འཕགས་མ་སྒྲོལ་མ་ལ་བསྟོད་པ།
མ་ཏི་ཙ་ཏྲི།
རྒྱ་གར་སྐད་དུ། ཨཱཪྻ་ཏཱ་རཱ་སྟོ་ཏྲ། བོད་སྐད་དུ། འཕགས་མ་སྒྲོལ་མ་ལ་བསྟོད་པ། བཅོམ་ལྡན་འདས་ངག་གི་དབང་པོ་ལ་ཕྱག་འཚལ་ལོ། །དད་པའི་ལྟེང་ཀ་རབ་ཏུ་རྒྱས་པ་ལ། །འདུན་པ་པདྨའི་རྩ་བ་རབ་ཏུ་བརྟན། །རྩོལ་བ་དྲག་པོ་པདྨའི་གདན་ལ་བཞུགས། །རྗེ་བཙུན་སྒྲོལ་མ་ཁྱོད་ལ་ཕྱག་འཚལ་ལོ། །འགྲོ་བ་ཉོན་མོངས་ཚད་པས་གདུངས་པ་ལ། །ཐུགས་རྗེས་བསིལ་མཛད་ཟླ་བའི་གདན་ལ་བཞུགས། །འགྲོ་བ་ཉམ་ཐག་སྒྲོལ་བའི་ལྷ་མོ་སྟེ། །རྗེ་བཙུན་སྒྲོལ་མ་ཁྱོད་ལ་ཕྱག་འཚལ་ལོ། །ཚོགས་གཉིས་ཤིང་རྟའི་འཁོར་ལོ་ལྟ་བུ་ཡིས། །སྒྲིབ་གཉིས་བཅོམ་ནས་ས་བཅུར་རབ་གནས་ཏེ། །ལྷ་མོའི་ཚུལ་དུ་འཁོར་བ་མ་སྟོངས་བཞུགས། །རྗེ་བཙུན་སྒྲོལ་མ་ཁྱོད་ལ་ཕྱག་འཚལ་ལོ། །ཉོན་མོངས་མི་གཡོ་རི་ལྟར་བརྟན་པའི་སྐུ། །ཡོན་ཏན་རབ་རྫོགས་ཤ་ལུས་ཤིན་ཏུ་རྒྱས། །བྱམས་པས་ཐུགས་གཡོས་ནུ་འབུར་རྒྱས་པ་ཅན། །རྗེ་བཙུན་སྒྲོལ་མ་ཁྱོད་ལ་ཕྱག་འཚལ་ལོ། །འཁོར་བས་མགོས་སྐུ་མདོག་འགྱིང་བག་ཅན། །སྒེག་པའི་ཆ་ལུགས་རིན་ཆེན་རྒྱན་ཆ་ཅན། །དབུ་སྐྲ་སྔོ་ལྗང་རིགས་ལྔའི་
ཅོད་པན་ཅན། །རྗེ་བཙུན་སྒྲོལ་མ་ཁྱོད་ལ་ཕྱག་འཚལ་ལོ། །ཟག་མེད་བདེ་རྒྱས་ཞལ་རས་འཛུམ་བག་ཅན། །རྣམ་སྣང་ལས་བྱུང་ཕྲིན་ལས་ཐུགས་རྗེ་ཅན། །བདུད་འཇོམས་མདའ་གཞུ་ཐབས་དང་ཤེས་རབ་ཅན། །རྗེ་བཙུན་སྒྲོལ་མ་ཁྱོད་ལ་ཕྱག་འཚལ་ལོ། །འཇིགས་པ་སྐྱོབ་མཛད་ཕྱག་གཡས་སྐྱབས་སྦྱིན་ཚུལ། །འགྲོ་བའི་ཡིད་འཕྲོག་ན་ཚོད་བཅུ་དྲུག་ཚུལ། །ལས་ཀྱི་རིགས་ཚོགས་ཨུཏྤལ་སྔོན་པོའི་ཚུལ། །རྗེ་བཙུན་སྒྲོལ་མ་ཁྱོད་ལ་ཕྱག་འཚལ་ལོ། །སྐྱེ་རྒས་ན་འཆིའི་ཆུ་བོ་བཞི་པོ་ལས། །སྒྲོལ་བའི་གཉེན་པོ་མཁས་པ་ཁྱོད་ལགས་ཏེ། །བྱམས་པའི་གྲུ་འཛིན་སྙིང་རྗེའི་སྐྱ་བ་ཅན། །རྗེ་བཙུན་སྒྲོལ་མ་ཁྱོད་ལ་ཕྱག་འཚལ་ལོ། །དེ་ལྟར་ཚིགས་སུ་བཅད་པ་བརྒྱད་ཀྱིས་ནི། །ལྷ་མོ་ཉིད་ལ་དད་པས་བསྟོད་པ་ལས། །དེས་ནི་འགྲོ་བ་སེམས་ཅན་ཐམས་ཅད་ཀྱིས། །མྱུར་དུ་སངས་རྒྱས་གོ་འཕང་ཐོབ་པར་ཤོག །རྗེ་བཙུན་མ་སྒྲོལ་མ་ལ་བསྟོད་པ། སློབ་དཔོན་མ་ཏི་ཙ་ཏྲིས་མཛད་པ་རྫོགས་སོ།།