དཔལ་ཆེན་མོ་སྒྲོལ་མའི་བསྟོད་པ་ཞེས་བྱ་བ།
ཙནྡྲགོམིན།
རྒྱ་གར་སྐད་དུ། །ཤྲཱི་མ་ཧཱ་ཏཱ་རཱ་སྟོ་ཏྲ་ན་མ། བོད་སྐད་དུ། དཔལ་ཆེན་མོ་སྒྲོལ་མའི་བསྟོད་པ་ཞེས་བྱ་བ། དཔལ་ཆེན་མོ་སྒྲོལ་མ་ལ་ཕྱག་འཚལ་ལོ། །ཞི་བའི་གྲོང་ཁྱེར་འཇུག་ལ་གྲོང་སྒོའི་མི་མོ་བཟོད་བྱས་འདྲ་བ་དང༌། །རྒྱལ་བའི་ལམ་དུ་འཇུག་ལ་དབྱིབས་ཅན་མདུན་ན་ངས་པའི་གཞུག་ལམ་ལྟ་བུ་དང༌། །ཤིན་ཏུ་བཟློག་པར་དཀའི་བའི་བདུད་ཀྱི་རྒྱུ་ལས་ཐར་མཛད་ཡང་ན་གསང་སྔགས་ལྷ། །ཁོ་བོ་བློ་གྲོས་བློན་པོ་འདིས་ནི་དཔལ་ཆེན་མོ་བསྟོད་བགྱི་བ་ཇི་ལྟ་ལགས། །གང་ཡང་རྒྱལ་སྲས་བདེ་བར་གཤེགས་པའི་རིགས་འཛིན་ས་བཅུའི་ཕ་རོལ་ཕྱིན་རྣམས་ཀྱི། །ཁྱོད་ཀྱི་ཡོན་ཏན་རིན་ཆེན་ཚོགས་ནི་གསལ་མཛད་ལྷ་རྣམས་ཀྱིས་ཀྱང་གླུ་ལེན་ཏེ། །དེ་ལྟ་ན་ཡང་གུས་པ་འབའ་ཞིག་གིས་བསྟོད་ལྷ་མོ་བདག་ལ་བཟོད་མཛོད་ཀྱེ། །མི་ཤེས་བྱིས་པ་ཡིས་ནི་རང་གི་མ་ལ་ཐལ་གྱིས་འཐོར་བ་མིན་ནམ་ཅི། །མཐའ་དག་མི་དབང་འདུས་པའི་གཙུག་གི་ནོར་བུ་རྣམས་ཀྱི་བཏུད་བྱས་འདམ་སྐྱེས་ཞབས། །གདུགས་དཀར་ཐིག་ལེ་གྱེན་དུ་འབར་ཞིང་ས་བདག་ཁྱེད་ཀྱི་འདོད་པ་ཡིས་ནི་འགྱུར། །རྣམ་རྒྱས་རྫིང་བུར་སྐྱེས་པའི་འོད་འཕྲོག་སྤྱན་གྱིས་གང་ལ་གཟིགས་གྱུར་དེ་ལ་ནི། །བཅོམ་ལྡན་གླང་ཆེན་སེང་གེའི་གདན་རྟ་ཤིང་རྟ་རྐང་ཐང་མཆོག་རྣམས་རྗེས་སུ་འགྲོ། །རང་གི་ཕྱག་གི་སྟོབས་ཀྱིས་ཉེར་སྐྱེས་རྣམ་གྲངས་ཕ་རོལ་གནོན་པས་དགྲ་རྣམས་ཐུལ། །འབར་བ་ཆེན་པོ་དཀྱིལ་འཁོར་མཆོག་གི་ཕུན་སུམ་ཚོགས་གྱུར་མི་བདག་རྣམས་ལ་ནི། །སྟེར་བར་བསྔགས་ཤིང་ངེས་འབྱེད་སྔགས་ཀྱི་ཡུལ་ལ་མི་དབང་བློན་པོའི་བློར་གྱུར་ལ། །རི་སྐྱིབས་ཟབ་མོར་ས་ཕུག་ཟབ་མོའི་གཞི་ལ་རྣལ་འབྱོར་རྣམས་ཀྱིས་འཛིན་པར་འགྱུར། །རབ་ཏུ་མྱོས་པ་པདྨའི་ཚལ་ལ་མ་ལ་ཡར་རླུང་དལ་བུས་གཡོ་ཞིང་བསྐྱོད། །འདབ་མ་རྣམས་ལ་ཕུལ་བྱུང་བུང་བའི་ཚོགས་ཀྱིས་ཉེ་བར་གླུ་ལེན་མེ་ཏོག་གི །འབྱུང་གནས་ཡ་མཚན་མཛེས་མ་ཁྱོད་ཡིན་ལྷ་མོ་ཁྱོད་ཀྱི་
བསྔགས་པ་རྣམས་ཀྱིས་ནི། །རྒྱལ་སྲིད་འབྲས་བུ་འགྲུབ་མཛད་འགྲམ་རྒྱས་རྩི་ལོགས་མྱོས་ཆུའི་མཚན་ལ་འགྲོ་།ཁྱེད་ཞབས་བཀའ་དྲིན་གྱིས་ནི་རང་དབང་ཁང་པའི་སྐྱེད་མོས་ཚལ་ལ་ཡུན་རིང་དུ། རྩེད་མོས་སྤྲོ་ལ་སྤྱན་མིག་དྲག་ཏུ་གཡོ་ཞིག་དགའ་མཆོག་རྣམས་ཀྱིས་ནི། །ཞལ་གྱི་པདྨའི་དབུགས་རླུང་གིས་བསྐྱོད་བུད་མེད་རྣམས་དང་ཉེ་བར་ལོངས་སྤྱད་ནས། །དེ་ནི་ཨ་མྲ་སར་པས་བྲན་ལས་དྲི་ཞིམ་སྦྲང་རྩི་རྣམས་ལ་འཐུང་བར་འགྱུར། །རབ་དགའི་ནགས་ལ་མེ་ཏོག་ཁུར་འཕྱང་མྱོས་པའི་སྐད་སྙན་ཁུ་བྱུག་གིས་ཁྱབ་ཅིང༌། །སྦྲང་རྩིས་མྱོས་པའི་བུང་བ་ཚོགས་པའི་དར་དིར་ལྡན་ལ་སོ་གའི་དཔལ་ཡིན་ཏེ། །འོ་མའི་རྒྱ་མཚོ་རླབས་ཕྲེང་གཡོ་བར་བཞད་གད་ཀུ་མུ་ད་ཡི་འབྱུང་གནས་དང༌། །ཤེལ་གྱིས་གཞི་བླ་ག་བ་མེད་པར་ཕུལ་བྱུང་ཟླ་བའི་ཆེ་ཤད་ཁྱེད་ཉིད་ལགས། །བཟོ་བོས་བྱས་པའི་རྩེད་མོའི་རི་རྩེར་བཀོད་པ་ཟླ་བ་ནོར་བུའི་ཆུ་རྒྱུན་ནི། བསྲུབས་པ་འཁྲུལ་འཁོར་ཆུ་སྲིན་ཁ་ནས་འཐོན་ཅིང་རྙོག་བྲལ་ལྷུང་ལྷུང་སྒྲོགས་པའི་ཆུ། །དཔྱིད་དུས་ཆང་གིས་མྱོས་ཞིང་ཚིམ་པའི་ཁུ་བྱུག་སྐད་སྙན་སྒྲོགས་པའི་ནམ་མཁའ་ལ། །ས་སྐྱོང་གིས་སྤྲུལ་ཁང་པ་དཔེ་མེད་པ་ལ་རབ་ཏུ་གནས་མཛད་ཁྱེད་ཉིད་ལགས། །གླང་ཆེན་མཆེ་བ་གཉེན་ལ་བཟོ་བོས་སྐར་ཁུར་དྲ་མིག་ལས་འཐོན་བྱ་འདབ་ལ། །གནས་ཤིང་རྣམ་པར་སྒེག་བཅས་མྱོས་པའི་ཕུར་རོ་ན་སྒྲ་སྙན་མགྲིན་པ་ནས་གྲག་སྟེ། །ནོར་བུའི་རྐང་གདུབ་མཆོག་ཏུ་འཇམ་ཞིག་སིལ་ཁྲོལ་བསྐྱོད་པ་བཙུན་མོའི་དཀྱིལ་འཁོར་དུ། །ས་སྐྱོང་དག་གི་ཁྱིམ་ལ་ཏི་སེའི་གངས་མཚུངས་ཕུན་སུམ་ཚོགས་པ་ཁྱེད་ཉིད་ལས། །ནུ་མར་ཉེར་བཞག་ལག་པ་གཅིག་གིས་སྨད་གོས་གཤེར་བ་གཡོ་བའི་མཐའ་བཟུང་སྟེ། །རྐྱལ་ཞིང་རྩེ་མོའི་བདེ་བ་ཡུན་རིང་མྱོས་ནས་ཁང་པའི་རྫིང་བུ་ནས་འཐོན་ཅིང༌། །སྐྱེ་བོ་འདྲིས་པས་སྐྲ་རྩེ་ཟླུམ་ཤིང་ཅུང་ཟད་ཟུར་མིག་ལྟ་བ་ཚ་བའི་དུས། །རི་མོ་བྲིས་འདྲའི་ཡན་ལག་མཆོག་མ་རྣམས་དང་ཉམས་དགའ་ཁྱེད་ཀྱི་མཐུ་ཡིས་སུ། །ཟླ་བའི་ཆོས་ལས་བརྡུངས་ཤིང་འཁྲུལ་འཁོར་ཁང་ཁྱིམ་རྩེ་མོའི་རི་ལས་བབ། །རབ་ཏུ་མྱོས་པའི་ནགས་ཀྱི་ཉེ་ལོགས་པདྨའི་ལྗོན་ཤིང་ཁང་པར་ས་བདག་རྣམས། །རྒྱུན་ཆད་མེད་པར་རླུང་ཡབ་དལ་བུས་གཡབས་པ་ཡིས་ནི་དབུ་སྐྲ་གཡོ་ཞིང་བསྐྱོད། །ཉི་མ་ཚ་བའི་དུས་ལ་ཁྱེད་ཀྱི་བཀའ་དྲིན་ལས་ནི་
ཉིན་ཞག་འདའ་བར་འགྱུར། །ཆུ་འབབ་སྤྲིན་ཚོགས་འབྲུག་སྒྲ་སྒྲོགས་ཤིག་རྨ་བྱའི་དཀྱིལ་འཁོར་ཀུན་ནས་སྐད་སྙན་འདོན། །འདམ་སྐྱེས་མེ་ཐོན་ལ་ནི་འཇམ་རླུང་རབ་ཏུ་གཡོ་ཤིང་གླུ་དབྱངས་ཆུ་གཏེར་དུས། །སྙན་དངགས་མཁས་པའི་དྲི་ཟས་བསྐོར་ཞིང་འཇམ་པོས་བསྣུན་པའི་གཏིང་རིང་རྔ་སྐད་ཀྱིས། ཁང་པའི་ནད་རྣམས་ཡོངས་སུ་གང་བ་ཁྱེད་འདོད་པས་ནི་རྒྱུན་དུ་ཐོས་པར་འགྱུར། །སྦྲང་རྩིའི་ཆང་གིས་མྱོས་ཤིང་རིག་འཛིན་གྲུབ་པའི་ཆུང་མའི་ཆུ་སྐྱེས་ཞལ་ལ་བཏུད་བྱས་ལས། །ལྷུང་བའི་མནྡྷ་ར་ཡི་རྡུལ་གྱི་ཀུན་ནས་མདོག་སེར་མ་པར་མཚོ་ལས་རྒྱལ། །ལྷ་ཡི་གྲོང་ཁྱེར་གཞལ་མེད་ཁང་གི་ལྷ་མོའི་སྐྱེ་བོ་དམ་འཁྱུད་སྤྲོ་བ་ལ། །ཁྱེད་ཀྱི་མཆོག་ལ་སྒྲུབ་པ་པོ་རྣམས་བདེ་ཉིད་ཉིན་རེར་རྗེས་སུ་མྱོང་བར་འགྱུར། །སྣ་ཚོགས་འགུགས་སྔགས་ཕྱག་རྒྱའི་ཚོགས་སྒྲུལ་རྡོ་རྗེའི་གུར་གྱིས་མེ་སྟག་འབར་བ་ལ། །བགེགས་ཡི་གཙོ་བོ་རྣམས་ནི་སྐྲག་ཅིང་འཇིགས་པས་རྒྱ་མཚོ་དག་ཏུ་འབྲོས་འགྱུར་ཏེ། །མྱུར་བར་བསྐྱོད་པ་གཏུམ་པོའི་ཧཱུཾ་ཡིག་སྒྲ་ཡིས་བསྣུན་པས་སྒྲ་ལྡན་ལྕགས་སྲོག་གཏོར། །ལྷ་མོ་ཁྱེད་ཀྱི་གསང་སྔགས་ཟློས་པའི་ཁང་པར་རང་ཉིད་འདུ་ཞིང་འོང་བར་འགྱུར། །གར་གནས་ཁང་སའི་སྐྱོར་ལ་གླུ་དབྱངས་འདུ་སར་རབ་བརྡུངས་གཏིང་རིང་རྔ་སྐད་ཀྱིས། །འདྲིས་ཤིང་ཡིད་འོང་གླིང་བུའི་རྗེས་འགྲོའི་སྒྲ་དབྱངས་ཉེ་བར་ལོངས་སྤྱོད་མཛད་ནས་ནི། །དེ་རྗེས་གྱ་ཚོམ་བུང་བ་མེ་ཏོག་སྙིམ་པར་གར་གྱི་ཆོ་ག་ཡིད་འཕྲོག་ལ། །རབ་ཏུ་མྱོས་མ་རྣམས་ཀྱིས་ཁྱེད་ཉིད་གར་གྱི་དཔོན་པོར་ངེས་པར་གར་གྱི་ལྷ། །རྒྱུད་ཆད་མེད་པར་ལག་པའི་རྩོལ་བའི་བྱ་བས་བསྣུན་པའི་ཡིད་འོང་རྫ་རྔའི་བཞིན། །གཡེར་ཀའི་སྒྲ་ཡིས་མྱུར་བར་རྣམ་རོལ་འདེགས་ཤིང་རྨ་བྱའི་མཇུག་སྒྲོ་རྣ་བར་བཙུགས། །རྣམ་པ་སྣ་ཚོགས་མཁས་ཤིང་ཡིད་འོང་སྣོད་ལྡན་སྐྱེ་བོས་ཡོངས་གང་ཁང་ཁྱིམ་ལ། །ཁྱེད་ལ་བརྟེན་པས་བདེ་ལྡན་གླུ་དབྱངས་བདེ་བ་ཉིད་རེར་བདེ་ལ་ལོངས་སྤྱོད་འགྱུར། །རྒྱལ་མཚན་དང་ནི་གདུགས་དཀར་སེང་གེའི་གདན་དང་གསེར་གྱི་བུམ་པ་རྔ་ཡབ་དང༌། །ཟླ་ཟེར་དཀར་བའི་བསིལ་ཁང་མགྱོགས་འགྲོའི་ཕྲེང་བ་དྲི་ཞིམ་ཆང་ལྡན་གླང་ཆེན་རྣམས། །ཁྱེད་ཀྱི་གཟུགས་བརྙན་རྟག་ཏུ་དྲན་བྱེད་བུད་མེད་དེ་ཡི་རྣ་ལུང་རིན་ཆེན་འོད། །ལྷ་མོ་ཅུང་ཟད་བཞད་པའི་
རྣམ་པས་རྣམ་པར་རྒྱལ་བ་དེ་མ་ཐག་ཏུ་འགྱུར། །སྐད་སྙན་ངང་པའི་དབྱངས་ནི་མཆོག་ཏུ་འགྱིང་འགྲོ་ནོར་བུའི་རྐང་གདུབ་སྒྲ་ཡིས་ཕམ། །འགྲམ་ལོགས་དཀྱིལ་འཁོར་འཇམ་རླུང་གིས་བདར་གཡོ་ཞིང་འཁྱིལ་པའི་སྒྲ་ཡིས་མདུད་པ་འབྱེད། །རྐེད་སྨད་མདོམས་ཀྱི་ཆ་ནི་འོད་འཕྲོའི་དོ་ཤལ་ནུ་མའི་ཁུར་བུའི་ལྗིད་ཀྱིས་དུད། །ལྷ་མོས་གནག་ལ་གཟིགས་པ་དེ་ལ་རྔ་ཡབ་དཀར་འཛིན་བུད་མེད་འདུ་བར་འགྱུར། །རྒྱུན་མི་འཆད་པར་ལྷ་མོ་ཁྱོད་ཀྱི་ཡོན་ཏན་རྗེས་དྲན་མི་སྐྱོ་གང་ཡིན་དེ། །ནོར་བུའི་རང་བཞིན་ཞལ་བའི་གཞི་མར་ཟླ་ཟེར་ལོ་འདབ་རྣམས་ལ་འགྱིང་བ་ཡིས། །ནུ་མར་ལག་གཅིག་ཉེར་གཞག་བུད་མེད་སྐྱེ་བོ་དག་གིས་བཟུང་བའི་ག་བུར་ཆུ། །ཁ་འབུས་ཨུཏྤལ་སྔོན་མོ་དྲི་ལྡན་སྦྲང་རྩི་འཐུངས་འགྱུར་མི་འཇིགས་སྦྱིན་པ་ཀྱེ། །མོ་བཙུན་རྣམས་ཀྱི་འགྲམ་པའི་ལོགས་པ་རྣ་རྒྱན་མཆོག་ཏུ་འགྱིང་ཞིང་རྒོད། །སྤྱན་མིག་ལ་ཡང་ཁྲོ་བ་སོམས་བསྐྱེད་པའི་མཆི་མའི་ཆུ་ཡིས་དབའ་རླབས་གཡོ། །མཁྲེགས་ཤིང་འབུར་བ་ནུ་མ་སོ་མའི་ཚོགས་ལ་གུར་གུམ་འདམ་གྱིས་ཁ་དོག་སེར། །རབ་རིབ་སྔོན་པོ་དབུ་སྐྲ་མེ་ཏོག་ཁ་འབུས་ཚོགས་པ་འང་མཆོག་ཏུ་དགའ་བར་འགྱུར། སྤྲུལ་བྱས་པདྨ་རཱ་གའི་སྟེགས་ལ་འགྲེ་ལྡོག་འགྱུར་བ་ལྷ་མོའི་སྐྱེ་བོ་ལས། །སྤྲུལ་ཏེ་གཅལ་བཀྲམ་མུ་ཏིག་དོ་ཤལ་གྱིས་ཁྱབ་རིན་ཆེན་ལྗོན་ཤིང་ཁང་པའི་ནང༌། །དེས་ལྷུང་མེ་ཏོག་རྡུལ་གྱིས་ཀུན་ནས་ཡོངས་བསྒོས་དགའ་བའི་ས་ཡི་དཀྱིལ་འཁོར་ལ། །བཅོམ་ལྡན་འདས་མ་ཁྱེད་ཀྱི་ཞབས་ཟུང་མཆོད་བྱེད་གང་དེ་ཡུན་རིང་གནས་པར་འགྱུར། །སྐད་ཅིག་རེ་རེར་རྔ་རིང་རྫ་རྔ་མཐའ་དག་བརྡུངས་པའི་སྒྲ་ཡིས་རྐང་པ་འགྱིང༌། །གླང་པོ་མཛངས་པའི་སྤྱི་ལ་ལག་པའི་རྣ་ལྕག་རབ་འགོད་ཕྱེད་བཙུགས་མིག །ཨ་མྲ་སར་བྲན་དྲི་ཞིམ་འབབ་ཅིང་འགྲམ་པའི་དཀྱིལ་འཁོར་དྲི་ལྡན་གླང་ཆེན་རྣམས། །བཅོམ་ལྡན་འདས་མ་མི་གང་ཡུད་ཙམ་དྲན་བྱེད་དེ་ལ་འདུ་བར་འགྱུར། །སྤྱི་བོ་ཕུག་པས་སྟེང་དུ་འབུར་ཏེ་རྣ་བའི་རྔ་ཡབ་དང་ནི་ལྕགས་ཀྱུ་གཡོ། །རྐང་པ་སྲུང་བྱེད་རྣམས་ཀྱི་རྣམ་མང་ཅ་ཅོའི་བདེ་བས་ཆུ་ཐིགས་ཟེར་མ་འཐོར། །རབ་ཏུ་རྒོལ་བའི་གླང་ཆེན་ཆང་གིས་ཁོང་འཁྲུགས་ཁྱེད་མཚན་གྲངས་པ་ལས། །གླང་པོ་མི་རྣམས་གཡུལ་འགྱེད་པ་ན་དགྲ་བོའི་སྒྲིབ་པ་རྣམས་ཀྱིས་སྒྲིབ་པར་འགྱུར། །གསེར་
གྱི་རང་བཞིན་རི་ཡི་སྐྱིབས་དང་ལྷ་ཡི་སྐྱེད་མོས་ཚལ་གྱི་ཁང་པ་དང༌། །མཇུག་སྒྲོ་རྣམ་པར་རྒྱས་པའི་རྨ་བྱ་རྩེད་མོར་གནས་པ་ས་བདག་ཁང་པ་དང༌། །ནམ་མཁའ་ཆུ་བོའི་རླབས་ཀྱིས་བྱས་པ་དྲི་མེད་རིན་ཆེན་ལྗོན་ཤིང་ཁང་པ་དང༌། །བུད་མེད་སྐྱེ་བོའི་ཞལ་གྱི་པདྨའི་འབྱུང་གནས་ལ་ཡང་གནས་མཛད་ཁྱེད་ཉིད་དོ། །པདྨའི་སྐྱོ་མ་སྦྲང་རྩིའི་ཁུ་བའི་ཆང་གི་བཏུང་བས་སྲེད་ཅིང་བསྐོར། །སྦྲང་བུའི་ཚོགས་པས་དར་དིར་མང་ལྡན་མེ་ཏོག་ཚོགས་པའི་དྲི་ཞིམ་ལྡན། །ངང་པའི་རྒྱལ་པོ་རབ་དགའི་ཚོགས་སྐྱིས་ཟོས་ཏེ་པདྨའི་གཞོན་ནུས་མཆེ་བ་གཙིགས། །པདྨའི་ལྷ་མོའི་ཟེ་འབྲུའི་རྡུལ་གྱི་མདོག་སེར་རླབས་ལྡན་ཡུན་རིང་གནས་པར་འགྱུར། །བཅོམ་ལྡན་འདས་མ་རྒྱལ་བ་དཀོན་མཆོག་ཅོད་པན་སྤྱི་བོར་ལྡན་པདྨའི་རིགས། །ཁྱོད་ཉིད་ཀུན་དོན་མཛད་པར་ལྷ་རྣམས་ཀྱིས་ཀྱང་བསྟོད་དེ་མང་པོ་སྨྲ་མོད་ཀྱི། །དེ་སླད་ལྷ་མོ་ཁྱོད་ཀྱིས་བསྟོད་པ་འདི་ཡིས་མཆོག་ཏུ་དགེ་བ་བདག་གིས་ཀྱང། །གང་ཐོབ་དེ་ཡིས་འགྲོ་བ་ཁྱད་གསོད་དབུལ་བའི་འཇིགས་པ་ཞི་བར་ཤོག །པཎྜི་ཏ་ཆེན་པོ་ཙནྟྲ་གོ་མིས་མཛད་པའི་དཔལ་ཆེན་མོ་སྒྲོལ་མའི་བསྟོད་པ་རྫོགས་སོ།། །།པཎྜི་ཏ་ཆེན་པོ་རྒྱལ་བའི་སྙན་གྱི་ཞལ་སྔ་ནས། ལོ་ཙཱ་བ་ཤཱཀྱའི་དགེ་སློང་ཉི་མ་རྒྱལ་མཚན་གྱིས་ལོ་ཙཱ་བ་བློ་གྲོས་རྒྱལ་པོས་བསྒྱུར་བ་ལས་ཅུང་ཟད་དག་པར་བྱས་སོ།།