འཕགས་མ་སྒྲོལ་མ་ལ་བསྟོད་པ།
དཱི་པཾ་ཀཱ་ར་ཤྲཱི་ཛྙཱ་ན།
རྒྱ་གར་སྐད་དུ། ཨཱཪྻ་ཏཱ་རཱ་སྟོ་ཏྲ། བོད་སྐད་དུ། འཕགས་མ་སྒྲོལ་མ་ལ་བསྟོད་པ། རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །ལྷ་དང་ལྷ་མིན་ཅོད་པན་གྱིས། །ཞབས་ཀྱི་པདྨོ་ལ་བཏུད་དེ། །ཕོངས་པ་ཀུན་ལས་སྒྲོལ་མཛད་ཅིང༌། །སྒྲོལ་མ་ལ་ནི་ཕྱག་འཚལ་ལོ། །རབ་འབར་དྲ་བས་ཁྱབ་པ་ཡི། །མནར་མེད་མེ་ཡིས་གདུངས་པ་ལ། །ཐུགས་རྗེས་བདུད་རྩིའི་ཆར་འབེབས་མ། །སྒྲོལ་མ་ལ་ཡང་ཕྱག་འཚལ་ལོ། །འགྲོ་དྲུག་གནས་སུ་ཡུན་རིང་དུ། །ཡང་དང་ཡང་དུ་འཁོར་བ་ཡིས། །དུབ་པ་དག་ལ་བདེ་ཆེན་གྱི། །བདེ་བ་མཆོག་གི་ངལ་སོ་མཛད། །གཞན་དོན་མཛད་པའི་ལྷ་མོ་ཁྱོད། །དྲན་པ་ཙམ་གྱིས་ཕོངས་སེལ་མ། །ཐུགས་རྗེ་བརྩེ་ལྡན་ཁྱོད་ཀྱིས་ནི། །སྲིད་པའི་འཆིང་བ་ལས་གྲོལ་མཛོད། །དུས་རྣམས་རྟག་ཏུ་སེམས་ཅན་ལ། །བུ་བཞིན་སྙོམས་པའི་ལྷ་མོ་ཁྱོད། །འགྲོ་བའི་ལོ་ཏོག་ཐམས་ཅད་ལ། །ཆར་རྒྱུན་འབེབས་ལ་ཕྱག་འཚལ་ལོ། །ཉི་མ་ཟླ་བ་ཇི་བཞིན་དུ། །འགྲོ་བ་སེམས་ཅན་ཐམས་ཅད་ཀྱི། །མུན་པའི་གདུང་བ་སེལ་མཛད་མ། །ལྷ་མོ་མཆོག་ལ་ཕྱག་འཚལ་ལོ། །པདྨ་ཟླ་བ་ཨུཏྤ་ལ། །དེ་བཞིན་དྲི་མེད་གདན་སྟེངས་སུ། །སྐུ་མདོག་སྔོ་ལྗང་འགྱིང་བག་ཅན། །ཨུཏྤལ་བསྣམས་ལ་ཕྱག་འཚལ་ལོ།། བསྐལ་པ་གྲངས་མེད་གསུམ་དུ་ཚོགས་བསགས་ཤིང༌། །བར་དུ་གཅོད་པའི་སྒྲིབ་པ་ཀུན་སྤངས་ནས། །བསྡུ་དངོས་བཞི་ཡིས་འགྲོ་རྣམས་སྡུད་མཛད་མ། །ཐུགས་རྗེ་དང་ལྡན་མ་ལ་ཕྱག་འཚལ་ལོ། །སྐུ་ཡི་སྐྱོན་སྤངས་མཚན་དང་དཔེ་བྱད་ལྡན། །གསུང་གི་སྐྱོན་སྤངས་ཀ་ལ་བིང་ཀའི་དབྱངས། །ཐུགས་ཀྱི་སྐྱོན་སྤངས་ཤེས་བྱ་མཐའ་དག་མཁྱེན། །བཀྲ་ཤིས་དཔལ་འབར་མ་ལ་ཕྱག་འཚལ་ལོ། །ཇི་ལྟར་ནོར་བུ་ཆུ་འདང་ལྟར། །ལྷ་མོ་ཁྱོད་ཀྱིས་རྟག་པར་ནི། །འགྲོ་བའི་སེམས་རྙོག་སེལ་མཛད་ཅིང༌། །འགྲོ་དོན་བརྩོན་ལ་ཕྱག་འཚལ་ལོ། །གང་
གིས་ཁྱོད་ཀྱི་མཚན་བཟུང་ཅིང༌། །བསྟོད་དང་བསྒྲུབ་པ་བྱས་པ་རྣམས། །རྟག་ཏུ་འབྲས་བུ་ཡོད་པར་མཛད། །མི་བསྙེལ་ཁྱོད་ལ་ཕྱག་འཚལ་ལོ། །རྗེ་བཙུན་མ་སྒྲོལ་མ་ལ་བསྟོད་པ་དཱི་པཾ་ཀཱ་ར་ཤྲཱི་ཛྙཱ་ནས་མཛད་པ་རྫོགས་སོ།། །།རྒྱ་གར་གྱི་མཁན་པོ་དེ་ཉིད་དང༌། བོད་ཀྱི་ལོ་ཙཱ་བ་ཚུལ་ཁྲིམས་རྒྱལ་བས་བསྒྱུར་བའོ།།