ཚེ་སྤེལ་བ་ཞེས་བྱ་བའི་རིག་པ་།སློབ་དཔོན་ཙནྡྲ་གོ་མིས་མཛད་པ་རྫོགས་སོ།། །།མ་ཧཱ་པཎྜི་ཏ་རཏྣ་རཀྵི་ཏའི་ཞལ་སྔ་ནས། ལོ་ཙཱ་བ་ཞང་གྲུབ་པ་དཔལ་བཟང་པོས་འགྱུར་བའོ།།